Popera ga Yudíugü ga yaxõgüxü̃ca̱x ümatüxü̃ 10

1Rü ngẽma mugü ga Moiché ümatüxü̃ rü naxchipetamare nixĩ i ngẽma mexü̃gü i yixcüra tá íngugüxü̃, natürü tama ngẽma mexü̃güxüchi nixĩ. Rü ngẽmaca̱x woo duü̃xü̃gü gucü ya taunecügügu Tupanaca̱x nanadaíxü̃ i naxü̃nagü nax ngẽmaãcü Tupanana nangaicamagüxü̃ca̱x, natürü ngẽma mugü rü tama napora nax Tupanape̱xewa yamexẽẽãxü̃ca̱x i ngẽma duü̃xü̃güarü maxü̃.

2Rü yexguma chi yema mugü aixcüma yema duü̃xü̃güxü̃ imexẽẽgu ga Tupanape̱xewa, rü taxũchima nagu narüxĩnüeecha nax yapecaduã́xü̃, rü chi nüxü̃ narüxoe nax naxü̃nagü Tupanaca̱x nada̱i̱xü̃.

3Natürü yema nax Tupanaca̱x nadaiaxü̃ ga naxü̃nagü, rü wüxichigü ga taunecügu duü̃xü̃güarü pecaduarü cua̱xãchixẽẽruü̃mare nixĩ.

4Yerü gumá nagü ga yema wocagü ga iyatüxü̃ rü chíbugü rü tama napora nax iyanaxoxẽẽãxü̃ca̱x ga pecadugü.

5Rü yemaca̱x ga Cristu ga yexguma ñoma ga naanewa naxũxgu, rü Tupanaxü̃ ñanagürü:

“Tama cunaxwa̱xe nax ãmaregü i naxü̃nagü cuxca̱x nada̱i̱xü̃ nax naxütanügüãxü̃ca̱x i pecadugü.

Natürü choxna cunaxã i wüxi i chaxune nax ngẽma ichaxãxü̃ca̱x.

6Rü tama namaxã cutaãxẽ i ngẽma ãmaregü i naxü̃nagü i cuxca̱x nada̱i̱xü̃ rü yagugüxü̃ nax naxütanügüãxü̃ca̱x i pecadugü.

7Rü yemaca̱x rü ñacharügü:

‘Pa Chaunatüx, daxe chixĩ, rü nua cupe̱xewa changexma nax chanaxüxü̃ca̱x i curü ngúchaü̃, ngẽma curü orewa chauchiga naxümatüxü̃rüxü̃’, ñachagürü”.

8Rü nüma ga Cristu rü yema nüxíra nüxü̃ yaxuxü̃ ga dexawa rü ñanagürü:

“Tupana rü tama namaxã nataãxẽ ga yema nacüma nax naxca̱x nadaiaxü̃ ga naxü̃nagü rü naxca̱x yagugüãxü̃ nax yemaacü naxütanügüãxü̃ca̱x ga pecadugü, woo yema mugü ga Moiché ümatüxü̃wa rü duü̃xü̃güxü̃ namu nax naxügüãxü̃ ga guxü̃ma ga yema”,

ñanagürü.

9Rü yemawena ga Cristu, rü ñanagürü ta:

“Pa Chaunatüx, daxe chixĩ, rü nua cupe̱xewa changexma nax chanaxüxü̃ca̱x i curü ngúchaü̃”,

ñanagürü. Rü ngẽmawa nüxü̃ tacua̱x nax Tupana rü marü iyanaxoxẽẽxü̃ i ngẽma nuxíraxü̃xü̃ i mu ga Moiché ümatüxü̃, nax yaxǘcuchiãxü̃ca̱x i ngẽma ngexwaca̱xü̃xü̃ i uneta.

