MARIKO 8
8
Yeso yalihiza avandu zielefu zine
(Mat. 15:32-39)
1Mu madiku yago kiduma kenene chavugana kandi, na kigira avandu sivali ni chukulia mba, Yeso yalanga aviigi veve, navavoolera, 2“Mbererera avandu yava kigira vaali harara nainzi amadiku gavaga, na kalunu sivaveeye ni chukulia mba. 3Niiva ndavavolera vazie yengo ninzara, ihuyuki ilatuula valala kunzira, kigira valala kuvo vatuli ihale.”
4Aviigi veve vamuteeva, “Mundu anyala konyoora hayi ichukulia mu changalangwe ichukulihiza avandu yava vosi?”
5Yeso yavateva, “Muveeye ni migadi janga?”
Navo vaamutivulira, “Saba.”
6Yalaga avandu viikare hasi. Maku yavugula migadi saba nasaandiza Nyasaye, nameganyia, nahaana ku aviigi vagavuliri avandu. 7Vaali kandi nu tusuzi tutaveeye utunyingi. Yeso yagasiza utusuzi zana yitwo navoora tugavulilwi avandu kandi. 8Avandu valia ni viiguta. Vadoola amadonye gaatigala, ma ni giizura ivihiinda saba. 9Avandu vosi avaalia vaali avaduuka izielefu zine. Yeso yavasivula 10nonoho yingira mu liato naviigi veve nazia mu kivala cha Dalimanuza.
Avafarisayo venya kelolekizu
(Mat. 12:38-42; 16:1-4)
11Avafarisayo vaza nivatanga koteeva Yeso amateeva. Vaamugeriza ni venya avakolere ekelolekizu chu kumanyia ndi aveeye nu vunyali kutura mwigulu. 12Yeso yatura umwika ligali kutura mugati mwimwe navoora, “Kigira ki likula yili lienyaa ekelolekizu? Muvooleraa agiligali, likula yili sililahevwa ekelolekizu choosi mba.”
13Maku yavaleka ni yingira mu liato niyambuka engeleka winyanza.
Mamera ga Vafarisayo na Herodi
(Mat. 16:5-12)
14Kunangwa aviigi vaali niviviliiyi kuvugura iviukulia, navuzwa vaali nu mugadi mulala mu liato. 15Yeso yavagerihiza navoora, “Mugerihi! Muhenze vulahi kigira amamera ga Vafarisayo na Herodi.”
16Aviigi vataanga kotevana aveene nivavoora, “Avoora ndio kigira sikoveeye ni migadi!”
17Yeso yamanya liganagana liavo navavoolera, “Kigira ki muvooraa simuveeye ni viukulia? Mukikiri kumanya kandi kuhulira? Imioyo jinyu ni midinyu? 18Muveeye ni zimoni navuzwa simulolaa mba? Muveeye na matu navuzwa simuhuliraa mba? 19Lwa ndameganyia imigadi jitano niimbana ku avandu izielefu zitano, ni vihinda vianga via mwadoola nivizuuyi amadonye?”
Navo vaamutivulira, “Likomi na viviri.”
20Yeso yavateva kandi, “Lwa ndaameganyia imigadi saba ku vandu izielefu zine, ni vihinda vianga via madonye via mwavungiza?”
Navo vaamutivulira, “Saba.”
21Kunangwa yavavolera, “Maku mu kikiri kumanya?”
Yeso yahonyia mboku wa Bezisaida
22Yeso yaduuka Bezisaida harara na aviigi veve. Avandu vamuleetera umundu umboku ni va mugoonyaa amudiiri. 23Yeso yagumira umboku oyo umukono naamuhira ichova wi lidaala. Lwa yaali niyakamutuuzira amate muzimoni zizie, yavika amakono kuye, ma namuteeva, “Unyala kolola ikindu choosi?”
24Umboku oyo yahenza mwigulu navoora, “Ndolaa avandu, navuzwa vaveeye kuli misaala jigendaa.”
25Yeso yaamuvikira amakono ku zimoni zizie kandi, na ziakunulwa naye natanga kolola ivindu viosi vulahi. 26Yeso yamuvolera “Zia yengo, na utiirana mu lidaala mba!”
Petero avulaa ndi Yeso aveeve Mesia Mwana wa Nyasaye
(Mat. 16:13-20; Luk. 9:18-21)
27Maku Yeso yazia naviigi veve mu madaala ga Kaisaria Filipi. Kunzira, Yeso yateeva aviigi veve, “Avandu vavoola inzi nivwaha?”
28Navo vaamutivulira, “Valala vavoola ivi ni Yohana Mubatizi, avandi Elija, na vandi vavoola oveeye mulala ku Vaporofeti.”
29Yavateva kandi “Na munyi muvooraa inzi nivwaha?”
Petero yamutivulira, “Ivi ni Mesia.”
30Maku Yeso yaviganihiza vatavoolera umundu kali mulala amakuva yaga.
Yeso yamoloma kigira lidambizwa, likuza ni lisimuguka lilie
(Mat. 16:21-28; Luk. 9:22-27)
31Maku Yeso yaatanga kwigiza aviigi veve navoora, “Gaduukanaa Mwana wa Adamu avitiri mulidambizwa ilinyingi nu kusuulwa na vakulundu na avasaalisi vanene harara na aviigi vi Lilaga. Aliitwa, na inyima wa madiku gavaga, alasimuguka.” 32Yeso yavavolera agene yaga havulavu. Kunangwa Petero yamuhira ha lovega natanga kumugaya. 33Navuzwa Yeso yagirung'ana nahenza aviigi veve naagondokera Petero na amuvoleraa, “Tula muzimoni ziange ivi Setani! Zing'anagani zizio siziveeye zia Nyasaye, navuzwa ni zia vandu.”
34Yalanga ikiduma cha vandu na aviigi veve, navavoolera, “Mundu ku vosi uwenyaa kononda, yigaye umwene ma agingi musalaba gwigwe ma yanonde. 35Kigira umundu wenyaa kohonyia livamwoyo lilie umwene alaligotiza, navuzwa umundu ogotizaa livamwoyo lilie kigira inzi, kandi kigira Ivangeri, alalihonyia. 36Ni vukala ki umundu anyoore lirova liosi, navuzwa agotizi livamwoyo lilie? 37Anoho umundu alahaana ki mu vogono vwi livamwoyo lilie? 38Niiva umundu woosi alava esoni kigira inzi na amigizu gange mu likula litaveeye na Nyasaye yiyi, kandi lichamu maku Mwana wa Adamu alakave zisoni naye lwaliiza. Zingelosi mu vukumi vwa Baba weve harara ni vatakatifu veve.”
Currently Selected:
MARIKO 8: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
