MARIKO 6

Yeso yasuulwa ha Nazareti

(Mat. 13:53-58; Luk. 4:16-30)

1Yeso yatura ahene yaho niyirana mu lidaala lilie, aviigi veve vaamulonda. 2Ku lidiku lie Lisabato, yaatanga kwigiza mu lisinagogi. Avandu avanyingi avamuhulira vagenya ni vavoola, “Mundu uyu yaatuliza hayi amakuva yaga goosi? Ni vogeri ki vwa yahevwa yivu? Akokoraa ivilolekizu kuturana kuliha? 3Uyu siaveeye umuvazi, umwana wa Maria, amwavo Yakobo, Jose, Yuda na Simoni? Avavozo veve si vamenya hano harara ni kunyi?” Na vamusuura.

4Yeso yavavolera, “Muporofeti anyala koheevwa uvukumi ihale kutura yengo weve, navuzwa achayangwa mu lidaala liatura mu, harara naviiko kandi avinyumba yeeye.”

5Si yaali anyala kokora ho ivilolekizu ivinene mba, nitali yavika amakono geege ku valwaye vakekeeke kandi naavahonyia. 6Yaagenya ligali kigira sivali ni lisuuvira linene mba.

Yeso yatuma aviigi likomi na vaviri

(Mat. 10:5-15; Luk. 9:1-6)

Yeso yavodong'ana mu madaala agaali ahimbi, ni yigiza avandu. 7Yalanga aviigi veve likomi na vaviri, natanga kuvatuma vaviri, vaviri. Yavaha uvunyali kutuliza amademoni. 8Yavagaya navoora, “Lwa muzia mutavugula ikindu choosi mba, nitaveeye imbimbu yenyine. Mutavugula imigadi, anoho umusigo, anoho mabese zimuya. 9Mwiviki ivilato, navuzwa mutiviika izinguvu ziviri mba.” 10Yavavolera kandi, “Hoosi aha mwingirizwa munyumba, mu menye mu kuduuka lwa muturaa ho. 11Navuzwa hoosi ha vandu valivula kumwingiriza anoho ku muhulira, muturi ho namweye uluguchi lwu mu zinduvatiru zienyu, yaga gave ekelolero kuvo.”

12Kunangwa vaatura ni vilwazira avandu vaduuki kwiganira. 13Vakunga amademoni amanyingi, kandi ni vaavaka avalwaye avanyingi amaguta nu kuvahonyia.

Likuza lia Yohana Mubatizi

(Mat. 14:1-12; Luk. 9:7-9)

14Kalunu Umwami Herodi#6:14 Mwami Herodi: Herodi Antipa, mwamihi wa Galilaya. yahulira amakuva yago, kigira lusuma lwi lizominywa lia Yeso lwalanda mu kivala choosi. Avandu valala vavoola “Yohana Mubatizi usimuguki kutura mu vakuzu! Yicho nicho kivuni kigira naveeye ni zinguru yizi okokora vilolekizu vinene yivi muye.”

15Avandi navo vavoola, “Mundu uyu ni Elija.”

Avandi vavoola, “Uyu aveeye muporofeti kuli mulala ku vaporofeti va kale.”

16Lwa Herodi yahulira amakuva yaga, yavoola, “Uyu ni Yohana Mubatizi! Inzi ndaalaga umutwi gwigwe gukalwe, navuzwa usimuguki!” 17Herodi mwene yaali nahaani lilago Yohana agumirwi, ma avofwi ni minyororo, ma avikwi muvuhambe. Herodi yakola ndio kigira Herodia, umukali wa amwavo weve Filipo uwa yaali navuguyi kuva umukali weve. 18Yohana yaali na avoleeye Herodi, “Sigaduukana ivi kuvugura umukali wa amwavo woovo mba.”

19Maku Herodia yavugula uvutima ovonene ku Yohana, niyenya kumwita, navuzwa si yanyala mba kigira Herodi 20yaali ni yatia Yohana kigira yamanya aveeye umundu umulahi kandi umutakatifu. Kulwayago yamukinga vulahi. Herodi yayanza kuhuliriza aga Yohana yavoola, kali niiva yaahenda umwoyo ligali ing'inga yoosi yayamuhulirizaa.

21Lwu kumaliriza Herodia yanyoora uvwiyangu vwivwe. Lwi lidiku lie liivulwa lia Herodi liaduuka, Herodi yalombera avanene veve vosi, harara na vakulundu va Galilaya vosi lilia. 22Mukaana wa Herodia yingira navina, nayaanziza Herodi harara na avageni veve ligali. Mwami yavolera mukaana oyo, “Usave inzi choosi cha wenyaa nainzi ndakuha.” 23Herodi ya mwisuuhira navoora, “Choosi icha ondeva, ndakuha; kali niiva ni inusu yu vwami vwange.”

24Mukaana oyo yatura nazia koteeva mama weve, “Muteeve ki?” Naye yamutivulira, “Umutwi gwa Yohana Mubatizi.”

25Mukaana yirana vwangu ku mwami namuvolera, “Nyenya ombe ulwene yilu umutwi gwa Yohana Mubatizi ku loderu.”

