IGHISYEWUT 22

1“Werköcho nko papotïnechu, oterwante angalan ompö tawunkwa.” 2Otini kilïm kïngölonchini chane ompö kuti Eprania, kïsisyö lasay kulet tagh Paulö kïlenchï,

3 # Ist 5:34-39. “Ochan chi pö Yaudi, nyo pö kanasyanta Tarso ompö Kilikia, wölo kyanaran kanasyantanete pö Yerusalem akinetanïn Kamaliel. Kikinetanïn lasiny wölo töptoy kirurutko kukötinecho, akyochöman Tororöt le wölo alatekwa tïkwïl nyete le ye. 4#Ist 8:3; 26:9-11. Kyachopan kong apar pich cho kirïpöy Aranï. Kyaratan mïrön nko kor atorchï chela. 5Muköy ntökukïniniö Tïsin nyo Wow* nko Kokwö* nyo kikikirchï werköcha pipö Yaudi kïmïkul lö omwoghan ngala man. Kyosïkan chane palaltin cho kimi Damaska, owan nyu wöloni atamïtï pich kïpka Yerusalem kïrötote atökemuny.”

Mwotïtoy Paulö waghakatenyi

(Ist 9:1-19; 26:12-18)

6“Ato kyomitan oruto owetöy Damaska nyini kilekïtit arikan, kulïwchanïn löpoyïn wop tïkwïl atongata atay keghyö asis nyo kingwïno yïm. 7Opïtyan ngwïny alïman kut nyo kingölonwanïn lö, ‘Saulö, Saulö, ompö ne techopaninyi kong?’ 8Atepan lö, ‘Ichinyi ngo nya, Echotyon?’ Kïlenchanïn, ‘Ochan Yeso nyo pö Nasaret, nyini ichopenyi kong.’ 9Kisïwa pïchini kyomitan tïkwïl löpoyïnoni, wölo malïmcha kutito chichini kingölonwanïn. 10Atepan lö, ‘Alïkwï ne ye nya, Echotyon?’ Kïlenchanïn, ‘Ngeta, wïyö lïtö kanasyanta Damaska, atö kemwowunenin wöloni kïgh anka tïkwïl nyo kakïtötunyï Tororöt igha.’ 11Kimosïwïyanye kïgh ompöwölo kiköryolanïn löpoyïnay. Kuretanïn pïchay kowetan tïkwïl ntatan Damaska.

12“Kimito chi nyo kikuro Anania kanasyantanoni pö Damaska, nyo kighönöy Tororöt akïrïpöy kirurut, akitïng konyït ompö pipö Yaudi kïmïkul cho kimöngöy kanasyantanoni. 13Kungwïn wölo omitan, kughyongö kamasunyan akïlö, ‘Tupchenyu Saulö, rosïtena ngat.’ Panini lawel arosïtan asïwan nyinte. 14Kïlenchanïn, ‘Kakwighinyi Tororöt pö kukötinecho nkïtunö machatenyi, atesïwena Mötworintenyi nyo pö man ailïm nyinte kïngölonuneninyi kutinyi. 15Ompöwölo ilïkunenyi söwintenyi nyo imwochini pich löwïr kini kesïwenyi ailïm. 16Akï yeo, ne nyo iköngenyi? Ngeta kepatisanïn atökemwötun ngokiku otini ikurenyi kaynata Echotyon.’

Kömwochï Echotyon Paulö kïwö kwomtochï pipö punton Lökoy cho Karamach

17“Amïlan owö Yerusalem ngat, kïkany otini kyomitan osoghöy ompö Kö pö Tororöt,* asïwan sïwïyagh, 18asïwan Echotyon kïmwowanïn lö, ‘Ngetena Yerusalem lawel ompöwölo meghönöcha piko wölete söwintönengu ompö ani.’ 19Oyokyan lö, ‘Nyini nkït chane nyoman nya we Echotyon lö, ani nyay kyolïtotoy kori sowut, anam pich amuny chane lapay cho kighöninyi. 20#Ist 7:58. Akïkany atanya kikïtïghöy söwintengu Stepano, kïkyomitan atoni, achaman pörchengwa, aki ani nyo kyoripöy sïroko pörichoni.’ 21Kïlenchanïn Echotyon, ‘Wïyö, ompöwölo oyontoninyi wete koro punton wölo low.’ ”

22Kïter pïchay ngala Paulö nyini kitïta atoni, Atolapay kutor kuteghyö tya lö, “Anateghena chichï! Apara nyinte! Mömïchininye kïsöp.” 23Akwotini kimi kuteghsot akuwiswïsöy sïrokökwa, akwïstoy terït kïpa yïm. 24Kïmwochï wowïnay pikachi kumït Paulö kïwö kutang köyay ripote, akïmwochï chane kïmuny nyinte atökenkïtï lö kïgh ne keteghyegho pipö Yaudi le nyï. 25Wölo nyini kirat chane nyinte kuwonyö, atökïmung, kïtep Paulö yetïn pö askarinechay lö, “Chömunyi so kirurut munge chi pö Rumi, kïtomö kerwokï?”

26Nyini kilïm yetïntonay lenyoni, kïmïla wölo mi nyay wow akïtep lö, “Ne nyï imökenyi ighe nya? Manyïnye Rumiyon chichay.”

27Kïlenyona kïwö yetïnay wow wölo mi Paulö akïtep lö, “Mwowune köny, ichinyi chi pö Rumi so?”

Kïlenchï Paulö, “Owöy.”

28Kïlenchï yetïnay wow, “Kyalïkwan chi pö kanasyanta Rumi ompöwölo kyalan ropïyen cho chang.” Kïlenchï Paulö, “Wölo ochan chi pö Rumi ompö yiyö.”

29Panini lawel kuchïchuka kegh wölo mi Paulö pïchay kömököy kïmunyöy nyinte, kuwöghisyö yetïnay otini kinkïtï lö ki Rumiyon Paulö, akwanyï karata nyinte sïrïmtin.

Mi Paulö tawu Kokwö

30Kimököy nyu yetïnay wow kunkïtu nyoman lö, kïgh ne nyini kirwokinegho pipö Yaudi Paulö, kïlenyona kutyak asis nyo kirïpöy sïrïmtin cho kikïrata Paulö kïmwochï tïsï cho echön nko Kokwö kïmïkul kïtuyö. Otolapay kïpïsï Paulö kungwïn kughyongö taghtangwa.

Currently Selected:

IGHISYEWUT 22: PIPÏLIA

Highlight

Copy