Nüxíraxü̃xü̃ ga popera ga Coríntiuwa yexmagüxü̃ ga yaxõgüxü̃tanüwa namuxü̃ ga Pauru 11
11
1Rü name nixĩ i nagu pexĩ i chaucüma ngẽxgumarüxü̃ i choma nax Cristucümagu chixũxü̃rüxü̃.
Ngexü̃gü rü ngutaque̱xewa name nixĩ i mexü̃ i nacümagu naxĩxü̃
2Pa Chauenexẽgüx, pemaxã chataãxẽ erü guxü̃guma chaugu perüxĩnüe rü nagu pexĩ ga yema ngu̱xẽẽtae ga pexü̃ changúexẽẽxü̃.
3Natürü chanaxwa̱xe i nüxü̃ pecua̱x nax Cristu rü wüxichigü i yatüeru nax yixĩxü̃, rü nüma ya yatü rü naxma̱xeru nax yixĩxü̃ ngẽxgumarüxü̃ ya Tupana rü Cristueru nax yixĩxü̃.
4Rü ngẽmaca̱x i ngẽxguma chi wüxi ya yatü ngutaque̱xewa yumüxẽgu rü ẽ̱xna Tupanaarü orexü̃ yaxuxgu, rü chi tama ínanga̱xüchipate̱xegu, rü ngẽma rü wüxi i chixexü̃ nixĩ i Cristupe̱xewa naxüxü̃.
5Natürü ngẽxguma chi wüxi i ngecü ngutaque̱xewa yumüxẽgu rü ẽ̱xna Tupanaarü orexü̃ yaxuxgu, rü chi tama ngĩgü natüerugu, rü ngẽma rü wüxi i chixexü̃ nixĩ i ngĩtepe̱xewa naxüxü̃. Rü ñoma ngĩgü yadüeruxü̃rüxü̃ iyixĩ.
6Erü ngẽxguma chi tama ngĩgü natüeruchaü̃gu, rü narümemae nixĩ i noxtacüma ngĩgü iba̱i̱xeru. Natürü ngẽxguma chi wüxi i ngĩrü ãne yixĩxgu i ngẽma nax ngĩgü naba̱i̱xeruxü̃ rüe̱xna ngĩgü yadüeruxü̃, rü narümemae nixĩ i ngĩgü itüeru.
7Natürü yatügü rü tama name nax nügü natüerugüxü̃. Yerü ga Tupana rü nügüraxü̃ãcü nanaxü ga yatü rü Tupanachipeta nixĩ. Rü yimá yatüwa nixĩ i nangóxü̃ nax ñuxãcü namexẽchixü̃ ya Tupana. Rü ngẽma ngecüwa nixĩ i nangóxü̃ nax ñuxãcü namexü̃ ya yatü.
8Yerü yexguma noxri Tupana naxü̱xgu ga yatü, rü tama ngecüwa nixĩ ga naxüaxü̃. Rü ngĩmawaxi nixĩ ga yatüwa ngĩxü̃ naxüxü̃.
9Rü yatüca̱x nixĩ ga Tupana ngĩxü̃ üxü̃ ga ngecü, rü tama ngecüca̱x nixĩ ga Tupana naxüxü̃ ga yatü.
10Rü ngẽmaca̱x name nixĩ i ngĩgü itüeru nax duü̃xü̃güpe̱xewa rü Tupanaarü orearü ngeruü̃gü i daxũcüã̱xgüpe̱xewa nangóxü̃ca̱x nax ngĩteme̱xẽwa nangẽxmaxü̃.
11Natürü Tupanape̱xewa rü taxuxü̃ma nixĩ ya yatü ega nataxuxgu i ngecü. Rü ngẽxgumarüxü̃ ta i ngecü rü taxuxü̃ma iyixĩ ega nataxuxguma ya yatü.
12Yerü yexguma noxri Tupana ngĩxü̃ üxgu ga ngecü, rü yatüwa nixĩ ga ngĩxü̃ naxüxü̃. Rü ngẽxgumarüxü̃ ta ya yatü rü ngecüwa nixĩ i nabuxü̃. Natürü Tupana nixĩ ya nango̱xẽẽcü i guxü̃ma i duü̃xü̃gü.
