Ore i mexü̃ ga Márcu ümatüxü̃ 13

Ngechuchu nüxü̃ nixu nax Tupanapata ga taxü̃negu tá napogüexü̃

(Mt. 24.1-2; Lc. 21.5-6)

1Rü yexguma Tupanapata ga taxü̃newa ínaxũxũxgu ga Ngechuchu, rü wüxi ga norü ngúexü̃ rü ñanagürü nüxü̃: —Pa Ngúexẽxẽruxü̃ ¡dücax nimexẽchi ya daa Tupanapataarü ĩpatagü ya taxü̃negü rü naxtapü̱xarü nutagü! —ñanagürü.

2Natürü Ngechuchu nanangãxü̃, rü ñanagürü: —Pema nüxü̃ pedaugü ya guxü̃nema ya yima Tupanapataarü ĩpatagü ya taxü̃negü. Natürü pemaxã nüxü̃ chixu rü aixcüma guxü̃nema ya yima ĩpatagü rü tá nagu napogüe. Rü norü nutagü rü taxucütama nügüétü nanu, rü bai ya wüxi —ñanagürü.

Cua̱xruü̃gü tá íngugüxü̃ naxü̃pa nax nagúxü̃ i naane

(Mt. 24.3-28; Lc. 21.7-24; 17.22-24)

3-4Rü yemawena rü Oribunecüarü Ma̱xpǘne ga Tupanapata ga taxü̃nearü to̱xma̱xtawa yexmanewa naxĩ. Rü yéma narüto ga Ngechuchu. Rü Pedru rü Chantiágu rü Cuáü̃ rü André rü naxü̃tawa naxĩ nax noxrüwama nüxna nacagüexü̃ca̱x. Rü ñanagürügü: —Tanaxwa̱xe i tomaxã nüxü̃ quixu nax ñuxgu tá nangupetüxü̃ i ngẽma nüxü̃ quixuxü̃. ¿Rü ta̱xacü tá nixĩ i norü cua̱xruxü̃ i nawa nüxü̃ tacuáxü̃ ega nawa tá nanguxgu i ngẽma? —ñanagürügü.

5Rü yexguma ga Ngechuchu rü nanangãxü̃ rü ñanagürü nüxü̃: —¡Pexũãẽgü nax taxúema pexü̃ womüxẽẽxü̃ca̱x!

6Erü muxũchixü̃ i duü̃xü̃gü rü tá ínangugü, rü chauégagu ñanagürügü tá: “Choma nixĩ i Cristu”, ñanagürügü tá. Rü muxũchixü̃ i duü̃xü̃güxü̃ tá nawomüxẽxẽ.

7Rü ngẽxguma nüxü̃ pexĩnüegu nax nügü nada̱i̱xü̃ i nachixü̃anegü i ngaicamagüxü̃ rü togü i nachixü̃anegü i yáxü̃gugüxü̃, ¡rü taxũtáma ngẽmaca̱x peba̱i̱xãchiãẽgü! Erü woetama ngẽmaãcü tá nangupetü. Natürü taxũta naanearü gu̱x nixĩ i ngẽma.

8Erü wüxi i nachixü̃ane rü to i nachixü̃anemaxã tá nügü nadai. Rü wüxi ya ãẽ̱xgacüarü churaragü rü to i ãẽ̱xgacüarü churaragümaxã tá nügü nadai. Rü muxü̃ma i nachicawa rü tá naxĩã̱xãchiane. Rü tá taiya nangu̱x. Natürü guxü̃ma i ngẽma rü norü ügümare nixĩ i ngẽma ngúxü̃ i tá ínguxü̃.

9¡Rü mea pegüna pedaugü! Erü ãẽ̱xgacügüpe̱xewa tá pexü̃ nagagü, rü ngutaque̱xepataü̃gügu tá pexü̃ nicua̱i̱xgü. Rü nachixü̃anegüarü ãẽ̱xgacügüpe̱xewa tá pexü̃ nagagü naxca̱x nax chorü duü̃xü̃gü pixĩgüxü̃. Natürü ngẽmaãcü tá pexü̃́ natauxcha nax ngẽma ãẽ̱xgacügümaxã nüxü̃ pixuxü̃ i chauchiga.

10Natürü naxü̃pa nax nagúxü̃ i naane rü tá nüxü̃ nixugüe i Tupanaarü ore i guxü̃ i nachixü̃anegüwa.