10Rü ñu̱xma rü Cristugagu Tupanape̱xewa time, yerü nüma ga Cristu rü Tupanaarü ngúchaü̃ naxü ga yexguma nügü inaxãxgu nax curuchagu nayuxü̃ca̱x. Rü nüma rü wüxicanatama pecaduarü ütanüca̱x nayu rü taxuca̱xma tü̱xcüü̃ wena nügü inaxã.

11Rü guxü̃ma i ngẽma chacherdótegü rü wüxichigü i ngunexü̃gu Tupanana nanaxã i naxü̃nagü i naxca̱x nada̱i̱xü̃. Rü guxü̃guma ngẽmaãcü nanaxügüxü̃, natürü ngẽma rü taguma inayanaxoxẽxẽ i duü̃xü̃güarü pecadugü.

12Natürü nüma ga Ngechuchu ya Cristu rü wüxicanatama Tupanana nügü naxã nax pecaduarü ütanüca̱x nayuxü̃ca̱x. Rü yema naxüxü̃ rü taguma inayarüxo. Rü yemawena Tupanaarü tügünecüwawa nayarüto.

13Rü nüma ya Ngechuchu ya Cristu rü ñu̱xma rü daxũguxü̃ i naanewa nangẽxma rü ngéma ínanangu̱xẽxẽ i ngẽma ngunexü̃ i nagu Tupana tá norü uanügüxü̃ nayexeraguxẽẽxü̃.

14Rü nüma ga Ngechuchu ya Cristu rü wüxicanatama Tupanana nügü naxã rü nayu nax Tupanaarü ãmare yixĩxü̃ca̱x. Rü yemaacü guxü̃guma Tupanape̱xewa tüxü̃ nimexẽẽgü ya yíxema Tupana tüxü̃ unetagüxe nax norü duü̃xü̃gü tixĩgüxü̃ca̱x.

15-16Rü Tupanaãxẽ ya Üünecü rü tüxü̃ nüxü̃ nacua̱xẽxẽ nax aixcüma yixĩxü̃ i ngẽma, yerü nüma ga Tupana rü ñanagürü:

“Ngẽxguma nawa nanguxgu nax wena ngẽma Yudíugümaxã ichaxunetaxü̃, rü wüxi i uneta i ngexwaca̱xü̃xü̃ tá namaxã chixu.

Rü norü maxü̃newa tá chanangexmaxẽxẽ i chorü mugü, rü naãẽwa tá chanaxümatü.

17Rü tagutáma wena nüxna chacua̱xãchi i ngẽma duü̃xü̃güarü pecadugü rü ngẽma chixexü̃ i naxügüxü̃”,

ñanagürü.

18Rü ngẽmaãcü nüxü̃ tacua̱x rü ngẽxguma Tupana duü̃xü̃güaxü̃́ nüxü̃ yarüngümagu i norü pecadugü, rü marü taxuca̱xma tü̱xcüü̃ tanaxwa̱xe nax wena pecaduca̱x naxü̃nagü ida̱i̱xü̃.

Ñu̱xma rü natauxcha nax Tupanana ingaicamaxü̃

19-20Rü ngẽmaca̱x i ñu̱xma, Pa Chauenexẽgü, rü Ngechuchu rü nagü taxca̱x ibaxẽẽxü̃gagu tüxü̃́ natauxcha nax Tupana ínangexmaxü̃wa ingugüxü̃ca̱x. Rü yema nüxíraxü̃xü̃ ga mugü rü nanachuxu nax ngexerüxüxemare nagu ücuxü̃ ga yema naxmachiã ga üünexü̃ ga tüyemachiãpe̱xewaama üxü̃ ga Tupana íyexmaxü̃wa. Natürü ñu̱xma ya Cristu rü pecadugagu nayu rü ngẽmaãcü taxca̱x nayawáxna i nama i ngexwaca̱xü̃xü̃ i maxü̃ tüxna ãxü̃ nax ngẽmaãcü Tupana íngẽxmaxü̃wa ingugüxü̃ca̱x.