13Rü pematama tá penangugü rü name i wüxi i nge rü tama natüeruãcüma nayumüxẽxü̃.
14Rü woetama tórü bucüma nixĩ i nüxü̃ nax icuáxü̃ nax wüxi i ãne yixĩxü̃ nax nügü nama̱xyaexẽẽxü̃ i wüxi i yatüxü̃.
15Natürü ngecüca̱x rü wüxi i mexẽchixü̃ nixĩ nax nama̱xyaexü̃. Erü Tupana rü ngĩxna nanaxã i ngĩyae nax ngẽmamaxã ngĩgü natüeruxü̃ca̱x.
16Natürü ngẽxguma chi texé ngẽmachiga tügü choxü̃gagügu, rü name nixĩ i nüxü̃ tacua̱x nax ngẽmatama yixĩxü̃ i tacüma rü nacüma i guxü̃ma i yaxõgüxü̃ i guxü̃nema ya Tupanapatagüwa.
Duü̃xü̃gü rü chixri namaxã inacua̱xgü ga Coriarü õna i üünexü̃
17Rü ñu̱xma i ñaa popera i pexca̱x chaxümatüxü̃wa rü pemaxã nüxü̃ chixu rü nangẽxma i wüxi i pecüma i chixexü̃ i tama namaxã chataãẽxü̃. Erü cha̱u̱xca̱x i ngẽma perü ngutaque̱xegü rü tama perü meruü̃gü nixĩgü, rü taxü̃ i guxchaxü̃ pexca̱x ínanguxẽẽgü.
18Erü duü̃xü̃gü chomaxã nüxü̃ nixugügü rü ngẽxguma tórü Corica̱x pengutaque̱xegüü̃xgu rü pegü pitoye. Rü chayaxõxõra nax aixcüma yixĩxü̃ i ngẽma nüxü̃ yaxugügüxü̃.
19Choma rü nüxü̃ chacua̱x nax woetama aixcüma yixĩxü̃ nax pegü pitoyexü̃ nax ngẽmawa nüxü̃ icuáxü̃ca̱x nax texégü tixĩxü̃ ya yíxema aixcüma Cristuarü duü̃xü̃gü ixĩgüxe.
20Rü ngẽma pegü nax pitoyexü̃gagu nixĩ nax tama aixcüma tórü Corixü̃ picua̱xüü̃güãcüma yixĩxü̃ i penangṍxü̃ i tórü Coriarü Õna i Ü̃ünexü̃ i ngẽxguma pengutaque̱xegüü̃xgu.
21Erü ngẽxguma penangõ̱xgu i ngẽma Õna i Üünexü̃ rü wüxichigü rü peñuxãẽgü nax pexíra nax penayaxuxü̃ca̱x i ngẽma õna. Rü yoxni i ngẽma togü rü ngẽxma nataiyae, rü togü rü nayaxaxgü ya bínu ñu̱xmata nangãxe.
22¿Ẽ̱xna pengechiü̃gü rü ngẽmaca̱x tama ngéma pechibüexü̃ rü pexaxegüxü̃? ¿Tü̱xcüü̃ nüxü̃ pexoe i ngẽma togü i yaxõgüxü̃ rü penaxãneexẽxẽ i ngẽma yaxõgüxü̃ i taxuxü̃ma nüxü̃́ ngẽxmagüxü̃? ¿Rü ta̱xacüxü̃ tá pemaxã chixu i ñu̱xmax? ¿Pexca̱x rü tá pemaxã chataãxẽxü̃? Dücax, pemaxã nüxü̃ chixu rü tama pemaxã chataãxẽ naxca̱x i ngẽma pexügüxü̃.
Tórü Coriarü Õna i Üünexü̃chiga
(Mt. 26.26-29; Mr. 14.22-25; Lc. 22.14-20)
23Rü ngẽma ngu̱xẽẽtae i pemaxã nüxü̃ chixuxü̃ rü tórü Corixü̃tawatama chanayaxu. Rü yexguma tórü Cori ga Ngechuchuxü̃ ínaxuaxü̃gu, rü yematama chütaxü̃gu rü nüma rü nanayaxu ga wüxi ga paũ.
