Ore i mexü̃ ga Luca ümatüxü̃ 20
20
Ngechuchuna nacagü nax texéarü oregagu Tupanapatawa nangu̱xẽxẽtaexü̃
(Mt. 21.23-27; Mr. 11.27-33)
1Wüxi ga ngunexü̃ ga yexguma Ngechuchu Tupanapata ga taxü̃newa duü̃xü̃güxü̃ íngúexẽẽgu namaxã ga Tupanaarü ore, rü yexgumayane yéma nangugü ga chacherdótegüarü ãẽ̱xgacügü, rü ngúexẽẽruü̃gü ga Moichéarü mugüwa ngu̱xẽẽtaegüxü̃, rü Yudíugüarü ãẽ̱xgacügü.
2Rü Ngechuchuxü̃ ñanagürügü: —¿Texéarü mugagu nixĩ i cunaxüxü̃ i ngẽma núma cuxüxü̃? ¿Rü texé cuxü̃ tamu nax cunaxüxü̃ca̱x i ngẽma? —ñanagürügü.
3Rü yexguma ga Ngechuchu rü ñanagürü nüxü̃: —Choma rü tá ta pexna chaca, rü chanaxwa̱xe i choxü̃ pengãxü̃gü.
4¿Rü texé tanamu ga Cuáü̃ nax duü̃xü̃güxü̃ ínabaiü̃ẽẽxü̃ca̱x? ¿Pexca̱x rü Tupana yixĩxü̃ ga namucü rü ẽ̱xna duü̃xü̃gümare? —ñanagürü.
5Rü yexguma ga yema nüxna cagüxü̃ rü inanaxügüe ga nügümaxã nax yaporagatanücüüxü̃. Rü nügümaxãtama ñanagürügü: —¿Ñuxũ ñagügüxü̃ tá? Erü ngẽxguma chi: “Tupana núma nanamu”, ñagügu, rü nüma rü chi ñanagürü tüxü̃: “¿Rü tü̱xcüü̃ ga tama nüxü̃́ peyaxõgüxü̃?” ñanagürü chi tüxü̃.
6Rü ngẽxguma chi ñagügu: “Yatügümare nua nanamu”, ñagügu, rü nüma i duü̃xü̃gü chi nutamaxã tüxü̃ ínamuxũchigü rü tüxü̃ chi nadai. Erü guxü̃ma i duü̃xü̃gü rü nüxü̃ nacua̱xgü nax Tupana yixĩxü̃ ga Cuáü̃xü̃ mucü —ñanagürügü
7Rü Ngechuchuxü̃ nangãxü̃gü rü ñanagürügü: —Tama nüxü̃ tacua̱x nax texé núma namuxü̃ ga Cuáü̃ ga baiü̃ẽẽruxü̃ —ñanagürügü.
8Rü yexguma ga Ngechuchu rü ñanagürü nüxü̃: —Choma rü ta taxũtáma pemaxã nüxü̃ chixu nax texé choxü̃ muxü̃ nax chanaxüxü̃ca̱x i ngẽma choxna naxca̱x pecaxü̃ —ñanagürü.
Ore ga puracütanüxü̃ ga ichixexü̃chiga
(Mt. 21.33-44; Mr. 12.1-11)
9Rü inanaxügü ga Ngechuchu ga duü̃xü̃gümaxã nax yadexaxü̃. Rü ñaa ore ga cua̱xruxü̃xü̃ namaxã nixu, rü ñanagürü: —Nayexma ga wüxi ga yatü ga wüxi ga úbanecü ücü ga norü naanewa. Rü ñu̱xũchi ñuxre ga puracütanüxü̃na nanaxã nax nüxna nadaugüxü̃ca̱x rü yixcama norü yoramaxã nax yayauxyegüãxü̃ca̱x ga yema norü o. Rü ñu̱xũchi ga gumá yatü rü tóxnamana naxũ rü tama paxa nataegu.
10Rü yexguma nawa nanguxgu nax yadauxü̃ ga yema úbagü, rü gumá yatü rü yema puracütanüxü̃xü̃tawa nanamu ga wüxi ga norü duü̃xü̃ nax naxca̱x íyaca̱xaxü̃ca̱x ga yema úbagü ga nüxna üxü̃. Natürü yema puracütanüxü̃ rü nanacua̱i̱xgü ga gumá yatüarü duü̃xü̃, rü taxuxü̃ma ga úba nüxna naxãgü. Rü yemaacü ínayamugü.
