Naanearü ügüchiga 21

Nabu ga Ichaá

1Rü nüma ga Cori ya Tupana rü yema ngĩmaxã nüxü̃ yaxuxü̃ãcü Cháragu narüxĩnü, rü nayanguxẽxẽ ga yema ngĩmaxã naxueguxü̃.

2Rü yemaacü ga Chára rü ixãxacü nüxü̃́ ga Abraáü̃ ga yexguma marü yaxguã̱x yixĩxgu. Rü gumátama tauemacü ga Cori ya Tupana nagu unetacügu nabu.

3Rü nüma ga Abraáü̃ rü Ichaágu nanaxüéga ga gumá nane ga Chárawáü̃cü.

4Rü yexguma 8 ga ngunexü̃ nüxü̃́ yexmagu ga nax naxíraxü̃, rü Abraáü̃ ínanawíecha̱xmüü̃pe̱xechiraü̃ yema Tupana namuxü̃rüxü̃.

5Rü Abraáü̃ rü nüxü̃́ nayexma ga 100 ga taunecü ga yexguma Ichaá íxragu.

6Rü yexguma ga Chára rü ngĩãẽwa ngĩgürügü: “Tupana choxü̃ nataãẽxẽxẽ. Rü guxãma ya nüxü̃ cua̱xgüxe nax chaxãxacüxü̃ rü tá wüxigu chomaxã tataãẽgü.

7¿Texé nagu rüxĩnüxü̃ ga Abraáü̃axü̃́ tá nax chaxãxacüxü̃? Natürü marü nüxü̃́ chaxãxacü i ñu̱xma i woo nax marü nayaxüchixü̃ i nümax”, ñaxü̃gu irüxĩnü ga ngĩãẽwa.

Agáxü̃ rü ngĩne ga Ismaémaxã íita̱xüchi ga Abraáü̃patawa

8Rü niyachigü ga gumá õxchana ga Ichaá, rü nayamaiegü. Rü yema ngunexü̃gu rü wüxi ga taxü̃ ga peta naxü ga Abraáü̃.

9Natürü ga Chára rü nüxü̃ idau ga Ichaágu nax yadauxcüraxü̃xü̃ ga Ismaé ga Abraáü̃ nane ga Equítuanecüã̱x ga Agáwaü̃cü.

10Rü yexguma ga Chára rü Abraáü̃maxã nüxü̃ iyarüxu rü ngĩgürügü: —Dücax, ¡ínamuxũchi i ngẽma taxü̃taxü̃ nanemaxã! Erü yimá chaune ya Ichaá rü taxuca̱xma i ngẽma taxü̃taxü̃ nanemaxã nangau i curü ngẽmaxü̃gü —ngĩgürügü.

11Rü yema dexa rü poraãcü nüxü̃́ nangu̱x ga Abraáü̃, yerü nanechiga nixĩ ga yema.

12Natürü ga Tupana rü Abraáü̃maxã nüxü̃ nixu rü ñanagürü: —¡Taxṹ i cuxoegaãẽxü̃ naxca̱x ya curü bucü rü ngĩxca̱x i ngẽma cuxü̃taxü̃! ¡Rü naxü i ngẽma Chára cumaxã nüxü̃ ixuxü̃! Erü cutaagü ga cumaxã chaxueguxü̃ rü Ichaáwa tá nixĩ i ne naxĩxü̃.

13Natürü ngẽma cuxü̃taxü̃ ngĩnewa rü tá ichanachigüxẽxẽ i wüxi i taxü̃ i duü̃xü̃gütücumü, erü cune nixĩ —ñanagürü ga Tupana.

14Rü moxü̃ãcü ga pa̱xmamaxü̃chi rü Abraáü̃ rü Agána nanaxã ga paũ rü dexá ga naxcha̱xmüü̃gu ibacuchixü̃. Rü Agáétügu nananugü rü yemaacü ngĩne ga Ismaémaxã ngĩxü̃ nimu. Rü yéma ngürüanewa ixũmare ga chianexü̃ ga Bechébawa.

15Rü yexguma nagu̱xgu ga dexá rü gumá ngĩne rü wüxi ga naixtüü̃gu inamu.

16Rü norü yáxü̃waxü̃ra iyarüto, yerü tama nüxü̃ idauxchaü̃ ga ngĩxü̃tama nax nayuxü̃. Rü yexguma yéma nato̱xgu rü gumá ngĩne rü inanaxügü ga nax naxaxuxü̃.

17Natürü ga Tupana rü nüxü̃ naxĩnü ga gumá bucü nax naxaxuxü̃. Rü wüxi ga daxũcüã̱x i orearü ngeruxü̃ rü daxũwa Agána nacagü rü ñanagürü: —¿Ta̱xacü cuxü̃ nangupetü, Pa Agáx? ¡Taxṹ i cumuü̃xü̃! Erü Tupana rü marü nüxü̃ naxĩnü i norü axu ya yimá curü bucü i ngéma ínaxaxuxü̃wa.

