IGHISYEWUT 23
23
1Kuchirchï kong Paulö pïchay mi Kokwö* akïlö, “Tupchenichu! Möwiranïnye choghïn nyo gha ompö tawu Tororöt ompö nyete le asisete.” 2Kïmwochï Anania nyo le Tïsin nyo Wow* pich cho kighyongo atolekïtö Paulö lö, arapaka nyinte kut. 3#Mat 23:27-28. Kïlenchï Paulö, “Nya kurapakinyi Tororöt, nyi nyo ilata nayat nyo kikïnyïra choka! Ketöponenyi atoni irwokwanïn kïrïp kegh nko kirurut, akwanyï inyorenyi kirurut imwochini pich kurapakanïn.”
4Kïlenchï pïchay kighyongo atolekïto Paulö, “Kechïpönyi Tïsinto Tororöt nyo Wow.”
5 #
Wuw 22:28. Kuyokyï Paulö lö, “Kömonkïtönye tupchenichu lö, kö Tïsin nyo Wow, ompöwölo lentöy Kikirut, ‘Mengalana nyo gha pöytoghinteto pikökwo.’ ”
6 #
Ist 26:5; Plp 3:5. Nyini kinkïtï Paulö lö, Sadukaytin* walaka kï Parisaytin* walaka ompö pïchoni, kïngölonchï Kokwö ompö kut nyo wow lö, “Tupchenichu. Ochan Parisayon, nyo le wero Parisaytin. Kakirwokwanïn ompö yi ompöwölo okönan lö, tutu asïyech pich cho kikïmeghö.”
7Nyini kiwang kïmwa lenyoni, kutor kïsyal Parisaytin nko Sadukaytin, akïpesyö. 8#Mat 22:23; Mrk 12:18; Luk 20:27. Ompöwölo lentöy Sadukaytin metutucha pich akï puryö malayken anta oy. Wölo ghönöy Parisaytin choni löwïr kï sömök. 9Kïtasa syalanay kïyetï, kïnget koneti kirurut walaka cho pö okumpö Parisaytin kughyö akïghetisyö lö, “Möminye kïgh nyo kalel chichï manan köngölonchï nyinte mïkulögh anta malaykayan köny?”
10Kïwowit kimölötonay tya ntökuwöghisyö yetïnay lö, töptoy pöröy tuyononi Paulö. Kïlenyona, kïmwochï askarinechi lö, oröytenö ape amïtuna Paulö, kungwïna kwenungwa, amït nyinte kïwö kö pö soch.
11Kughyongö Echotyon oghononi ato kilekïto Paulö akïlenchï, “Inyakanitï! Ompöwölo kïle wölo kesöwintönchaninyi ompö yi le Yerusalem, kïmïchini söwintönchaninyi lenyoni ompö Rumi tïkwïl.”
Söpchini pipö Yaudi Paulö tökïpar
12Kïtuyö pipö Yaudi walaka ompö asis nyo kirïptoy akuwalwal kegh ompö tawu Tororöt lö, “Mökyomisïyechanye anta kïgheghsyö tökïtenö ketïghöcha Paulö.” 13Kitïlöy, tömönut angwan pïchoni kituyö akitat ngalechoni. 14Otolapay kïpa wölo mi tïsï cho echön nko poy akïlenchï, “Kakewawalacha kegh löwïr lö mökyomechanye kïgh nyonikïny tökïtenö keparacha Paulö. 15Kïlenyona ye mwochinö nyo le nyi nko pipö Kokwö atetepa yetïnay kumïtï kungwïn wölo omitekwa aghakwa kegh le ato oyörekwa okïte lasiny ngale walaka ompö nyinte. Wölo kïmicha nyu atoni kïpsach keköngöy nyinte atökepara kïtomö kïrikï wölo omitekwa.”
