Luk 22

Kessatul le yóm kmò kekfô le ke Jisas

(Matyu 26:1-5; Mark 14:1-2; Jan 11:45-53)

1Móyónen bud hto ne yóm mò ken bong yó kem Ju gónó le gel mken du yóm mambang laen dù bulung henoken. Yó boluyen, mò ken bè Kdaw Khius. 2Bong yó kem geta bè yó kem tau gel demsù ebè Dwata kkólen bè yó kem tau gel tmolok hlau, sónmò le mebel lan le lemifut hmatay ke Jisas. Yó gónó le tô lemifut du, knikò le yó kem tau gel hmungol ke Jisas.

Katul Judas ke Jisas

(Matyu 26:14-16; Mark 14:10-11)

3Bè yóm kdaw yó, husek Seitan bè hendem Judas, yóm gel boluy le du Iskariyut. Du se sotu bè yó kem sfolò lewu deng gel lemolò ke Jisas. 4Kewót Judas bè yó, nan e nit satul yó kem geta bè yó kem gel demsù ebè Dwata kkólen bè yó kem gónó le galak yó kem tau gel mentey bè Gónô Dwata. Tulón Judas kul yóm kmò któbóngen kul anì gekfô le Jisas. 5Ya tey ktimu óyô le. Glok le fmasad ke Judas filak mò ofolen mò du bélê le. 6Ne móyô se ke Judas kun. Kewóten bè yó ne, sónmoen mebel lanen anì gekfô le Jisas, okóm ten-gwaen se yóm là kton le du yó kem dumu tau.

Eles kehtifes le yóm mò ken bè Kdaw Khius

(Matyu 26:17-25; Mark 14:12-21; Jan 13:21-30)

7Timbow hto yóm kdaw kken le du yóm mambang laen dù bulung henoken, yó se yóm kdaw gel wen ngà ubiha hnatay le mò tnétê le bè yóm mò ken bong bè Kdaw Khius. 8Yó gónó Jisas mdók kul le Pitér ne Jan, monen mò kul, “Eles ye lemwót kut ne, na ye e nmò kut nim ken ni mò ken tekuy kifu kedeng.”

9Ne bnalà le se, mon le, “Nô se gónó me tô mò du du?”

10Ne yó mon Jisas mò kul, “Mógów ye ebè Jirusalim. Ke deng ye kól ditu, angat wen logi geslong ye mit él. Tódô ye huli du efet kól ebè yóm gónô gónón e mulék. 11Ke sok ye deng kól bè yó, snólók ye yóm fun gónô, mon ye mò du, ‘Hsólók yóm tau gónó tekuy gel htolok yóm dfél mò gónó me sbung mken yóm ken bè Kdaw Khius.’ 12Ne tódô toloken kuy yóm dfél bong le bè gewun sodò seel tofi ta, deng eles tódô ket du ne yóm kimu ken nô du. Ne bè yó gónó ye mò du yóm mò ken tekuy.” 13Ne tahu se. Kewót le bè yó ne ebè tum syudad, ne tódô lómón se yóm tehe ktulón Jisas du kul. Ne bè yó se gónó le mò du yóm ken le sbung bè yóm mò ken bong yó.

Yóm mò hemget du yóm fasad Dwata

(Matyu 26:26-30; Mark 14:22-26; 1 Kurin 11:23-25)

14Tikóng deng kól du ne yóm kesbung le Jisas mken, gotu le seyón hilolen yó kem gel hógówen. 15Yó mon Jisas mò kul, “Tey bong kehyu nawahu du nim keseyón tekuy mken ni yóm gu laanu là deng gemnóm du yóm angat keglayamu. 16Tódô tulónu kuy, hatan bud kenu he dou nim ken ni ke deng kól bè yóm hol tennefen ditu bè yóm benwu nogot Dwata.”

17Omin Jisas mkay yóm sotu tgayan gónón nô yóm ninum le, bede nan na mni bè Dwata, ominen mon du mò kul, “Ni sensinum ye. 18Tódô tulónu kuy, hatan bud ninumu he dou nim ninum tekuy ni ke deng kól bè yóm kogot Dwata tau.”

