LUKA 7
7
1Kïkany kuwany Yeso kïngölonchï chane ngalechi löwïr, kïwö kutang Kapernaum. 2Kimito wölini chi pö Rumi nyo kiwowö askarin nyo kitïng mötworintenyi nyo kichömöy nyoman. Kichirate mötworintononi akirich kïma. 3Kikany kïlïm wowïnay pö askarin ngala Yeso, kuyoktö poyi pipö Yaudi kïpa kïkur nyinte kungwïn atökusop mötworintenyi. 4Kïpa wölo mi Yeso akïsagh nyinte nyoman lö, “Mïchini ngarakanyi chichoni, 5ompöwölo chömöy piköcho, akitekwecha kö pö saghat.”* 6Kïwö Yeso nko chane akwotini kirich köyay, kïyonta wowïnay pö askarin kongotichi kïpa kïmwochï Yeso lö, “Mesus kegh, we Echotyon, ompöwölo mömïchinanïnye atakinyi ompö konyan. 7Akunka nyete kasïwan lö merokonye atwan wölo imitenyi. Nyo karam, mwagha ngölyon pat atökïsöp mötwörintenyan. 8Ochan tïkwïl chi nyo omitö ngwïnyi echotkachu aterchinan chane akïmi askarin cho opöyunan akïterwanïn chane. Ato olenchan anka, ‘Wïyö!’ Kïwetöy, alenchan anka, ‘Nyonö!’ Kungwïnöy, akwato omwochan mötworintenyan lö, ‘Igha ki,’ kwighöy.” 9Kïtangany Yeso atoni kilïm ngalechoni, kïwaghach kegh kura söpïch nyo kirïpöy nyinte akïlenchï, “Omwowokwa nyoman lö, tomönye onyorwan kighanat nyo lata nyï, ompö koro Israel kïmïkul.” 10Otini kit pïchay kikïyonta ka wowïntonay, kupentö kikïsöp mötworintonay.
Kesop Yeso wero mïsïk ompö Nain
11Kipöghön nyo tangogh, kïwö Yeso kutang kanasyan nyo kïkuro Nain. Kiwö nko kinetankachi nko söpïch nyo wow. 12Otini kirich kuka kanasyantanoni, kïnyorï pich cho kipöy chi nyo kima. Mïntïrïchoni kï ki weri onkït nyo pö korka nyo kile mïsïk. Kimito kokononi nko söpïch nyo wow nyo pö pich cho kipkono kanasyantanay. 13Kikany kïsïwa Echotyon kokonay kusyonchï, akïlenchï, “Meriröy.” 14Atolapay kïrich akïswany kïyay kikïsïto mïntïrïch, kïkïch akughyö pïchay kisïtöy. Kïlö Yeso, “Werï, omwowunyi lö, ngeta.” 15Kïtöpö chichay kile mïntïrïch ngwïny akïngalan. Kïlenchï Yeso kame, “Anyï montöngu.” 16Kïnam mïghötö pïchay löwïr, akïsal Tororöt kilentöy, “Kechumuna kwenuncha werkoyontö nyo wow! Kengwïn Tororöt kïsörï pikachi!” 17Kiyasta ngalechay pö Yeso kïghömï Yudea kïmïkul nko koros cho kilekïtinö.
Köyonï Yoana Kipatisanintö pich
(Mat 11:2-19)
18Kipa kinetanpa Yoana akïmwochï Yoana ngalechoni löwïr. 19Kïnget Yoana kïyonta kinetankachi cho le odeny, kïpa wölo mi Echotyon atökïtep lö, “Nyi nyoni kimwa Yoana lö ngwïnöy nya, anta tökekönecha chitö anka?” 20Otini kitï chane wölo mi Yeso, kïlenchï, “Köyonwecha Yoana Kipatisanin ketepinyi lö, ‘Nyi nyï kikïngor lö, ngwïnöy nya anta tökekönecha chi anka?’ ”
21Kïnyini kusop Yeso pich cho chang ompö sömewutkökwa, otini kingölonöy nko chane, akutul kïpegha pich ogh cho ghach, akwigh chepkörotonoy cho chang kurosïta. 22#Isa 35:5-6; 61:1. Kuyokyï Yeso chane lö, “Omïlonchenö wölo mi Yoana amwochï tïkwïn tïkwïl cho kasïwekwa alïmakwa, kerosïta chepkarotonoy, kapesta pich cho ngwolsot, kaketïlil cho amate psenkwet, kalïm cho mingote, kakututï pich cho kimeghö akyomchï mey Lökoy cho Karamach. 23Akusoyönote chi nyo mötïngnye tomtomönöt ompö ani.”
