IGHISYEWUT 26
26
1Kïlenchï Akripa Paulö, “Imukenyi ye nyu ngölone.” Kughïtö Paulö ewunyi akïghet kegh lö,
2“Olentan otïngetan tokoch nyo karam tya asete, pöytoghin Akripa. Ompöwölo kamukan ye nyu agheta kegh tawungu ompö ngal löwïr cho kömïrchanïn pipö Yaudi. 3Ompöwölo mechinyinye ton nyonikïny ompö otöptino pipö Yaudi nko teputkökwa. Nyo osominyi ye nyu lö terwante ngalechu ompö mïkukönöt.
4“Nkït pipö Yaudi löwïr otöptönyan kïngeta otini kyochan mïnïng. Nkït chane kïngeta tagh wölo kyotöptonan ompö korenyu nko ompö Yerusalem. 5#Ist 23:6; Plp 3:5. Nkït chane kïngeta otini le tagh, ontö chömöy chane kïsöwintönöy lö, kyochan chi nyo kyanam ngaleko sowutko piköcho Parisaytin,* arïpan lasiny le chane. 6Anyï omitan ye yi kerwokyinon ompö kikönöt nyo kiyomisï Tororöt papotïnecha. 7Kiyomisötononi nyaye könöy ortïnecha chay le taman nko odeny lö, nyoru chane atonoghyö kïsagh Tororöt nangat nko pöghet. Akwompö nyu, kikönötononi nyini ye mi pipö Yaudi kurwokinanïn ye pöytoghin! 8Ompö ne tökwoghïghchokwa aghana lö muköy Tororöt kwigh pich cho kimeghö kututu?
9 #
Ist 8:3; 22:4-5. “Kyononan ante lö, agh kïgh anka tïkwïl nyo olyoko kaynata Yeso nyo pö Nasaret. 10Kyaghan lenyoni ompö Yerusalem. Kïchömwanïn tïsï cho echön agh lenyoni, atorchan pipö Tororöt cho chang chela akïkany kemïtï chane kirwoko meghat, achaman lenyoni. 11Kyachopan chane kong kïnyïl cho chang otini kimi kïsoghöy ompö kori sowut, amukyï agh chane kuchal kighanatengwa, kyanarekan nko chane nyoman tökwighanïn owö kanastina koroswe walaka atachop kong chane.
Söwintönchini Paulö waghakatenyi
(Ist 9:1-19; 22:6-16)
12“Ki kïyoni nyoni kipanïn owö Damaska, kiyontanïn tïsï cho echön akïkonanïn palaltin cho pö owesyö. 13Kyomitan nyu pan otini keghyö asis, pöytoghin, kïnyini kulïwï löpoyïn nyo kitïl löpoyïn pö asis nyo kingwïno yïm nyo kiwitanïn nko pïchay kyowetan tïkwïl. 14Kepïtyicha ngwïny lapay, alïman kut nyo kilenchanïn ompö ngala Eprania, ‘Saulö, Saulö! Ompö ne techopaninyi kong? Nyinte kegh nyo ichiröy ato ilentenyi otyorsïyi.’ 15Atepan lö, ‘Ichinyi ngo nya Echotyon?’ Kïlö, ‘Ochan Yeso nyo ichopenyi kong. 16Wölo ngeta aighyongö kelyeku. Koporunyi kegh ataghinyi lïkuna mötworintenyan atewïyö mwochinö pikö walaka ngalechï kesïwenyi asisï nko tïku walaka cho toporunyi. 17Osörunoninyi pipö Israel nko pipö punton, chini oyonchininyi. 18Nyi nyo iyotyini chane konyikwa ategha chane kïmïlisyeghö tuwïn kïpka wölo mi löpoyïn, akïngetunö owesyo Onyöt kïpka wölo mi Tororöt, akelöstoghchï chane ngokikwa ompö kighanatengwa nyo tïng ompö ani, atökelöwönchï wölo tïpisot nko pich cho le kïlanpa Tororöt.’
Kömwowï Paulö pöghisyenyi
19“Kïlenyona, pöytoghin Akripa, kimalïkwanye tighin ompö sïwïyaghnoni pö yïm. 20#Ist 26:20,28-29. Kyamtan nyo pö tagh ompö Damaska, atolapay amteghan kanasyanta Yerusalem, amteghan koro Yudea kïmïkul nko koros lapay cho pö punton, kyomchan chane lö mïchini kïkötö chane ngalekwa akïmïlisyö kutang wölo mi Tororöt, akwigh nyu pöghisyewut cho poru lö kikïkötö chane. 21Kinamanïn pipö Yaudi otini kyomitan Kö pö Tororöt,* ompöwölo kyamtan ngalechoni lenyoni, akumukyï kïtïghanïn. 22Wölo kingarakanïn Tororöt tökwanyï omitan ye oghyongo yi tosöwintönchï pich lapay, cho mïnkech nko cho echön. Ngalechoni omwoghan lö pkonöy kwighisyot, kïkarkegh nko chanye kingor werkoy nko Musa, 23#Isa 42:6; 49:6; 1Kr 15:20. lö, kichopöy kong Kristo,* atökïlïkwï nyo tagh nyo tutuno pich cho kimeghö, atökïmwochï pipö Yaudi nko pipö punton lö, kimuköy kesöru chane, köröy kegh nyoni nko löpoyïn ompö chane.”
24Otini kimi Paulö kïngölonöy, kuchïrima Pesto lö, “Kipilönyi Paulö! Keghinyi chïreryengu nyo wow pilö!”
25Wölo kuyokyï Paulö lö, “Mochanye pilote, we Pesto nyo konyïtot! Ongölonan ngala man akï pö chïreryö. 26Pöytoghin Akripa, melö owöghan omwowunyi ngalechete ompöwölo onkïtön lö, kilïmanyi nyite. Ankïtön nyo pö nyoman lö, kipköchinyi ngalechoni löwïr ompöwölo kimeghisyeghöcha ngalechoni wölo wïngate. 27Ayo, we pöytoghin Akripa, ighönenyi ngala werkoyï? Onkïtön lö, ighönenyi.” 28Kïlenchï Akripa Paulö, “Imökenyi wöghökanïn alïkwï chi pö Kristo ompö pöroyïnete tangogh so?”
29Kuyokyï Paulö lö, “Ato kö tangogh pöroyïn anta kö kogh, wölo osoghan Tororöt lö, telïkunyi le ani nko pïchete teröy ngalechan kïpoto chï le sïrïmtin!” 30Atolapay kïnget pöytoghintö nyo wow nko pöytoghinte nyo ripöy, Pernike nko nyu pikö kïmïkul, 31akwotini kipetöy kïngölonchï kegh chane lö, “Meghatnye chichï kïgh nyo kömïchini ketïgho anta kïrata.” 32Kïlenchï Akripa Pesto, “Kötö kityököy chichï ntömökïlokyï Kaisari.”
Kakimït Paulö kïwö kughegh Rumi
Currently Selected:
IGHISYEWUT 26: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
