Kehewà 3

Ktaba Dwata ke Musis

1Sotu kdaw bè yó, bnentey Musis yó kem ubiha ne kem kambing tuónen Jitru yóm tau gel demsù ebè Dwata bè Midyan. Yó nmò Musis, nalaken yó kem ógóf mifal yóm benwu laen hol wen tauhen ne mógów ebè Sinay yóm bulul bnoluy le bulul Dwata. 2Bè yóm kkólen bè yó, wen hógów Dwata gu bè longit hegfan béléen bede hlingu bè dilóf ofi, mkal bè yóm sotu ngà koyu lefungu. Ton Musis yóm koyu lefungu tódô tfeng dilóf okóm là se kóen dog mlób. 3Yó hendem Musis, “Hentaw ton du mni. Moen ke là dogen mlób yóm ngà koyu yóó? Na hloni e du dé na tenngel.”

4Timbow ton Dwata yóm tô kehloni Musis edu, yó gónón mudél ebéléen gu lem yóm ngà koyu yó, monen, “Ó Musis! Ó Musis!”

Bnalà Musis se, “Ni ou.”

5Bud mon Dwata, “Béi hloni edini. Kóhem tlumfaem abay se dengi mdà bè yóm gónóhu nô. 6Ou se sana Dwata yó kem tehe fuem, le Abraham ne Isak ne Jakub.” Bè yóm kungol Musis du yóm udél yó, botong nsengen uyóhen bè yóm alì klikoen temngel ebè Dwata.

7Omin Dwata bud mudél ebéléen, monen, “Deng tonu yóm alì keglayam yó kem dou tau bè Idyip. Gungolu yóm tey ktaba le ebéléu anì wen lemwà kul bè yóm gónó le ghesek. Gotu tngónu yóm kdê gónó le glayam. 8Ne ni, denge mnaul elaan anì naw e lenwà lu lem tdok yó kem tau Idyip, nitu lu hewà gu bè yó. Nitu lu ebè yóm tonok hyu ne lamang, yóm tonok alì hyu mò du hulu ne angat tey wen tbasen. Ni kmoen ni, hanà le tolo menwu tahen yó kem tau Kanan ne kem tau Hitayt ne yó kem tau Amurayt ne kem tau Pirisayt ne kem tau Hibayt ne yó kem tau Jibusayt.#3:8 Yó kem but tau bnoluy Dwata yó, hono kem tau angat genlaen lemwót bè yó kem sidek gel nmò le.Gungolu yóm alì ktaba le ebéléu yó kem dou tau ne tonu se yóm tendo kehdes le kul yó kem tau Idyip. 9Gungolu yóm alì ktaba le ebéléu yó kem dou tau ne tonu se yóm tendo kehdes le kul yó kem tau Idyip. 10Duhen ni, hógówu u ebè Faro bè Idyip anì nitem lu hewà gu bè yóm kun benwu yó kem dou tau.”

11Okóm yó balà Musis ke Dwata, monen, “Ê, blaem olohu tau hkawang he dou. Là kô gbeku du dou mógów ebè Faro anì naw e nwit lu hewà bè Idyip yó kem tau Israél.”

12Bnalà Dwata se, monen, “Elese tendo nô béléem ne bè yóm kwitem kul hewà gu bè Idyip yó kem tau, angat ye tmaba ebéléu bè nim bulul ni. Yó se ilóen yóm khógówu kóm.”

13Okóm yó bud mon Musis, “Ke mógówe ebè yó kem tau Israél ne monu mò kul, ‘Hógówen o ebélê ye yóm sana Dwata yó kem tehe fù ye,’ mò kmoen se ke snólók le boluyem? Tedu se tulónu kul?”

14Mon Dwata se, “Yó monem mò kul, ‘Ou se yóm sana Dwata laen kô dù buten ne laen se kô dù tul sónen.’ Hol tulónem kul ou se yóm sana Dwata, yóm hógów kóm ebélê le ni. 15Tulónem yó kem tau Israél ou se yóm sana Dwata hol gónó mogot, yóm sana Dwata yó kem tehe fù le Abraham ne Isak ne Jakub. Ou se yóm hógów kóm ebélê le. Yó se yóm dou boluy efet kól bè laen dù tul sónen. Yó se yóm angat bud gel taba le do yó kem lugod le elem hulin kdaw.

16Lemwóti ne, nam e sentifun yó kem tau gónó le mogot yó kem tau Israél ne tulónem kul yóm deng kehegfanu béléem, yóm sana Dwata hol gónó mogot, yóm sana Dwata yó kem tehe fù le Abraham ne Isak ne Jakub. Tulónem kul yóm deng knaulu edini ne yóm deng ktonu du yóm nmò le bélê le yó kem tau Idyip. 17Deng eles natulu ne yóm kwitu kul hewà gu bè Idyip, yóm benwu alì gónó le glayam. Nitu lu ebè yóm tonok alì hyu mò du hulu, yóm benwu yó kem tau Kanan ne kem tau Hitayt ne yó kem tau Amurayt ne yó kem tau Pirisayt ne yó kem tau Hibayt ne yó kem tau Jibusayt.

18Angat hnungol le u yó kem tau malak bè yó kem tau Israél. Ne ominem mógów ebè Faro bè Idyip, mung kóm yó kem tau gónó le mogot yó kem tau Israél ne yó udélem ebéléen, monem, ‘Deng hegfan bélê me yóm sana kum Dwata mi kem tau Hibru, yóm sana kum Dwata hol gónó mogot. Ke yó dum hyu béléem, hógówem mi tlu kdaw elem yóm benwu laen hol wen tauhen anì ne me e demsù ebéléen bè yó, yóm sana kum Dwata hol gónó mogot.’ ”

19“Okóm,” mon Dwata, “deng eles tngónu là kô bayà Faro kuy ke là hol gnagahu du. 20Okóm lemwót bè kfasangu angat tnafaku Idyip mlan bè yó kem alì dê knikò nmou lem blóng le. Ominen yó he hewót kuy Faro. 21Angat wen hefedemu yó kem tau Idyip anì wen nawa le kuy. Duhe kóm, bè yóm angat kewót yó kem dou tau, là kô le na a lemwót hkawang. 22Gu laan le là deng lemwót he yó nmò yó kem libun Israél na le mógów ebè yó kem libun Idyip kul dumu sebét, duhen ke bè yó kem libun Idyip mauy bè yó kem dumu le sebét yó na le e mni bélê le nes ne ngom libun nmò le bè tahu blówón ne blówón bukay. Yó kem hni le yó, angat gotu leket le bè yó kem ngà le logi ne bè yó kem ngà le libun. Yó gónóm mon, tey wen nwit yó kem dou tau lemwót bè kul kendengen yó kem tau Idyip.”

Currently Selected:

Kehewà 3: tbl

Highlight

Copy