16Wölo kïlïm karöchïnin nyo le mamato Paulö ngalechoni mwoghöy, kïlenyona kurïp kutang kö pö soch akïmwochï Paulö. 17Atolapay kïkur Paulö wöwïn pö askarin akïlenchï, “Mïte karachïnintonï kïwö wölo mi pöytoghintö nyo wow, tïng ngölyon nyo yöröy kïmwochini nyinte.” 18Kumït yetïnay weray kïwö wölo mi yetïnay wow akïlenchï, “Kökuranïn chichay ratate le Paulö akïlenchanïn mïta karachïnintonï wölo imitenyi ompöwölo tïng ngölyon nyo yöröy kïmwowunyi.”
19Kïnam yetïnay karachïnintonay egh akumït ato le yona, akïlenchï, “Ne ngölyonte nyini imökenyi mwowanïn nya?”
20Kïlenchï, “Köchomnyechï wowïntino pipö Yaudi lö pkonöy kïtepïnyi asïyech kemït Paulö tawu Kokwö le nyo kötomököy Kokwö kïtepo nyinte ngale walaka lasiny. 21Wölo meterchï chane, ompöwölo mi pich cho tïlöy tömönut angwan cho ghïpchot kusyepöy nyinte. Kikuwalwal kegh chane lö momisïyicha anta gheghsyö tökïtenö kepar Paulö. Mi chane ye kïpsach tökwigh ngölyontononi, akïmi kïköngöy ngölyon nyo ngwïno wölo imitenyi.”
22Kïlenchï yetïnay wow karachïnintonay, “Memwochï chi ompö akonga lö, kemwowaninyi ngalechï. Atolapay kïlenchï, ‘Wïyö.’ ”
Kakiyok Paulö kïwö Kaysaria
23Atolapay kikur yetïnay wow yetïntin odeny cho rïpöy nyinte akïlenchï, “Akanya kïnap kegh askarin cho le 200 atökïpa kutang Kaysaria nko walaka 70 cho pegho angoletin nko 200 cho pö ngötwö, anap kegh atangeta satïn sömök nyo pö soya oghö. 24Akïmwochï kïyörchï Paulö angoletin cho kiwegho, atökemït nyinte kwit wölo mi pöytoghinto Peliki nyo karam.” 25Atolapay kukirchï pöytoghintonay wow palalyan kïlö,
26“Takwes, we pöytoghin Peliki nyo konyïtote, ani Klaudio Lisia nyo kakir palayantanï. 27Kinam pipö Yaudi chichï, akilekït kïpar chane nyinte. Onkïtwan lö chi pö Rumi nyinte, kïlenyona owan nko askarin osörï nyinte. 28Kyomökan nyu onkïtune lö ne nyo kirwokyineghö chane nyinte, kïlenyona amïtan kïwö Kokwengwa. 29Kïpköchanïn nyu lö kitöpö kokwe kimölöto kirurutkökwa walaka kimasïwanye kïgh nyo kimïchini chichï kepar anta kerat. 30Kïkany kemwowanïn lö mi pipö Yaudi walaka kusyepöy nyinte, cho kimököy kïpar, amutan lö nya oyokwan nyinte kungwïn wölo imitenyi. Kyomwochan pich cho kirwokini nyinte kwipï kirwokengwa wölo imitenyi.”
31Kumït nyu askarin Paulö kïle wölini kikiyomïstö. Kïyotï Paulö akumït oghononi kïwö Antipatris. 32Kïkany kïyech, kïmïlisyö kö pö soch askarinechay kipegho kelyön, kïpïstö chay pö angoletin kïpa nko nyinte. 33Kumït kïwö Kaysaria, akutö pöytoghintonay palalyante, akwonkoghchï nyinte Paulö. 34Kusomön nyu pöytoghintonay palalyantanay atolapay kïtepa Paulö kore wölo kingwïno. Nyini kinkïtï lö ki chi pö Kilikia, 35kïlenchï, “Oteran ngaleku asïyech atonkïtwan kini keghanyi otini ketï pïchoni kirwokunyi.” Atolapay kïmwatïta keripö Paulö kö pö Erode nyo pö kirwok.
Kirwokyini Paulö ompö tawu pöytoghin Peliki
Currently Selected:
IGHISYEWUT 23: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
