Maraquía 3
3
Tupana rü tá nanapoxcue i ngẽma chixexü̃ ügüxü̃
1Nüma ya Cori ya Guxãétüwa Ngẽxmacü rü ñanagürü pexü̃: —Choma rü chaugüpe̱xe tá chayamu i chorü orearü ngeruxü̃ nax yoxni chauxü̃pa nügü íyamexẽẽgüxü̃ca̱x i chomaxü̃. Rü yimá Cori ya naxca̱x peda̱u̱xcü rü ngürüãchi tá napata ya taxü̃negu naxücu. Rü ngẽmaãcü tá ínangu ya yimá perü maxẽxẽẽruxü̃ ga Tupana nüxü̃ ixucü ga yexguma perü o̱xigümaxã inaxunetagu —ñanagürü.
2¿Natürü texé tá namaxã tapora ya yimá Cori i ngẽma ngunexü̃ i nagu ínanguxü̃? ¿Rü texé tá nape̱xegu tachiama? Erü ngẽxguma ínanguxgu rü ñoma wüxi i üxüemaãcü tá ínangu nax yamexẽẽgüãxü̃ca̱x i tórü maxü̃. Rü ñoma wüxi ya chaũrüxü̃ tá inanayi̱xẽxẽ i guxü̃ma i tórü ãũãchixü̃.
3Rü nüma ya Cori rü tá ínarüto nax ínapigüãxü̃ca̱x i norü chixexü̃ i ngẽma chacherdótegü i Lebítanüxü̃, ñoma diẽrumü rü úiru norü üxaxü̃ca̱x üxüwa iguxü̃rüxü̃. Rü ngẽmawena rü tá marü name i ngẽma chacherdótegü nax Cori ya Tupana naxwa̱xexü̃ãcü ngéma nape̱xewa nangegüãxü̃ i norü ãmaregü.
4Rü ngẽxguma i nüma ya Cori ya Tupana rü tá namaxã nataãxẽ i ngẽma Yudátanüxü̃arü ãmaregü rü Yerucharéü̃cüã̱xarü ãmaregü yexguma noxri duü̃xü̃güarü ãmaregümaxã nataãẽgurüxü̃.
5Rü nüma ya Cori ya Tupana ya Guxãétüwa Ngẽxmacü rü ñanagürü: —Choma rü tá aixcüma pexna chaca i perü chixexü̃ca̱x. Rü chomatátama nüxü̃ chixugüe i ngẽma yuüexü̃, rü ngẽma nai i ngexü̃maxã maxẽxü̃, rü ngẽma doramaxã nügü ípoxü̃xü̃, rü ngẽma norü puracütanüxü̃maxã rü ngẽma yutegüxemaxã, rü ngẽma taxcutagümaxã chixri icua̱xgüxü̃. Rü ngẽxgumarüxü̃ tá ta nüxü̃ chixugüe i ngẽma chixri tümamaxã icua̱xgüxü̃ ya duü̃xẽgü ya to i nachixü̃anecüã̱xgü, rü ngẽma tama chauga ĩnüexü̃ —ñanagürü.
Ngẽma diésmu rü ãmaregü i Tupanaarü ixĩxü̃
6Rü ñanagürü: —Choma nixĩ ya Cori ya Tupana chixĩxü̃. Rü taguma naxüchicüxü i chorü uneta. Rü ngẽmaca̱x i pemax, Pa Acóbutanüxü̃x, rü tama iperüxo.
7Pema rü chorü mugüna pixĩgachitanü, yema nũxcümaü̃xü̃ ga perü o̱xigü choxna ixĩgachixü̃rüxü̃. Rü tama naga pexĩnüechaü̃ i ngẽma chorü mugü. Rü ñu̱xma i chomax i Cori ya Tupana ya Guxãétüwa Ngẽxmaxe rü ñachagürü pexü̃: “¡Cha̱u̱xca̱x pewoegu! Rü choma rü tá pexca̱x chataegu”, ñachagürü. Natürü i pemax rü ñaperügügü: “¿Ta̱xacüca̱x chi i cuxca̱x tawoeguxü̃?” ñaperügügü.
8Rü ñu̱xma i choma rü pexna chaca: “¿Ẽ̱xna namexü̃ yixĩxü̃ i wüxi i duü̃xü̃ rü choxü̃́ nangĩ́xü̃? Rü dücax i pemax, rü aixcüma nixĩ i choxü̃́ pengĩ́exü̃. Rü ngẽxguma rü ta rü ípecagüamaxü̃ rü ñapegügüxü̃: ‘¿Rü ta̱xacüwa i cuxü̃́ tangĩ́exü̃?’ ñapegügüxü̃. Rü dücax, rü choxü̃́ pengĩ́e nawa i ngẽma diésmugü rü ãmaregü i choxrü ixĩxü̃.
