MARIKO 9

1Yeso yavavolera kandi, “Ligali ligali inzi muvooleraa, valala ku munyi avasingiyi hano sivalizazama ilikuza kuduuka lwa valilola Uvwami vwa Nyasaye ni vuzaa mu zinguru.”

Yeso yagirung'ana iligondo

(Mat. 17:1-13; Luk. 9:28-36)

2Inyima wa madiku sita, Yeso yavugula Petero, Yakobo na Yohana, naavimilira kuzia mu kiguru ikitambi, aha vaali venyine. Nonoho, Yeso yagirung'anywa naava ni ligondo lindi imbiri wavo. 3Zinguvu zizie ziagwa izindavu ligali, kali mufuyi wumulirova siyaali yakanyali kuzilaviza zing'ereng'ane kuli ndio mba. 4Maku aviigi vavaga yavo valora Elija na Musa nivavolerana na Yeso. 5Petero yavolera Yeso “Mwigizi, ni vulahi kove hano. Leka kwumbake ividioli vivaga. Kilala ichicho, ikindi cha Musa, ni ikindi cha Elija.” 6Petero harara na vandi vaali nu vuti na siyamanya ichavoolaa mba.

7Maku lilesi liaza nilivakinga, nu umwoyo gwahulirika mu lilesi zana ni govoora, “Uyu nu Mwana wange wandaayaanza. Mumuhuliri!” 8Nonoho lwa viikivuka, si valora umundu wundi mba, nataveeye Yeso yenyine harara navo.

9Lwa vaali ni vasulunguta kutura mu kiguru, Yeso yavalaga vatavoolera umundu kali mulala ivindu via valoli, kuduuka lwu Mwana wa Adamu alisimuguka kutura mu likuza.

10Vavisa amakuva gavaloraa, nivateevana aveene ikivuni chi lisimuguka kutura mu vakuzu. 11Vateva Yeso, “Kigira ki avigizi vi Lilaga vavoola ndi Elija kuduuka yaaze kutanga?”

12Yavativulira, “Yee, ligali Elija alaza kutanga aduuki kwetegekiza vuli kindu. Navuzwa kigira ki gang'odwa mu Mang'oda Matakatifu ndi, Mwana wa Adamu alakubizwa ikivi kinyingi nu kuchaywa? 13Navuzwa muvooleraa, ligali Elija yamala kuuza, na avandu vamukolera kuli gavayaanzizaa kuli gang'odwa kuye.”

Yeso yahonyia muyaayi waali ni lidemoni

(Mat. 17:14-21; Luk. 9:37-43)

14Lwa vaduuka ku aviigi vandi, valora ikiduma ekenene ni kivakumbirizi harara na avigizi vi Lilaga nivahangalizanaa navo. 15Lwa vandu vosi vamulola vagenya ligali, ni vazia kuye ni vamucheliza. 16Yeso yavateva, “Muhangalizaniraa ki?” 17Umundu mu kiduma yamutivulira, “Mwigizi, ndeti muyaayi wange ku ivi kigira aveeye nilidemoni muye kandi aveeye idimbidi. 18Lwi lidemoni limugumiraa, limulasa hasi, ma atulaa ulufulu, ma kandi atangaa kudiedieyiza amiinu, ma atangalala vuzwa. Lwa ndeevi aviigi vovo valitulizi, vaatamiywi.”

19Yeso yavavolera, “Likula litaveeye ni lisuuvira munyi! Ndamenya harara ni munyi kuduuka ng'inga ki! Ndikuzira ni munyi kuduuka ng'inga ki! Muleeti hano ku inzi.” 20Kunangwa valeta muyaayi oyo ku Yeso.

Lwi lidemoni lialola Yeso, nonoho liamusang'usura na muyaayi oyo yagwa nagalagara hasi, natura ulufulu mu munwa. 21Yeso yateeva baba weve, “Yaatanga kuva ndi kutura ng'inga ki?”

Naye yamutivulira, “Kutura mu vwana vwivwe. 22Haali kanyingi lidemoni liageriza kumwita ku limutuula mu muliru anoho mumazi. Okoveere zimbavasi, na okokonye niiva galanyalika!”

23Yeso, yamuvolera, “Yee, niiva ivi umwene unyala! Ivindu viosi vinyalikaa ku mundu oveeye ni lisuuvira.”

24Nonoho baba wu muyaayi zana oyo yahanzuka navoora, “Mwami inzi mbeeye ni lisuuvira, navuzwa ni likuzuzu vuzwa. Ngonya mbula ndava ni lisuuvira iliduukiru!”

25Yeso yalora avandu nivisuunda ahimbi kuvo ma yagondokera ilidemoni navoora, “Ivi lidemoni litamolomaa ni liahana matu, ngulaga, tula mu muyaayi uyu kandi utingira muye kandi!”

