Matayo 23

1Hene yaho Yesu ya volera viduma na vegidzwi veve, 2na a vola, Avang'odi na Vafarisayo vikala ku kisako kya Musa: 3kunangwa vyosi vya va mu volera mu kole, mu vi gumire: navutswa mu ta kola kuli va kola; kigira va vola, navutswa si va kola. 4Yee, va boha misigo miliduhu gyi mina, ni va vika ku mavega gavandu; navutswa avene va sula kugyisunda kali nekidete. 5Navutswa miyinzi gyavo gyosi gya va kola, va kolanga avandu va va lole: va kola tsifilateri tsyavo tsimamba lalu, ni va dasa tsing'oli ku nyasi kwetsingubo tsyavo, 6ni va yanza kwikala hambiri mu lilia, kandi visako vinene mu masomero, 7nokuchelidzwa mu vitu, nokulangwa Rabi 8Navutswa mwinye mu ta langwa Rabi mba: kigira mulala a veye mwegidzi wenyu, na mwinye vosi mu veye avamwavo navamwavo. 9Mu ta langa mundu dada wenyu mu lirova mba: kigira mulala a veye Dada wenyu, uyu u veye migulu. 10Kandi mu ta langwa avami: kigira mulala a veye Mwami wenyu, ni Kristo. 11Navutswa uyu a veye munene ku mwinye a la va mtumekiri wenyu. 12Uyu wenenehidza a la gehidzwa; naye wegehidza a la nenehidzwa.

13Navutswa O Bayaye bu veye ku mwinye, avang'odi na Vafarisayo, avagadi kigira mwigalira avandu mu bwami bwomigulu: kigira mwinye si mwingira mba, kandi si mu va leka avingiranga, vingire.

14O Bayaye bu veye ku mwinye, avang'odi na Vafarisayo, avagadi kigira mu mira tsinyumba tsya vakunzakali, nokwelolekidza mu saala masaala matambi: kigira yaga likalagirwa lyenyu li la va budinyu kuvita vya avandi.

15O Bayaye bu veye ku mwinye, avang'odi na Vafarisayo avagadi kigira mu vodonkana inyanza nelirova mu duke kukola mundu mulala a hambane na mwinye; na lwa a mala kugwa ndiyo, mwinye mu mu kola mwana wa gehena kuvita mwinye hali kaviri.

16O Bayaye bu veye ku mwinye, avimiri avaboku, ava vola, Uyu wisuha ku litempeli, si ki li kindu; navutswa ku vosi wisuha ku ithahabu yelitempeli, webohi. 17Avasiru na vaboku ki li ha kinene, ithahabu, naho litempeli li kola ithahabu i ve intakatifu? 18Kandi kuvosi wisuha ubwali, si ki li kindu; navutswa uyu wisuha isadaka i veye ku, webohi. 19Mwinye avaboku: ki li ha kinene, isadaka, nabo ubwali bu kola isadaka i ve intakatifu? 20Kigira yaga, uyu wisuha ku ubwali, yisuha ku ubwali nevindu vyosi vi veye ku. 21Na uyu wisuha ku litempeli, yisuha ku litempeli, kandi ku uyu u menya mu. 22Kandi uyu wisuha ku ligulu, yisuha ku kisako kya Nyasaye, kandi uyu wikala ku.

23O Bayaye bu veye ku mwinye, avang'odi na Vafarisayo, avagadi kigira mu tunga izaka ya inaana, nebizari, nekumini, navutswa mu leki amakuva manene gelilaga, bulungi, netsimbabasi, nelisuuvira: navutswa yivi nu bulahi kuvikola, vindu vindi vyembiri muvule kuvileka. 24Avimiri vaboku, mu lomba kiseso kwigalira ingi, navutswa mu mira ing'amia.

25O Bayaye bu veye ku mwinye, avang'odi na Vafarisayo, avagadi kigira mwogidza kikombe nesahani igulu, navutswa mugati vi zuye ubunyagi nubunuuli. 26Ive Mufarisayo mboku u tange kwogidza mugati mwekikombe nomwesahani vi duke kandi kuva vilahi igulu.

27O Bayaye bu veye ku mwinye, avang'odi na Vafarisayo, avagadi kigira mu veye kuli vilindwa vi lavidzeywi, igulu vi fwana vi veye vilahi, navutswa mugati vizuye vigumba vyavakudzu, nobugundu bwosi. 28Kandi ndiyo mwinye habulavu mu loleka ku vandu kuli avalungi, navutswa mugati mwizuye ubugadi nekirage.

29Ubudamano bu veye ku mwinye, avang'odi na Vafarisayo, avagadi kigira mwombaka vilindwa vyavaprofeti, na mu gasidza tsindidza tsvavalungi, 30kandi mu vola, Kwinye ku va kwa li ho mu madiku ga vaguga vetu, nkano si kwa nyala kusanga navo mu masahi gavaprofeti. 31Ku yaga mweyama mu veye avana va yavo aviita avaprofeti. 32Mwizulitse kigero kyavaguga venyu. 33Tsinzoka mwinye, avana vevihirigoma, mu la hona naki mu likalagirwa lyegehena? 34Kigira yaga, henza, ntuma ku mwinye avaprofeti, navageeri, navang'odi: avalala kuvo mu liita nokuvabamba; navandi kuvo mu la va kuya mu masomero genyu nokuvadambidza mu madala na madala: 35amasahi malungi gosi aga tadza mu lirova ga duke kuva ku mwinye, kutwula ku masahi ga Habili mulungi kali kuduka ku masahi ga Zekaria mwana wa Barakia, wa mwiitira hagati ha hatakatifu nobwali. 36Ligali, mmu volera, Vindu yivi vyosi vi la gwira likula yili.

37O Yerusalemi, Yerusalemi, lidala liita avaprofeti, nokulasa magina avatumwa kulyo Kuduka tsinyinga hali kanga ni nyenya kuvungidza avana vovo kuli inyavuli i vungidza viminyo vyayo mu mwetsimbaha tsyayo, navutswa mwambakana 38Henza, inyumba yenyu i tigaye ku mwinye yoneki. 39Kigira mmu volera, Si mu li ndola kandi, mu luhe mu duke kuvola, A veye nobugasu yadza ku lieta lyo Mwami.

Currently Selected:

Matayo 23: MBE

Highlight

Copy