LUKA 12

1 # Mat 16:6; Mrk 8:15. Ataye kokay, kighömïtyï kegh pich cho makïrar kipka wölo mi Yeso ntökïtïk kegh chane. Atolapay kïngalan Yeso ngalechï kutang kinetankachi lö, “Orip kegh mumara Parisaytin.* Nyoni kï chepölkösnönengwa. 2#Mrk 4:22; Luk 8:17. Möminye kïgh nyo tïpote nyo melö kïwösu kungwïn sany akï möminye ngölyon nyo wïnyate nyo mökinkïtu. 3Nyo ye ngölyon nka tïkwïl nyo kangalanekwa tuwïn kelïmöy pöghet kulïwu asis akï ngölyon anka tïkwïl nyo kachamekwa kö nyo karat kukat, kemwotïtegho pörkö parak.

Nyo mïchini kewagh

(Mat 10:28-31)

4“Omwowokwa kongotïnechu lö, mawagh pich cho pöröy chi por atolapay kïmökïmi kïgh anka nyo gha nyo muköy kwigh. 5Oporwokwa nyo mïchini awaghakwa. Awagha Tororöt nyo tïng owesyö kïpar chi akïtïng owesyö nyo wirchini nyinte mapa kokay. Nyoman, awagha nyinte.

6“Ngo nyo menkït lö kyoltegho alurïtin mut senten odeny kwïle? Akï möminye nyo le ompö akonga nyo wutyegho Tororöt. 7Nana ngat lö, kikeyit pute löwïr cho mi mötöwekwa. Kïlenyona mowöghisyö ompöwölo opokwa kinyiwut kïtïl alurutin cho chang.

Kecham nko kïtagh Kristo*

(Mat 10:32-33; 12:32; 10:19-20)

8“Amwowokwa lö, chi anka tïkwïl nyo mwochini pich lö kikughananïn nyinte, omwotïtonan lö nyinyan nyinte ompö tawu malaykeni Tororöt. 9Wölo anka tïkwïl nyo töghananïn ompö tawu pich, otöghan nyinte tïkwïl ompö tawu malaykeni Tororöt.

10 # Mat 12:32; Mrk 3:29. “Kïlöstoghchini ngokï chi anka tïkwïl nyo mwoghöy ngölyon nyo gha paraku Wero Chi, wölo melö kïlöstoghchini chi ngokï nyo mwoghöy Mïkulögh nyo Tïlil.

11 # Mat 10:19-20; Mrk 13:11; Luk 21:14-15. “Akwato kipokwa kerwokwok ompö sinakokin anta tawu kirwokot anta pöytoghï, mosus kegh lö kïghetöy lö ne kegh anta lö kïmwoghöy ne. 12Ompöwölo porwokwa Mïkulögh nyo Tïlil atoni ngölyon nyo mïchini amwaghakwa.”

Körkeyïn pö monkoryon nyo le sölwö

13Kinget chi akong ompö söpïchinay kïlenchï Yeso, “Konetin, mwochinö werïncha nyï wow kïchöghwanïn tïkwïn cho kipïswecha paponyo.” 14Kuteghchï Yeso chichay lö, “Ayo, kighanïn ngo oghyongchï anta alïkwï chöghinto tïkukwa kwodeny?” 15Atolapay kïlenchï pïchay löwïr, “Wechara! Oripö kegh pïrchinogh pö tïkwïn. Ompöwölo molenchï kegh lö köromitu tya söpon pö chi ato tïng tïkwïn cho chang.” 16Otolapay kunet chane ompö körkeyïn, “Kimi sïkonö nyo kitïng par nyo kirïr nyoman. 17Kunonchï kegh lö, ‘Otï ye motïngetanye wölo olchini paghe walaka, kïgh ne nyo oghan nya?’ 18Atolapay kïlö, ‘Konkïtwan kïgh nyo oghöy. Ongonyan töpotonichu löwïr atek cho echön kïtïl chï atolapay olchan paghechu löwïr arorchï ori tïkucha walaka. 19Atoni nyu olenchan kegh, pöyösinö kegh aiyomisyö aigheghsyö le wölo kechamta, ompöwölo itïngetenyi tïkwïn cho chang cho karamach cho ghöminyi ompö könyis cho chang.’ 20Wölo kïlenchï Tororöt chichay, ‘Sölwonï! Ochengan söpontöngu oghonete, kïlenyona pöyitu ngo nyu tïkuchï löwïr kerorchinyi kegh?’ ”

21Atolapay kuwanta Yeso lö, “Ighöy lenyoni ompö chi nyo rorchini kegh sïkönöt, wölo meywon nyinte ompö tawu Tororöt.”

