MARKO 16

1Nyini kiwer asispa Sapato,* kwal Marya Makdalena nko Salome nko Marya yoto Yakopo tïkwïn cho ngutoy lö pïlpïlpïl atökïpa kïnyïra por pö Yeso. 2Ompö asispa Chumapili kiwasan, kïpa kutang pïrïm. 3Kïngölonotoy chane lö, “Ekïngo nyo mïlmïltowecha köghay mi pïrïmponay kukat?” 4Nyini kitopöntö, kïsïwa lö, kïchï kikemïlmïlta köghay kunach. Ki wow koghoni nyoman. 5Nyini, kïlït chane pïrïmponay, kïsïwa chumwak nyo kimpuröy ompö ewu tagh loköy ananka nyo rel, kïmïghyö koruchay nyoman.

6Kïlenchï chumwakanay, “Mowöghisïyi, onkïtön lö, oyörekwa Yeso, nyo pö Nasaret, nyay kikïwudochï kimurtöwon. Melö mi yi, kikututï! Arose, ayi ataye kikïrorchï. 7#Mat 26:32; Mrk 14:28. Wölo ape omwochinö kinetankachi nko Petro lö, ‘Kinyaghakwa tagh nyinte kiwö Kalilaya, onyorchinekwa nyinte wölini, le atanye kimwowokwa.’ ” 8Kïlenyona kïryagha koruchay pïrïmponay, ompöwölo kimïghyö akïtangany. Amömwochïcha chi anka tïkwïl ngölyon ompöwölo kiwöghisyö.

Kechumchï Yeso Marya Makdalena

(Mat 28:9-10; Yna 20:11-18)

[ 9Otini kitutunö Yeso ngwen, asispa Chumapili kiwasan, kïnya kuporchï kegh Marya Makdalena, nyo kitulö nyinte oy cho le mut nko odeny. 10Kïwö kokonay kïmwochï pich cho kimi nko Yeso ngal cho kighisyö. Ompö atoni kï kimi chane kïrirsot akïloksot. 11Otini kïlïm lö satate Yeso, akakïsïwa Marya Makdalena nyinte, kïmökughancha ngalechi.

Kechumchï Yeso kinetankachi odeny

(Luk 24:13-35)

12Ato mi sörömuto ngalechoni, kuchumchï Yeso kinetankachi ompö kïton nyo sis, otini kimi chane pan kïpetöy keston. 13Kïmïlisyö kipa kïmwochï kinetanka walaka, wölo meghancha nyonikïny.

Kechumchï Yeso kinetankachi chay le taman nko akonga

(Mat 28:16-20; Luk 24:36-49; Yna 20:19-23; Ist 1:6-8)

14Ato mi nyu sörömuto ngalechoni lapay, kuchumchï Yeso kinetankachi chay le taman nko akonga otini kyomisïyi. Kugheghchï chane ompöwölo meghancha nko oghïghyeto mïkulöwekwa akwompöwölo kimeghancha pich cho kisïwa nyinte lö, kikututï. 15#Ist 1:8. Kïlenchï, “Ape ngwïny kïmïkul amtatena Lökoy Karamach kwityï pich lapay. 16Chichona ghönöy akepatisan kesöru akï nyo meghönönye kerwokyini. 17Rïpotoy möcheywechï pïchona ghönöy, tulöy oy ompö kaynenyan akïngölonöy kutïw walaka. 18Akwato nam chane moroyut anta am ködöwï, kïmedonye kïgh, könoghöy ewunekwa pich cho chirsot, kïsöpchö.”

Kakip Yeso yïm

(Luk 24:50-53; Ist 1:9-11)

19 # Ist 1:9-11. Otini kiwany kïngölonöy Echotyon Yeso nko chane, kep nyinte kutang yïm akïtöpö okumpö tagh nyo pö Tororöt. 20Kïpa wop lapay akwamtata kimi Echotyon kïpöghisïyi nko chane akuchichim ngölyotononi, pö amtaghtangwa kutö machey nyo kinomnyoto tïkwïl.]

Currently Selected:

MARKO 16: PIPÏLIA

Highlight

Copy