24Kïkany kïpechï kegh pïchay kiyonï Yoana, kutor Yeso kïmwochï söpïchay parak Yoana, kïtep chane lö, “Otini kyapekwa wölini le surkwen, kyokönekwa lö, kïsïwïy ne? Soywon nyo kitimtimöy yomötï? 25Kyapekwa nyu asïwa ne? Chi nyo loköy sïro cho pïchighöchï? Nkït chi anka tïkwïl lö, pich cho loköy cho pïchighöch akïtïpisot ompö pïghyöny kïmöngöy kori pöytoghï. 26Wölo mwowante köny lö, kyapekwa asïwa ne? Werkoyon so? Owöy, amwowokwa nyoman lö, kyasïwekwa nyo wow kïtïl werkoyon. 27#Mal 3:1. Ompöwölo Yoana nyaye ngölono Kikirut lö, ‘Anyï chi nyo oyoktonan, oyonunan kuntöghoghunyi akwiwunyi arengu.’ ” 28Kuwany Yeso kïlenchï pïchay, “Omwowokwa nyoman lö, wow Yoana kïtïl chi anka tïkwïl nyo kikïyï, wölo chi anka tïkwïl nyo mïnïng tya ompö Pöyunöto Tororöt kïwow kïtïl nyinte.”
29 #
Mat 21:32; Luk 3:12. Akwotini kilïm pich tïkwïl ngalechi, kïmi nko kwöghi surï, kughan lö pö man Tororöt, ompöwölo ki chane choni kitach Kipatisanata Yoana. 30Wölo kitagh Parisaytin* nko koneti kirurut machata Tororöt ompö parakungwa akïtagh kupatisan Yoana chane.
31Kilenchï Yeso pïchay, “Okongityonan pïnï nko ne? Karkegh nko ne? 32Karkegh nko tengon cho mpuröy donyö, cho mwochini kegh lö, ‘Kakïkutacha pkurerï amelö kanyalakwa. Kïkany ketumwokwa tum pö rira chi nyo kama, kïmolokyekwanye.’ 33Kingwïn Yoana Kipatisanintö, momisyö amögha dipay,* amwaghakwa lö, ‘Ipote oy.’ 34Kungwïn Wero Chi kwomisyö akïgheghsyö, olekwa, ‘Arose chemu, akï ptamasyan nyo le kongo kwöghi surï nko mwokïyis.’ 35Wölo rumunote lö, pö man ngöghomnyö Tororöt ompö monechi löwïr cho terchini nyinte.”
Yeso ompö ka Simon nyo le Parisayon
36Kikur Parisayon Yeso kungwïn kïlïkwï tontenyi. Kïlït Yeso köyay akumpur kwomisyö. 37#Mat 26:7; Mrk 14:3; Yna 12:3-8. Kimi korka kanasyantanoni nyo kile chepores. Kïlïm kokononi lö, kyomisyegho Yeso köyoni pö Parisayon, kwipï lal nyo kimi mwagh nyo kiyiltoy 38Kughyongö lötu Yeso otini riköy kelyechi, kïloch kïtörenchini lokechi kelyo Yeso akïmisa putechi, akïchïchïn akuyila mwaghay. 39Akwotini kisïwa Parisayontanay kikurchï nyinte omisyö, kunonchï kegh ompö mïkulöwunyi lö, “Ntökö werkoyon chichete nyoman kötösïku lö, ngo kokonï swongöy nyinte ompöwölo chemwokïyon.” 40Kuyokyï Yeso nyinte lö, “Simon, otïngetan ngölyon nyo omwowunyi.”
Kïlö, “Owöy, konetin mwowante.”
41Kutor Yeso kïlenchï, “Kimi pich odeny cho kimang ropïyeni chi, kimang akonga ropïyeni silpa 500, kumang anka 50. 42Akimökumïcha kwodeny kïghakta kïlenyona kuchalta chichay pösöntinechay kwodeny. Ekïngo ompö chane nyo chömöy nyinte tya?”
43Kuyokyï Simon lö, “Olentan chitö nyinö kikïlöstoghchï cho chang.”
Kïlenchï Yeso, “Kenyorunyi.”
44Kïwaghaka Yeso kuros kokonay akïlenchï Simon, “Isïwïyenyi kokonï nya? Kangwïnan kongu amekonanïnyinye pögh amwata kelyechu, wölo kamwata nyinte lökechi kelyechan akïmisa putechi. 45Melö ketarokaninyi ompö chïchïna, wölo möminye ato köpïstö nyinte machïchïn kelyechan ompö konyït kïngeta otini katwan. 46Meyilenyinye mwagh mötïnyan, wölo keyila nyinte mwagh nyo ngutöy nyo anyïn kelyechan. 47Nyo omwowunyi lö, poru chamatenyi nyoni wow lö, kikelöstoghchï nyinte ngokichi chini chang. Ompöwölo poru chi nyo kikïlöstoghchï cho ngörï chomnyogh nyo mïnïng pat.”
48Atolapay kïlenchï Yeso kokonay, “Kikelöstowunyi ngokiku.”
49Kutor toye walaka kïtep kegh lö, “Ekï ngo nyï löstoghchini pich ngokï köny?”
50Kïlenchï Yeso kokonay, “Kakïsörunyi kighanatengu, wechinö kegh ompö kalya.”
Kor cho kirïp Yeso
Currently Selected:
LUKA 7: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
