MARIKO 7

Miima ja avaguuga

(Mat. 15:1-9)

1Avafarisayo harara na avigizi vi Lilaga, avaari ni vatuli Jerusalemi vavunga harara imbiri wa Yeso. 2Valora valala ku aviigi va Yeso nivalizaa ichukulia chavo na mamisu. Sivali nivisaavi amakono munzira idukanaa mba.

3Kigira Vafarisayo na Vayuda vosi valonda amigizu ga vanyoola kutura ku avaguuga vaavo: sivalizaa chukulia nivatisaavi amakono gaavo munzira indahi kolondekana ni miima jaavo mba. 4Sivalizaa ikindu choosi kutura mu chiitu nivakikiri kuchogiza kutanga mba. Valonda malago ni miima jindi minyingi ja vanyoola, kuli kwogiza ivikombe, izinyingu, zibakuli ni vituria vie migasa.

5Kunangwa Avafarisayo na avigizi vi Lilaga vateva Yeso, “Kigira ki aviigi vovo si valonda imiima ja vaguuga viitu vaakolekela, navuzwa mu vogono yivwo, valiza na mamisu ku makono?”

6Yeso yavativulira, “Avagaadi munyi! Muporofeti Isaya yaporofeta agiligali ku munyi lwa yang'oda:

‘Avandu yava vanzizominya na makuva ameere, Nyasaye avoora,

navuzwa imioyo jaavo jiveeye ihale kutura ku inzi.

7Vaveeye ku ni kivuni chu kusigamira mba, kigira amigizu gaavo gaveeye vuzwa amalago ga vandu!’

8“Munyi mulekaa amalago ga Nyasaye ni mulonda imiima ja vandu.”

9Yeso yavavolera kandi, “Munyi muveeye ninzira yu vugadi, yu kusuura amalago ga Nyasaye kunangwa muduuki konyoora inzira yokolonda amigizu ginyu aveene. 10Musa yalaga, ‘Wizominyi baba woovo na mama woovo,’ kandi, ‘Uyu onyegaa baba anoho mama weve, gamudukira akuzi.’ 11Navuzwa munyi mwigizaa ndi niiva umundu aveeye ni kindu cha anyala kokonya nacho baba weve anoho mama weve, navuzwa avoole, ‘Yiki keveeye Koribani,’ agaveeye kovora keveeye cha Nyasaye, 12sianyala kunigwa kokonya baba weve anoho mama weve mba. 13Munzira yiyi, amigizu gamuhanaa ku vandi gatulizaa ho likuva lia Nyasaye. Viveeye ho kandi ivindu vindi vinyingi viu lugano yilu ivia mukoraa.”

Vindu vikola umundu kuva umudamanu

(Mat. 15:10-20)

14Maku Yeso yalanga kandi ikiduma cha vandu navavoolera, “Munyi mwosi mumbulirizi, ma mumanyirize. 15Ikindu kitulaa ichova ma chingira mu mundu sikinyala kumulomba ave mudamanu kolondekana nu mwima mba. Nitali ivindu vituraa mu mwoyo gwu mundu nivio ivimukolaa umudamanu. 16[Nimuva nimuveeye na matu gu kuhulira, muhuliri!]”

17Lwa yaali niyakatula mu kiduma cha vandu nu kwingira munyumba, aviigi veve vamuteeva ilivoola liu lugano yilu. 18Yeso yavavolera, “Kali munyi kandi simuveeye avageri kuli avandi. Munyi si mumanyi ndi ikindu kingiraa mu mundu kutura ichova si kinyala ku mukora umudamanu mba, 19kigira si kimwingira mu mwoyo mba, navuzwa kizizaa munda, na inyima kitulaa ichova?” Mu livoora yaga, Yeso yavoola iviukulia viosi vive iviukuliivwa.

20Yaazizagilira kovora, “Keveeye ikitulaa mu mundu nicho ikimukolaa avuli kuva munifu. 21Kigira ivitulaa mugati mu mwoyo gwu mundu vituraa mu zing'anagani zindamanu izimwimiliraa kokora uvudamanu zing'ano ziosi, ukunuura, ukwita, livolizana, 22okoheya, ukukayirwa, uvuviti kokora kifavi chi zing'ano ziosi; ovovehi, embodoka, kolegeriza, kugina kwelola harara nuvusiru 23ivindu vidamanu yivi viosi vituraa mugati mwu mwoyo gwu mundu, ma vimukola mudamanu.”

Lisuuvira liu mukali Mukanani

(Mat. 15:21-28)

24Yeso yatura ho kandi, nazia mu kivala cha Tiro na Sidoni. Yingira munyumba na avula kwenya umundu kali mulala amanye; navuzwa si yaali unyala kwivisa mba. 25Ahene yaho umukali mulala, wu mukaana weve yaali ni lidemoni, yahulira Yeso aveeye mu. Yaza naagwa hasi, imbiri hi virenge via Yeso. 26Mukali zana oyo yaali Muguriki, wivulwa mu losoma lwa Foenisia mu Siria. Yagoonya Yeso akungi ilidemoni kutura mu mukaana weve. 27Yeso yamuvolera, “Avana vatange kwiguta; kigira sivoveeye vulahi kuvugura ichukulia cha vana nu kusigisira izimbwa mba.”

28Navuzwa umukali oyo yamuvolera, “Gaveeye ndio, Mwami; navuzwa kali izimbwa ziveeye isi we mesa ziliizaa amadonye gi viukulia via vana agatigala komesa.”

29Yeso yamuvolera, “Kigira livoora yili, zia yengo. Lidemoni limali kutura ku mukaana woovo!”

30Maku yazia yengo weve, nanyoora umwana naagoni ku kidali, ni lidemoni limali kutura muye.

Yeso yahonyia dimbidi

31Lwa nyima Yeso yatura mu kivala cha Tiro, naavitira Sidoni, naduuka kunyanza ya Galilaya ma naavitira hagati hi kivala cha Dekapolisi kilangwa. 32Avandu vamuleetera umundu waali dimbidi. Vamugoonya aviiki amakono kuye. 33Yeso yaamutuliza mu avandu naamuhira ha lovega yenyine, naviika videte vivie mu matu geege, naatuza amate ma namudiira ku lulimi. 34Inyima yahenza mwigulu natuula umwika, namuvolera, “Efaata,” iliveeye kovora, “Igulika.”

35Ahene yaho amatu geege giigulika, nu ululimi lwilwe ni lovoholorwa, namoloma vulahi. 36Yeso yavagaya nukuviganihiza vatavoolera mundu kali mulala likuva yilio. Navuzwa kali niyavagaya, vazizagilira kulandiza amakuva yago. 37Avandu vagenya ligali kuvita, ni vavoola, “Akolaa ivindu viosi vulahi akolaa kali avahana amatu vahuliri, ni zidimbidi vamolome!”

Currently Selected:

MARIKO 7: LOGOOLI

Highlight

Copy