YOANA 16
16
1“Komwowokwa ngalechï atömopïstö kighanatengwo. 2Yonenokwa chane kori saghat. Atökïpkonöy osiswö cho nonöy chi nyo pörokwa lö pöghisyechini nyinte Tororöt. 3Ighwokwa chane ngalechoni, ompöwölo tomöcha kunkïtï Paponyan anta nkïtwanïn. 4Kanyaghan omwowokwa ngalechoni tö ato itï sayanoni ighöy chane tïkuchoni ananakwa nyu lö kökomwowokwa.
Ighisyo Mïkulögh nyo Tïlil
“Kimanyaghanye omwowokwa ngalechï otini le towunöt, ompöwölo kitomitan nko akwa. 5Wölo kowan ye wölini mi nyinte, nyini kiyonwanïn akï möminye akong ompö akwa nyo tepanïn lö, ‘Iwetenyi onö?’ 6Kïkany otï komwowokwa ye ngalechï, mïkulöwekwa kïsïköy nyarïl. 7Wölo omwowokwa ngölyonto man lö, karam ompö akwa ato owan, ompöwölo ato mowanye, kïmengwïnchinokwanye Kingörokintö. Wölo ato owan, oyokwokwa nyinte. 8Kïkany otini ketï, kukïniniechï nyinte pipö ngwïny lö lelate chane ompö ngala ngokï nko ompö ngala man nko ompö kirwoko Tororöt. 9Lelate chane ompö ngala ngokï, ompöwölo meghananïcha, 10akï lelate chane ompö ngala man, ompöwölo owetan wölo mi Paponyu amosïwïyanïkwanye ngat, 11kïkany ompö kirwok, kï ompöwölo kikerwokyï pöytoghinto ngwïnyinï.
12“Otïngetan ngal cho chang cho kötötomwowokwa, wölo nïkisöchitu tya ompö akwa. 13Wölo otini ketï Mïkulöwunoni pö man, kuntöghowokwa wölo mi man kïmïkul, ompöwölo möngölononye ngalechi kegh, wölo mwowokwa ngal löwïr cho lïmöy nyinte akïngongwokwa ngal cho tökïpkonöy. 14Töroritanïn nyinte, ompöwölo mwowokwa ngal cho nyorunenanïn. 15Chichan tïkwïn tïkwïl cho tïng Paponyan, nka nyay kolan mwowokwa Mïkulöwunoni Tïlil, ngalechoni nyorunenanïn nyinte.
Nyarïl nko ngörekyö
16“Mosïwïyanïkwanye ato lekït, akïtomönye kite ngat asïwanïkwa.” 17Kïtep kegh kinetankachi walaka lö, “Möchöy kïmwoghöy ne otï lenchinecha, ‘Mosïwïyanïkwanye ato lekït, akïtomönye kite ngat asïwanïkwa,’ akïmwa ngat lö, ‘Ompöwölo owetan wölo mi Paponyan.’ 18Kömököy kïmwoghöy ne otï lentöy, ‘Tomönye kite?’ Mökinkïtöchanye kini ngölono nyinte.” 19Kunkïtï nyu Yeso lö kimököy chane kïtepöy nyinte, kïlenyona kïlenchï, “Kamwaghan lö, ‘Mosïwïyanïkwanye ato lekït, akïtomönye kite ngat asïwanïkwa.’ Nka nyoni kini otepekwa kegh akwane nya? 20Omwowokwa ngölyonto man lö, oloksokwa ariryö, wölo ngörököy ngwïnya. Onöreksokwa, wölo wöghöko nörekyenkwa kïlïku ngörekyö. 21Otini mach korka kïlusyö kïtïng kichïr, ompöwölo ketïta sayenyi, wölo otini kakïlusyö nyinte, kïwutyeghö kichïrtanyi, ompöwölo ngörökyini nyinte monïng nyo kakeyïchï ngwïny. 22Lïku nyoni ompö akwa tïkwïl: omitekwa nko nörekyö otï le ye, wölo osïwïyanïkwa ngat, atökïnyïghï ngörekyö mïkulöwekwa, ngörekyö nyo memuchönye chi ntökïchengenakwa. 23Otini ketï asisoni, kïmöminye nyu kïgh nyo otepanïkwa. Amwowokwa nyoman lö, konokwa Paponyan tïkwïn löwïr cho osomekwa nyinte ompö kaynenyan. 24Tomönye osomökwa kïgh ompö kaynenyan nko nyete le ye, osomö atosïkö atökwitïta ngörekyenkwa.
Kakïrïnta Yeso ngwïny
25“Komwowokwa ngalechï löwïr ompö ngötïnyö. Wölo itu osiswö cho mopöghisyeghonanye ngötïnyö ngat, wölo omwowokwa ngaleko Paponyan kïlöpo. 26Otini ketï asisoni, osomökwa nyinte möchutkökwo ompö kaynenyan amelö omwowokwa lö osoghan Paponyan ompö akwa, 27ompöwölo chömokwa nyinte Paponyan, ompöwölo kachamanïkwa, aghanakwa lö kyangwïnan wölo mi Tororöt. 28Kyangwïnan wölo mi Paponyan angwïn ngwïny apökoktenan ye ngwïnyinete, amïla wölo mi Paponyan.”
29Atolapay kïlenchï kinetankachi, “Rose nyu köny lö, kengalananyi ye kïlöpo amelö ompö ngötïnyö! 30Köpköchecha ye nyu lö, inkïtönyi kïgh anka tïkwïl amelö itïngetenyi machat lö, tötepinyi chi anka tïkwïl teput. Kïlenyona kakighanacha lö, kingwïnenyi wölo mi Tororöt.” 31Kuyokyï Yeso chane lö, “Kaghanakwa ye nyu so? 32Itu asis akikwitï ye yeteyi, ato otoyokwa löwïr atökïwö chi tïkwïl katanyi, atökepïstanïn onkït. Wölo momitanye onkït, ompöwölo mi Paponyan nko ani. 33Kanyaghan omwowokwa ngalechete atamukakwa osïkenö orinyan kalya. Onyorunekwa nyarïl ompö ngwïny. Wölo onyökönitu! Karïntan ngwïny!”
Soghchini Yeso kinetankachi
Currently Selected:
YOANA 16: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
