Mark 5

Bud kehdó Jisas busaw

(Matyu 8:28-34; Luk 8:26-39)

1Ngang le mówóng le Jisas efet le kól sendifal yóm Lanaw Galili bè benwu yó kem tau Girasin. 2Timbow le dmuung bè kilil, omin Jisas kmó ete kembu. Tódô senlong yóm sotu tau wen busaw malak du lemwót bè yó kem kilib gónó lembeng. 3Són bè yó gónóhen gel nô nim tau ni. Laen kô dù tau gembek mfét du, baluen ke kedina. 4Deng dê dulék le ne kemdina sigelen ne tihen, ewenem tódô gotu bkas yóm kedina le du. Laen kô dù tau gembek mafas du. 5Tódô senflósen kdaw ne kifu tendo mógów sembeweg gu lem blóng yó kem lebeng ne gu lem bulul. Tódô gel hendlaen lemangat, lelen gel migad du bè knóen yó kem botu telem efet hnalì.

6Bè yóm ktonen ke Jisas, hanà tolo mayuk béléen. Yó nmoen, tódô kendel mlóy ebéléen na a mtud bukol bè soluhen, 7ne ominen tódô hendlà lemangat, monen, “Ó Jisas, yóm hol Ngà yóm Dwata alì geta bè kdéen. Tedu hendufem béléu ni du? Smafai do bè Dwata kun anì là kendel tnafakem do ni.” 8Yó gónón mon du nim ni, abay se deng eles mudél Jisas ebè yóm busaw, monen mò du, “Mdóhi béléen.”

9Ne snólók Jisas yóm busaw, monen, “Tedu de boluyem?”

Bnalaen se, monen, “Yó dou boluy ‘Genged’ abay se tey me wen.” 10Tódô henlelen hkodu bè Jisas anì là hdóhen kul bè yóm benwu yó. 11Bè yóm kdaw yó, kulel se keswól le talak bilil yó kem tey sdô wen, uma kóm geblà klayuken bélê le. 12Yó henkodu le bè Jisas yó kem busaw, mon le, “Yake bè yó dé kem sdô tuu gónóm e hfusek kum.” 13Tahu se, hlus Jisas lu. Ne tódô tebel yó kem busaw yóm tau yó koni, ne husek le ebè tu kem sdô. Kewót le se kul yó kem tey sdô wen, dô limu libu kwen le, gotu le sedlu mlóy mosol ebè tubaw kbu yóm lanaw, ne gotu le gekmó elemen, ne tódô le gotu lemneb yóm kdê le.

14Kewót le se kul yó kem tau gel semgyok yó kem sdô, tódô le gotu lemwót mlóy ebè yóm benwu moni bè yó ne ebè yó kem dumu tau gmónô hmilol na le e tulón kul yóm deng ton le. Mung kungol le du, tódô le sguku etu na le e hnénég yó kem deng tulón le kul. 15Timbow le gdofì bè Jisas, tódô ton le se yóm tau tehe genged busaw malak du myón klohok Jisas. Deng bud lemsek nes, ne deng bud hyu kehedemen. Ya tey sidek klikò le yó kem tau sguku ebè yó yó. 16Yó kem tau mton du yóm deng nmò Jisas bè yóm tau tehe wen busaw malak du yó, bud lu se fen alì tmulón du bè yó kem dumu tau. Ne tulón le snéen yóm kmò kton le yó kem sdô. 17Lemwót yó kem tau bè yó, henkodu le bè Jisas anì tnagaken yóm benwu le. Tahu se, lemwót le Jisas.

18Bè yóm kotunen elem ówóng, tey kehkoduhen bè Jisas yóm tau tehe wen busaw malak du anì tô mung kul. 19Okóm là kô henmóyô Jisas du, mom monen mò du, “Tódói mulék ne ebè yó kem fes lówóhem. Tulónem kul yóm tey deng nmoen béléen yóm gónóhem mogot ne yóm tey kkoduhen kóm.” 20Tahu se, mulék yóm tau yó. Tódô lengeben bè klamangen yóm benwu boluyen Sfolò Benwu gónón e tmulón du yóm deng nmò Jisas béléen. Ya tey kehtaw le du yó kem tau gel mungol du.