11Rü yexguma ga gumá yatü rü wenaxarü to ga norü duü̃xü̃ yéma ta namu. Natürü ga yema puracütanüxü̃ rü chixexü̃ namaxã nixugüe, rü nanacua̱i̱xgü, rü taxuxü̃ma ga úba nüxna naxãgü. Rü yemaacü ínayamugü.
12Rü wenaxarü to ga norü duü̃xü̃ yéma namu ga gumá yatü. Natürü ga yema puracütanüxü̃ rü nanapi̱xẽxẽ, rü ínanata̱xüchigü ga yema naanewa.
13Rü düxwa ñanagürü ga gumá naanearü yora: “¿Ta̱xacü tá chaxüxü̃ i ñu̱xmax? Rü name nixĩ i chaune ya nüxü̃ changechaü̃cü ngéma chanamu. Rü ngẽxguma nüxü̃ nadaugügu rü bexmana naga tá naxĩnüe”, ñanagürü.
14Natürü ga yema puracütanüxü̃ rü yexguma gumá yatü nanexü̃ nadaugügu, rü nügümaxã ñanagürügü: “Ñaaarü tá nixĩ i ñaa naane i yixcama. ¡Rü ngĩxã tayama̱xgü nax tóxrü nax yixĩxü̃ca̱x!” ñanagürügü.
15Rü ínanata̱xüchigü ga yema naanewa, rü nayama̱xgü —ñanagürü ga Ngechuchu. Rü yexguma ga Ngechuchu rü duü̃xü̃güna naca, rü ñanagürü: —¿Ta̱xacü tá ngẽma puracütanüxü̃maxã naxü i ngẽma naanearü yora i ñu̱xmax?
16Rü ngéma tá naxũ rü tá nanadai i ngẽma puracütanüxü̃, rü togüna tá nanaxã i norü naane —ñanagürü ga Ngechuchu. Rü yexguma yemaxü̃ naxĩnüegu ga duü̃xü̃gü rü ñanagürügü: —Chierüx Tupana toxü̃ ípoxü̃ nax tama toxü̃ naxüpetüxü̃ca̱x i ngẽma —ñanagürügü.
17Natürü Ngechuchu rü nüxü̃ nadawenü, rü ñanagürü nüxü̃: —¿Natürü ñuxũ ñaxü̃chiga nixĩ i ngẽma Tupanaarü ore i ümatüxü̃ i ñaxü̃?:
“Yimá nuta ya ĩarü üruü̃gü nüxü̃ oechirécü,
rü ñu̱xma rü yimátama nuta nixĩ ya nüxíra yaxǘcuchigüãcü i ngẽma ĩpataarü üruü̃gü”,
—ñaxü̃.
18Rü ñanagürü ta ga Ngechuchu: —Texé ya yimá nutaétügu nguxe, rü tá itapoü̃gü. Rü yíxema tümaétügu nanguxe ya yimá nuta, rü tá tüxü̃ niñaĩxmü —ñanagürü ga Ngechuchu.
19Rü nüma ga yema chacherdótegüarü ãẽ̱xgacügü rü ngúexẽẽruü̃gü ga Moichéarü mugüwa ngu̱xẽẽtaegüxü̃, rü yexgumatama Ngechuchuxü̃ niyauxgüchaü̃. Yerü nüxü̃ nacua̱xgü ga nachiga nax yixĩxü̃ ga yema ore ga cua̱xruxü̃ ga nüxü̃ yaxuxü̃. Natürü tama nayayauxgü, yerü duü̃xü̃güxü̃ namuü̃e.
Ãẽ̱xgacüna üxü̃ i diẽruchiga
(Mt. 22.15-22; Mr. 12.13-17)
20Rü yema chacherdótegüarü ãẽ̱xgacügü rü Ngechuchuxü̃tawa nanamugü ga ñuxre ga norü duü̃xü̃gü nax mexü̃ ga duü̃xü̃gürüxü̃ yéma iyanaxĩnüẽxü̃ca̱x ga norü ngu̱xẽẽtae, natürü naxca̱x nax nadaugüxü̃ca̱x nax norü ngu̱xẽẽtaegagu nachixü̃anearü ãẽ̱xgacüxü̃tawa Ngechuchuxü̃ ínaxuaxü̃güxü̃ca̱x.
21Rü yemaca̱x Ngechuchuna nacagü rü ñanagürügü: —Pa Ngúexẽxẽruxü̃, toma nüxü̃ tacua̱x rü aixcüma nixĩ i ngẽma nüxü̃ quixuxü̃ rü ngẽma namaxã cungúexẽẽtaexü̃. Rü tama duü̃xü̃arü düxétüxü̃negu cudawenü erü nacüma nixĩ i cungugüxü̃. Rü aixcüma cunangúexẽxẽ i duü̃xü̃gü nax Tupana naxwa̱xexü̃ãcüma namaxẽxü̃ca̱x.
