Tekang Kbuten 27

Kolu Isak ke Jakub

1Deng tey tuha ne Isak, lelen butô. Sotu kdaw bè yó, htabahen Iso yóm ngaen twogu ne monen mò du, “Ó Ngà.”

Bnalà Iso se, monen, “Yó du, Mà.”

2Mon Isak se mò du, “Denge tey tuha ne ni ne móyóne mfu. 3Nwahem bohohem nam e dmulok dou lem bnes. 4Tnógóhem dou yóm utón alì mnóm béléu, ominem mit du edini béléu. Ke deng deng kkenu du, wen oluhu kóm gu laanu là deng matay.”

5Yóm igò Isak mudél ebè Iso hnungol Ribika yóm tuha libunen. Bè yóm kewót Iso dmulok, 6yó mon Ribika mò ke Jakub, “Lomi gungolu yóm udél maem ebè twoguhem koni, monen mò du, 7‘Dmuloki dou ne tnógóhem dou. Ke deng deng kkenu du, wen oluhu kóm bè solu Dwata bè yóm gu laanu là deng matay.’ ” 8Ne bud mon Ribika mò ke Jakub, “Ne ni Ngà, hnungolem ou ne nmoem nim tulónu kóm ni. 9Mógówi ebè gónó le nô yó kem ógóf tekuy, méléki lewu ngà kambing mabù mò tnétéu bè maem, tnógóhu béléen yóm utón alì nóyóen. 10Ke sok deng któgóhu du, ominem mkay du ebè maem. Ne wen oluhen kóm gu laanen là deng matay.”

11Okóm yó mon Jakub mò ke yéen, “Tngónem se nbul kun ke Iso ne fen là dou. 12Déke nigófen ou mà ne tngónen yóm ksukatu du. Ke ni se nmou, là kô noluhen dou, deng mom wen hmulaen dou.”

13Ne yó balà yéen du, monen, “Ou he yó ngà gónón e tódô ke wen hmulà maem kóm. Tódô nmoem yóm tulónu kóm. Lemwóti ne, mahi dou kem ngà kambing.”

14Tahu se, lemwót Jakub ne wen kem ngà kambing nwiten ebè yéen mò tnétê le ne tnógó yéen yóm utón alì nóyô maen. 15Omin yéen ma yóm nes Iso, yóm nesen alì hyu gel henyuhen bè gónô ne heseken ke Jakub. 16Wen kulit kambing suen bè sigel Jakub ne wen se bè liholen bè yóm gónón laen dù bulen. 17Ne oguhen ke Jakub yóm utón alì mnóm deng tnógóhen, mung du yóm mambang deng nmoen. 18Omin Jakub yó mógów ebè maen ne monen mò du, “Ó Mà.”

Mon maen se, “Hó. Ngà kóm de?”

19Bnalà Jakub se, monen, “Isohe, yóm ngaem twogu. Deng nmou yóm hmoem dou. Nam btik dé mà, kenem yóm utón deng nwitu ebéléem anì noluhem ou kedeng.”

20Mon Isak se, “Tey klahil kebelem utón ni du ngà.”

Mon Jakub se, “Yóm Dwata gónóm mogot tmóbóng dou mebel du.”

21Yó mon Isak mò ke Jakub, “Yake hlonihi dou edini anì nigófu uu. Holi tahu Iso kô?” 22Tahu se. Hloni ebè maen Jakub, omin maen migóf du ne monen mò du, “Hol lómón tô udél Jakub yóm udélem okóm yóm sigelem, sigel Iso.” 23Là kô dilóen ke Jakub abay se nbul sigelen, hol lómón yóm kun sigel Iso. Ne tô wen oluhen ke Jakub 24okóm nan bud mon, “Holi tahu Iso kô?”

“Ou se du,” mon Jakub.

25Yó mon Isak mò du, “Oguhem dou yóm utón tnógóhem. Ke deng deng kkenu du wen oluhu kóm.” Tahu se, nwit Jakub ebéléen ne nwiten snéen yóm tifas grép mò ninumen. 26Ne yó bud mon maen mò du, “Hlonihi dou edini, ngà, nelekem ou.”

27Bè yóm igoen hloni ebè maen na a melek du, gungef Isak boo yóm nes leseken ne yó gónón molu du, monen,

“Yóm tey klinggel boo yóm ngau,

hol lómón ke boo yóm tonok deng tnóbóng Dwata.

