WUWÖT 9

1Kïlenchï ECHOTYON Musa, “Wïyö wölo mi Parao ailenchï kölö ECHOTYON, Tororöt pö Eprania, ‘Nya kïpa piköchan atökïpöghisyeghwanïn. 2Ato itaghenyi chane kïpa, 3kuwongo ECHOTYON sömew nyo gha tukaku nko angoletineku nko sïkïröyiku nko tamasayiku nko kechiryeku nko neköku. 4Wölo töni ECHOTYON rotyot kwenu tupa Israel nko tupa Misri, atömömeghö cho pö pipö Israel. 5Kïlö ECHOTYON oghan asïyech lenyoni.’ ”

6Kwigh ECHOTYON lenyoni asisto odeny. Kïmeghö tupa Misri lömïs, wölo möminye ompö akong nyo kima ompö tupa pipö Israel. 7Kïyonta Parao pich kuros tupa Israel kïsïwa lö möminye ompö akong nyo kima, wölo kwaghïghit möt pö Parao amöchömchïnye pïchay kïpa.

Tasusay

8Atolapay kïlenchï ECHOTYON Musa nko Aron, “Arama or ompö nökögh aikany kwistö Musa kutang yïm ompö tawu Parao. 9Atökïlïkwï terïtyon ompö koro Misri kïmïkul, atökwam tasusay pich nko kyak kïlïkwï moyoy.” 10#Ngo 16:2.Kiram chane or ompö nökögh akughyongö tawu Parao, kwistö Musa aren kutang yïm. Kwam tasusay pich nko kyak kïlïkwï moyoy. 11Akimemïcha chepsoköytinechay kughyongö tawu Musa, ompöwölo kyam tasusay chane nko pipö Misri löwïr. 12Wölo kwigh ECHOTYON möt pö Parao kwaghïghit amöterchïnye chane, lenyini kimwochï ECHOTYON Musa.

Takarïs

13Kïlenchï ECHOTYON Musa, “Ngeta asïyech tökwoghö aiwö ilenchï Parao, kölö ECHOTYON, Tororöt pö Eprania, ‘Nya kïpa piköchan atökïpöghisyeghwanïn. 14Melö tonyörilonan ye kichoput mötworiku nko piköku opïn, wölo onyörilinyi tïkwïl atenkïtunö lö möminye anka nyo karkegh nko ani ompö ngwïny. 15Ompö ye kötö koghïtan ewunyan alïweninyi nko piköku sömewut akötö kewonyenyi ompö ngwïny. 16#Rum 9:17. Kopïstinyi söpö, ompöwölo omökan oporunyi owesyenyan, atökïrumtö kaynenyan ompö ngwïny kïmïkul. 17Temitenönyi kwole kegh ompö piköchan aitöghonyi chane kïpa. 18Wölo ato tenö nyete asïyech, oropönunan takarïs cho echön cho kimömicha cho lata choni kïngata otini kitor koro Misri nko ye. 19Yoktenö ye nyu kerongwï kyakiku löwïr cho mi achey kïpka kaw, ompöwölo ropönöy takarïs akïmeghöy kïgh anka löwïr nyo mi sany.’ ” 20Kirang chi anka tïkwïl nyo kiter ngölyonto ECHOTYON ompö mötwori Parao tukachi akïkur sekeykachi kïpa kaw. 21Wölo pich walaka cho kimötercha ngölyonto ECHOTYON kï kipïsyï sekeykökwa nko twakwa wölnö le achey.

22Kïlenchï ECHOTYON Musa, “Ghïtenö ewungu kutang yïm atökïropönchï takarïs koro Misri kïmïkul, ompö chi nko kyak nko onkïy nko pagh cho mi par.” 23Kughïtö Musa lïkïnyi kutang yïm. Kiyonï ECHOTYON kighumöt nko takarïs akïrökwï ma kungwïn ngwïny. 24#Ngo 8:8; 16:21. Kiropan kïchïnu takarïs akuryal yïmö le ma. Kitomönye kïmito cho lata choni otini kitor koro Misri nko ye. 25Kunyar takarïschay kïgh anka tïkwïl nyo kimi par ompö koro Misri kïmïkul: pich nko kyak nko onkïy nko pagh cho mi par akïrïng ket löwïr. 26Kïpoto koro Kosyen, wölo kimi pipö Israel nyo kimömicha takarïs.

27Kuyoktö Parao kekur Musa nko Aron akïlenchï chane, “Kaghan ngokï ye, wölo ECHOTYON nyo pö man. Wölo ani nyo kalel nko piköchan. 28Asagha ECHOTYON, kïcheng kighumötonï nko takarïschï, ompöwölo kingwonchencha. Opïstenokwa ape, amelö totöpïyokwa nyo kogh.”

29Kïlenchï Musa nyinte, “Otini katan kanasyantanï oghïtan ewunyan kutang wölo mi ECHOTYON. Wonyot nyu kighumötonï nko takarïschï, atenkïtunö lö pö ECHOTYON ngwïnya. 30Wölo onkïtön lö melö kekonyïtönyi nko mötworiku ECHOTYON Tororöt.”

31Kilï takarïs kitani nko matay, ompöwölo kökiterempan matayï akïwö tapïk kitani. 32Wölo kimenyorisyöcha nkanuna nko paghe walaka, ompöwölo kitomönye kuyin.

33Kïweghö Musa tawu Parao kutang sanypa kanasyantanay, akughïtö ewunyi kutang wölo mi ECHOTYON tökuwonyö kighumötonay nko takarïschay, amelö kitökïropan ngat. 34Wölo otini kisïwa Parao lö mökïminye rop nko takarïs nko kighumöt, kwigh ngokï ngat akwaghïghit möt nko mötworichi, 35amöchömchïnye pipö Israel kïpa, lenyini kimwochï ECHOTYON Musa.

Talam

Currently Selected:

WUWÖT 9: PIPÏLIA

Highlight

Copy