11Natürü ngẽxguma ãẽ̱xgacügüpe̱xewa pexü̃ nagagügu, ¡rü taxũtáma pexoegaãẽgü naxca̱x nax ta̱xacümaxã tá penangãxü̃xü̃! ¡Rü namaxã nüxü̃ pixu i ngẽma ore i ngẽxgumatama Tupana pexna ãxü̃ nax nüxü̃ pixuxü̃ca̱x! Erü taxũtáma pema nixĩ nax pidexagüxü̃, natürü Tupanaãxẽ ya Üünecü tá nixĩ i pewa idexaxü̃.

12Rü nügüenexẽgüwa tátama ãẽ̱xgacügüxü̃tawa nügü ínayaxuaxü̃gü nax ngẽmaãcü tüxü̃ nada̱i̱xü̃ca̱x. Rü ngẽxgumarüxü̃ tá ta i papagü rü mamagü rü tá naxacügüxü̃ ínayaxuaxü̃gü. Rü nümagü i naxacügü rü tá nanatügümaxã rü naégümaxã nanue, rü tá tüxü̃ ínayaxuaxü̃gü nax ãẽ̱xgacügü tüxü̃ nada̱i̱xü̃ca̱x.

13Rü guxü̃ i duü̃xü̃gü tá pexchi naxaie naxca̱x nax chorü duü̃xü̃gü pixĩgüxü̃. Natürü yíxema ngẽmaétüwa mea Tupanaaxü̃́ yaxõõmáxẽ, rü yíxema tá tixĩ ya aixcüma nayaxúxe i maxü̃ i taguma gúxü̃.

14Rü ngẽxguma nüxü̃ peda̱u̱xgu i ngẽma ãũãchixü̃ i ãũcümaxü̃chixü̃ i chixexẽẽruxü̃ i ngextá tama ínaxwa̱xexü̃wa nax nangẽxmaxü̃, rü ngẽxguma ya yíxema Yudéaanewa ngẽxmagüxe rü tanaxwa̱xe i ma̱xpǘneanewa tabuxmü. (Rü texé ya yíxema nüxü̃ daumatüxe, rü name nixĩ i mea nagu tarüxĩnü i ngẽma.)

15Rü ngẽma ngunexü̃gu texé tümapataa̱xtüwa ngẽxmagu, rü tama name i tümapatagu tayangaxi nax ta̱xacü i tümaarü ngẽmaxü̃ tayayaxuxü̃ca̱x.

16Rü texé ya tümaanewa ngẽxmaxe rü tama name i tümapataca̱x tataegu nax tümachirugü tayayaxuxü̃ca̱x.

17Rü ngẽma ngunexü̃gügu, rü wüxi i ngechaü̃ tá nixĩ i tümaca̱x ya yíxema ngexegü ya itacharaü̃güxe rü yíxema mãĩxãcügüxe.

18¡Rü Tupanana naxca̱x peca i perü yumüxẽwa nax tama gáuane ixüyane pexü̃ nax nangupetüxü̃ca̱x i ngẽma chixexü̃!

19Erü ngẽma ngunexü̃gügu rü poraãcü tá nangẽxma i ngúxü̃ ga noxri Tupana naane ixügügumama taguma yexmaxü̃, rü ngẽmawena rü tagutáma nangẽxma.

20Rü ngẽxguma Tupana tama nanoxrexẽẽgu i ngẽma ngunexü̃gü, rü taxúetama tamaxü̃. Natürü Tupana rü marü nananoxrexẽxẽ i ngẽma ngunexü̃gü erü tüxü̃ nangechaü̃ ya yíxema noxrüxü̃ tüxü̃ nadexe.

21Rü ngẽxguma texé pexü̃ ñagügu: “Dücax, daa nixĩ ya Cristu”, ñagügu, rüe̱xna: “Gua nixĩ ya Cristu”, ñagügu, ¡rü taxṹ i nüxü̃́ peyaxõgüxü̃!

22Erü Cristunetagü rü Tupanaarü orearü uruü̃netagü tá ínangugü. Rü tá nanaxügü i muxü̃ma i cua̱xruü̃gü i taxü̃gü. Rü ngẽmaãcü, ega nüxü̃́ natauxchagu, rü tá tüxü̃ nawomüxẽẽgü woo ya yíxema duü̃xẽgü ya Tupanatama tüxü̃ dexe.

23¡Pexũãxẽgü! Erü guxü̃ma i ngẽma tá ngupetüxü̃, rü marü naxü̃pa pemaxã nüxü̃ chixu.

Ñuxãcü tá nixĩ i ngẽxguma nataeguxgu ya Tupana Nane ya duü̃xü̃xü̃ ixĩcü

(Mt. 24.29-35, 42, 44; Lc. 21.25-36)

24Natürü marü nangupetügu i ngẽma ngúxü̃gü, rü ngẽma ngunexü̃gügu rü tá nixo ya üa̱xcü rü taxũtáma inabaxi ya tauemacü.