28Dwata he bemlay kóm amù lemwót gu bè longit mò hméfê yóm tonokem anì bong tebasen.

Dwata he hol bemlay du kóm yóm mò gel ken ye ne yóm mò gel ninum ye.

29Yó kem dumu but tau, baling le tóbóng lówóhem ne mtud le bukol bè soluhem.

Uu gónó le kmulu yó kem dumuhem setwoli ne mtud le bukol bè soluhem yó kem dumu ngà yéem logi.

Yó kem tau hemmulà kóm angat tnafak Dwata lu.

Ne yó kem tau tmóbóng kóm bud tnóbóng Dwata lu.”

Kni Iso yóm olu maen du

30Timbow deng kolu Isak ke Jakub henmung Jakub se lemwót. Unihen lemwót, kól dmulok se Iso, yóm twoguhen. 31Bud tnógóhen se kun yóm utón alì mnóm, ominen mkay du ebè maen. Yó monen mò du, “Ó Mà, nam btik dé, nam ken yóm utón nwitu ebéléem anì noluhem ou.”

32Bnalà Isak, monen, “Tau kóm de?”

Mon Iso se, “Ou se Iso, yóm ngaem twogu.”

33Bè yóm kungol Isak du, ya tey sidek kekkelen ne monen, “Ke uu se Iso, tau du se yóm deng mit utón ebéléu koni? Lomi deng kkenu du gu laanem là deng sut ne deng wen oluhu du koni. Ne hlós kun se yó laen kô dù tul sónen.”

34Timbow gungol Iso yóm udél maen, tódô hendlaen lemangat mkik, yó monen, “Déy gi, Mà, bud noluhem ou se do.”

35Yó balà Isak du, monen, “Deng gu bè ni twolihem ne deng snukaten ou. Deng gwahen ne yóm tô oluhu kóm.”

36Mon Iso se, “Deng gewuhen dulék ni ne smukat dou. Kô mon se ke boluyen Jakub.#27:36 Yóm boluy Jakub, tô le sadén yóm udél “smukat” bè udél Hibru. Bè yóm gnan, deng nwahen yóm dou kwalis bè ketwogu ne ni bud nwahen yóm dou olu. Tey, Mà, laen dù bud oluhem dou ne kô?”

37Bnalà Isak se, monen, “Deng oluhu du, du gónóm mogot ne gotu le baling tóbóng lówóhen yóm kdê dumuhen setwoli. Deng oluhu du yóm tendo kwen gel kenen ne ninumen. Laen dù bud gmou béléem ne ni, Ngà.”

38Tódô henlós Iso hkodu bè maen, monen, “Tek olon sotu kô oluhem, Mà? Hol noluhem ou sen.” Ominen yó bud mkik.

39Ne yó mon Isak mò du,

“Bong béléem kóm, laen dù amù lemwót bè longit ke hméfê tonokem.

Laen dù tonok hyu ke mò nfunem.

40Són olo gónóm mowil, són bè sudengem ne balingi tóbóng lówó yóm twolihem.

Okóm bè yóm kdaw katuem du angati gewà lem hólólen.”

41Ya tey kutó nawa Iso ke Jakub lemwót bè yóm deng kolu mà le du. Yó hendemen, “Móyónen matay ne yóm mà. Ne ke deng matay, hnatayu Jakub.”

42Okóm timbow tngón Ribika yóm tô atul Iso, yó gónón tmaba ke Jakub ne monen mò du, “Ó Ngà, ni hnungolem ou. Yóm twoguhem, tô natul hnatayen uu mò belesen yóm deng nmoem béléen. 43Yó nmoem, géhéli lemwót etu bè Haran bè yóm logihu Laban. 44Nam na hlun nô ditu béléen efet lembó kebuten kóm yóm twoguhem 45ne klifóten yóm deng nmoem béléen. Ke deng klifóten angat wen hógówu edyó mò mangay kóm. Là kô gbeku hembala du ke tódô lana béléu yó kem lewu ngau bè yóm sotu kdaw.”

Khógów Isak ke Jakub ebè Laban

46Sotu kdaw bè yó, yó mon Ribika mò ke Isak, “Denge tey tmakas bélê le ne yó kem tólóng libun yehen Iso. Sélét ne ke tô bud myehen bè ni kem libun Hitayt Jakub, ngunte déke tódóe matay.”

Currently Selected:

Tekang Kbuten 27: tbl

Highlight

Copy