Tekang Kbuten 7
7
Kehdunuk Dwata bè klamangen benwu
1Bè yóm deng kdeng yóm kafal hmò Dwata ke Nuwa, bud mudél ebè Nuwa Dwata, monen, “Huseki elem yóm kafal ne, nwitem yó kem fes lówóhem. Bè kdê yó kem tau nô talak tonok, tek són uu yóm tonu mò du yóm tedeng. 2Bè kdê yó kem kay ógóf gel henmóyóu mò dsù ye ebéléu, miti elem yóm kafal ket ne hitu tengeb. Okóm bè yó kem dumu ógóf là henmóyóu du, olon ket ne stengeb nwitem elemen. 3Ne bè yó kem onuk koyu, budi mit ket hitu tengeb snéen bè ket kayen. Yó gónóm mò du yóm yó anì mowil le ne bud le mból talak tonok yóm kentihen kay ógóf ne yóm kentihen kay onuk koyu. 4Tek hitu kdaw ne duen kehkulónu du. Ne yó kegenen mò du kmulón, botong fat folò butengen anì gotu meglà yóm kdéen mowil deng tehe nmou.”
5Tahu se, gotu nmò Nuwa yóm kdê hmò Dwata du yó. 6Bè yóm kehdunuk Dwata te tonok yó, deng nem latu ne halay Nuwa. 7Yóm khuseken elem yóm kafal nmoen, mung du yehenen ne kem ngaen logi ne yó kem towuhen anì là glumfaken kul yóm tey dunuk yó. 8Kentihen kay ógóf ne kentihen kay onuk koyu, yó kem ógóf gel dsù le ne yó kem là gel dsù le du, gotu le mógów bè Nuwa, 9ket ne stengeb kmò khusek le elem yóm kafal, lómón yóm deng hmò Dwata du. 10Timbow deng hitu kdawen bè yó, msut se yóm tey dunuk.
11Bè yóm ksuten, deng nem latu ne halay Nuwa. Msut yóm dunuk bè yóm gesfoloen hitu kdaw bè yóm gewuhen bulón. Yó kmoen, tódô semfut gu lem tonok yóm tey él nô fi laan tonok ne sen-gengen se sut yóm tey kulón bong. 12Tódô knoyungen fat folò buteng mò du kmulón. 13Bè yóm kdaw khusek Nuwa elem yóm kafal yó, mung du yehenen ne yó kem ngaen logi, le Sém ne Ham ne Jafit ne yó kem towuhen. 14Ne mung kul kentihen kay ógóf, yó kem ógóf tnomò ne yó kem ógóf nô lem bnes, kewóten bè yó kem lebangen kkólen bè yó kem leneken ne kentihen kay onuk koyu, gotu mung kul. 15Ket ne stengeb bè ket kay yó kem mowil te tonok, gotu mung ke Nuwa elem yóm kafal nmoen, 16hol lómón yóm deng hmò Dwata du. Timbow deng kól lemen Nuwa, omin Dwata tmikeb du bak dól yóm kafal yó.
17Ngangen mò du dmunuk efet fat folò butengen, ya tey kngelem yóm él efet tódô lemtów yóm kafal. 18Tódô sónmoen minut nelem yóm él efet tódô mung bè lewók yóm kafal yó. 19Ngangen mò du ne yóm él efet là bud tonem du ne yó kem bulul hol geta. 20Ngangen efet hitu mitru nuléhen ta yó kem bulul geta. 21Tódô kdê yó kem mowil talak tonok gotu le matay. Kdê kem onuk koyu ne kdê kem ógóf ne kdê kem tau gotu le matay. 22Tódô kentihen mowil talak tonok gotu le matay. 23Gotu genlà Dwata kdéen mowil talak tonok, kdéen tau ne kdéen ógóf ne kdéen onuk koyu. Tek són Nuwa dù tebel ne yó kem mung du elem yóm kafalen. 24Botong lematu bud limu folò butengen kegenen wen él te tonok.
Currently Selected:
Tekang Kbuten 7: tbl
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