26Mwami yavelera ligali, navuzwa kigira iliesuuha lia yisuhira imbiri wa vageni veve, si yayanza kuvunanyia lilaga lilie mba. 27Kunangwa umwami yatuma vwangu mulala ku vasikari avamulindaa, naamulaga aleete umutwi gwa Yohana. Musikari yazia nakalaga umutwi gwa Yohana muvuhambe, 28ma nagoleetera koloderu, naha umukana naye yaguhaana ku mama weve. 29Lwa aviigi va Yohana vagahulira, vazia kuvugura muviri gwigwe nivaguvika mu kilindwa.

Yeso yalihiza vandu zielefu zitano

(Mat. 14:13-21; Luk. 9:10-17; Yoh. 6:1-14)

30Avatumwa virana kandi nivaagaana na Yeso. Vamuvolera goosi aga vaali nivakoli kandi aga vigiza. 31Avandu vaali avanyingi avaazaa kandi nivazia, ukuduuka kali Yeso na aviigi veve nivadaka uvwiyangu vwukulia. Yeso yavolera aviigi veve, “Hambi kuzie kwenyine aha vandu vataveeye, musoose hakekeke.” 32Kunangwa vataanga logendo venyine mu liato nivazia aha vandu vavura kuva.

33Avandu vanyingi vaavalola nivazizaa, ma vavamanyiriza; kulwayago vaatura mu madaala goosi, ni vanyagura nivimila uwa Yeso na aviigi veve vazizaa, nivavavita kandi niviizura yo. 34Lwa Yeso yika ku lujinga lwinyanza, yalora ikiduma ekenene cha vandu navavererera, kigira vaali kuli amagondi gataali nu mwayi. Yaatanga kuvigiza ivindu vinyingi. 35Ing'inga yaali niviiti, kulwayago aviigi vazia ku Yeso ni vamuvolera, “Hano ni mukiziimi, kandi kalunu ing'inga iviti. 36Nivulahi ovoolere avandu yava vazie mu milimi nu mumadala gaveeye ahimbi, viguliri iviukulia.”

37Navuzwa Yeso yavavolera, “Munyi mu vahe ichavalia.” Navo vamuteeva, “Kuzie kugura imigadi ji vidonye mia mbiri viefeza kuvahe valie?”

38Yeso yavateva, “Muveeye ni migadi janga? Muzie mulole.” Lwa vaali ni vaakalola, vamuvolera, “Jiveeye ho imigadi jitano, ni zisuzi ziviri.”

39Yeso yavolera aviigi veve viikalize avandu vosi mu viduma. 40Maku viikara mu viduma via avandu mia, na avandi mu viduma via vandu amusini. 41Maku Yeso yavugula imigadi jitano ni zisuzi ziviri yizio, nahenza mwigulu, nasaandiza Nyasaye, nameganyia imigadi, naha aviigi veve vagavuliri avandu. Yavagavulira izisuzi ziviri yizio, kandi hagati haavo vosi.

42Avandu vosi valia niviguta. 43Aviigi vavungiza amadonye gaatigala ku migadi nu kuzisuzi. Vavungiza amadonye mu vihinda likomi na viviri nivizuuyi. 44Avandu vosi avaalia imigadi, vaali izieletu zitano.

Yeso yagenda ku mazi

(Mat. 14:22-33; Yoh. 6:15-21)

45Nonoho Yeso yavolera aviigi veve vingiri mu liato viimili imbiri, kuzia ku lwangereka lundi lwinyanza kuduuka Bezisaida. Naye yaali nakisiivula avandu vazie yengo. 46Lwa yamala kuvasiivula, yazia mu kiguru kusaala. 47Lwa mugolova gwaduuka iliato liali hagati munyanza naye yaali yenyine ku lujinga. 48Yalora aviigi veve nivanyang'anaa kuhila iliato kigira imbuza yaavahunzulanyia yiyi na yiyi. Lwa vwali nivuchezaa, hagati hi zisa tisa ni zisa likomi na ziviri zia mugamba, Yeso yazia kuvo na agendaa ku mazi ni yenya kuvavita. 49Navuzwa lwa vamulola na agendaa ku mazi, vaganagana ni kigiingi. Vaakuba izikwiri. 50Vosi lwa vamulola, vaadegera ligali.

Nonoho Yeso yamoloma kuvo navoora, “Lemi mioyo, ninzi. Mutatia mba!” 51Yanina mu liato harara navo kandi imbuza yakiring'ana. Aviigi vagenya ligali, 52kigira sivamanyiriza kuli gakolekaa lwa Yeso yalihiza avandu izielefu zitano mba; iziganagani ziavo ziali nu vudinyu kumanyiriza agiligali ge kelolekizu yiki.

Yeso yahonyiaa avalwaye mu kivala cha Genesareti

(Mat. 14:34-36)

53Lwa vaali nivakambuka inyanza, vaduuka mu kivala cha Genesareti ni vavoha iliato ku lujinga. 54Lwa vaatura mu liato, avandu vamanyiriza Yeso vwangu. 55Kunangwa vanyagura mariviti, mu kivala yicho choosi, ni vataanga kugingira avalwaye vaavo ku majambi, ni vavaleeta havundu hoosi aha vahulira Yeso aveeye. 56Hoosi aha Yeso yazia, mu tudaala, mu madaala, anoho mu kivala choosi, avandu valeta avalwaye mu viitu, ni vamuhoomba avavugiliri kudiira vuzwa ku lukigiti lwi inguvu yeeye. Na vosi avamudiira vaahona.

Currently Selected:

MARIKO 6: LOGOOLI

Highlight

Copy