LUKA 21
21
1Kimi ato kisïwa Yeso pich cho le sïkön kutöni ropöwekwa köröpo Kö pö Tororöt.* 2Kisïwa tïkwïl mïsïk nyo kile meywon kutötöy, ropöwontenyi nyo pö senten odeny. 3Atoni nyu kïlö Yeso, “Omwowokwa nyoman lö, ropöwon nyo kökonï mïsïknï le meywon kï chang kïtïl cho kökonï pïchona löwïr. 4Ompöwölo ketötö pïchinö walaka rarakan pö sïkönötengwa, wölo kïrkegh kö meywon kokonï lö ne, kemï kïkonï löwïr chini könömtoy kegh.”
Kangalana Yeso kiwurata Kö pö Tororöt*
(Mat 24:1-2; Mrk 13:1-2)
5Akitö kïngölono pikö walaka ngala Kö pö Tororöt nyo kimi Yerusalem, wölini kikïmina koghïn cho pïchighöch kïlïkwï nko tïkwïn cho kikitö Tororöt. Kïlenchï Yeso chane, 6“Pkonöy osiswö cho möngötininye kagh nyo le ompö akonga parakuto kada anka, kïwirchini ngwïny löwïr.”
Kisusut nko kichopata kong
(Mat 24:3-14; Mrk 13:3-13)
7Kïtep chane lö, “Konetin ighisot ngalechoni ato le oyï nya. Akï kiporunöt ne nyo mwowu lö, karich kwighisyö?”
8Kïlenchï Yeso, “Orip kegh tömökilutok wuw. Ompöwölo pkonöy pich cho chang ompö kaynenyan kïlentöy, ‘Ochan nyinte,’ akïlö, ‘Kikarik ato ngwïnöy Kristo.’* Mayay arïp chane. 9Akwoto alïmakwa ngala poryot nko ngala puchen, motyö, ompöwölo nyoghöy kwighisyot ngalechoni mötïny, wölo meporunye choni lö, kikwitï söröm.”
10Kulet tagh Yeso kïlö, “Ngetöy koro kïporyegho kore anka kinget paytagh kïporyeghö paytaghta anka. 11Itu korïngringtinö ngwïny cho echön akwitu kömeywok nko sömewut ompö wop anka tïkwïl. Pkonöy tïkwïn cho otyegho pich nko töngönchin ompö yïm. 12Wölo kïtömö kwighisyö ngalechoni kïnömokwa akechopokwa kong. Atolapay ketötokwa tökerwokwok ompö kori sowut aketorchok chela. Kimïtinokwa tawu pöytoghï nko yetïntin akwompö kaynenyan. 13Lïku nyoni nyu pöroyïntonkwa nyo omwotïtoy Lökoy cho Karamach. 14#Luk 12:11-12. Mïchinokwa amuta akonga lö möminye machata kenya kenan lö kïghetöy kegh lö ne. 15Ompöwölo okonokwa ante kuti nko ngöghomnye nyo memukönye pungkökwa kuyokwï kïgh amemukönye kumöl. 16Wïchtonokwa chini le ompö yïyikwa nko tupchenikwa nko pich cho pö orenkwa nko kongotïnekwa. Kïtïghokwa walaka. 17Reyokwa pich akwompö kaynenyan. 18Wölo ompö choni löwïr, mepotönye putyon nyo le ompö akonga ompö mötöwekwa. 19Achïchïm nyu lasiny tonyorunö söpon.
Kangalana Yeso kiwurata Yerusalem
(Mat 24:15-21; Mrk 13:14-19)
20“Ato asïwekwa kuwitwit lïkoswö cho reyö kegh Yerusalem, onkïtï lö, kirich kiwuratenyi. 21Nya nyu kïryagh pich cho mi Yudea kutang kutïngkot, akany kïpka sany cho mi kanasyan ori amopïsï cho kömi sany kïlïtï ori. 22#Ose 9:7. Ompöwölo osiswechete kï Osis cho tököy Tororöt pipö Israel atökïpïntö ngala löwïr cho mwoghöy Kikirut. 23Mutyö nyoman atoni ompö kor cho mirsïyi osiswechoni nko yotïn cho rerïyöy monekwa ompöwölo itu nyarïl nyo wow ngwïnyinï akwitini nörekyo Tororöt pïchete. 24Kïpöro walaka chok, kenam walaka kïlïkwï mampustin ompö koros löwïr. Pkonöy pipö punton kuwuröy Yerusalem ntökuwonyö osiswekwa cho kikïngor.
Kingwïnata Wero Chi
(Mat 24:29-31; Mrk 13:24-27)
25 #
Isa 13:10; Esk 32:7; Yol 2:31; Ngo 6:12-13. “Osïwïyekwa tïkwïn cho pö kwongut ompö asis nko arawa nko kokel. Ngwïnchini nyarïl akïpotonchö pipö koros cho mi ngwïny kïmïkul, ompö kighumöto nanam nko mirtino pögh. 26Ryöltoy pich ompö mïghö otini tupu kong nyörilwok cho pkonchini ngwïny kïmïkul, ompöwölo kitimtimöy tïkwïn cho owesöch cho mi yïm. 27#Dan 7:13; Ngo 1:7. Atolapay kïsïwa nyu chane Wero Chi kungwïno polta nko owesyö nko ororyö nyo wow. 28Otini kasïwekwa nyu kwighisyö tïkuchoni, oghyong asyol mötöwekwo, ompöwölo kikïrikï sörunötenkwa.”
Kinetutyo moköngwö
(Mat 24:32-35; Mrk 13:28-31)
29Atolapay kïmwochï Yeso pïchay körkeyïn lö, “Anane ket pö moköngwö nko ket walaka, 30otini kasanach morichi akusïl sökechi onkïtukwa lö, karikï osiswo kitokot. 31Kïlenyoni ato asïwekwa tïkuchete komwowokwa kwighisyö, onkïtukwa nyu lö karich kwitï Pöyunöto Tororöt.
32“Omwowokwa nyoman lö, mewerönye pïnete kïtomö kwighisyö tïkuchï löwïr. 33Weröy yïmö nko ngwïny, wölo meweröcha ngalechan nyonikïny.
Mi machata kemi kïpsach
34“Orip kegh nyu akwane, tömekaperak pïghyöny nko tamasa nko sïngut pö ngwïnyinï, tömemirok asispa kingwïnata Wero Chi le ngöghöp. 35Ompöwölo itini asisoni pipö ngwïny kïmïkul lenyoni. 36Wölo, otöpï kïpsach kïnomnyö asagh tochïwïtyeghenö tïkuchoni pkonöy löwïr, amuch oghyongö tawu Wero Chi.”
37 #
Luk 19:47. Kinetisyegho Yeso osiswechoni Kö pö Tororöt nyo mi Yerusalem, wölo otini katuwit kïwö kutïng pö Arol. 38Kingetöy pich otini le kiwasan kïpetöy Kö pö Tororöt kïteröy ngalechi.
Kakïtat kepar Yeso
(Mat 26:1-5; Mrk 14:1-2; Yna 11:45-53)
Currently Selected:
LUKA 21: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
