TOWUNÖT 46

1Kïlenyona kïnam pan lenyini nyu Israel nko tïkuchi cho kitïng löwïr, nyini kitï Persyepa, kutötö amörostin kutö Tororöt nyo pö paponyi Isak. 2Akïngölonchï Tororöt Israel ompö sïwïyagh oghö, akïlenchï, “Yakopo, Yakopo.”

Kïngitön lö, “Ooy.”

3Atolapay kïlenchï Tororöt, “Ochan Tororöt, Tororöt nyo pö papongu, mewagh röytenö wïyö Misri, ompöwölo oghinyi saka aichangitï ilïkwï pipö punton. 4Owetan nko nyi Misri, ayokunyi ngat. Airöpösenyi kïsïwïyi Yosep.”

5Kïweghö Yakopo Persyepa. Kwipö werkachi nyinte nko monekwa nko korukwa nkarinechay kiyokï Parao kepö nyinte. 6#Ist 7:15.Kuwï kyakikwa nko tïkukwa cho kisïch ompö koro Kanan, akipka Misri Yakopo nko monechi löwïr, 7werkachi nko tipichi nko kukötinechi.

8Nka chï kaynötut pö monïngo Israel cho kipa Misri, Yakopo papongwa nko Rupen poretyenyi, 9werpö Rupen kï: Anok nko Palu nko Esron nko Karmi. 10Werpö Simion kï: Yemuel nko Yamin nko Oad nko Yakin nko Soar nko Syaul wero chepö Kanan. 11Werpö Lawi kï: Kersyon nko Koat nko Merari. 12Werpö Yuda kï: Syela nko Peres nko Sera (wölo kiwonyö Er nko Onan ompö koro Kanan). Werpö Peres kï: Esron nko Amul. 13Werpö Isakar kï: Tola nko Pua nko Yasyup nko Syimron. 14Werpö Saplon kï: Sered nko Elon nko Yaaleel. 15Werpö Lea cho kiyichï Yakopo ompö Mesopotamia kïmi nko cheptanyi Dina, kï 33.

16Werpö Kad kï: Sepon nko Aki nko Syuni nko Espon nko Eri nko Arod nko Areli. 17Werpö Asyer kï: Imna nko Ispa nko Ispi nko Peria nko cheptöngwa Sera. Werpö Peria kï: Eper nko Malkiel. 18Achï werpö Silpa nyo kitö Lapan cheptanyi Lea. Kïyichï Yakopo monïng 16.

19Werpö Rael koko Yakopo kï: Yosep nko Penchamen. 20Kiyï Yosep ompö koro Misri Manase nko Epraim, nyo kiyichï Asenat, chepö Potipera tïsinto Eliopolis. 21Werpö Penchamen kï: Pela nko Peker nko Aspel nko Kera nko Naaman nko Ei nko Ros nko Mupim nko Upim nko Ard. 22Werpö Rael cho kiyichï Yakopo kï taman nko angwan löwïr.

23Wero Dan kï: Usyim. 24Werpö Naptali kï: Yaaseel nko Kuni nko Yeser nko Syilem. 25Werpö Pila nyo kitö Lapan cheptanyi Rael, kï monïng mut nko odeny löwïr cho kiyichï Yakopo.

26Pich löwïr cho kipka Misri nko Yakopo cho kile monechi kegh akimeyitnye chi koruko werkö, ki pich 66 löwïr. 27Kikïyichï Yosep karachïna odeny ompö koro Misri, pich cho pö ka Yakopo cho kipka Misri ki 70.

Yakopo nko katanyi ompö Misri

28Kiyonta Yakopo Yuda kïwö wölo mi Yosep, tökuporchï nyinte ore nyo wetöy Kosyen. Kitï nyu korononi kikuro Kosyen. 29Kinap kegh nyu Yosep kwigh nkarinyi akïpusta kïwö kïtarok kwanta Israel ompö Kosyen akuporchï kegh nyinte, kïtarok akukonköy akïlok nyo kogh ompö katïnyi. 30Atolapay Kïlenchï Israel Yosep, “Kanya ye nyu ameghan ompöwölo kasïwan ante lö techinyi satate.”

31Kïlenchï Yosep werkökwa nko koto kwanta, “Opustenan owetan olenchini Parao, ‘Köpkonchanïn werköcha nko kato paponyan kïmïkul cho kapkana koro Kanan.’ 32Akï pipö kyak chane akörongwï tukakwa nko tïkukwa löwïr cho kötïng.” 33Ato kurokwa Parao akïtepekwa lö, “Ne pöghisyenkwa?” 34Olenchï, “Pipö tïch mötworiku, kïngeta otini kichicha mïnkech nko ye, acha lapay nko papotïnecha, atamuka amanga koro Kosyen.” Ompöwölo kitaghate chi anka tïkwïl nyo yokuyöy kyak ompö Misri.

Currently Selected:

TOWUNÖT 46: PIPÏLIA

Highlight

Copy