IGHISYEWUT 25
25
1Nyini kiwany Pesto osis sömök kïngata kïnam paytagh ompö koronay, kïweghö Kaysaria kutang Yerusalem. 2Kïmwochï tïsï cho echön nko kintöghoghi pipö Yaudi Pesto ngala Paulö ompö wölini. Kïsom Pesto lö, 3mïtwecha Paulö kungwïn Yerusalem, ompöwölo kökikïtat kusyep nyinte ara or atökïpar. 4Kuyokyï Pesto lö, “Ratate Paulö ompö Kaysaria, owentan ante atolekït wölini. 5Akanya kïpa kintöghoghikwa nko ani Kaysaria atökurwokyï chichoni, ato mi kïgh nyo lelate nyinte.”
6Kïtöpö Pesto nko chane osis cho ngata mut nko sömök anta taman köny, atolapay kïwö kutang Kaysaria. Ato mi asis nyo kirïptoy, kïlït kö pö kirwok akïtöpö ngacharunyi, akïmwatïta kemïtï Paulö. 7Nyini kïti Paulö kughyong pipö Yaudi kuwit nyinte cho kipkono Yerusalem akutor kïmwa lö, “Ighate chichï ngal cho chang cho ghach nyoman.” Wölo kimemïcha ntökukïniniö ngalechoni. 8Kïghet kegh Paulö kïlentöy, “Maghanye kïgh nyo gha ompö kirurut pö pipö Yaudi anta ompö Kö pö Tororöt* anta ompö Kaisari.”
9Kïmak Pesto kïnama kongot pipö Yaudi, kïlenyona kïtep Paulö lö, “Imökenyi wete Yerusalem atö kerwokyinenin wölini kïrïp kegh nko ngalechoni ompö tawunyan?”
10Kuyokyï Paulö lö, “Omitan oghyongo tawu kö pö kirwoko pöytoghin, wölini kömïchinanïn kerwokyineghenon. Tomönye oghchan kïgh nyo gha pipö Yaudi, lenyini inkïtönyi lasiny. 11Kwato kanyaran kirurut agh lelut nyo mïchini ketïghanïn, kïmelö komökan lö, tachïwït. Wölo nyu ato puryö man ompö ngalechoni kerwokyinenanïn chane, kïmöminye chi nyo töninanïn morikwa. Opchinan ye nyu lokechu Kaisari.”
12Kïkany kuwany kïngalan Pesto nko kirurichi, kuyokyï lö, “Kemwanyi lö opchini lokechu Kaisari, kïlenyona iwetenyi nyu wölo mi Kaisari.”
Kirwokyini Paulö ompö tawu Akripa nko Pernike
13Kïkany kuwer osiswö cho te, kungwïn pöytoghintö Akripa nko Pernike Kaysaria kïtaroch Pesto. 14Kïkany kïtïpï wölini osis cho chang, kïmwochï Pesto pöytoghintonay ngalechay pö Paulö. Kïmwochï lö, “Mi chi yi nyo kipïstö Peliki kïratate. 15Ato kyomitan Yerusalem, kwipkanïn tïsi pipö Yaudi cho echön nko poy ngalechi akïmach orwokyan nyinte. 16Wölo olenchan melö otöp pö pipö Rumi kurwokyï chi kïtomö kutuyö mököy kwipöy nyinte ka kirwok, atökïsïch pöroyïn nyo söröpchini kegh ompö ngalechoni kirwokyinegho. 17Nyini kipka, aghan ngalechay lawel, ompurön kö pö kirwok asis nyo kirïpöy amwatïta kemïtï chichoni. 18Kughyö pïchay kitïngö nyinte kirwok wölo kimemïcha kuporï kini gha kigh nyinte le wölo kyonontenan. 19Wölo kïgh nyo kitïng nko nyinte kïteput cho kirïpöy kegh nko ngaleko kighanatengwa nko ngala chi nyo kikuro Yeso, nyo kima, wölo kïlö Paulö söpöy nyinte. 20Kupölanïn wölo kïmutïtoy ngal cho lenye chï. Kïlenyona atepan Paulö lö ekömököy kïwö kerwokinegho nyinte Yerusalem ompö ngalechoni. 21Wölo kïlö Paulö omököy pöytoghin nyo wow kïmutöy ngalechu, amwatïtan kerip tökïtenö asïyech ayontan kïwö wölo mi Kaisari.”
22Kïlenchï Akripa Pesto, “Omökan ante tïkwïl olïmöy ngala chichoni.”
Kuyokyï Pesto lö, “Ilïmenyi asïyech.”
23Kïkany kïyech, kungwïn Akripa kïmi nko Pernike, kutö pich chane konyït nyo wow nyoman, kïpka kïlïtöy kö nyo kïtero ngal, kïmi nko yetïntin cho echön nko pich löwïr cho rumunote cho pö kanastin. Kïkurtö Pesto kemïtï Paulö. 24Kïlö Pesto, “Pöytoghin Akripa nko pich tïkwïl cho mi yi nko acha: Osïwïyekwa chichï, kölokyanïn pipö Yaudi löwïr cho mi yi nko cho mi Yerusalem ompö nyinte otï teghyot lö roko kepar nyinte. 25Wölo kimösïwanye kïgh nyo kimïchini nyinte kerwokyï kïma. Kïkany kïsom nyinte lö omököy orirchini pöytoghin nyo wow, achaman nyu ayonta nyinte. 26Wölo motïngetanye kïgh nyonikïny nyo okiröy totö pöytoghin. Kïlenyona, kamïtwan nyinte yi le tawunkwa, ntökïmïr tawungu, we pöytoghin Akripa, töto ikïtönyi ngalechï kumuchö, osïkön nyu kïgh nyo okiröy. 27Ompöwölo pköchinanïn lö merokonye keyonta chi nyo ratate kïtomö keporï lasiny ngalechini kïlentöy kanam nyinte.”
Gheto kegh Paulö tawu Akripa
Currently Selected:
IGHISYEWUT 25: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
