Tekang Kbuten 26

Knô Isak bè benwu Girar

1Bè yóm kun kdaw Isak, bud mbel bitil bong bè yó bè Kanan, tólóng se yóm tehe kbel bitil bè Kanan ekni bè yóm tehe kun kdaw yóm maen Abraham. Lemwót Isak mógów ebè Abimélék bè Girar yóm sotu benwu glem lem Kanan. Nim Abimélék ni, tau hol geta mogot yóm benwu yó kem tau Flistin.

2Yó gónó Isak mógów ebéléen, abay se deng hegfan béléen Dwata ne deng monen mò du, “Ó Isak, béi abay mógów ebè Idyip na a mebel ken ditu. Tódói nô bè ni bè Kanan yóm benwu gónóhu hemsù kóm. 3Hluni nô bè ni ne elese tendo nô béléem ne tnóbóngu uu. Yóm klamang yóm benwu Kanan angat blayu kóm ne yó kem lugodem. Là kô klifótu du yóm deng tehe kfasadu ke maem Abraham bè yóm tonok ni. 4Angat hwenu bólem, lómón kwen le blotik bè longit. Angat gotu blayu kul yóm klamang yóm benwu Kanan ni. Ne angat mlan bélê le gónóhu tmóbóng yóm kdéen but tau bè klamangen benwu. 5Yó gónón lemwót yóm któbóngu kóm, lemwót bè yóm tehe tendo kimónen dou yóm kóm mà ne yóm là kuléhen du yóm dou gel hlau du ne yóm dou gel hmò du.”

6Tahu se, nô bè yóm benwu boluyen Girar Isak. 7Tikóng snólók yó kem logi menwu bè yó Isak gbak bè yehenen Ribika, yó tulónen kul, monen, “Libunu.” Likò tmulón du ke yehenen. Yó hendemen, “Angat hnatay le o anì nwa le béléu, yakà teyen tilob.” 8Okóm sotu kdaw bè yó, temngel gu tembó bengen Abimélék yóm hol geta bè yó kem Flistin, ne tonen sekef le Isak Ribika.

9Tódô kendel htaba Abimélék Isak, ne monen mò du, “Moen ke monem libunem, igoen du se yehenem?”

Bnalà Isak, monen, “Likoe déke hnatay le o anì nwa le béléu.”

10Yó udél Abimélék, monen, “Moen ke gbek nmoem bélê me nim ni? Ke deng wen semtungô du, uu se gónón lemwót yóm tey kegsalà me.” 11Omin Abimélék hemwit udél ebè kdéen tau, monen, “Ke wen tau temdól kul ni kem tau ni lewu le yehenen, angat hnatay kmò du.”

12Bè yóm knô Isak bè yó bè Girar, wen tey hulu nmoen. Lemwót bè yóm gel któbóng Dwata du tey bong yóm gel tebasen botong lematu bud gel ulék yóm huluhen. 13Tódô senflósen wen gendengen, efet baling tey wen kendengenen. 14Lemwót bè yóm tey kwen ubihahen ne safien ne tey dê tau tóbóng lówóhen, deng mom mélés nawa le du yó kem Flistin. 15Yó nmò le, gotu tnibeng le yóm kokol tehe hokol maen yó kem tau tóbóng lówóhen bè yóm igoen tolo mowil.

16Omin Abimélék yóm tau hol geta bè yó kem Flistin, mógów ebè Isak ne monen mò du, “Mdóhi bè ni bè kum benwu, yakà dengi mbegel senta me.”

17Tahu se, lemwót Isak mili ebè Datal Girar, bè yó gónó le bud kmamfù ne malù legen knóen bè yó. 18Bud hen-gulék nokolen yó kem kokol tehe maen bè yó, yó kem kokol tehe tnibeng yó kem tau Flistin kogol yóm katay maen. Tódô hlós bud boluy Isak yó kem kokol yó yóm tehe boluy maen kul. 19Ne bud wen kokol nokol le bè yó bè datal yó kem tau tóbóng lówó Isak ne wen se él ton le.

