Naanearü ügüchiga 25

Abraáü̃ rü naxma̱x ga Queturáwaü̃güxü̃ rü nataagüchiga

(1 Cr. 1.32-33)

1-2Rü Abraáü̃ rü wena naxãxma̱x, rü guxema naxma̱x rü tümaéga rü Queturá nixĩ, rü Abraáü̃ nanegü ga Queturáwaü̃güxü̃ nixĩ ga Chimráü̃, rü Yoxcháü̃, rü Medáü̃, rü Madiáü̃, rü Ichibáx, rü Chúa.

3Rü Yoxcháü̃ nanegü nixĩ ga Chebá rü Dedáü̃. Rü Dedáü̃tanüxü̃ nixĩ ga Achuréugü, rü Retuchéugü, rü ñu̱xũchi Leuméugü.

4Rü Madiáü̃ nanegü nixĩ ga Efá, rü Éfex, rü Anóx, rü Abidá rü Edaá. Rü guxü̃ma ga yemagü rü Queturá ngĩtaagü nixĩ.

5Rü guxü̃ma ga Abraáü̃arü yemaxü̃gü ga nüxü̃́ yexmaxü̃ rü nane ga Ichaána nanana.

6Rü yema togü ga nanegü ga naigü ga naxma̱xwaü̃güxü̃, rü nüma ga Abraáü̃ rü nayaxãmareã̱xgümare. Natürü yexguma namaxü̃gutama ga Abraáü̃, rü nane ga Ichaána nayamugachitanü ga yema togü ga nanegü. Rü naane ga éstewaama yexmaxü̃wa nanamugü.

Nayu ga Abraáü̃ rü inanata̱xgü

7Rü Abraáü̃ rü 175 ga taunecü namaxü̃.

8Rü nüma rü nayumare, yerü marü nayaxüchi. Rü natanüxü̃ íta̱xgüxü̃gu nayata̱xgü.

9Rü nanegü ga Ichaá rü Ismaé rü yema naxmaxü̃ ga Maxperágu ãégaxü̃gu nayanaxücuchigü. Rü yema naxmaxü̃ rü ĩane ga Mamréarü éstewaama nayexma nawa ga norü naane ga Efróü̃ ga Chóa ga Itítanüxü̃ nane.

10Rü yema naane nixĩ ga Abraáü̃ naxca̱x taxexü̃ naxü̃tawa ga Itítanüxü̃. Rü yema naxmaxü̃gu nixĩ ga Abraáü̃xü̃ yanaxücuchigüxü̃ ngĩxü̃tagu ga naxma̱x ga Chára.

11Rü nawena ga nax nayuxü̃ ga Abraáü̃, rü Cori ya Tupana rü Ichaáxü̃ poraãcü narüngü̃xẽxẽ. Rü nüma ga Ichaá rü gumá puchu ga Tupana ya Maxü̃cü rü Choxü̃ Daucügu ãégacüxü̃tagu naxãchiü̃.

Ismaé nataagü

(1 Cr. 1.28-31)

12Rü ñaa nixĩ ga nanegü ga Ismaé ga Abraáü̃ nane ga Agáwaü̃cü. Rü ngĩma ga Agá rü Cháraarü puracütanüxü̃ ga Equítuanecüã̱x iyixĩ.

13-15Rü naégagü ga Ismaé nanegü, rü gumá nüxíra bucüwa inaxügü rü ñu̱xmata gumá nawa iyacuácüwa nangu rü ñaagü nixĩ: Rü gumá nüxíra bucü nixĩ ga Nebaióx. Rü gumaweama ügüxü̃ nixĩ ga Quedáx, rü Axbeé, rü Mixcháü̃, rü Michimá, rü Dumá, rü Machá, rü Adá, rü Temá, rü Yetú, rü Napí, rü Quedemá.

16Rü yema nixĩ ga naégagü ga yema 12 ga Ismaé nanegü. Rü yema naégagügutama nixãéga ga norü naanegü rü norü ĩanegü. Rü wüxichigü ga nüma rü noxrütama duü̃xü̃güarü ãẽ̱xgacü nixĩ.

17Rü yexguma nayu̱xgu ga Ismaé, rü nüxü̃́ nayexma ga 137 ga taunecü. Rü yemaacü norü o̱xigü ga nüxíra yuexü̃tanüwa naxũ.

18Rü yema nataagü rü Abirá rü Chúxarü ngãxü̃wa yexmaxü̃ ga naanewa nixĩ ga nangugüxü̃, rü yexma naxãpatagü. Rü yema naane rü Equítuanearü to̱xma̱xtawa nayexma ga nama ga Achíriaanewaama nadaxü̃wa. Rü yexma nixĩ ga naxãpatagüxü̃ woo ga naenexẽgü nax naxchi aiexü̃.

Acóbu rü Echaúarü buxchiga

19Rü ñaa nixĩ i Abraáü̃ nane ga Ichaáchiga.

20Rü nüma ga Ichaá rü 40 ga taunecü nüxü̃́ nayexma ga yexguma naxãxma̱xgu ngĩmaxã ga Rebéca ga Betuéacü ga Labáü̃eya̱x. Rü nümagü rü Araméutanüxü̃ nixĩgü rü Padáü̃-aráü̃anegu naxãchiü̃gü.

