TOWUNÖT 36

1Achï monïngo Esau, nyo kïkuro kaynate anka Edom. 2#Tow 26:34. Kip Esau tipö Kanan: kip Ada chepö Elon nyo pö pipö Ititi nko Olipama chepö Ana, nyo kile kuköto Sipeon nyo kile chi pö Ipiti, 3#Tow 28:9.kïkuro korkenyi nyo pö sömök Pasemat, chepö Ismael akï chepto ompö Nepaiot. 4Kisïkyï Ada Esau Elipas, kïsïkyï Pasemat Reuel. 5Kïyï Olipama Yeus nko Yalam nko Kora. Choni kï werpö Esau cho kikïyï ompö koro Kanan.

6Atolapay kumït Esau koruchi nko werkachi nko tipichi nko pikö walaka tïkwïl cho kimi katanyi, kyakichi nko tïkuchi cho kinyorunö korononi pö Kanan akïwuchï kore anka wölo lowö werïngwa Yakopo. 7Ompöwölo kökichangit tïkukwa tya nyo melö kitö kumuköy chane kïmang wop akonga. Kimelö kitö kumuköy korengwa nyini kimöngöy kutö chane pöroyïn kïmang tïkwïl, ompöwölo ki chang tukakwa. 8Kïlenyona, kïmang Esau koro Seir wölo kile kamas, Esau kï Edom.

9Achï monïngo Esau nyo le papoto pipö Edom cho kimöngöy koro Seir nyo kile kamas. 10Achï kaynötut pö werpö Esau: kiyï Ada koko Esau, Elipas. 11Kïyï Elipas wor mut: Teman nko Omar nko Sepo nko Katam nko Kenas. 12(Timna kï ki chemïnïngwo* Elipas wero Esau. Kïsïkyï Timna Elipas Amalek.) Choni werpö Ada koko Esau. 13Kïyï Pasemat korketö nyo pö Esau Reuel. Kïyï Reuel wor angwan: Naat nko Sera nko Syama nko Misa.

14Kïyichï Olipama, chepö Ana, kuköto Sipeon Esau wor sömök, Yeus nko Yalam nko Kora.

15Achï pich cho echön cho kipkana ara Esau. Elipas nyo kile poretya Esau nyo kiyï Teman nko Omar nko Sepo nko Kenas 16nko Kora nko Katam nko Amalek. Kiwowö chi anka tïkwïl ompö pïchoni pikökwa. Ki werpö Elipas pïchoni löwïr akimöngöy koro Edom akïyï Ada koko Esau chane lapay.

17Kïyï Reuel wero Esau Naat nko Sera nko Syama nko Misa. Ki wowö chi anka tïkwïl ompö pïchoni pikökwa. Ki werpö Reuel pïchoni löwïr akimöngöy koro Edom akïyï Pasemat koko Esau chane lapay. 18Kïyï Olipama koko Esau: Yeus nko Yalam nko Kora. Kiwowö chi anka tïkwïl ompö pïchoni pikökwa. Ki werpö Olipama koko Esau chepö Ana pïchoni löwïr. 19Kïlenyona, pipö yiyo Esau choni löwïr.

Monïngo Seir

(1Ot 1:38-42)

20Achï werpö Seir nyo kile chi pö Ori akï chane cho kimöngöy korononi: Lotan nko Syopal nko Sipeon nko Ana 21nko Disyon nko Eser nko Disyan. Kiwowö chi anka tïkwïl ompö pïchoni pikökwa ompö pipö Ori cho kipö yiyo Seir, cho kimi koro Edom.

22Achï werpö Lotan: Ori nko Eman nko chepto ompö Lotan nyo kikuro Timna. 23Achï werpö Syopal: Alpan nko Manaat nko Epal nko Syepo nko Onam. 24Achï werpö Sipeon: Aya nko Ana. Nyinte Ana nyo kinyorï kori pöghon cho loyote cho kimi surkwen, otini kiyokwïyi sïkïröyiko kwanta.

25Achï monïngo Ana: Disyon nko cheptanyi nyo kikuro Olipama. 26Achï werpö Disyon: Emdan nko Espan nko Itran nko Keran. 27Achï werpö Eser: Pilan nko Saapan nko Akan.

28Ki papoto Us nko Aran nko Disyan.

29Achï kaynötut pö pöytoghi pipö ara Ori: Lotan nko Syopal nko Sipeon nko Ana 30nko Disyon nko Eser nko Disyan, kimöngöy chane koro Seir.

Pöytoghi koro Edom

(1Ot 1:43-54)

31-39Achï pöytoghï cho kipayta koro Edom otini kitomönye kïpayta chi anka nyo le pöytoghin pipö Israel:

Pela wero Peor Edom nyo pö kanasyanta Dinapa

Yopap wero Sera nyo pö kanasyanta Posra

Usyam nyo pö koro Teman

Adad wero Pedad nyo pö kanasyanta Apit (kirïnta nyinte pipö Midyan ompö koro Moap)

Samla nyo pö kanasyanta Masreka

Syaul nyo pö kanasyanta Reopot, okumpö lalwa Yuparet

Paal Anan wero Akpor

Adad nyo pö kanasyanta Pau (korkenyi kï Meetapel chepö Matred nyo kile koköto Mesaap)

40Achï kaynötut pö pöytoghï cho pö ara Esau kïrïp kegh nko pikökwa nko wölini kitïpisot: pïchoni kï ompö Timna nko Alpa nko Yetet 41nko Olipama nko Ela nko Pinon 42nko Kenas nko Teman nko Mipsar 43nko Makdiel nko Iram. Kighechön pïchoni ompö pïchoni kipkana ara Edom (nyoni kï Esau nyo kile papoto Edom), kïrïp kegh nko wölini le möngengwa ompö kor nyo kimïl chane kïlïkwï nyingwa.

Yosep nko werkökwa

Currently Selected:

TOWUNÖT 36: PIPÏLIA

Highlight

Copy