20Lemwót yó kem tau gel mentey ógóf bè yó bè Girar nit le segled yó kem tau gel mentey ógóf Isak, mon le, “Kum funen nim kokol ni.” Ne yó boluy Isak du yóm kokol yó, “Sen-gled.” 21Omin le tódô bud mokol tólóng kokol yó kem tau tóbóng lówó Isak ne bud wen mled du snéen. Yó bud boluy Isak du yóm kokol yó, “Sfohon.” 22Yó bud nmò Isak, bud hlayuk bè yó ne bud mokol dumu kokol. Laen dù bud mled du ne yóm kokol bud nokolen yó. Ne yó boluy Isak du, “Laen dù hemseng kum.” Yó monen, “Deng wen lan nmò Dwata anì laen dù hemseng tekuy bè yóm kut kbenwu bè ni ne gónón angat wen gendeng tekuy.”

23Omin Isak bud lemwót bè yó mógów ebè Birsiba. 24Ne bè yóm kifu kkólen bè yó, bud hegfan béléen Dwata, monen mò du, “Ó Isak, ou se yóm kun Dwata yóm maem Abraham. Hol béi abay hlikò, elese tendo nô béléem. Angat tey któbóngu kóm ne hwenu bólem lemwót bè yóm tehe fasadu ke maem yóm tau tóbóng lówóhu.” 25Omin Isak yó semsodò botu mò gónón demsù ebè Dwata ne tmaba ebéléen. Ne bè yó gónón bud kmamfù ne bud le mokol kokol bè yó se yó kem tau tóbóng lówóhen.

Kesfasad le Isak Abimélék

26Bè yóm knô Isak bè Birsiba, lemwót Abimélék yóm tau hol geta bè Girar mógów ebéléen, mung du Ahusat yóm fen gel hmau du ne Fikol yóm kmandér bè yó kem sendaluen. 27Bè yóm kkól le bè Isak, yó snólók Isak bélê le, monen, “Tedu nógów ye ebéléu ni du igò ye deng mutó nawa do ne deng hdó ye ou ekni bè yóm kuy benwu?”

28Bnalà le se, mon le, “Yó nógów me ebéléem ni, abay se deng tngón me yóm eles tendo knóen béléem Dwata. Deng hendem me, hyu ke wen senfasad tekuy mung du safà. Yó nóyô me ni ke holi smafà bélê me. 29Hol béi abay mò sidek bélê me hulin kdaw. Hol lómón yóm tehe kum nmò béléem ekni, laen kô dù sidek nmò me béléem. Tey hyu yóm tehe kum nmò béléem, tódô menek kehewót me kóm. Ne ni, tódô tngón me yóm deng tey któbóng Dwata kóm.”

30Tahu se, omin Isak mò ken bélê le, ne gotu le seyón mken ne wen ninum le. 31Timbow hol hlafus bè yó, omin le sfasad mung du safà le. Bè yóm deng gotu keskas le bè yó, deng le gotu bud baling swè. 32Bè yóm kdaw yó, sut se yó kem tóbóng lówó Isak ne tulón le ke Isak yóm kokol lomi nokol le, mon le, “Deng wen él ton me.” 33Yó boluy Isak du yóm kokol yó, “Safà.” Yó se gónón lemwót yóm boluy yóm syudad Birsiba.

Kyehen Iso bè yó kem tólóng libun

34Timbow deng fat folò halay Iso, ominen yó myehen yó kem lewu libun Hitayt. Yó boluy le Judit yóm ngà Biri, ne Basimat yóm ngà Ilon. 35Lemwót bè ni kem lewu libun Hitayt ni, tey sidek kesbeweg kegnóm le Isak du lewu le Ribika.

Currently Selected:

Tekang Kbuten 26: tbl

Highlight

Copy