Tekang Kbuten 39

Jusif ne yehen Putifar

1Bè yóm deng kwit le ke Jusif ebè Idyip yó kem tau Ismaél, bud hbalù le se kul bè yóm sotu tau boluyen Putifar yóm tau genlal yóm Faro bè yó. Yó glalen du, du kfitan bè yó kem tau gel mentey bè yóm gónô bongen.

2Bè yóm kbaling Jusif hesek bè Putifar tendo eles nô béléen Dwata, yó gónón hyu uléken bè ket yóm gel nmoen. Tódô nô bè yó bè gónô yóm tau Idyip amohen. 3Tódô dilô yóm amohen yóm tendo knô Dwata bè Jusif ne yó gónón hyu uléken bè yóm ket gel nmoen bè yóm amohen. 4Tey hyu nawa Putifar ebè Jusif, ne nmoen tóbóng lówó mò hol gfi béléen. Ne gotu hogoten du yóm kdéen tau mò nmò bè gónóen ne yóm kdê ngom nô lemen. 5Lemwót bè yóm knô Jusif bè yó, tey któbóng Dwata du yóm tau Idyip gónóhen nô, gomong yó kem tau nogoten ne kdê yó kem ngom lem gónóen kkólen bè yó kem huluhen. 6Tódô gotu hogot Putifar ke Jusif kdéen. Balù udì ke wen bud tnafa nawahen, olohen tódô hemdem kkenen.

Yóm Jusif, tey knóón logi. 7Timbow deng legen udì bè yó, deng mom niwol yehen Putifar Jusif ne tô nbóten. 8Okóm là kóen móyô Jusif, monen mò du, “Hendemem dé, là bud wen tnafa nawa amohu du bè ni lem gónóen abay se nóe bè ni. Gotu hogoten dou kdéen. 9Yóm kwalisen bè ni lem gónô, lómón yó se yóm dou kwalis, ne laen dù nalihen béléu, tek són uu yóm tuha libunen. Là kô gbeku du yóm sidek monem yó, tey salà bè Dwata yóm yó.”

10Tódô ket kdawen gel tô mbót ke Jusif, okóm là kóen móyô Jusif stungô du. Balù kehlonihen ebéléen, là kô nmoen du. 11Sotu kdaw bè yó, husek elem gónô le Putifar Jusif, nmoen yóm sana kun gel nmò bè yó ne geslaen yóm klaen dù dumu tau gel mò nmò bè yó lem gónô. 12Tódô lemwót yehen Putifar nan e kenfô nogot Jusif bè nesen, monen mò du, “Mungi dou elem dfél.” Okóm mlóy Jusif ne hewà ne mlus béléen yóm lafin nesen fi ta, tódô gtebel lem hólól yóm libun.

13Timbow ton yóm libun yó yóm lafin nes Jusif gtebel lem hólólen ne yóm klóyen ebè lewà, 14tódô kendel tnabahen yó kem dumu tau gel mò nmò bè yó, monen mò kul, “Hnénég ye dé. Yóm tau Hibru nwit tuha logihu ebè ni, tey kehyaken tekuy. Tódô noloen ou ditu lem dfél, bede laen kô dù gmoen abay se tey klangatu. 15Bè yóm kungolen du yóm langatu, tódô mlóy hewà ne gtebelen béléu nim lafin nesen nii.”

16Lemwót yóm libun yó, henyuhen yóm nes Jusif efet kól tuha logihen, yóm amo Jusif. 17Timbow kól, bud senged se tulónen du, monen, “Yóm tau Hibru hesek nwitem ebè ni, deng noloen ou lem dfél, tô henyaken ou. 18Okóm timbowe lemangat, tódô kendel mlóy hewà ne gtebelen béléu yóm lafin nesen fi ta.”

19Unihen mungol du yóm amo Jusif yóm tulón tuha libunen, ya tey kebuten. 20Tódô hekfóen Jusif, tenesen lem yóm sotu gónô blanggù gónón gel tmafak tau yóm tau hol geta bélê le. Ne bè yó gónó Jusif nô. 21Bede là kô tnagak Dwata ke Jusif, tendo tnóbóngen. Ne yó gónón hyu nawan ebè Jusif yóm tau mentey gónô blanggù. 22Ne deng mom hogoten du yó kem dumu tau blanggù. Són Jusif fen mogot du balù kihu nmò le bè yó lem gónô blanggù. 23Là kóen tafa nawahen du yóm hogoten ke Jusif yóm tau mentey gónô blanggù yó abay se tendo nô bè Jusif Dwata. Balù kihu nmoen, sal hyu uléken.

Currently Selected:

Tekang Kbuten 39: tbl

Highlight

Copy