22Rü dücax, ngẽma diẽru i ãẽ̱xgacü ya Rómacüã̱x naxwa̱xexü̃ nax tanaxütanüxü̃, ¿rü namexü̃ yixĩxü̃ nax nüxü̃́ tanaxütanüxü̃ rü ẽ̱xna tama? —ñanagürügü.
23Natürü Ngechuchu nüxü̃ nacua̱xama nax chixexü̃gu naxĩnüexü̃ ga yema duü̃xü̃gü, rü yemaca̱x ñanagürü nüxü̃: —¿Tü̱xcüü̃ i chixexü̃gu choxü̃ pengu̱xẽẽchaü̃?
24¡Choxü̃ ngĩxü̃ pewé i wüxi i diẽru nax ngĩxü̃ chadauxü̃ca̱x! ¿Rü texéchicüna̱xã rü texééga ngĩgu üxü̃? —ñanagürü. Rü nanangãxü̃gü rü ñanagürügü: —Rómacüã̱x ya ãẽ̱xgacü ya tacüchicüna̱xã nixĩ —ñanagürügü.
25Rü yexguma ga Ngechuchu rü ñanagürü nüxü̃: —¡Ãẽ̱xgacüna ngĩxü̃ pexã i ngẽma ãẽ̱xgacüarü ixĩcü, rü Tupanana ngĩxü̃ pexã i ngẽma Tupanaarü ixĩcü! —ñanagürü.
26Rü yema Ngechuchuarü ngu̱xẽẽtae ga duü̃xü̃gümaxã nüxü̃ yaxuxü̃wa rü taxuxü̃ma ga chixexü̃ inayangaugü nax yemagagu yayaugüãxü̃ca̱x. Rü yexguma nüxü̃ naxĩnüegu ga norü ngãxü̃ga rü naba̱i̱xãchiãẽgü rü narüngea̱xgümare.
Chaduchéugü rü Ngechuchuna nacagüe rü aixcüma wena tá namaxẽ i yuexü̃gü
(Mt. 22.23-33; Mr. 12.18-27)
27Rü Ngechuchuxü̃tawa ínayadaugü ga ñuxre ga Chaduchéugü. Rü nümagü rü tama nayaxõgü nax wena namaxẽxü̃ i yuexü̃. Rü yemaca̱x Ngechuchuxü̃ ñanagürügü:
28—Pa Ngúexẽxẽruxü̃, Moichéarü mugüwa rü ñanagürü:
“Ngẽxguma wüxi ya yatü naxma̱x ngexacüyane nayu̱xgu, rü name nixĩ i naenexẽtama ngĩmaxã naxãxma̱x i ngẽma yutecü i naxüma̱x,
nax ngẽmaãcü naxãxacüxü̃ca̱x nüxü̃́ ya naenexẽ ya marü yucü”,
—ñanagürü i ngẽma ore.
29Rü ñanagürügü ta ga Chaduchéugü: —Nayexma ga 7 ga nügüenexẽ. Rü naxãxma̱x ga gumá yacü, natürü tauta naxãxacüyane nayu.
30Rü yexguma nai ga naenexẽ nüxĩ́ ngĩmaxã naxãxma̱x ga yema ngecü. Rü gumá rü ta nayu, rü nangexacüyane.
31Rü yexguma rü nai ga naenexẽ nüxĩ́ ngĩmaxã naxãxma̱x. Rü yemaacü guxcüma ga gumá 7 ga nügüenexẽgü rü ngĩmaxã naxãxma̱x ga yema nge. Rü guxcüma nayue tauta naxãxacüyane.
32Rü ngĩma rü ta düxwa iyu ga yema nge.
33Rü ngẽxguma yuexü̃ wena maxẽgu, ¿rü ngecürüücü naxma̱x tá iyixĩ i ngẽma nge? Yerü yexguma namaxẽgu rü guxcüma ga gumá 7 ga nügüenexẽ ngĩmaxã naxãxma̱x —ñanagürügü.
34Rü yexguma ga Ngechuchu rü nanangãxü̃ rü ñanagürü: —Ñoma i naanewa rü yatügü rü nixãma̱xgü rü ngexü̃gü rü nixãtegü.
