Tekang Kbuten 16
16
Hagar ne yóm ngaen logi boluyen Ismaél
1Yóm Saray yehen Abram, atil se kun. Okóm wen libun Idyip heseken boluyen Hagar. 2Yó mon Saray mò ke Abram, “Lemwót bè yóm là kehngà Dwata dou, yake sentungóem dé yóm libun heseku. Déke mngà anì mò dou.” Tódô nmung Abram yóm mon Saray mò du yó. 3Tahu se, hedwey Saray ke Abram Hagar. Yóm kedwey Abram ni, deng sfolò halayen ne nô bè Kanan.
4Sentungô Abram Hagar ne mlutut. Bè yóm ketngón Hagar du deng mlutut, deng mom hegmón ne là bud nadaten ke Saray. 5Ne yó mon Saray mò ke Abram, “Kóm salà yóm là bud kadat Hagar dou ni. Igò sem ou du yóm tehe hedwey du kóm, okóm lemwót bè yóm deng keblututen deng mom là bud nadaten dou. Dwata he kmukum du ke mahi du bélê te tahu.”
6Yó balà Abram du, monen, “Kóm hesek se yóm libun yó ne tolo nô lem hólólem. Kihu kóm kmò du.” Tahu se, tey kehsidek Saray ke Hagar, botong mlóy.
7Bè yóm klóy Hagar yó, wen hógów Dwata gu bè longit semlong du bè yóm tbul él bè yóm benwu là hyu menwu du bè yóm lan mógów ebè Sur. 8Yó udélen, monen, “Ó Hagar, yóm hesek Saray, gónóm gu de? Gónóm tô e solu ni du?”
Bnalà Hagar, monen, “Mlóye gu bè yóm libun amohu.”
9Monen mò du yóm hógów Dwata, “Budi mulék ebè yóm libun amohem Saray ne holi heglaan béléen.” 10Bud mon yóm hógów Dwata, “Angat tey kehwen Dwata bólem, laen kô tau gembek msó kul. 11Angat wen ngaem logi ne boluyem du Ismaél abay se deng gungol Dwata yóm kkikem lemwót bè yóm alì ksidek kegnómem du. 12Okóm yóm ngaem yó, hol lómón ke kudà tabag. Angat ket tau hnohonen ne ket tau se hmohon du. Tódô htólóngen kun ke benwu bè yó kem dumun setwoli.”
13Bè yóm deng kulék yóm hógów Dwata tódô mudél tek sotu Hagar, monen, “Tey, deng tonu Dwata dou, kiholu là matay?” Ne yó boluyen du yóm Dwata mudél ebéléen yó, “Yóm Dwata hol mton dou.” 14Yó gónóm mon, yó boluy kem tau du yóm kokol yó, “Kokol yóm Dwata mowil, yóm mton dou.” Yóm kokol yó, nô bè blóng benwu Kadis ne benwu Béréd.
15Wen ngà logi Hagar bè Abram ne yó boluy Abram du Ismaél. 16Deng wolu folò nem ne halay Abram bè yóm ksut Ismaél.
Currently Selected:
Tekang Kbuten 16: tbl
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