25Rü woramacurigü rü ẽxtagü rü tá narüyi. Rü guxü̃ma i daxũwa nüxü̃ idauxü̃ rü tá naxĩã̱xãchitanü.

26Rü ngẽxguma i duü̃xü̃gü rü tá nüxü̃ nadaugü ya Tupana Nane ya duü̃xü̃xü̃ ixĩcü nax caixanexü̃gu ínaxĩxü̃ i guxü̃ma i norü poramaxã rü norü ngóonexü̃maxã.

27Rü tá nanamu i norü orearü ngeruü̃gü i daxũcüã̱x nax tüxü̃ nanutaque̱xexü̃ca̱x ya yíxema Tupana tüxü̃ idexechixe ya guxü̃wama ngẽxmagüxe ñu̱xmatáta ñoma i naane íyacuáxü̃wa nangu rü daxũguxü̃ íyacuáxü̃wa nangu.

28¡Iperüxĩnüe i ñaa ngu̱xẽẽtae i nanetü i igunecüchiga, rü naxca̱x pengúe! Rü ngẽxguma ngexwaca̱xü̃xü̃ i nachacüüxacügü iyarüyixgu rü naxüátügu, rü ngẽmawa nüxü̃ pecua̱x nax paxa tá taunecü yixĩxü̃.

29Rü ngẽxgumarüxü̃ ta, rü ngẽxguma nüxü̃ peda̱u̱xgu nax nangupetüxü̃ i ngẽma pemaxã nüxü̃ chixuxü̃, rü ngẽmawa tá nüxü̃ pecua̱x nax paxa tá ínanguxü̃ ya Tupana Nane ya duü̃xü̃xü̃ ixĩcü.

30Rü guxü̃ma i ngẽma ñu̱xma pemaxã nüxü̃ chixuxü̃ rü aixcüma tá nangupetü naxü̃pa nax nayuexü̃ i ngẽma duü̃xü̃gü i ñu̱xma maxẽxü̃.

31Dauxü̃guxü̃ i naane rü ñoma i naane rü tá inayarüxo. Natürü chorü ore rü tagutáma inayarüxo, rü aixcüma tá ningu.

32Natürü ngẽma ngunexü̃ rü ngẽma ora i nagu tá ínanguxü̃ i ngẽma pemaxã nüxü̃ chixuxü̃, rü Tanatü ya Tupanaxicatama nixĩ ya nüxü̃ nacuácü i ñuxgu tá ínanguxü̃ i ngẽma, rü taxúema ya togue nüxü̃ tacua̱x. Rü woo i norü orearü ngeruü̃gü i daxũcüã̱x rü tama nüxü̃ nacua̱xgü, rü woo ya Tupana Nane ya duü̃xü̃xü̃ ixĩcü rü tama nüxü̃ nacua̱x nax ñuxgu tá ínanguxü̃ i ngẽma.

33Rü ngẽmaca̱x, ¡ipedaue rü pexuãẽgü! Erü tama nüxü̃ pecua̱x i ta̱xacürü ora tá ínangu i ngẽma pemaxã nüxü̃ chixuxü̃.

34Rü guxü̃ma i ngẽma pemaxã nüxü̃ chixuxü̃, rü ñoma wüxi ga yatü ga ixũãchichaü̃cü nax to ga nachixü̃anewa naxũxü̃ca̱xrüxü̃ nixĩ. Rü yemaca̱x norü puracütanüxü̃na naxãga nax mea nüxna nadaugüxü̃ca̱x ga gumá napata. Rü ñu̱xũchi wüxichigüna nanaxã ga norü puracü. Rü yema ĩã̱xarü dauruxü̃ rü nagu nanamu nax mea nadauxü̃taegüxü̃ca̱x.

35-36¡Rü ngẽmaca̱x i pema rü name nax ípexuãxẽgüxü̃! Erü tama nüxü̃ pecua̱x i ñuxgu tá ínangu ya yimá cori ya ĩpataarü yora, rü bexmana noxri nachütagu, rüe̱xna ngãxü̃cüügu, rüe̱xna ota ícaxgu, rüe̱xna noxri yangóonegu. ¡Rü ngẽmaca̱x ipedaue nax ngürüãchi ínanguxgu tama ípepeeyane pexü̃ nax íyanguéü̃xü̃ca̱x!

37Rü ngẽma ore i pemaxã nüxü̃ chixuxü̃, rü guxü̃ i duü̃xü̃güca̱x nixĩ. ¡Rü ipedaueecha! —ñanagürü.

Currently Selected:

Ore i mexü̃ ga Márcu ümatüxü̃ 13: tcaP

Highlight

Copy