26Vwangu lidemoni liakuba lukwiri; ni limusang'usula vuvi ligali, ma ni limuleka. Muyaayi oyo yaali kuli umukuzu. Avanyingi kuvo vavoola, “Akuzi!”

27Navuzwa Yeso yamugumira umukono namukoonya, na yasingira.

28Lwa Yeso yaali niyakingira munyumba, aviigi veve vazia kuye naveeye yenyine ni vamuteeva, “Kigira ki kunyi si kunyali ku lituliza?”

29Yavavolera, “Lidemoni ulugano yilu silinyala kutulizwa nigatali ni lisaala lienyine; Ikindu kindi mba.”

Yeso yamoloma kandi kigira Likuza lilie

(Mat. 17:22-23; Luk. 9:43-45)

30Lwa Yeso na aviigi veve vaatura yo, valonda inzira ivitiraa Galilaya. Yeso si yenya avandu vamanye aha yaali mba, 31kigira yaali ni yigizaa aviigi veve: Yaviigiza navoora, “Mwana wa Adamu alaviikwa mu makono ga avandu avalimwiti. Navuzwa niyakiitwa, inyima wa madiku gavaga, alasimuguka.”

32Aviigi veve si vamanya ikivuni chi livoora lilie mba, kandi vaatia kumuteeva.

Nivwaha oveeye munene mwigulu?

(Mat. 18:1-5; Luk. 9:46-48)

33Vaduuka Kaperinaumi, na lwa yaali munyumba, “Yeso yateeva aviigi veve, kigira ki ni muhangalizana kunzira?”

34Navuzwa vaakiring'ana kigira kunzira vaali nivatevanangi, nivwaha oveeye munene kuvo. 35Yeso yikala hasi naalanga avaari likomi na vaviri navavoolera, “Mundu na ava niyenya kuva imbiri kuduuka ave winyima kandi umutumikiri wa vosi.” 36Yavugula umwana mukekeeke naamusingiriza imbiri wavo, naamukumbelera ma navavoolera, 37“Uvugilira mwana kuli uyu mu lieta liange, avugiliraa inzi; na uyu uvugilira inzi siavugiliraa inzi, navuzwa avugiliraa kandi uyu uwanduma.”

Mundu utahing'anaa ni kunyi aveeye harara ni kunyi

(Luk. 9:49-50)

38Yohana yamuvolera, “Mwigizi, kwalola umundu natulizaa amademoni mu lieta liilio, nikumugaya kigira siaveeye mulala kukunyi mba.”

39Navuzwa Yeso yavoola, “Mutamugayi mba, kigira si haali ho nu mundu okolaa kelolekizu ku lieta liange unyala kutivula madamanu ku inzi. 40Kigira utahing'anaa ni kunyi aveeye harara ni kunyi. 41Ligali muvooleraa, ku vosi umuha ekekombe cha mazi munwi kigira muveeye harara ninzi, alanyoola amadanyi.”

Kwikigatariza avandi

(Mat. 18:6-9; Luk. 17:1-2)

42“Mundu wosi okola mulala ku vakekeeke, yava kuvula kusuuvira mu inzi, vwakaveeye vulahi ulugina lonene lusungwi mwigoti, ma asiuvwi mu luliva lwinyanza. 43Na niiva umukono gugwo gwakakokoli wikigitale no kokora uvwoni, gaduukanaa ugukale. Ni vulahi kwingira mu livamwoyo nu mukono mulala kuvita kuva na makono gombi ma uzie mu gehena, mu muliru gutasimaa. [ 44Umwene yimwo izing'ende ziliizaa avandu sizikuzaa mba; kandi muliru gusimaa mba.] 45Niiva ekerenge chicho kilakokola okole uvwoni, kandi, ukikalage! Ni vulahi kwingira mu livamwoyo umulema kuvita kuva ni virenge viombi ma usiuvwi mu gehena [ 46umwene yimwo izing'ende ziliizaa avandu sizikuzaa mba; kandi muliru gusimaa mba.] 47Kandi emoni yooyo ne kokoloa okole uvwoni, ugitulizi! Nivulahi, kwingira mu vwami vwa Nyasaye ne moni ndala kuvita kuva ni zimoni ziombi na usiuvwi mu gehena. 48Umwene yimwo zing'ende zitakuzaa zimenyaa mu, kandi umuliru gutasimaa goveeye mu.

49“Vuli mundu alatakaswa nu muliru kuli ikisiuviliru kitakasangwa ni ijumbi.

50“Munyu numulahi, navuzwa niiva gulagotiza ekenosi chagwo, unyala kokora ki ogolombe gugwi munyu kandi?

“Muve ne kenosi chu vulina hagati hinyu, kandi mumenye mu mirembe na vandi.”

Currently Selected:

MARIKO 9: LOGOOLI

Highlight

Copy