TOWUNÖT 30

1Otini kisïwa Rael lö tomönye kïyichï nyinte Yakopo monïng, kurey cheptöngwa Lea akïlenchï Yakopo, “Konanïn monïng anta mönyona omeghan!”

2Kïnörekyï Yakopo Rael akïlenchï, “Kalïkwan so Tororöt nyo karatinyi tömesïch monïng?”

3Kïlenchï Rael, “Anyï chepö montönyan Pila, rïwö nko nyinte tömanyïl kïyï nyinte monïng cho lïku chichan.” 4Kïlenyona, kutö Rael Pila chepö montanyi Yakopo Kïlïkwï korkenyi, kïrï nko nyinte. 5Kïsïkisyö Pila akïyichï Yakopo monïng nyo le weri. 6Kïlö Rael, “Keghwanïn Tororöt man akïlïm riratenyan akïkonanïn worö.” Kïkurö kaynenyi Dan.#30:6 Dan: Ompö Eprania kelentöy, “Keghwanïn man.” 7Kïsïkisyö ngat Pila chepö mompö Rael akïyichï Yakopo worö nyo pö odeny. 8Atolapay kïlö Rael, “Konoghyan kula nko cheptöncha, arïntan nyinte.” Kïlenyona kïkurö monïngay Naptali.#30:8 Naptali: Ompö Eprania kelentöy, “Kinoghyot.”

9Otini kisïwa Lea lö kyangat, kïcheng chepto pöghisyenyi akutö Yakopo kïlïkwï korkenyi. 10Kïyichï Silpa chepö mompö Lea Yakopo weri. 11Kïlö Lea, “Wechï mö töpkotut!” Kïlenyona, kïkurö kaynatenyi Kad.#30:11 Kad: Ompö Eprania kelentöy, “Töpkotut.” 12Kïsïkyï Silpa chepö mompö Lea Yakopo ngat werto odeny. 13Kïlö Lea, “Wechï möngörekyö ompö ani! Kurenanïn korï asïyech nyo ngarakate.” Kïlenyona kïkurö kayneto monïngay Asyer.#30:13 Asyer: Ompö Eprania kelentöy, “Ngarakate.”

14Kïwö Rupen osiswo kasata nkanun wölnö le paren akïnyorchï wöloni ket cho konu perur, kwipchï kame Lea. Kïlenchï Rael Lea ompö atoni, “Kaykay konante ketichoni tïkwïl chinö kepï werïngu.”

15Kïlenchï, “Kesïwenyi so lö mökïghnye sarenaninyi santenyu aimököy ngat söreno ketiko werïnyu tïkwïl?” Kuyokyï Rael lö, “Ato ikonaninyi ketiko werïngu, kïrïwöy Yakopo kongu oghonete.”

16Kïkany kwituna Yakopo wölnö le paren otini kikwimön, kïwö Lea kïtaroch akïlenchï, “Mïchininyi nyonö oghonete, ompöwölo kaleninyi ketiko werïnyan.” Kïlenyona kïrï nko nyinte aghononi.

17Kïlïm Tororöt saghata Lea, kïsïkisyö akïyichï Yakopo weri nyo pö mut. 18Atolapay kïlö Lea, “Kökonanïn Tororöt ropöwon ompöwölo kyotönön santenyu chepto ighisyenyan.” Kïlenyona, kïkurö kayneto monïngay Isakar.#30:18 Isakar: Ompö Eprania kelentöy, “Kakyala chi,” anta, “Mi ropöwontö.” 19Kïsïkisyö Lea ngat akïyichï Yakopo weri nyo pö mut nko akonga. 20Kïlö, “Kökonanïn Tororöt ropöwon nyo pïchigh. Konyïtanïn ye nyu santenyu ompöwölo koyichan nyinte monto mut nko akonga nyo le weri.” Kïlenyona kïkurö monïngoni Saplon.#30:20 Saplon: Ompö Eprania kelentöy, “Ropöwon.” 21Atolapay kïyichï monïng nyo le työ, kïkurö Dina.

22Atolapay kunan Tororöt Rael, kïterchï nyinte saghatenyi akusyonchï kïsïch owesyö nyo sïköy monïng. 23Kïsïkisyö akïyï weri, kïlö, “Kachengenanïn Tororöt arasinyan.” 24Kïlenyona kïkurö kaynenyi Yosep,#30:24 Yosep: Ompö Eprania kelentöy, “Osoghan ECHOTYON kïkonï anka.” akïlö, “Osoghan ECHOTYON kïtöswanïn weri anka.”