21Rü ñu̱xma tüxü̃́ nangẽxma ya tórü Chacherdóteeru ya Cristu ya Guxü̃étüwa Ngẽxmacü ya Tupanaarü duü̃xü̃gümaxã icuácü.

22Rü ngẽmaca̱x tanaxwa̱xe i Tupanamaxã tixaixcümagü nax nüxü̃ rüxoexü̃ i tórü chixexü̃gü. Rü tanaxwa̱xe nax aixcüma nüxü̃́ yaxõgüxü̃, rü torü maxü̃newa nax nataxuxü̃ma i chixexü̃, rü taxü̃negü rü mechiüxü̃ i dexáwa yayauxgüxü̃. Rü ngẽmaãcü tanaxwa̱xe i Tupanana ingaicamagüxü̃.

23Rü ñu̱xma nax ínangu̱xẽẽxü̃ i ngẽma maxü̃ i taguma gúxü̃ ya Tupana tamaxã ixunetaxü̃ rü tanaxwa̱xe i aixcüma Cristuaxü̃́ yaxõgüechaxü̃ rü taguma nüxü̃ rüxoexü̃. Yerü Tupana ga tamaxã ixunetacü nax tüxü̃ nangü̃xẽẽxü̃, rü aixcümaxü̃chi tá nayanguxẽxẽ ga yema tamaxã nüxü̃ yaxuxü̃.

24Rü ñu̱xma rü name nixĩ i naxca̱x idaugüxü̃ nax wüxichigü yigü rüngü̃xẽẽgüxü̃ nax yexeraãcü yigü íngechaü̃güxü̃ca̱x rü mexü̃ ixügüxü̃ca̱x.

25Rü tama name nax nüxü̃ rüxoexü̃ nax ingutaque̱xegüxü̃, erü togü rü marü nüxü̃ narüxoe nax ngutaque̱xewa naxĩxü̃. Natürü name nixĩ i yigüaxü̃́ tanangúchaü̃xẽxẽ nax ingutaque̱xegüxü̃. Rü ñu̱xma nax nüxü̃ icuáxü̃ nax marü yangaicaxü̃ ya tórü Cori, rü name nax yexeraãcü yigüaxü̃́ nangúchaü̃xẽẽxü̃ nax ingutaque̱xegüxü̃.

26Erü ngẽxguma chi Cristuaxü̃́ tayaxõchire̱xgu rü ñu̱xũchi tórü ngúchaü̃maxã pecadu taxüechagu, rü marü nataxuma i ãmare íyaxüxü̃ i tórü pecaduarü ütanüruxü̃.

27Rü ngẽmaca̱x yíxema Cristuna ixũgachixe rü ngẽma tüxü̃ ínangu̱xẽẽxü̃ nixĩ i ngẽma ãũcümaxü̃ i poxcu ya yima üxü ya iya̱u̱xrane ya nagu Tupana tá napoxcuexü̃ i norü uanügü.

28Rü nüxü̃ tacua̱x rü ngẽxguma texé tama Moichéarü mugüga ĩnügu rü nangẽxmagu i taxre rü ẽ̱xna tomaepü̱x i duü̃xü̃gü i tüxü̃ daugüxü̃ rü tüxü̃ ixugüexü̃ nax aixcüma tama naga taxĩnüxü̃, rü nüma ya ãẽ̱xgacü rü tama nüxü̃́ tangechaü̃tümüü̃ãcüma tá tümamaxã nanaxuegu nax noxtacüma tayuxü̃.

29Natürü Tupana rü aixcüma yexeraãcü tá nanapoxcue i ngẽma duü̃xü̃gü i chixri Nanechiga idexagüxü̃, rü nüxü̃ oexü̃ nax gumá nagümaxã yixĩxü̃ ga pecadu naxütanüxü̃, rü namaxã guxchigagüxü̃ i Tupanaãxẽ ya Üünecü i nüxü̃ ngechaü̃xü̃.