9Rü guxãma i pema i ñaa nachixü̃anecüã̱xgü rü choxü̃́ pengĩ́e, rü ngẽmaca̱x tá chixexü̃ pemaxã chaxuegu. Rü choma i Cori ya Tupana ya Guxãétüwa Ngẽxmaxe nüxü̃ chixu i ngẽma.
10¡Rü chopata ya taxü̃nearü diẽruchixü̃gu peyaxǘ i ngẽma diẽru i choxrü ixĩxü̃! Rü ngẽmaãcü tá nangema i õna i chopatawa. ¡Rü dücax, choxü̃ pexü̱x! Rü ngẽmaãcü tá nüxü̃ pedau nax dauxü̃guxü̃ i naanearü beü̃tána chiwãxnaxü̃ rü peaneétügu chanapuxẽẽxü̃ ya pucü.
11Rü penetü rü tá mea nixo erü choma tá nüxna chadau nax taxuxü̃táma i naweane rü da̱xaweane nachixexẽẽxü̃ i ngẽma penetügüarü o rü perü úbanecügu.
12Rü guxü̃táma i ngẽma togü i nachixü̃anegü rü tá pexü̃ nixuchigagü nax ípetaãẽgüxü̃ erü pemax rü tá pexü̃́ nangẽxma i wüxi i nachixü̃ane i mexẽchixü̃”. Rü choma i Cori ya Tupana ya Guxãétüwa Ngẽxmaxe nüxü̃ chixu i ngẽma —ñanagürü.
Tupanaaxü̃́ nangechaü̃tümüxü̃ i norü duü̃xü̃gü
13Rü nüma ya Cori ya Tupana rü ñanagürü: —Pemax rü poraãcü chixexü̃ chomaxã pixugüe. Rü ngẽxguma rü ta ípecaama rü ñaperügügü: “¿Ta̱xacürü chixexü̃ nixĩ i cumaxã tixugüxü̃?” ñapegürügü.
14Rü ñaa nixĩ i ngẽma nüxü̃ pixuxü̃: “Taxuwama name i Tupanaaxü̃́ nax ipuracüexü̃. ¿Rü ta̱xacürü mexü̃ tayaxu i ngẽxguma naxü̱xgu i ngẽma nüma tüxü̃ namuxü̃? ¿Rü ta̱xacüwa tüxü̃́ name nax ingechaü̃güxü̃ ega ta̱xacürü chixexü̃ ixügügu nape̱xewa ya Cori ya Tupana ya Guxãétüwa Ngẽxmacü?
15Rü yixema rü nüxü̃ tadau i ngẽma duü̃xü̃gü i nügü írütagüxü̃ rü nataãẽgü. Rü ngẽma chixexü̃arü üruü̃gü rü guxü̃ma i ta̱xacü i naxügüxü̃wa rü mea nüxü̃́ ínanguxuchi. Rü woo Tupanaxü̃ naxügügu rü taxuxü̃ma i poxcu naxca̱x ínangu”, ñaperügügü —ñanagürü ga Tupana.
16Natürü yema duü̃xü̃gü ga Tupanaga ĩnüexü̃ rü wüxichigü namücümaxã nidexa ga Cori ya Tupanachiga. Rü nüma ga Cori ya Tupana rü inarüxĩnü ga yema nüxü̃ yaxugüxü̃. Rü Tupanape̱xewa rü wüxi ga poperagu nanaxümatü ga naéga ga yema duü̃xü̃gü ga naga ĩnüexü̃ rü namaxã taãẽgüxü̃.
17Rü nüma ya Cori ya Tupana ya Guxãétüwa Ngẽxmacü rü ñanagürü: —Choma rü íchanamexẽxẽ i wüxi i ngunexü̃ i nagu tá cha̱u̱xca̱x nawoeguxü̃ nax wena chorü duü̃xü̃gü yixĩgüxü̃ca̱x i Iraétanüxü̃. Rü ñoma wüxi i papa i nane i nüxü̃́ puracüxü̃xü̃ ngechaü̃xü̃rüxü̃, rü ngẽmaãcü tá choxü̃́ nangechaü̃tümüxü̃gü.
18Rü ngẽxguma i pemax rü tá nüxü̃ picua̱xãchitanü nax tama nawüxiguxü̃ i ngẽma mexü̃ ügüxü̃ namaxã i ngẽma chixexü̃ ügüxü̃. Rü ngẽxgumarüxü̃ ta i ngẽma choxü̃ icua̱xüü̃güxü̃ rü tama namaxã nawüxigu i ngẽma tama choxü̃ icua̱xüü̃güxü̃ —ñanagürü ya Tupana.
Currently Selected:
Maraquía 3: tcaP
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.