Kkó Jisas des yóm libun mdù nesen ne klowilen yóm ngà libun deng mlef

(Matyu 9:18-26; Luk 8:40-56)

21Bud kewót le Jisas bè yó, mówóng le mulék efatu lanaw. Bè yóm bud kduung le, ya tey tau wen bud sembung kul bè yó bè kilil lanaw. 22Ne wen sotu tau sut bè Jisas, boluyen Jarus, tau wen glalen bè yóm kul gónô stifun bè yó. Bè yóm ktonen ke Jisas, tódô na a mtud bukol bè soluhen, 23ya tey kehkoduhen béléen, monen, “Ó Sér, tey leed desen yóm ngau libun. Holi mung dou bè gónóu nam e nnok dou anì tódô mkó tum desen, ne anì bud mowil.”

24Ne tahu se, mung du Jisas, ne lel yó kem tey tau wen tendo seklot hmilol du. 25Wen sotu libun gemnóm des tenbalung gbool bè yó kem tey tau wen huli ke Jisas. Deng sfolò lewu halayen gemnóm du yóm desen. 26Deng dê duléken ne gel hbulung bè duktur, botong gotu filaken, ewenem là kóen mkó yóm desen, deng mom temnù. 27Deng gel gungolen yóm nmò Jisas, yó gónón tódô hegbool bè yó kem tey tau wen huli du. 28Yó hendemen, “Baluen ke olohu gemdù nesen, kaem tódô mkó nim desu.” 29Tahu se, nan e gdù nes Jisas, ne tódô sennganen se teflok yóm litô tendo gu béléen, ne gnómen se yóm deng kehyuhen.

30Unin mdù du, tódô gnóm Jisas se yóm kwen ktued hkó des lemwót gu béléen. Ominen binguy ete kwangen, monen, “Tmau du mdù nesu ni koni?”

31Ne mudél se yó kem gel lemolò du, mon le, “Ilóem là tonem du kô yó du kem tau seklot hmilol kóm yóó? Tlek kóm tô smólók ke tau du mdù nesem.”

32Okóm là kóen mkó kebel Jisas du mata yóm tau mdù nesen yó. 33Ne tódô tngón yó sem libun, ebéléen gónón e gbak yóm mon Jisas yó. Tódô setbol kkelen lemwót bè yóm tey klikoen, na a tódô mtud bukol bè solu Jisas. Gotu benkas tulónen du yóm ktahuhen. 34Mon Jisas se mò du, “Yó ne, Lenibun, bè yóm kehtahuhem béléu, yó se gónón mkó yóm desem. Tu ne, muléki. Dwata he henek nawahem. Laen dù bud sfuhen ne yóm desem.”

35Yóm igò Jisas tolo stulón bè yóm libun yó, wen tau sut bè yó lemwót bè gónô Jarus, ne mon le mò ke Jarus, “Là bud gafitem du ne ngaem. Bê kuy dog bud hnala ne Jisas.”

36Okóm ke Jisas, là dog kenmónen du yóm mon le yó, olon mon du mò ke Jarus, “Béem htafa nawam. Tódô henlelem yóm ksaligem do.” 37Kewót Jisas bè yó, tek són Pitér ne Jim ne twolihen Jan nwiten, là nwiten kul yó kem dumu tau. 38Bè yóm kkól le ditu bè gónô Jarus, tódô glo le tey dê tau hebnes bè yó, lenangag le yóm ngà deng matay, ne tey sidek kkik le. 39Omin Jisas husek elem gónô, monen mò yó kem tau bè yó, “Mò ye alì hebnes ni du? Tedu alì nkik ye ni? Là kóen matay yóm ngà, olon tungô.” 40Deng mom henkéng le Jisas yó kem tau yó. Omin Jisas gotu hewà kul, tek són mà yóm ngà ne yéen ne yó kem tlu tau gel lemolò du nwiten elem tum dfél gónón nô yóm ngà. 41Kól bè yó, nogoten sigel yóm ngà, ne monen mò du bè kul udél, “Talitha koum.” Yó lanen, “Ó Bun, btiki ne.” 42Tahu se, tódô kendel btik yóm ngà, ne tódô mógów gu bè yó. Deng wen dô sfolò lewu ne halayen yóm ngà yó. Ya tey ketnga yó kem tuhahen. 43Bede tey mget kmon Jisas du mò kul, “Hol bê ye abay tulón yóm deng nmou bélê ye ni.” Ne bud monen mò kul, “Henken ye dé.”

Currently Selected:

Mark 5: tbl

Highlight

Copy