18¡Inachi rü íyadau ya yimá bucü, rü naxme̱xgu iyauxãchi! Erü choma rü nawa tá ichanachixẽxẽ i wüxi i taxü̃ i nachixü̃ane —ñanagürü.

19Rü yexguma ga Tupana rü Agáxü̃ nanawe̱x ga wüxi ga puchu. Rü ngĩma rü yéma ixũ, rü inaxüãcu ga yema ngĩrü dexáchiü̃ ga naxcha̱xmüü̃naxca̱x. Rü ñu̱xũchi inaxaxexẽxẽ ga Ismaé.

20-21Rü Tupana rü nüxü̃ narüngü̃xẽxẽ ga gumá bucü. Rü nüma rü niyachigü. Rü chianexü̃ ga Paráü̃gu nanapexü̃tanüane. Rü meama maxgütaexü̃ cuácü nixĩ. Rü yexguma naya̱xgu, rü naé rü wüxi ga Equítuanecüã̱xmaxã inaxüxma̱x.

Abraáü̃ rü Abimeréxmaxã wüxi ga uneta nügümaxã naxügü

22Rü yema ngunexü̃gügu ga Abimeréx rü Abraáü̃xü̃tagu nanaxũane. Rü nayaxümücü ga norü churaragüeru ga Picóx. Rü yexguma yéma nanguxgu rü nüma ga Abimeréx rü Abraáü̃maxã nidexa rü ñanagürü nüxü̃: —Nüxü̃ tadau nax guxü̃guma Tupana cuxü̃ rüngü̃xẽẽxü̃ i guxü̃ma i ngẽma cuxüxü̃wa.

23¡Rü ngẽmaca̱x, nua Tupanape̱xewa chomaxã naxuegu nax tagutáma ta̱xacürü chixexü̃ chomaxã, rü chaunegümaxã, rü chautaagümaxã cuxüxü̃. Rü ngẽxgumarüxü̃ ta chomaxã naxuegu nax guxü̃gutáma mea chomaxã quixĩxü̃ ga yema choma nax cumaxã chamecümaxü̃rüxü̃! Rü ngẽxgumarüxü̃ ta chanaxwa̱xe nax namaxã cumecümaxü̃ i ñaa duü̃xü̃gü i ñaa nachixü̃ane i nawa cuyamaxü̃xü̃wa maxẽxü̃ —ñanagürü ga Abimeréx.

24Rü yexguma nüma ga Abraáü̃ rü nanangãxü̃ rü ñanagürü nüxü̃: —Aixcüma tá ngẽmaãcü chanaxü —ñanagürü.

25Natürü nüma ga Abraáü̃ rü Abimeréxna nüxü̃ nacua̱xãchixẽxẽ nachiga ga wüxi ga puchu ga ü̃paacü Abimeréxarü duü̃xü̃gü nüxna yapugücü.

26Rü yexguma nüma ga Abimeréx rü Abraáü̃xü̃ nangãxü̃ rü ñanagürü: —Chomax, rü taguma nüxü̃ chacuáchiga i ngẽma, erü taguma chomaxã nüxü̃ quixu. Rü tama nüxü̃ chacua̱x nax texé naxüxü̃ ga yema —ñanagürü.

27Rü yexguma nüma ga Abraáü̃ rü Abimeréxna nanamugü ga wocagü rü carnérugü. Rü yemaacü yematama ga ngunexü̃gu rü wüxi ga uneta nügümaxã naxügü ga yema taxre.

28Natürü nüma ga Abraáü̃ rü norü carnérugütanüwa Abimeréxca̱x nanade ga 7 ga carnérugü.

29Rü yemaca̱x nüma ga Abimeréx rü Abraáü̃na naca rü ñanagürü: —¿Tü̱xcüü̃ cunanuxuchi i ngẽma 7 i carnérugü? —ñanagürü.

30Rü yexguma nüma ga Abraáü̃ rü nanangãxü̃ rü ñanagürü: —Ñaa carnérugü rü tá cuxna chanamugü nax ngẽmawa nüxü̃ cucuáxü̃ca̱x nax daa puchu rü choma chanaxüxü̃ —ñanagürü.

31Rü Abraáü̃ rü Abimeréxmaxã yema nachicawa nügümaxã inaxüga, rü yemaca̱x ga yema nachica rü Bechébagu naxãéga.

32Rü yexguma marü Bechébawa uneta nügümaxã naxügüguwena, rü nüma ga Abimeréx rü Picóx rü Firitéugüchixü̃aneca̱x nawoegu.

33Rü nüma ga Abraáü̃ rü yexma Bechébagu nanato ga wüxi ga nanetü ga tamaríscogu ãégaxü̃. Rü yematüü̃wa nixĩ ga Abraáü̃ rü Cori ya Tupana ya guxü̃guma maxü̃cümaxã yadexaxü̃.

34Rü yemaacü ga nüma ga Abraáü̃ rü mucüma ga taunecü Firitéugüarü naanewa namaxü̃.

Currently Selected:

Naanearü ügüchiga 21: tcaP

Highlight

Copy