Tekang Kbuten 32

Eles ketgama Jakub yóm bud keston le Iso

1Bè yóm tolo lel le Jakub mógów, wen kem hógów Dwata semlong du. 2Bè yóm kton Jakub kul, botong monen, “Deng bè ni gónóhen kmamfù Dwata.” Ne yó gónóhen moluy du Mahanaim yóm benwu yó.

3Wen kem tau hógów Jakub tukô gna ebè yóm twoguhen Iso nô bè benwu Idom. 4Yó hlauhen kul, monen, “Ni hol tulón ye yóm gónóhu mogot Iso, mon ye, ‘Yó gónón là géhél gulék Jakub yóm tau tóbóng lówóhem abay se tódô nô bè mà dì ye Laban. Ne ni se yóm bang kuléken. 5Deng tey wen kem safien ne kem kudà asnuhen ne kem ubihahen ne kem kambingen ne deng wen se kem heseken. Yó gónóhen tminok ebéléem, kóyóen ke mulék hyu nawahem ebéléen.’ ”

6Timbow le bud semfulék yó kem tau hógów Jakub yó, yó tulón le ke Jakub, mon le, “Deng me gu bè twoguhem Iso ne deng sana kól bè lan nan e senlong uu. Botong fat latu tau mung du.” 7Ya tey klikò Jakub, tey ktafa nawahen. Yó gónón mólól du bè lewu bung yó kem tau mung du ne dalang se yó kem ubihahen ne kem kambingen ne kem safien ne kem kamélen. 8Yó hendemen, “Ke sut Iso ne ke genlaen yóm sotu bung, hyu ke wen lanen mlóy yóm sotuhen.”

9Omin Jakub mni bè Dwata, yó monen, “Ó Dwata, hol hnungolem ou. Uu se Dwata téméu Abraham ne mau Isak. Uu se mdók dou mulék ebè dou benwu ne ebè yó kem dou dumu ne deng fasadem dou se yóm klaen dù hemenu bè yóm kuléku. 10Là knóóne du yóm tey kehyu kmoem ebéléu ne yóm là konol nawahem ebéléu, olohu tau tóbóng lówóhem nim ou. Bè yóm tehe kewótu gu bè mà, mifale él Jurdan, són tugedu nwitu. Okóm bè yóm bud kuléku ni, botong lewu lumbuku. 11Hol hnihu béléem, hol lenwaem ou ke wen sidek tô nmoen béléu yóm twoguhu Iso. Tey sidek klikou, déke sut ne tódô gotu hnatayen mi kdê me, gomong kem libun ne yó kem ngà. 12Hol béem klifót yóm deng kfasadem du dou yóm klaen dù hemenu bè yóm bud kuléku ne yóm kehwenem bólu là gbek tau msó kul, lómón kwen le helek bè kilil mohin.”

13-15Tódô suloy Jakub buteng nô bè yó. Timbow hlafus, wen néléken bè yó kem ógófen mò slongen ke twoguhen Iso. Yó néléken mò blayen du, 200 kambing libun ne 20 kambing logi, 200 ubiha libun ne 20 ubiha logi ne 30 kamél libun hono malak nati, 40 safì libun ne 10 safì tudu, 20 kudà asnu libun ne 10 kudà asnu logi. 16Gotu sentólóngen lu bè ket kayen ne sket wen sotu tóbóng lówóhen mò halaken kul. Yó monen mò kul, “Mógów ye tukô gna dou, bede nmò ye blóngen yóm ket kay ógóf nalak ye.”

17Yó monen bè yóm tóbóng lówóhen malak ógóf tukô gna, “Ke geslongen uu yóm twoguhu Iso ne ke snólóken uu, ke monen, ‘Tau du gónóhem mogot? Gónóm e solu de? Tau du mfun kul ni kem ógóf nalakem ni?’ 18Yó balaem du, monem, ‘Hono ke Jakub, yóm tóbóng lówóhem. Hwiten lu ebè yóm gónóhen mogot Iso. Yó huli kum.’ ” 19Senged se bud udélen ebè yóm gewuhen malak ógóf ne bè getluhen ne bè kdê yó kem dumu wen halaken kul. Yó monen mò kul, “Ni se mò tulón ye ke Iso ke geslong ye, 20hol mon ye mò du, ‘Tahu se, yó huli kum Jakub, yóm tóbóng lówóhem.’ ” Yó hendem Jakub, “Ke wen blayu du, déke mulék hyu nawahen ebéléu. Ne ke segeslong me, déke hnifóten ou.” 21Duhen yó, gna hwiten yó kem mò blayen ke Iso, okóm kun fen tebel bè yóm gónó le kmamfù bè yóm kifu yó.

Yóm dumuhen sbunù Jakub

22Bè yóm kifu yó, tódô btik Jakub. Yó nmoen, nwiten yó kem lewu yehenen ne lewu libun nmuhen ne yó kem sfolò sotu ngaen, hifalen lu yóm él boluyen Jabuk. 23Tikóng deng gotu khifalen kul, gotu bud hifalen se yó kem ógófen. 24Bede fen tebel fatu kun tek sotuhen. Yóm knô Jakub bè yó, tódô wen tau sut béléen na a mit du sbunù. Ngang le sbunù efet móyón mwas. 25Timbow gnóm yóm tau yó yóm là bud kegbeken ke Jakub, tódô nogoten bè hunuk Jakub, botong sléhé. 26Yó mon yóm tau mò ke Jakub, “Kóhem ou ne, abay se deng móyón mwas.”

Mon Jakub se, “Là kô kóhu kóm ke là nan wen oluhem dou.”

27“Tedu boluyem?” mon yóm tau yó mò ke Jakub.

Mon Jakub se, “Jakub.”

28Ne yó bud mon yóm tau yó, “Lemwót bè yóm deng khotuhem gelem ebè Dwata ne bè tau, yó gónóm matù. Là bud Jakub du ne boluyem. Yó tles boluyem, Israél.”

29Mon Jakub se mò du, “Tulónem dou se kóm boluy.”

Okóm mom yó balaen du yóm tau yó, monen, “Béem abay snólók boluyu.” Ominen yó wen oluhen ke Jakub.

30Yó udél Jakub, monen, “Denge tódô suyó ke Dwata dou, hol là bangen du ke là mataye.” Ne yó boluyen du yóm benwu yó, Pinyél. 31Deng sut mata kdaw ne yóm kewót Jakub bè yó bè Pinyél, bede deng mom tugô lemwót bè yóm deng kesléhé lem hunuken. 32Balù ni kmoen ni, yó kem tau Israél là kô ken le du yóm unged nô bè hunuk yóm kihu kay ógóf, abay se bè yó tehe gónó Dwata mogot ke Jakub bè yóm tehe kehesléhéhen du.

Currently Selected:

Tekang Kbuten 32: tbl

Highlight

Copy