30Rü meama nüxü̃ tacua̱x rü Tupana rü ñanagürü:

“Choma nixĩ i nüxü̃ chacuáxü̃ nax ta̱xacü tá namaxã chaxüxü̃ i ngẽma chixexü̃ ügüxü̃.

Rü aixcüma tá chanapoxcue”,

ñanagürü. Rü yexgumarüxü̃ ta ñanagürü:

“Choma tátama nixĩ i nüxna chaca̱xaxü̃ i chorü duü̃xü̃gü i norü maxü̃chiga”,

ñanagürü.

31Rü wüxi i ãũcümaxü̃chixü̃ nixĩ nax Tupana ya Maxü̃cüme̱xẽgu iyi̱xixü̃ nax tüxü̃ napoxcuexü̃ca̱x.

32Rü name nixĩ i nüxna pecua̱xãchie ga yexguma noxri Cristuxü̃ peyauxgügu rü nüxü̃́ peyaxõgügu rü pema rü mea peyaxõgüama rü tama Cristuna pixĩgachi woo nax taxü̃ ga guxchaxü̃gü pexca̱x íngugüxü̃.

33Rü ñuxre ga pema rü duü̃xü̃gü pemaxã naguxchigagü rü guxãpe̱xewa pexü̃ nicua̱i̱xgü. Rü toguxe ga pemax rü pegü ipeyaxãgü nax yema pemücügürüxü̃ ngúxü̃ pingegüxü̃ca̱x.

34Rü pema rü pexü̃́ nangechaü̃tümüü̃gü ga yema petanüxü̃ ga yaxõgüxü̃ ga poxcupataü̃wa yexmagüxü̃. Rü taãẽãcüma yáxna namaxã pexĩnüe ga yema tama yaxõgüxü̃ ga pexna napuxü̃xü̃ ga perü yemaxü̃gü. Rü tama naxca̱x pexoegaãxẽ, yerü meama nüxü̃ pecua̱x rü daxũguxü̃ i naanewa pexü̃́ nangẽxma i ngẽmaarü yexera ixĩxü̃ i tagutáma gúxü̃.

35Rü ngẽmaca̱x i ñu̱xmax, rü tama name nax nüxü̃ perüxoexü̃ nax Cristuaxü̃́ peyaxõgüxü̃. Erü Tupana rü perü õgagu tá pexna nanaxã i perü ãmare i maxü̃ i taguma gúxü̃.

36Rü ngẽma guxchaxü̃gü i pexca̱x íngugüxü̃, rü name nixĩ i yáxna namaxã pexĩnüe nax penaxüxü̃ca̱x i Tupanaarü ngúchaü̃ rü penayaxuxü̃ca̱x i ngẽma ãmare i pemaxã inaxunetaxü̃.

37Erü Tupanaarü ore i ümatüxü̃wa rü ñanagürü:

“Paxa tá wena núma naxũ ya Cristu.

Rü taxũtáma nũxcü ínangu.

38Natürü yíxema tümaarü õgagu chope̱xewa mexẽ, rü name nixĩ i guxü̃guma tayaxõõcüma cha̱u̱xca̱x tamaxü̃.

Natürü ngẽxguma nüxü̃ tarüxoxgu nax tayaxõxü̃, rü choma rü taxũtáma tümamaxã chataãxẽ”,

ñanagürü.

39Natürü i yixema rü tama naxrüxü̃ tixĩgü i ngẽma duü̃xü̃gü i Tupanana ixĩgachixü̃ rü poxcuwa ĩxü̃, erü yixema rü tüxü̃́ nangẽxma i maxü̃ i taguma gúxü̃ erü tayaxõgü.

Currently Selected:

Popera ga Yudíugü ga yaxõgüxü̃ca̱x ümatüxü̃ 10: tcaP

Highlight

Copy