Tekang Kbuten 48

Yóm olu Jakub kul le Ifraim ne Manasi

1Sotu kdaw bè yó, wen tau tmulón du ke Jusif wen des maen. Yó gónón mógów etu bè maen niten yó kem lewu ngaen Manasi ne Ifraim. 2Timbow tulón le ke Jakub yóm kkól Jusif bè yó, tódô naluhen btik myón.

3Yó monen mò ke Jusif, “Ó Ngà, yóm tehe knóu bè Lus bè benwu Kanan, hegfan béléu yóm Dwata laen dù là gbeken du ne wen oluhen dou. 4Yó udélen ebéléu, monen, ‘Angat hwenu ngaem anì dê but tau semfu gu bélê le. Nim tonok ni, blayu kul ne laen dù tul sónen yóm kfun le du.’ ” 5Ne yó bud mon Jakub mò ke Jusif, “Ne ni, Jusif, yóm gu laanu là deng kól dini, deng lewu ngaem bè ni bè Idyip, le Ifraim ne Manasi. Yó kem lewu ngaem yó, dou funen. Hol dou ngà, hol le senged bè yó kem ngau twogu le Rubén ne Simyun. 6Ke bud wen ngaem, sundu dou du ne yó. Yóm kul tonok angat nfun, tódô le gomong mfun bè kul tonok le Ifraim ne Manasi. 7Yó gónóhu mò du nim ni abay se lemwót bè yóm yéem Rakél. Tey klangagu du bè yóm katayen bè Kanan bè yóm kulék me gu bè Misuputamya. Deng me moni bè Ifrat ne yóm katayen. Tódô lebengu bè yó bè kilil lan mógów ebè Ifrat.” Yóm benwu Ifrat yó, yó se Bitlihim nim kmoen ni.

8Timbow ton Jakub yó kem lewu ngà Jusif ominen smólók ke Jusif, monen, “Kem ngà kul se ni du?”

9Bnalà Jusif se, monen, “Ni se kem ngau, kem ngà blay Dwata dou bè ni bè Idyip.”

Mon Jakub se, “Hlonihem lu dou edini anì noluhu lu.”

10Là holen bud gmefet ketngel Jakub lemwót bè yóm deng tey ktuhahen, yó gónón là hol bud mton. Omin Jusif mit kul hloni ebéléen yó kem ngaen ne sket lenkefen lu yóm tuha logi lelen melek kul. 11Mon Jakub mò ke Jusif, “Bè yóm gnan kdaw, là kem bud henkólu du ne ke bud tonu uu. Bede bè kun kmò du Dwata, botong naw gafit ton lu ni kem ngaem.”

12Omin Jusif ma yó kem ngaen nô klohok bukol témê le ne tódô hegdufok ebè tonok bè solu maen. 13Ominen yó hemsù ke Ifraim bè iwóng Jakub ne fen suen Manasi bè kwananen. 14Okóm mom senfifay Jakub sigelen. Lemwót sigel kwananen ogoten bè kulu Ifraim yóm ngà twoli. Ne fen ogoten sigel iwóngen bè kulu Manasi yóm ngà twogu.

15Ominen molu ke Jusif hlanen bè yó kem ngaen, monen,

“Yó hem Dwata tehe lolò téméu Abraham ne mau Isak, hol tmóbóng kul ni kem ngà logi ni.

Yó hem Dwata tendo malak dou efet nim kmoen ni hol tmóbóng kul.

16Yó hem hógów Dwata tehe gel lemwà dou bè yó kem gónón mgel hol tmóbóng kul.

Hol mlan bè ni kem ngà ni gónóhen là lana yóm dou boluy ne boluy yóm téméu Abraham ne mau Isak.

Dwata he hol hwen yó kem ngà le ne yó kem angat ból le.”

17Timbow ton Jusif yóm kogot maen bè kulu Ifraim yóm sigel kwananen, botong sbeweg kegnómen du. Yó nmoen, tô kóhen henmù maen bè kulu Ifraim anì ogoten bè kulu Manasi. 18Monen mò ke maen, “Sundu, Mà. Ni dii yóm ngà twogu, ogotem bè kuluhen sigel kwananem.”

19Okóm mom mon maen mò du, “Tngónu, Ngà, deng tngónu se yó. Angat tey mbegel snéen kun yóm kun ból Manasi okóm milud he kbegelen yóm twolihen. Yó kem angat semfu gu béléen baling le kem but tau alì mbegel.” 20Ne omin Jakub muyag kul bè yóm kdaw yó, monen, “Ke wen tau muyag kul yó kem tau Israél elem hulin kdaw, angat mon le, ‘Dwata he hol tmóbóng kuy lómón yóm któbóngen kul le Ifraim ne Manasi.’ ” Yó se gónó Jakub hegna ke Ifraim ne fen hfulihen ke Manasi.

21Omin Jakub mon du mò ke Jusif, “Tódô tonem se yóm móyón katayu lem blóng ye, okóm tendo eles nô bélê ye Dwata ne angat niten yu semfulék ebè tum tonok tehe fù ye. 22Hfunu kóm yóm tonok Sékém, là blayu du bè yó kem twoguhem. Yó se yóm tonok alì hyu tehe nwahu bè yó kem tau Amurayt mlan bè sudeng ne hanak.”

Currently Selected:

Tekang Kbuten 48: tbl

Highlight

Copy