Twaytena kegh Tororöt

(Mat 6:25-34)

22Atolapay kïlenchï kinetankachi, “Omwowokwa lö, mosus kegh ompö tïkwïn cho kyomöy anta cho kïgheghöy anta cho kïloköy. 23Mötïlönye so söpon omisyö anta tïl por sïro? 24Arose törit, cho melö kötkötisïyi amelö ilsïyi amötïngcha töpoton. Wölo pöghöy Tororöt chane. Melö so opokwa tösunöt nyo wow kïtïl törit? 25Akï ngo ompö akwa nyo ato sus kegh kumuköy kïtas kite osiswechi ompö ngwïny? 26Kïnyïl ato momukekwanye ye ntagh kïgh nyo le kite lenyoni kwompö ne tosusenökwa kegh tïku walaka? 27#1Pöy 10:4-7; 2Ot 9:3-6. Arose wölo pitïtoy tapïkoy pö wuw, cho meghöcha ighisyö anta nöpchï kegh sïro. Wölo omwowokwa lö kïrkegh ki oror pöytoghintö Solomon lö ne, kïmelö kiloköy sïro cho pïchighöch le tapïkoychï. 28Wölo atö minöy Tororöt sus, cho nyörilöch ye akwasïyech kïyomö akepel, kïmemukönye nyinte tökulokwekwa sïro kïtïl? Heywey akwa cho mïnïng kighanata!

29“Kïlenyona, makany kususok machata nyo pö tïkwïn cho kyomöy anta cho kïgheghöy. 30Ompöwölo yöröy pipö punton tïkuchoni löwïr akunkït Paponkwa nyo mi yïm lö otïngetekwa machat nyo pö tïkuchoni löwïr. 31Wölo ayara Pöyunöto Tororöt nko mantanyi tökïtöswokwa nyinte tïkuchoni löwïr.

Sïkönöto yïm

(Mat 6:19-21)

32“Amowöghisyö, okwotnï mïnïng, ompöwölo kacham Paponkwa nyo mi yïm kïkonokwa Pöyunötenyi. 33Altena tïkukwo atotönö mey ropïyeni. Oyörchinö kegh mïlot cho melö wïrsot amörchï kegh kaplawachtin cho mewonyot ompö yïm wölo mönyorucha chorï antewur rirïm. 34Ompöwölo mi mïkulöwungu wölo mi kaplawachtangu.

Körkeyïn pö mötwor cho mi kïpsach

35 # Mat 25:1-13. “Agha kegh lasiny atöpï kïpsach ompö kïgh anka tïkwïl nyo itu amomis tatïnekwo, 36#Mrk 13:34-36. Akara kegh nko mötwor cho mi kïköngöy echotyontengwa kwituna ichon pö kensyö, nyo otini ketï akukonykony kukat, keyotyini nyinte lawel. 37Ngörechot mötworichoni otini ketï echotyontengwa, kupenï chïkonchot. Nyo pö nyoman ngetöy, echotyon nyo lata nyoni akulach sïrochay pö akuporchï chane wölo kumpuröy atolapay kïpagh chane. 38Ngörechot kïtya mötworichoni ato nyorï echotyontengwa kïmi kïpsach kïrkegh ketï oghökwen anta kiwasan. 39#Mat 24:43-44. Onkïtökwa lö ntökenkït chi nyo mi katanyi lö oyï ato itu chorin, kömöpïsininye nyinte kïwiröy konyi. 40Otïpinö kïpsach atach Wero Chi ompöwölo ngwïnöy nyinte ato mokönekwa lö itu.”