24Rü Tupanana moxẽ naxã, rü yemawena rü inanabücu, rü ñanagürü: “Ñaa nixĩ i chaxune i pexca̱x ichaxãxü̃chiga. ¡Rü penangṍ i ñaa paũ nax ngẽmaãcü peãẽwa choxna pecua̱xãchiexü̃ca̱x!” ñanagürü.
25Rü yexgumarüxü̃ ta ga chibüwena rü Ngechuchu nanayaxu ga wüxi ga pochíyu ga bínuchíümaxã ããcuxü̃, rü ñanagürü: “Daa bínu rü wüxi i cua̱xruxü̃ nixĩ nax ngexwaca Tupana duü̃xü̃gümaxã ixunetaxü̃ i maxü̃ i taguma gúxü̃chiga. Rü chaugü ya pexca̱x ibacüwa nixĩ ya Tupana pexü̃ nüxü̃ cua̱xẽẽxü̃ i ngẽmachiga. Rü ngẽxguma penaxügüxü̃gu nax daa bínu pixaxgüxü̃ rü ngẽmaãcü tá penaxü nax choxna pecua̱xãchiexü̃ca̱x”, ñanagürü ga Ngechuchu
26Rü guxü̃guma i ngẽxguma penangõ̱xgu i ñaa paũ rü peyaxaxgügu ya daa bínu rü ngẽmawa tá duü̃xü̃güxü̃ nüxü̃ pecua̱xẽxẽ nax tórü pecaduca̱x nayuxü̃ ga tórü Cori. Rü ngẽmaãcü tá penaxü ñu̱xmatáta wena nataegu i nümax.
Tórü Coriarü Õna i Üünexü̃chiga
27Natürü ngẽxguma chi texé tama tamearü maxü̃xãcüma tanangõ̱xgu i Coriarü paũ i üünexü̃ rü tayaxaxü̱xgu ya yimá bínu ya üünecü, rü pecadu taxü nape̱xewa ya tórü Cori ya taxca̱x yucü rü nagü ibacü.
28Rü ngẽmaca̱x naxü̃pa nax tanangṍxü̃ i ngẽma paũ rü nax tayaxaxüxü̃ ya yimá bínu, rü name nixĩ i wüxichigü mea tümaarü maxü̃ tangugü rü nataxu̱xma i ta̱xacürü chixexü̃ i tümaarü maxü̃wa ngẽxmaxü̃.
29Erü ngẽxguma tama tamearü maxü̃ãcüma tanangõ̱xgu rü tayaxaxü̱xgu, rü tügütama poxcuwa taga. Erü tama mea nagu tarüxĩnü nax tórü Corixü̃nechiga yixĩxü̃ i ngẽma paũ rü yimá bínu.
30Rü ngẽmaca̱x nixĩ i muxũchixe i petanüwa rü pida̱xaweexü̃ rü peturaexü̃, rü ñuxre i togü rü marü nayuexü̃.
31Natürü ngẽxguma chi tóxrütama maxü̃ tangugügu naxü̃pa nax nangṍxü̃ i ngẽma Coriarü õna, rü nüma rü taxuca̱x tüxü̃ napoxcue.
32Natürü ngẽxguma tórü Cori ñoma i tórü maxü̃wa tüxü̃ poxcugu, rü ngẽmaãcü tüxü̃ inayarüwe̱xãchixẽxẽ nax tama yixcüra naanearü gu̱xgu tüxü̃ napoxcuxü̃ca̱x wüxigu namaxã i ngẽma duü̃xü̃gü i tama yaxõgüxü̃.
33Rü ngẽmaca̱x, Pa Chauenexẽgüx, ngẽxguma pengutaque̱xegügu nax penangṍxü̃ca̱x i ngẽma õna i üünexü̃, rü name nixĩ i pegü ípenangu̱xẽxẽ nax guxãma wüxigu mea penangṍxü̃ca̱x.
34Rü ngẽxguma chi texé taiya̱xgu, rü name nixĩ i tümapatawatama tachibü nax tama Tupana pexü̃ poxcuexü̃ca̱x naxca̱x nax chixexü̃ pexügüxü̃ i perü ngutaque̱xegüwa. Rü ngẽma to i guxchaxü̃gü i pexü̃́ ngẽxmaxü̃, rü choma rü tá chanamexẽxẽ i ngẽxguma petanüwa chaxũxgu.
© 2022, Wycliffe Bible Translators, Inc. All rights reserved.
