Nüxíraxü̃xü̃ ga popera ga Timutéuca̱x naxümatüxü̃ ga Pauru 2

Yumüxẽchiga

1Rü ñu̱xma rü tá pemaxã nüxü̃ chixu nax ñuxãcü namexü̃ nax peyumüxẽgüxü̃. Rü ngẽma nüxíra naxca̱x peyumüxẽgüxü̃ tá nixĩ i guxü̃ma i duü̃xü̃gü i ñoma i naanewa maxẽxü̃. ¡Rü Tupanana naxca̱x peca nax nüxü̃ nangü̃xẽẽxü̃ca̱x rü nüxü̃́ nüxü̃ narüngü̃maxü̃ca̱x i norü pecadugü! ¡Rü moxẽ nüxna pexã ya Tupana naxca̱x i norü ngü̃xẽxẽ i guxü̃ i duü̃xü̃güna naxãxü̃!

2Rü ngẽxgumarüxü̃ ta name nixĩ i naxca̱x peyumüxẽ i guxü̃ma i nachixü̃anegüarü ãẽ̱xgacügü rü guxü̃ma i norü ngü̃xẽẽruü̃gü i ãẽ̱xgacügü nax ngẽmaãcü itaãẽgüxü̃ca̱x rü Tupanape̱xewa rü guxü̃ i duü̃xü̃güpe̱xewa tüxü̃́ nangẽxmaxü̃ca̱x i wüxi i maxü̃ i aixcüma mexü̃.

3Rü ngẽma nixĩ i namaxã nataãẽxü̃ ya yimá Tupana ya tüxü̃ maxẽxẽẽcü.

4Erü nüma nanaxwa̱xe nax guxãma tüxü̃́ nangẽxmaxü̃ i maxü̃ i taguma gúxü̃ rü guxãma nüxü̃ cuáxü̃ i ngẽma ore i aixcüma ixĩxü̃.

5Erü Tupana rü wüxitama nixĩ rü nataxuma i to. Rü ngẽxgumarüxü̃ ta wüxitama nixĩ i Tupanape̱xewa taétüwa chogüxü̃. Rü nüma nixĩ ya Ngechuchu ya Cristu ya Tupana Nane ga duü̃xü̃xü̃ ixĩcü.

6Rü nüma ga Ngechuchu rü nügü inaxã rü nayu nax guxü̃ i duü̃xü̃güxü̃ naxütanüxü̃ca̱x nax Tupanaxü̃tawa nangugüxü̃ca̱x. Rü yexguma Ngechuchu yu̱xgu nixĩ ga Tupana yanguxẽẽxü̃ ga yema ü̃paacü nüxü̃ yaxuxü̃ rü tá duü̃xü̃güxü̃ namaxẽxẽxẽxü̃.

7Rü Tupana choxü̃ naxuneta nax norü orearü ngeruxü̃ chixĩxü̃ca̱x. Rü choxü̃ namu nax chanangúexẽẽxü̃ca̱x i ngẽma duü̃xü̃gü i tama Yudíugü ixĩgüxü̃ nax nümagü rü ta yaxõgüãxü̃ca̱x rü nüxü̃ nacua̱xgüxü̃ca̱x i ngẽma ore i aixcüma ixĩxü̃. Rü ngẽma pemaxã nüxü̃ chixuxü̃, rü aixcüma nixĩ, rü tama chidora.

8Rü ñu̱xma chanaxwa̱xe i guxü̃wama nayumüxẽgü i yatügü. Rü chanaxwa̱xe i ngearü pecaduã̱xãcüma naxugüme̱xẽ. Rü tama name i nügümaxã nanueãcüma rüe̱xna nügü nachoxü̃gagüãcüma nayumüxẽgü.

9Rü chanaxwa̱xe i ngexü̃gü rü meamare üxü̃ i naxchirugu nicu̱xgü, rü meamare nügü namexẽẽyaegü, rü tama poraãcü nügü nanga̱xãẽgü úirumaxã rü meruxü̃gümaxã rü naxchiru i tatanüxü̃maxã.

10Rü name nixĩ i meamare Tupanaca̱x namaxẽ, rü mexü̃ i puracü naxügü, erü ngẽmaãcü nanaxwa̱xegü nax namaxẽxü̃ i ngẽma ngexü̃gü i aixcüma Tupanaaxü̃́ yaxõgüxü̃.

11Rü chanaxwa̱xe i ngexü̃gü rü mea inaxĩnüe i ucu̱xẽgü. Rü tama name nax nachoxü̃gawa̱xegüxü̃.

12Erü ngexü̃gü rü tama chanaxwa̱xe nax perü ngutaque̱xegüwa yatügüxü̃ nangúexẽẽxü̃, rü yatügüétüwa naxügüxü̃. Rü name nixĩ i mea inarüxĩnüemare.

13Yerü Tupana rü Adáü̃xü̃xíra naxü rü yixcama ga Ébaxü̃.

14Rü Chataná rü tama Adáü̃xü̃ nawomüxẽxẽ, natürü yema ngecüxü̃ nixĩ ga nawomüxẽẽxü̃. Rü yemaacü pecadugu ingu ga yema ngecü.

15Rü ngẽma ngexü̃gü rü ngẽxguma naxãxãcügügu rü tá inayauxgü i maxü̃ i taguma gúxü̃ ega mea ngĩxacügümaxã inacua̱xgügu, rü aixcüma yaxõgüãgu, rü aixcüma duü̃xü̃güxü̃ nangechaü̃gu rü mea Tupanape̱xewa namaxẽgu.

Currently Selected:

Nüxíraxü̃xü̃ ga popera ga Timutéuca̱x naxümatüxü̃ ga Pauru 2: tcaP

Highlight

Copy