21Rü Ichaá naxma̱x ga Rebéca rü tama nüxü̃́ ixãxacü. Rü yemaca̱x ga Ichaá rü Cori ya Tupanana naca nax naxãxacüxü̃ca̱x. Rü nüma ga Tupana rü nüxü̃ naxĩnü ga norü yumüxẽ rü ixãxacü.

22Rü nataxree̱xpü̱x ga ngĩxacü, natürü ngĩanügu nügü nadai. Rü yemaca̱x ñaxü̃gu irüxĩnü: “Ngẽxguma tá ngẽmaãcü yaxĩgügu i ñaa buxü̃gü ¿rü tü̱xcüü̃ ichamaxü̃xü̃?” ñaxü̃gu irüxĩnü. Rü yemaca̱x ga ngĩma ga Rebéca rü Cori ya Tupanana ica yemachiga.

23Rü Tupana rü ngĩxü̃ nangãxü̃ rü ñanagürü:

—Nataxree̱xpü̱x nixĩ i ngẽma cunegü i cuanüwa ngẽxmagüxü̃.

Rü nüma i taxre rü wüxichigü tá nachixü̃anemaxã inacua̱x.

Rü naxü̃pa nax nabuexü̃ rü nügü nadai. Rü wüxi tá nixĩ i rüporamaexü̃.

Rü ngẽma rübumaexü̃ rü ngẽma rüyamaexü̃arü yexera tá nixĩ

—ñanagürü.

24Rü ngĩrü ngunexü̃wa nangu ga nax naxíraxacüxü̃ ga Rebéca. Rü nataxree̱xpü̱x ga ngĩnegü.

25Rü gumá ngĩne ga nüxíra bucü rü nadauyáe rü naxãxta̱xaxü̃ne. Rü Echaúgu nanaxüégagü.

26Rü yemawena nabu ga naenexẽ. Rü Echaúme̱xtü̱xügu yangĩãcüma nabu. Rü yemaca̱x Acóbugu nanaxüégagü. Rü ngẽma naéga rü Iyauxwa̱xexü̃, ñaxü̃chiga nixĩ. Rü nüma ga Ichaá rü 60 ga taunecü nüxü̃́ nayexma ga yexguma nabuegu ga gumá ngĩnegü ga Rebéca.

Echaú rü õnaca̱x inanaxã ga yema nüxna üxü̃

27Rü gumá taxre ga bucügü rü nayae. Rü Echaú rü norü me nixĩ ga naanewa nax napuracüxü̃, rü cueneexü̃ nacua̱xüchi. Natürü ga Acóbu rü yatü ga meãẽmarecü nixĩ, rü norü me nixĩ ga ĩgüarü ngaicamana nax naxã́ũxü̃.

28Rü nüma ga nanatü ga Ichaá rü yexera Echaúxü̃ nangechaü̃ yerü norü me nixĩ ga nax nangóoxü̃ ga yema naeü̃machi ga Echaú imáxü̃. Natürü ga naxma̱x ga Rebéca rü yexera Acóbuxü̃ ingechaü̃.

29Rü wüxi ga ngunexü̃ ga yexguma Acóbu íxüwemügu, rü nüma ga Echaú rü maxneewa ne naxũ rü poraãcü nipaxüchi.

30Rü Acóbuxü̃ ñanagürü: —¿Taxũchima cuxü̃́ namexü̃ i chomaxã cungauxgu i ngẽma curü õna i dautanüxü̃? Erü ngẽmatama taiyamaxã chayu —ñanagürü. (Echaú rü Edóü̃maxã rü ta nanaxugü yerü norü me nixĩ ga yema õna ga dautanüxü̃.)

31Rü yexguma ga Acóbu rü nanangãxü̃ rü ñanagürü: —Nangexma i mexü̃ i cuxna üxü̃ erü tanatü nane ya yacü quixĩ, rü chanaxwa̱xe i ñaa õnaca̱x choxna cunaxã i ngẽma mexü̃ i cuxna üxü̃ —ñanagürü.

32Rü yexguma ga Echaú rü ñanagürü: —¿Ta̱xacüwa chi choxü̃́ namexü̃ i ngẽma nüxü̃ quixuxü̃ i choxna üxü̃? Erü choxü̃ cudau nax taiyamaxã chayuxchaü̃xü̃ —ñanagürü.

33Rü yexguma ga Acóbu rü ñanagürü: —¡Tupanaégagu chomaxã nüxü̃ ixu nax aixcüma tá choxna cunaxãxü̃ i ngẽma mexü̃ i cuxna üxü̃! —ñanagürü ga Acóbu. Rü yexguma ga Echaú rü Tupanaégagu Acóbuna nanaxã ga yema naxca̱x ínaca̱xaxü̃.

34Rü yexguma ga Acóbu rü Echaúna nanaxã ga paũ rü guma purutuarü dautanüne. Rü yexguma marü chibüwa rü axewa yanguxgu ga Echaú, rü inachi rü ínixũ. Rü tama nagu narüxĩnü ga yema mexü̃ ga norü yamaeca̱x nüxna üxü̃ ga naenexẽna naxãxü̃.

Currently Selected:

Naanearü ügüchiga 25: tcaP

Highlight

Copy