Naanearü ügüchiga 39

Yúche rü Potifáma̱xchiga

1Rü yexguma Yúchexü̃ Equítuanewa nagagügu ga yema Ismaétanüxü̃, rü wüxi ga Equítuanecüã̱x ga Potifágu ãégacü naxca̱x nataxe. Rü nüma ga Potifá rü Equítuanearü ãẽ̱xgacü ga Faraóü̃arü dauruü̃güeru nixĩ.

2Natürü ga Cori ya Tupana rü Yúchemaxã nayexma. Rü yemaca̱x meama nüxü̃ nangupetü ga norü cori ga Potifáchiü̃wa.

3Rü yema norü cori rü nüxü̃ nicua̱xãchi nax Yúchexü̃tawa nayexmaxü̃ ga Tupana, yerü guxü̃ma ga yema naxüxü̃, rü meama inixũ.

4Rü yemaca̱x ga norü cori rü poraãcü namaxã nataãxẽ. Rü düxwa norü ngü̃xẽẽruxü̃ nayaxĩxẽxẽ, rü naxme̱xgu nanaxǘ ga guxü̃ma ga napatawa yexmaxü̃ nax namaxã inacuáxü̃ca̱x.

5Rü yexguma Yúcheme̱xẽgu naxǘãgu ga napata rü norü yemaxü̃gü, rü Cori ya Tupana rü poraãcü Potifáxü̃ narüngü̃xẽxẽ ga napatawa rü naanewa rü naxü̃nagüwa.

6Rü yexguma Yúche marü nüxna da̱u̱xgu ga norü yemaxü̃gü, rü nüma ga Potifá rü marü taxuca̱xma naxoegaãxẽ, rü chibüguxicatama narüxĩnü. Rü Yúche rü wüxi ga ngextü̱xücü ga mechametücü nixĩ rü yemaca̱x nangúchaü̃.

7Rü yemaca̱x ga naxma̱x ga Potifá rü düxwa ngĩxü̃́ nangúchaü̃. Rü wüxi ga ngunexü̃gu rü ngĩgürügü nüxü̃: —¡Chomaxã namaxü̃! —ngĩgürügü.

8Natürü nüma ga Yúche rü ngĩxü̃ naxo. Rü ngĩxü̃ nangãxü̃ rü ñanagürü: —Dücax, chorü cori marü cho̱xme̱xwa nanangexmaxẽxẽ i guxü̃ma i norü ngẽmaxü̃gü nax namaxã ichacuáxü̃ca̱x. Rü ñu̱xma nax choma chanuxmaxü̃, rü taxuca̱xma naxoegaãxẽ i nümax.

9Rü daa napatawa rü taxúema ya toguxe rü chorü yexera tixĩ. Rü nüma ya chorü cori rü taxuxü̃ma i ta̱xacü choxna nachu̱xu. Rü cuxicatama nixĩ i tama nanaxwa̱xexü̃ nax cuxü̃ chadauxü̃ erü naxma̱x quixĩ i cumax. ¿Rü ngẽmaca̱x ñuxũcürüwa i ta̱xacürü chixexü̃ chaxüxü̃ i nua napatawa ya chorü cori rü Tupanape̱xewa? —ñanagürü.

10Natürü ga ngĩma rü guxü̃ ga ngunexü̃gu rü Yúchexü̃ ichixeweecha nax ngĩxü̃tagu naxã́ũxü̃ca̱x rü ngĩmaxã namaxü̃xü̃ca̱x, natürü ga nüma rü tama nanangĩãẽraxü̃.

11-12Natürü wüxi ga ngunexü̃ ga Yúche rü ĩpatagu naxücu nax yéma puracü naxüxü̃ca̱x. Rü yéma aixepewa rü nataxuma ga to ga duü̃xü̃. Rü ngĩma rü naxchiruwa iyachü̱xüxü, rü ngĩgürügü nüxü̃: —¡Chomaxã namaxü̃! —ngĩgürügü. Natürü ga nüma ga Yúche rü inayago, rü ngĩxme̱xwa nayaxü̃ãchi ga naxchiru ga nüxna yapu̱xü̃.

13-14Rü yexguma nüxü̃ nada̱u̱xgu ga naxchiru ga ngĩxme̱xwa nax yaxü̃ãchixü̃, rü ngĩrü duü̃xü̃güca̱x ica. Rü ngĩgürügü nüxü̃: —¡Dücax! Chaute nua nanaga i wüxi i duü̃xü̃ i Ebréutanüxü̃, rü ñu̱xma rü tagu nua nidauxcüraxü̃. Rü nüma rü nuxã ĩxgu cha̱u̱xca̱x naxücu rü chomaxã taa̱x namaxü̃, natürü i choma rü poraãcü aita chaxüama.

15Rü ngẽxguma poraãcü aita chaxüxgu, rü inayago. Rü ngẽmaca̱x nua nanata̱x i ñaa naxchiru —ngĩgürügü.

16Rü ñu̱xũchi ga ngĩma rü namaxã inguxü̃ ga Yúchechiru ñu̱xmata yéma ĩxwa nangu ga ngĩte.

17Rü yexguma yéma nanguxgu ga ngĩte, rü namaxã nüxü̃ iyaxu rü ngĩgürügü: —Rü ngẽma duü̃xü̃ i Ebréutanüxü̃ i nua cungexmaxẽẽxü̃, rü chorü ucapugu naxücu rü chomaxã taa̱x namaxü̃.

18Natürü ngẽxguma poraãcü aita chaxüxgu rü inayago, rü nua nanata̱x i ñaa naxchiru.

19Rü ngẽmaãcü chomaxã nixĩ i ngẽma curü duü̃xü̃ i Ebréutanüxü̃ —ngĩgürügü. Rü yemaxü̃ naxĩnügu ga nüma ga Potifá rü poraãcü nanu.

20-21Rü Yúchexü̃ niyaxu. Rü ñu̱xũchi norü duü̃xü̃güxü̃ namu nax ãẽ̱xgacü poxcuexü̃ ga duü̃xü̃gütanügu nayata̱xcuchigü. Natürü woo ga poxcupataü̃wa nax nayexmaxü̃ ga Yúche rü Cori ya Tupana rü naxü̃tawa nayexma, rü nüxü̃ narüngü̃xẽxẽ. Rü nüxü̃́ nanatauxchaxẽxẽ nax yema poxcupataü̃arü ãẽ̱xgacü namaxã taãẽxü̃.

22Rü yemaca̱x ga nüma ga poxcupataü̃arü ãẽ̱xgacü rü Yúcheme̱xẽwa nanange̱x ga guxü̃ma ga yema poxcuexü̃ nax namaxã inacuáxü̃ca̱x. Rü Yúche nixĩ ga namaxã icuáxü̃ ga guxü̃ma ga puracü ga yéma.

23Rü nüma ga yema poxcupataü̃arü ãẽ̱xgacü rü taxuca̱xma tü̱xcüü̃ ínayadauuxü̃ ga yema Yúcheme̱xẽwa yexmaxü̃, yerü ga Tupana rü Yúchexü̃ narüngü̃xẽxẽ nax guxü̃ma mea iyaxũxü̃ca̱x ga yema poxcupataü̃wa.

Currently Selected:

Naanearü ügüchiga 39: tcaP

Highlight

Copy