Matayo 24

1Yesu ya twula mu litempeli, ni yenya kutsia; na vegidzwi veve vadza kuye kummannya tsinyumba tsyelitempeli. 2Navutswa ya tivula na a va volera, Mu lola vindu yivi vyosi? Iigali mmu volera Si li la tigala hano ligina lilala ku lindi li ta gwihidzwa hasi.

3Lwa yikala mu kigulu kya Mizeituni, avegidzwi vadza makiriri, ni va vola U ku volere vindu yivi vi la va inyinga ki? Kandi kilolekidzu kyeliduka lilyo ki la va ndi, kandi kyelihera lyenyinga yiyi? 4Yesu ya tivula na a va volera, Mu gelihe avandu kali mulala va ta mu gotidza. 5Kigira vanyingi va ladza ni lieta lyange, ni va vola, Inze niye Kristo; va la gotidza vanyingi. 6Kandi mu la hulira mahe namakuva gamahe mu henze, mu ta henda myoyo mba kigira vindu yivi vi ladza; navutswa kiheri ki kikiri. 7Kigira ihiri i la vukira ihiri, nobwami bu la vukira ubwami; kandi ha la va netsinzala nokudegera kwelirova hale ne hale. 8Navutswa vindu yivi vyosi vi veye litanga lyobusaliri. 9Inyinga yeneyo va la mu zama mu kivi, nokumwita: kandi tsihiri tsyosi tsi la mu dun ira kigira lieta lyange. 10Hene yaho vanyingi va likigitala, kandi va la zamana avene, nokudunyirana. 11Navaprofeti vobubehi vanyingi va la twula na va gotidze vanyingi 12Kandi kigira kirage ki la daswa, ubuyanzi bwavanyingi bu loneka 13Navutswa uyu wikudzihidza kuduka ku kiheri, a la honnywa. 14Kandi amakuva malahi yaga gobwami ga lilwadzwa mu lirova lyosi ga ve kilolekidzu ku tsihiri tsyosi; ma kiheri ki la duka.

15Lwa mu lola livihiridzwa lyokwononya ya Danyeli mprofeti ya vola, li singira mu hatakatifu (u somanga a manye), 16hene yaho ava veye mu Buyuda virukire mu vigulu: 17uyu u veye ku inyumba igulu a tika mba kuvugula vindu vi veye mu inyumba yeye: 18na uyu u veye mu mulimi a tirana kuvugula ingubo yeye. 19Navutswa ubuda mano bu veye kuvo ava veye inda, nokuvo ava nyunnya, mmadiku yago 20Navutswa mu saale liruka lyenyu li ta va inyinga yobukindu, kandi ku lidiku lyelisabato: 21kigira yeneyo kivi kinene ki la duka, kusira kyosi kutwula ku litanga lyelirova kuduka kalunu, kandi si ki li va ho. 22Madiku yago ni ga vula kwimbihidzwa mibiri gyosi si gyi li nyala kuhona: navutswa madiku yago ga limbihidzwa kigira avatovoleywi. 23Inyinga yiyo mundu na a mu volera, Nguyu hano Kristo, kinga Ngoyo yaho, mu ta bugirira mba. 24Kigira va la twula vakristo vobubehi navaprofeti vobubehi, kandi va ia leta vilolekidzu vinene, nevyokugennya vinene; kuduka kugotidza kali ava tovoleywi, ni va nyala kuvagada. 25Henza, inze ntangi kumuvolera. 26Kunangwa ni va li mu volera Henza, a veye mwigendanyama; mu ta tsia mba: Henza, a veye mu inyumba mu bwasi; mu ta bugirira mba. 27Kigira kuli luheni lu twula ivugwe na lu ng'ereng'ana madioli; iduka lyo Mwana wa Adamu li la va ndiyo. 28Hekikudzu ki veye tsididzu tsi la vuganira ho.

29Navutswa inyima yekivi kyanadiku yago bwangu liuva li la nwaminywa, nomweli si gu liaaka etsing'ereng'ani tsi la guluka mwigulu, netsingulu tsyomwigulu tsi la degeridzwa: 30kunangwaheneyaho ki la lolekana migulu kilolekidzu kyo Mwana wa Adamu: ma tsihiri tsyosi tsyelirova tsi la lira, kandi va la lola Mwana wa Adamu yadza ku malesi gegulu netsingulu nobukumi bunene. 31A la tuma tsingelosi veve nomwoyo munene gwekisiliva, navo va la vu gannya avatovoleywi veve va twule ku tsimbuudza tsine, kandi va twule ku kiheri kilala kandi kuduka ku kiheri kindi kyegulu. 32Kalunu mwegi ku mkuyu, mu manye lugano lwagwo: lwa lusya lu gwiye ludoto ni lu sibuka amatu, mu manya inyinga yoluya i veye himbi. 33Ndiyo kandi mwinye inyinga mu lola vindu yivi vyosi, mu manye a veye himbi, kali ha kiliango. 34Ligali mmu volera, Likula yili si li li vita, vindu yivi vyosi vi kikiri kukolwa. 35Ligulu nelirova li la vita, navutswa amakuva gange si ga li vita mba. 36Navutswa lidiku yilyo nenyinga yiyo si ha li nomundu u manya, kali tsingelosi, kandi Mwana, navutswa Dada yeng'ine. 37Kuli mu madiku ga Nuhu, kandi liduka lyo Mwana wa Adamu li la va ndiyo. 38Kuli mu madiku yago imbiri wa madzi manene va li ni va lia, ni va nwa, ni va sererana, ni va kwebwa, kali kuduka ku lidiku lya Nuhu yingira mbwato, 39si va manya, amadzi ga luha ga duka ni ga hila vosi; kandi liduka lyo Mwana wa Adamu li la va ndiyo. 40Inyinga yeyo avandu vaviri va la va mummulimi; mulala a la hilwa na mulala a la tigala: 41avakali vaviri va la siya ku lugina; mulala a la hilwa na mulala a la tigala. 42Kigira yaga, Lindi: kigira si mu manya lidiku lyo Mwami wenyu yadza. 43Navutswa mu manye yaga, mwene inyumba a va wa manya inyinga mwivi yadza, nkano ya linda a la vula kuleka inyumba yeye i hudulwe. 44Kigira yaga mwinye kandi mwetegeke; kigira isaa ya mu ta gana gana Mwana wa Adamu yadza.

45Mutugwa mulahi nomugeeri ni bwaha, womwami wewe a vika a ve munene wenyumba yeye, kuvaha vyokulia vyavo vyetsinyinga tsi duka? 46A veye nobugasu womwami wewe a li nyola na a kola ndiyo lwa a ladza. 47Ligali, mmu volera, a la mu vika ku vyosi vya a veye navyo. 48Navutswa mutugwa uyu mudamano na a va na a la vola mu mwoyo gwigwe, Mwami wange a ki lindagira; 49na a tanga kukuya avakye veve, na a lia na a nwa halala navahambiki; 50mwami womutugwa uyo a ladza ku lidiku lya a ta ganagana, ne isaa ya a ta manya, 51a la mu temlnya, na a mu ha kidieli kikye halala navagadi: ha la va nokulira nokudyedyeidza amino.

Currently Selected:

Matayo 24: MBE

Highlight

Copy