GENESIS 49

Auh Yakob je pangkalepahe

1Limbah te Yakob mantehau kare anake tuntang hamauh, “Keleh pumpong hetoh, tokep aku. Handak insanangku akan keton narai je kareh ingkeme keton intu katika je rahian.

2Keleh hapumpong, kare anak Yakob,

hining Israel bapam.

3Ruben, anakku je bakas,

ikau kaabasku, bua tamparan kagancangku.

Ikau pangkagagah tuntang pangka abase bara hapus anakku.

4Ikau murah hongge kilau danum,

awi te ikau dia je mambatang;

awi ikau hinje dengan gundikku,

imapam eka batiroh bapam.

5Simeon tuntang Lewi hampahari;

sanjata ewen jete alat kakaras.

6Aku dia handak omba huang pakat ewen,

dia kea huang pumpong ewen.

Awi ewen mampatei huang kasingi,

mampalongkang banteng tagal rami-rami.

7Sapa akan kasingin ewen, awi kapahame.

Sapa akan kalait ewen, awi kapapae.

Aku handak mamisah-darai awen hong hapus Israel.

Aku handak manaburan ewen marak kakare bangsa.

8Yuda, ikau kareh manangkarap tekok musohm;

kare paharim kareh manara ikau

tuntang sontop manyembah intu taharepm.

9 # Num. 24:9; Pang. 5:5 Yuda kilau singa tabela,

ie manangkarap taloh kinae, palus haluli akan sarangae;

ie ngaliat palus menter,

tuntang jaton ije je bahanyi mangguleie.

10Yuda kareh mimbing tongkeh karajaan,

turonae kareh marentah katatahie.

Kare bangsa kareh magah panenga,#49:10: Kare bangsa … panenga, hai kemungkinae jete riman auh te.

tuntang sontop manyembah intu taharepe,

11Anak kalidai imetenge intu upon kayu,

upon anggor je pangkahalape.

Ie mampukan pakaiae hapan anggor,

anggor bahandang kilau daha.

12Bahandang matae awi mihop anggor,

baputi kasingae awi mihop susu.#49:12: Bahandang … susu; atawa matae labih bahandang bara anggor; kasingae labih baputi bara susu.

13Sebulon kareh melai tokep tasik;

kare kapal kareh tende intu saran pantai ayue;

sampai Sidon tikas ekae.

14Isaskar te kilau kalidai abas

je menter helat karanjang je ietoe.

15Ie mite eka te paham kahalape

tuntang lewu te paham kabungase,

palus ie maniling bahae eka mandak taloh eton,

ie imaksa bagawi kilau jipen.

16Ikau Dan, kareh marentah bangsa aim

ikau jadi bangsa kilau bangsa beken intu Israel.

17Ikau kilau handipe intu saran jalan,

handipe tada intu saran jalan,

je manutok takir kuda

sampai panongkange tambalang.

18O Tuhan, salamat je inengam, jete je ientaiku.

19Gad, ikau kareh iawi bigal,

tapi ikau kareh mambaleh mambigal ewen.

20Aser, panginam malabien hayak manga-mangat,

ikau kareh manatap panginan akan kare raja.

21Naptali, sama kilau bajang lapas,

paham bahalap kare anake.#49:21: Naptali … kare anake; atawa Naptali sama kilau batang kayu ije labat dengan kare edae je bahalap.

22Yosep sama kilau kalidai tabela,

kalidai baliar tokep tahasak danum,

dari-dari intu biling bukit.#49:22: Yosep … biling bukit, atawa Yosep sama kilau batang kayu intu tahasak danum, kare batang bua je habaris intu dinding batu.

23Musoh paham mawi,

manggoange hapan panah dengan sampitie.

24Tapi Yosep tetep gancang penange,#49:24: Tapi … penange (lengee), atawa tapi panah ewen bapelek tuntang rotek, kare isin penange rabit-rabita.

tetep kaabas panah aie,

tagal kuasan Sakatik je paham abas,

Hatalla ain Yakob, je mahaga Israel.

25Hatalla ain bapam mandohop ikau;

Je Jaton Tikas Kuasae mamberkat ikau

hapan ujan bara langit

tuntang danum bara penda petak.

Hapan anak tuntang sapi,

26gandom tuntang kambang.#49:26: Kemungkinan toto riman auh ayat toh iete: Gandom tuntang kambang; Ibrani: tato hiang keton labih gagah bara.

Berkat Hatalla ain bapam

labih bara panatau kare bukit je bakas toto.#49:26: Ije salinan je bara jaman horan manyewut: kare bukit je bakas toto; Ibrani tato hiangku akan.

Keleh kare berkat te mohon akan hunjun takolok Yosep, hong lingkaue

Ie te paling mambatang marak kare paharie.

27Benyamin te sarigala je basiak.

Hong hanjewu ie manangkarap taloh kinae.

Hong hamalem ie mambagi-bagie.”

28Jete kare due walas suku Israel, tuntang auh je inyewut bapa ewen metoh manyampai auh salamat hapisah akan genep bitin ewen.

Yakob matei tuntang ingubur

29-30 # Gen. 23:3-20 Limbah te Yakob mameteh kare anake, “Hanjulo tinai aku handak matei kilau tato hiangku. Keleh mangubur aku kareh habambai dengan ewen hong goha intu Makhpela, hila timor Mamre hong tanah Kanaan. Abraham jari mamili goha tuntang tanah hakalilinge bara Epron oloh Het mangat akan manjadi kubur. 31#Gen. 25:9-10, 35:29 Intu hete Abraham tuntang Sarah, Isaak tuntang Rebeka ingubur; tuntang intu hete kea aku mangubur Lea. 32Tana tuntang goha je aton intu hete jari imili bara oloh Het. Keleh mangubur aku intu hete.” 33#Gaw. Ras. 7:15 Limbah jari lepah kare auh petehe akan kare anake Yakob mampenter arepe palus mahutos.

Currently Selected:

GENESIS 49: NIJ

Highlight

Copy