35Natürü ngẽma duü̃xü̃gü i Tupanape̱xewa mexü̃ nax wena namaxẽxü̃ nax daxũguxü̃ i naanewa naxĩxü̃ca̱x rü ngéma rü taxũtáma nixãma̱xgü rü ẽ̱xna nixãtegü.
36Erü ngéma rü tagutáma nayue. Rü daxũcüã̱x i Tupanaarü orearü ngeruü̃gürüxü̃ tá nixĩgü. Rü aixcüma Tupanaxacügü tá nixĩgü erü yuwa ínarüdagü.
37Rü yema ore ga naixacüchigawa rü Moiché tüxü̃ nüxü̃ nacua̱xẽxẽ rü yuexü̃ rü tá wena nax namaxẽxü̃. Erü yema orewa, rü ñanagürü ga Cori ga Tupana:
“Choma nixĩ i Abraáü̃arü Tupana, rü Ichaáarü Tupana, rü Acóbuarü Tupana”,
ñanagürü.
38Rü ngẽmawa nüxü̃ tacua̱x rü Tupana rü tama yuexü̃arü Tupana nixĩ, erü Tupanaca̱x rü guxü̃ma namaxẽ —ñanagürü.
39Rü yexguma ga ñuxre ga ngúexẽẽruü̃gü ga Moichéarü mugüwa ngu̱xẽẽtaegüxü̃ rü ñanagürügü: —Aixcüma meama nüxü̃ quixu, Pa Ngúexẽxẽruxü̃ —ñanagürügü.
40Rü yemawena rü marü namuü̃e nax ta̱xacüca̱x Ngechuchuna nacagüexü̃.
¿Texé nane nixĩ ya Cristu?
(Mt. 22.41-46; Mr. 12.35-37)
41Rü Ngechuchu rü duü̃xü̃güna naca rü ñanagürü nüxü̃: —¿Tü̱xcüü̃ duü̃xü̃gü nüxü̃ nixugüe rü Cristu rü nũxcümaü̃cü ga ãẽ̱xgacü ga Dabítaxa nixĩ?
42-43Yerü nüma ga Dabí rü Wiyaegüarü poperawa ñaaãcü nanaxümatü:
“Cori ya Tupana rü chorü Corixü̃ ñanagürü:
‘¡Nua chorü tügünecüwawa rüto,
ñu̱xmatáta cuxme̱xwa chanangẽxmagüxẽxẽ i curü uanügü nax namaxã icucuáxü̃ca̱x!’ ”
—ñanagürü.
44Rü ñanagürü ga Ngechuchu: —¿Ñuxũcürüwa i Dabítaxa yixĩxü̃ ya Cristu ega nümatama ga Dabí rü norü Corimaxã naxuãgu? —ñanagürü.
Ngechuchu nüxü̃ nixu nax nügü ínamegünetaxü̃ ga yema ngúexẽẽruü̃gü ga Moichéarü mugüwa ngu̱xẽẽtaegüxü̃
(Mt. 23.1-36; Mr. 12.38-40; Lc. 11.37-54)
45Rü guxü̃ma ga duü̃xü̃gü rü yéma inarüxĩnüe ga yexguma Ngechuchu norü ngúexü̃güxü̃ ñaxgu:
46—¡Pexũãẽgü naxca̱x i ngẽma ngúexẽẽruü̃gü i Moichéarü mugüwa ngu̱xẽẽtaegüxü̃! Erü nümagü rü norü me nixĩ i mexü̃ i naxchirumaxã nax naxĩaneãxü̃. Rü ĩanearü plazagüwa nanaxwa̱xegü nax duü̃xü̃gü mea nüxü̃ rümoxẽgüxü̃. Rü ngutaque̱xepataü̃güwa rü norü me nixĩ i ngẽma nape̱xewa ügüxü̃ ga naxmaxwe̱xewa nax natogüxü̃. Rü õna i taxü̃wa rü ngẽma õnaarü yoraxü̃tawa ügüxü̃ i nachicaca̱x nadaugü.
47Rü tüxü̃ nawomüxẽẽgüãcüma tüxna nanapuxü̃ ya tümapatagü ya yíxema yutegüxe. Rü ñu̱xũchi nanama̱xẽxẽ i norü yumüxẽgü nax duü̃xü̃gü nagu rüxĩnüexü̃ca̱x nax aixcüma mexü̃gü yixĩgüxü̃. Natürü nümagü tá nixĩ i yexeraãcü napoxcuexü̃ —ñanagürü.
Currently Selected:
Ore i mexü̃ ga Luca ümatüxü̃ 20: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.