Mötworin nyo kighönöy anta nyo melö kighönöy

(Mat 24:45-51)

41Kïtep Petro lö, “Echotyon, mwowechanyi körkeyïnï opïn anta kemwochinyi pich löwïr?” 42Kuyokyï Echotyon lö, “Ngo ataye mötworintö nyo kighönöy akï ngöghom nya? Mötworin nyo lata nyoni kï nyo töni echotyontenyi kughyongchï pöghisyewut pö akuros lö könyorï konyi mötwori walaka ropöwo omisyo osiswechini kikïchomnyechï. 43Ngarakat kïtya mötworintö nyo ato tomï echotyontenyi kupenï ighöy lenyoni! 44Omwowokwa nyoman lö, töni echotyontononi mötworintononi kughyongchï tïkuchi löwïr. 45Wölo ato lenchï kegh mötworintonay, ‘Mengwïnönye kaw lawel echotyontenyan,’ atolapay kïmuny mötwori walaka cho le mïrön nko tïpïn, akïnget kwomisyö akïgheghsyö ntökïtamas, 46miru ye nyu echotyonto mötworintonay, akwotini ketï, törotöröy mötworintonay akïpïsï kwam nyarïlpa mwokïyis.

47“Mötworin anka tïkwïl nyo möyongönye kwigh lenyini möktoy echotyontenyi, kïnyoru sitöt nyo wow. 48Wölo ato mi nyo menkïtnye wölo kömöktoy echotyontenyi, akwigh cho könyoru sitöt nyo wow, kïnyoru site nyo mïnïng. Akwanka tïkwïl nyo kakitö tïkwïn cho chang, kemöko nyinte asïyech tïkwïn cho chang. Kïkany chi nyo kakitö cho chang tya kemöko nyinte asïyech cho chang tya.

Ipu Yeso pesyogh

(Mat 10:34-36)

49“Kyangwïnan otyorchï ma kitas tagh ompö ngwïnyinete. Opï kötö kikïnagh mayoni! 50#Mrk 10:38. Wölo tökisis onyorwan kipatisanat anka nyo sis akïmötïngnye mïkulöwunyan kimïny ntökïtenö kïpïntö. 51Olentekwa so kyopkan kalya ngwïnyinï? Ewo, mopkanye kalya, kopkan pesyogh. 52Ompöwölo kïngeta ye kutang tagh, chöghöy kegh kö akong nyo mi pich cho le mut kïlïkwï woptin odeny ompöwölo mi cho ghönanïn nko cho meghönanïcha. Mi odeny wop anka, kïmi sömök woptö anka amöchomsocha. 53#Mik 7:6. Kïlenyoni tïkwïl, chuniot papo nko werïnyi, kïchuniö weri nko kwanta, chuniot kame nko cheptanyi, kïchuniö cheptö nko kame, chuniot korketo weri nko potïchtanyi, kïchuniö potïchtö nko korketo werïnyi.”

Kenkïtï osis

(Mat 16:2-3)

54Atolopay kïmwochï Yeso söpïchinay lö, “Ato osöchikwa polta kungwïno ta, olekwa, ‘Mach kïropan,’ akïropönöy nyoman lenyoni. 55Kïkany kïkutuna yomöt wölnö porö, olekwa, ‘Wechï loyöy asete,’ akïlïku nyoni. 56Ochech chepölköstinechï, kölö ne tomukekwa atatame kïgh nyo igho ato arosakwa ngwïny nko yïm, akupölokwa onkïtunö lö kïgh ne nyo ighöy Tororöt osiswechete?

Awanya ngal nko punyontengu

(Mat 5:25-26)

57“Ompö ne tömomukekwa omutchini kegh ngal cho mïchini keghöy? 58Muko kwipinyi chi kokwo kirwok kerwokyin. Mukyinö awanga ngalekwo kïtomitenö arawet atökïpïstin. Atomeghanyinye lenyoni, kumïtinyi tawu mutinto ngal nyo rwokyininyi akwonkoghchinyi askaryon nyo torchininyi chela. 59Nyo pö nyoman mengetunonyinye wöloni ntökïtenö ghaktena ropïyenichay pö chi sentöyon lödo amöngötï ompö nyo le.”

Opïstenö ngokï atömomeghö

Currently Selected:

LUKA 12: PIPÏLIA

Highlight

Copy