19Ominen bud ma yóm mambang, ne nan bud dóyón Dwata, ominen yó kembéng du, ne blayen kul, monen mò kul, “Nim mambang kenbéngu bélê ye ni, ni se dou lówó angat gamà bélê ye. Ken ye mò gónó ye hemtulón dou nawa.” 20Timbow deng kken le, ominen bud ma yóm ninum le, monen mò kul, “Nim bud hinumu kuy ni, hnigaden yóm lomi fasad nmò Dwata bélê ye. Yó hemget du, duhen yóm dou litô angat gamà bélê ye.

21Okóm yóm fen matul dou bè yó kem hmohon dou, deng seyón béléu bè ni bè lemisa. 22Yóm angat katay yóm Ngà Tau,” monen, “tódô uliten bè yóm deng eles kolu Dwata du. Bede nawaw tey tafaken yóm tau angat matul du ebè yó kem hmohon du.” 23Lemwót yó kem gel lemolò du, gotu le ssólók ke tmau du bélê le gónón e gbak yóm mon Jisas mò kul yó.

Yóm geta bè yó kem gel lemolò ke Jisas

24Senkuya yó kem gel lemolò ke Jisas ke mahil du bélê le fen geta bélê le. 25Mon Jisas mò kul, “Yó kem tau hol geta talak tonok, tey gel kdansók le yó kem tau snakuf le. Ewenem hol kóyô le ke boluy le kul ‘Tau Hulung Tmóbóng.’ 26Okóm kuy du,” mon Jisas, “sundu yó du yóm hyu bélê ye. Ke wen sotu bélê ye móyô ke du geta bè kem dumuhen, yake hol nô béléen yóm nawa yóm tau gel tóbóng lówó. Ke wen bélê ye móyô ke du hol lemyu bè kem dumuhen tau, yake hol nô béléen dé yóm nawa yóm tau gel heklifen anì hol heklifen bè kem dumuhen. 27Bè kuy kehedem du,” mon Jisas, “tau du se yóm geta? Yóm tau tódô gel hetnù myón ne olohen tódô mken, duhen ke yóm tau fen gel hemken du? Tódô tngón ye,” monen, “yóm tau hol geta, tódô gel hetnù myón ne olohen tódô mken se kun. Olo nim dou knô lem blóng ye,” monen, “lómón ke ou yóm fen gel hemken.” 28Bud mon Jisas mò kul, “Nim kdê ye ni, là kô deng tnagak ye dou bè yó kem mgel gel sut béléu. 29Deng wen kwalis deng blay Mà do mò kmamal benwu. Senged se kuy, angat wen kwalis mogot benwu blayu kuy. 30Ke deng kól bè yóm dou kogot tau, angat ye seyón dou mken, ne angat ye gotu mogot kukum bè yó kem sfolò lewu but tau semfu gu bè tehe fù tekuy Israél.”

Eles ktulón Jisas yóm kehlalà Pitér du

(Matyu 26:31-35; Mark 14:27-31; Jan 13:36-38)

31Mon Jisas mò ke Pitér, “Hol ten-gamahem, Simun. Deng bal Seitan bè Dwata yóm angat ktilówen kuy. Hol lómó kmoen kuy, lómón kmusu halay. 32Okóm deng eles utómu u, Simun, bè yóm knihu bè Dwata anì là lanahen yóm kehtahuhem. Sok deng bud mulék nawahem ebéléu, hol ten-gelem lu yó kem dumuhem deng hemtahu.”

33Bnalà Pitér se, monen, “Baluen he ke bnanggui, Sér, senged nóm ke matayi, là kô naw e tebel kóm.”

34Ne bnalà Jisas Pitér, monen, “Tódô tulónu kóm ktahuhen, Pitér. Gu laanen là deng kmóót onuk kifu ni kdeng, deng sana tlu dulékem ne hmalà yóm ketngónem dou.”

Filak, bag, sudeng

35Wen snólók Jisas bè yó kem gel lemolò du, monen, “Yóm tehe khógówu kuy ekni, laen dù filak nit ye, duhen ke bag, ne là se tmumfà ye. Wen kô gónó ye élél?”