Kitösisyö kyaki Yakopo

25Kikany kïyï Rael Yosep, kïlenchï Yakopo Lapan, “Pïswante owö atamïla atang katanyo wölini le korencha. 26Chömwante owö nko koruchu nko monechu, ompöwölo kyopöghisyewunyi ompö chane, pïswante owö inkïtönyi wölini kyopöghisyewunyi kïlïkwï.”

27Wölo kïlenchï Lapan, “Ato isïwenyi lö karam ompö nyi, itöpö. Onkïtön nyo le ani lö kikïchamanïn ECHOTYON akwompö nyi. 28Mwowante ghosyengu nyo otïngön tokonïn.” 29Kïlenchï Yakopo, “Inkïtönyi nyinte wölanye kyopöghisyewunyi kïlïkwï nko wölanye kyoriptan kyakiku. 30Kitïngetenyi kyak cho ngörï atanye kitomönye atwan, wölo kïtösisyö kyakiku kïchangit kïngeta atakinye kyatwan akusoyöninyi ECHOTYON ompö wop anka tïkwïl nyo kyowan. Wölo lïku nyu oyï ato owetan opöghisyechini piko konyu?” 31Kïtep Lapan nyinte lö, “Okoninyi ne?”

Kuyokyï Yakopo lö, “Mekonanïn kïgh nyonikïny kïpoto ighwante kïgh nyo omökan atayakuyunyi kyakiku kutang tagh. 32Nya owan orim kyakiku ye, tataran kech anka tïkwïl nyo köpentö nko nyo pusyentö, lïku choni nyu ropöwechan. 33Atökïpïntö ato le asïyech kighanatenyan lasiny otini kengwïnanyi iros ropöwechan cho mi tawungu. Akï aran anka tïkwïl nyo otïngetan nyo melö köpentö anta pusyentö anta kecha anka tïkwïl nyo melö tuw, iyit lö kakïchor.”

34Kïlö Lapan, “Nya kïle! Pïsyinönyi nyu lenyoni kemwanyi.” 35Wölo kïwö asisoni Lapan kïtar kwöghe cho köronöch nko cho pusyenöch nko ngaror tïkwïl cho köpenöch nko cho pusyenöch nko anka tïkwïl nyo kitïng put cho relach nko wara kechir tïkwïl cho tuwöch, atolapay kutö werkachi kuyakwïy. 36Kïwö Lapan kulowitö kegh wölo mi Yakopo wölo tenö rutogh pö osis sömök. Kïwechï Yakopo kuyakwïy kyaki Lapan cho le ngötunön.

37Atolapay kïpït Yakopo lïkip cho nyörilöch cho pö ket pö mlupna nko mlosi nko mwaramoni akungirngir. 38Atolapay kutö sititchay tawu otupöy löwïr cho kighegho kyakï pögh, kitö nyinte lenyoni ompöwölo kirïsyegho kyakï atoni kigheghöy pögh. 39Kïlenyona, otini kipka ngaror kïrïsyeghö tawu sititchay, kïmi ato le asïyech kïyï nechay wara cho köronöch nko cho köpenöch nko cho pusyenöch.

40Kïlenyona, kupesyö Yakopo warechay pö kechir. Atolapay kïkany kïtopön nechay wölo mi cho köronöch nko cho tuwöch tïkwïl cho pö nepö Lapan akutö ocheywechi okuntöngwa opïn, melö kituyö nko cho pö Lapan.

41Kïkany otini kirïsyot ngaror cho nöryote, kutö Yakopo sititchay tawu nechay wölini kimi otupenichay kïghegho pögh, tökïrïsyeghö atoni kimi sititchay. 42Wölo kimetönye otini kirïsyot ngaror cho nyösyote. Ato mi löt kïpöyit Lapan nekö cho kinyösyote, kïpöyit Yakopo cho kinöryote. 43Kïlïkwï chichoni monkoryon nyoman ompö aranoni, kitïng ocheywo kyak cho chang nko mötwor cho le tipïn nko mötwor cho le mïrön nko tamasay nko sïkïröy.

Kepertegha Yakopo ka Lapan

Currently Selected:

TOWUNÖT 30: PIPÏLIA

Highlight

Copy