TOWUNÖT 34
34
1Kïwö asistanka Dina chepö Yakopo nyo kiyichï Lea kïtuyö nko koruko korononi. 2Nyini kisïwa Syekem wero Amor nyo kile chi pö Ipiti, aki nyinte nyo kirwokyini korononi, kïnam chepay akïpatal nyinte ompö owesyö. Kïlenyona, kutö arasï nyinte. 3Wölo kïlö aros kipïchighit nyoman Dina. Kïwechï kïchamacham chepay pö Yakopo. 4Kïwö kïlenchï kwanta, “Kaykay weghwante aloto ka Yakopo topön cheptanyi.”
5Kunkïtï Yakopo lö kikusïmnyon Syekem cheptanyi Dina, wölo kimeghnye kïgh ntökïtenö kïpka werkachi, ompöwölo kitökïmi chane achey. 6Kïwö Amor papoto Syekem aloto ka Yakopo, 7kipkono achey werpö Yakopo panoni. Nyini kilïm ngalechoni, kïngwonchï nyoman, ompöwölo kighchï chichoni pipö Israel ghöyityö nyo wow otini kinam chepö Yakopo ompö owesyö, kïgh nyo kimelö kikïchömöy keghöy. 8Wölo kïngalan Amor nko chane lö, “Kicham werïnyan Syekem cheptönkwa nyoman nyo osoghokwa lö opïsinö kwip nyinte. 9Akanya kechomnyechinö ngala kensyö. Okonecha tipikwa kepö, opökwa chicha. 10Kimukechanyu kemöngisyenö tïkwïl. Omukekwa omönge wop anka tïkwïl nyo kamachakwa, ompurö atagha mïnchïrïsnön atalïkuna monkor ompö wölete.”
11Atolapay kïlenchï Syekem papoto Dina nko werkökwa, “Kaykay achama kïgh nyo kaghan, tö ato mi kïgh nyo omwowanïkwa, omukan oghöy. 12Otörwokwa kanyoy cho tenö chini komökekwa nko ropöw, otini kokonanïkwa kïnye cheponi opön.”
13Kuyokyï werpö Yakopo Syekem nko kwanta Amor ompö lïs, ompöwölo kökikusïmnyon cheptöngwa Dina. 14Kïlenchï, “Melö kimukecha keyilchine cheptönyo chi nyo le somchon. Lïku nyoni arasï ompö acha. 15Kimukecha kechomnyenö nko akwa ato arïpakwa otöptöncha nyo mötïnye, kemutöy pich löwïr cho le mïrön ompö kwenunkwa. 16Atoni nyu ato kïpïswokwa opö tipicha akepöcha tipikwa aketïpicha nyu nko akwa akelïkwï pich akonga. 17Wölo ato machamakwanye lenyoni, kemïtecha cheptönyo.”
18Kïsïwa Amor nko werïnyi Syekem lö karamach ngalechoni. 19Kurïpchï rotwö panini weray mïnïng ompöwölo kichomnyö nyoman nyinte nko chepö Yakopo. Aki weroni nyo kikonyïtote tya ompö katangwa. 20Kïlenyona, kïwö Amor nko werïnyi Syekem kutang areto kanasyantengwa akïngölonchï pich cho kimi kanasyantanay lö, 21“Achï pich cho le kongot. Kepïsyinö chane kïmöngisyö akwigh mïnchïrïsnön, ompöwölo mïchinecha koronete nko chane tïkwïl, tökepöcha tipikwa, kwip chane tipicha. 22Wölo muköy pïchoni kïcham kïmang nko acha tökelïkuna pich akonga ato kïchamacha kemuta ompö kwenuncha monïng lapay cho le wor kïkarkegh nko chane. 23Mölïkucha so kyakikwa nko tïkukwa kïmïkul chicha? Akanya pat kechömchinö chane tökïmöngisyö nko acha.” 24Kïcham piko kanasyantanay kïmïkul ngala Amor nko Syekem. Kïlenyona kemut mïrön anka tïkwïl.
25Ato mi asisto sömök, otini kitökuchiryot pïchay kikïmut, kïcheng chokonikwa werpö Yakopo odeny, Simion nko Lawi cho tupchö nko Dina, kïpa kïlïtöy kanasyantanay ompö nyakanat akïpar mïrön löwïr. 26Kïpara chok Amor nko werïnyi Syekem akumïtuna Dina kö pö Syekem, kïpechï kegh pïchay. 27Nyini kiwonyö pörchonay, kïpa werpö Yakopo walaka kïlïtöy kanasyantanay akïcheng tïkwïn, tökutak arasito cheptöngwa. 28Kïpörï kechir nko tïch nko sïkïröy nko kïgh anka tïkwïl nyo kimi kanasyan anta nyo kimi wuw. 29Kïcheng tïkukwa löwïr, monïng nko korukwa nko kïgh anka tïkwïl nyo kimi korikwa.
30Atolapay kïlenchï Yakopo Simion nko Lawi, “Kokonanïkwa kömpölelyö ompöwölo ghöchinanïn pipö Kanan nko pipö Peris, pïchini möngöy koronete akwanyï kïchicha ngörï, kïkany atotuyö kegh chane kïporyeghenanïn, kumuköy chane kuwuranïn nko piko konyu.” 31Wölo kuyokyï chane lö, “Kichö mïchini so kwida nyinte cheptöncha chepkartayan?”
Kesoyön Tororöt Yakopo ompö Petel
Currently Selected:
TOWUNÖT 34: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