Ne mon le se, “Laen duen.”

36“Okóm tólóng se ni,” mon Jisas. “Ke wen kuy filak duhen ke bag, eles nit ye. Yóm tau laen dù kun sudeng, eles hbaluen yóm dumu nesen anì wen blihen sudengen. 37Tódô tulónu kuy ktahuhen,” monen, “ebéléu gónón e gbak yóm tehe snulat le bè Sulat Dwata, yóm monen, ‘Angat homong hnatay le bè yó kem tau gel mò sidek.’#22:37 22:37 Isaya 53:12. Nim deng snulat le ni, móyón dohò etahu ne.”

38Mon yó kem gel lemolò du yó koni, “Ni sii, Sér, wen lewu sudeng me.”

Mon Jisas se, “Geblaen yó ne.”

Yóm kni Jisas bè Bulul Ulib

(Matyu 26:36-46; Mark 14:32-42)

39Kewót Jisas bè yó bè Jirusalim, mógów ebè yóm Bulul Ulib, yó se yóm sana kun gel nmò. Eles le mung du yó kem gel lemolò du. 40Yóm deng kkól le bè yó, mudél ebélê le Jisas, monen, “Hol ye mni bè Dwata anì là wen gónó ye gsindil bè Seitan.”

41Kewót Jisas bè yó, hetsik, ne hóyów tnudà yóm klayuken bélê le. Yó nmoen, tuden bukolen bè tonok, ne mni bè Dwata. 42Yó monen, “Ó Mà, ke mlan bè kóm kóyô, kóhem tahu dé nim tey hlayamu ni. Bede balù wen se yóm dou tô kóyô ni, tódô hendengem yóm kóm kóyô béléu.” 43Ne bè yóm igò Jisas mni yó, wen hógów Dwata lemwót gu bè longit tódô na a hegfan béléen mò na a temgel du. 44Tódô kem hotuhen nawahen mni bè Dwata igoen alì sidek kegnómen du. Bè yóm knihen yó, yóm ingeten temdak ebè tonok, hol lómón litô. 45Tikóng hebkó mdà Jisas bè yóm gónóhen mni, bud mulék ebè yó kem gel lemolò du. Deng le mom gotu henga tungô lemwót bè yóm alì kegbeng lem le. 46Gotu bentik Jisas lu, monen mò kul, “Bê ye tlek tungô dé. Btik ye, mni ye bè Dwata anì là wen gónó ye gsindil bè Seitan.”

Kekfô le ke Jisas

(Matyu 26:47-56; Mark 14:43-50; Jan 18:3-11)

47Yóm igò Jisas tolo mudél, tódô gdofì yó kem tey tau wen. Ne tukô gna kul se Judas, sotu bè yó kem sfolò lewu gel lemolò du. Tódô hekteng nan e tô nelek Jisas. 48Okóm mon Jisas mò du, “Na, Judas, tô hlanem bè kelekem yóm Ngà Tau kô yóm katulem du?”

49Timbow glileb yó kem gel lemolò ke Jisas yóm angat tô nmò le béléen, mon le, “Tmibó me kô, Sér?” 50Ne sotu bélê le tmibó yóm sotu gel dók yóm hol geta bè yó kem tau gel demsù ebè Dwata, okóm olon sfak klingu kwananen.

51Okóm bnólów Jisas, monen, “Geblaen yó ne.” Ne nduen yóm tuhod klinguhen, ne hol lómón ke laen dù hemenen. 52Ne mon Jisas mò yó kem tau mundug du yó, yó kem geta bè yó kem gel demsù ebè Dwata ne yó kem gónó le galak yó kem mentey bè Gónô Dwata, ne yó kem tuha gónó le gel galak yó kem Ju, monen mò kul, “Tey, glok ye mit sudeng ne bogul nim na ye e kekfô dou ni. Ilóem tô heskél ye o bè yóm tau gel mò sidek. 53Igò sem ket kdawu du nô lem blóng ye lem yóm Gónô Dwata. Mò ye là tnana kemfô do ditu du? Okóm deng hto ne yóm kuy uras mò du nim nmò ye ni. Ni se kun kdaw Seitan, yóm fen mogot yóm gónón kmifu.”

Kehlalà Pitér yóm ketngónen ke Jisas

(Matyu 26:57-58, 69-75; Mark 14:53-54, 66-72; Jan 18:12-18, 25-27)

54Kogol yóm kudél Jisas ebélê le, omin le kemfô du, nwit le ebè gónô yóm geta bè yó kem tau gel demsù ebè Dwata. Bè yóm kwit le ke Jisas yó, holun huli du Pitér. 55Tikóng le kól ebè yóm gónô gónó le e mit ke Jisas, wen ofi deng hbong le talak lósól yó kem tau mò gónó le mnalang, ne gbót myón lem blóng le Pitér. 56Wen yóm sotu ngà libun nô bè yó, sotu gel dók yóm tau fun yóm gónô yó. Tonen Pitér mnalang ne hnunu tenngelen ne monen, “Ni se sotu tau gel mung du tum tau kenfô le tuu.”

57Deng mom yó balà Pitér du, monen, “Là kô tngónu du dou, Bun, yóm tau kenfô le yó.”

58Là legenen bè yó, bud wen tau dmilô ke Pitér, monen mò du, “Uu se sotu bélê le.”

Ne bud yó balà Pitér du, monen, “Là gi dou.”

59Deng dô sotu urasen bè yó, bud wen tau dmilô ke Pitér, monen, “Kaem dumu yóm tau nfét le yó nim tau ni, senged kul lemwót bè Galili.”

60Okóm yó balà Pitér du, monen, “Là me gi. Là kô tngónu du yóm monem yó.” Ne tódô sen-gengen se kmóót onuk. 61Omin Jisas beklil temngel ebè Pitér. Yó he kegbelen bè nawa Pitér yóm tehe mon Jisas mò du, yóm monen, “Gu laanen là deng kmóót onuk kifu ni kdeng, deng sana tlu dulékem hmalà yóm ketngónem dou.” 62Unin gbel bè nawa Pitér yóm yó, tódô hewà, ya tey sidek kkiken.

Kesedekà le ke Jisas ne kfes le du

(Matyu 26:67-68; Mark 14:65)

63Yó kmò le ke Jisas yó kem tau mentey du, senflowon le, lel le moug du. 64Lel le mseng matahen, ne mon le mò du, “Tensob bnoluyem kun yóm tau moug kóm?” 65Ne tey dê he dumu sidek benkó le ebéléen.

Kkukum le ke Jisas yó kem Ju

(Matyu 26:59-66; Mark 14:55-64; Jan 18:19-24)

66Tikóng deng mwas bè yó, omin le mit ke Jisas ebè yó kem tau hol geta mogot kukum. Gotu le nô bè yó yó kem tuha gónó le gel galak yó kem Ju, ne yó kem tau hol geta bè yó kem gel demsù ebè Dwata kkólen bè yó kem tau gel tmolok hlau. 67Yó mon le mò ke Jisas yó kem tau yó, mon le, “Ke uu yóm Misaya, hol tulónem kum kun.”

Ne yó balà Jisas kul, monen, “Baluen ke tulónu kuy, là kô hentahu ye du. 68Ne anien he ke wen snólóku bélê ye, senged se, là kô bnalà ye du. 69Okóm,” monen, “kewóten bè ni ne, angat myón fi bè kwanan yóm Dwata alì mfasang bè kdéen yóm Ngà Tau.”

70Ne bud snólók le Jisas, mon le, “Ke lómón se yó monem, Ngai Dwata kô?”

Ne yó balà Jisas kul, monen, “Yó sem deng mon ye yó.”

71Ne bud mon yó kem tau kmukum du yó, mon le, “Deng gotu tódô gungol tekuy ne yóm udél btang bè sumóngen yó. Anien he ke laen dù dumu tau bud tmifù du.”

Currently Selected:

Luk 22: tbl

Highlight

Copy