DATU MITA IMITÁNEA 2
2
Koyow mita pangabisan i Daud kon i Salomo
1Naonda in motoyongdon matoi, ki Daud nogoiní kon i Salomo, adínea ḷoḷaki, bo nopoyaput in koyownea mita pangabisan. Ki Daud in noguman, 2“Wakutukudon matoi in naa. Pokoyakin bo pokobarani in iko. 3Aidaibí in onu inta pinarenta i Tuhan Allahmu kon inimu. Duduiai in bayongan hukum bo parenta-Nea inta pinais kon bonu in Buk i Musa, sinbá kon ondaka in bayáanmu yo kodapotanmu in bayongan inta iḷongasimu. 4Aka iko motoḷutui kon i Tuhan, yo intompodan-Neabí in dandi-Nea kon buíkubí in momarenta kon Israel, asaḷ bo mosia in takin ḻimbatú in gina bo bayongan dimukud in umuran mosatia in dumudui kon parenta-Nea mita.
5 #
Sam.2. 3:27, 20:10 Tobatúpa doman! Kinotoropanmupabí in onu inta ain inaidan i Yoab kon inakó takin noḻimod kon porwira in Israel doyowa, ki Abner adí i Ner bo ki Amasa adí i Yeter. Sia in noḻimod kon i monia kon dodai in diá noparang sin motuḻí kon pinoḻimodan monia kon dodai in parang. Sia in noḻimod kon intau inta diá kotaḷá táe tanaa in akuoidon in musti mobaba kon oaidnea bo akuoidon in mororiga.#2:5: Kon bonu in tongonumai in terjemahan dungkuḷmai pinais: akuoidon … akuoidon in mororiga; kon bonu in naska in Ibrani pinais siadon … siadon in mororiga. 6Yo, adíku, popoaidon kon inia in onu inta inanggapmu mopia; tongá donaai pomayámu mako in sia matoi motompia mako natua.
7 #
Sam.2. 17:27-29
Táe aka kon i adí mita ḷoḷaki i Barzilai nongkon Gilead kopia kaasí kon i monia. Musti ogoianmu in onu inta pakéon monia muḷoi in singgai, sin mosia in nopoaidon inta mopia kon inakó kon tungkuḷ in akuoi noḷagui kon i guya-guyangmu, ki Absalom.
8 #
Sam.2. 16:5-13, 19:16-23 Soaḷ ki Simei adí i Gera nongkon kotá in Bahurim kon butá in Benyamin, oyúon doman in koyowku kon inimu. Kon binayáanku kon Mahanaim, ki Simei tua in koḻipod nogodi-godimai kon inakó totok in moraat. Táe kon singgai noiduduimai, kon dodai in sia namangoi nonontomu kon inakó kon Ongkag in Yordan, akuoi in nongibotdon kon inia pinodoyon kon i Tuhan kon diábí in akuoi moḻimod kon inia. 9Táe naa in koyowku kon inimu: dika pomayá mako in sia moiḷuat nongkon hukuman. Kinotaauankubí kon iko nion in mobijaksana; dá, umpakabí in sia ain nogoguyang, ḷongasidon sinbá hukumon matoi in sia.”
Ki Daud minatoi
10Onda intua ki Daud minatoi bo iḷobong kon kotá i Daud. 11#Sam.2. 5:4-5; Taw.1. 3:4 Sia in nobaḻí datu kon bonu in opat nopuḷú notaong: Pitu notaong in kon Hebron, bo toḷu nopuḷú botoḷú notaong in kon Yerusalem. 12#Taw.1. 29:23 Onda intua ki Salomo in nobaḻí datu nonoḻiu kon i Daud, ki amánea. Kawasa i Salomo saḷaku datu noroton totok.
Ki Adonia minatoi
13Kon singgai tobatú, ki Adonia minayá kon i Batsyeba. Ki Batsyeba noḻibó kon inia, “Degá inangoianmu naa in makusud mopia?”
“Oo,” tubag i Adonia. 14Bo noguman doman in sia, “Oyúon in poigumonku nongkon i iná.”
“Onu?” ki Batsyeba in noḻibó. 15Ki Adonia in notubag, “Kinotaauan i iná kon sabanarnea in akuoibí in mobaḻí datu; tua in inoḷat bidon mako in bayongan Israel. Táe noyoḻiudon in nobaḻí; ki ai-aikubí in nobaḻí datu, sin natua in kinoibog i Tuhan. 16Tanaa in tobatú in poigumonku, igumonku mako in tarimaan i iná.”
17 #
Dat.1. 1:3-4
“Onu in poigumonmu?” ki Batsyeba noḻibó.
Ki Adonia notubag, “Poigumonku in ki iná moibog mopoigum kon i Datu Salomo sinbá ogoinea in akuoi mononibuḷoi kon i Abisag, mongodeaga nongkon Sunem tatua. Noyakinbí in akuoi kon ki Salomo in moibogbí motarima kon onu in poigumon i iná.”
18“Oo, mopia,” tubag i Batsyeba. “Bain yosingogonku intua takin i datu sin kopontinganmu.”
19Dá minayádon in ki Batsyeba kon i datu makusud mopoyosingog intua sin kopontingan i Adonia. Sinimindog in ki datu sin monontomu kon i inánea bo sinumungkud kon inia, bo dongka iḻimitú bui kon ḷoḻitúannea. Onda intua sia nokisadia in ḷoḻitúan kon dotá in koḷanannea sin ḻitúan i inánea. 20Naonda in iḻimitú, ki Batsyeba in nogumandon, “Ki Iná in moibog mopoigum in soaḷ inta mointokbí nongkon inimu. Haraponku mako tarimaanmupa.”
“Onu intua, iná?” ki Salomo in noḻibó. “Tarimaankubí.”
21Ki Batsyeba in notubag, “Ogoidon in ki Adonia, ki guya-guyangmu tua in mononibuḷoi kon i Abisag.”
22“Nongonu sin ki iná in moigum kon soaḷ tatua kon inakó?” ki Salomo noḻibó. “Tua in notongkaibí in nopoigum kon inakó sinbá mobogoi in ḷoḻitúan in dodatuan tanaa ogoi kon inia. Sia tua in ki guya-guyangku! Apadoman ki Imang Abyatar bo ki Yoab in tua kon inia!” 23Naonda in noguman mako natua nongibotdon in ki Salomo pinodoyon kon i Tuhan, “Biódon mako in akuoi kotugatan in kutuk i Tuhan, aka diá hukumonku matoi in ki Adonia popisí in oigumnea tatua! 24Ki Tuhan in noginrigondon kon ḷoḻitúanku kon ḷoḻitúan i amáku, ki Daud. Ki Tuhan ain nogintompod kon dandi-Nea bo ain nobogoi in dodatuan tanaa kon inakó bo kon buíku. Akuoi in mongibot podoyon kon i Tuhan inta nobiag kon ki Adonia in matoibí doman singgai naa!”
25Dá ki Datu Salomo in nobogoidon in parenta kon i Benaya, bo ki Benaya minayá noḻimod kon i Adonia.
Ki Abyatar pinopogogai bo ki Yoab minatoi
26 #
Sam.1. 22:20-23; Sam.2. 15:24 Noiduduimai kon tua ki Datu Salomo in noguman kon i Imang Abyatar, “Bayádon kon ḻipúmu kon Anatot. Iko nion in patusbí hukumon matoi, táe singgai in naa akuoi in diábí moḻimod kon inimu, sin kon dodai in iko noyotakinpa i amáku, iko in noitakin nobaba kon bayongan in roriganea. Bo iko doman in nonompiamai kon Poti Dodandian i Tuhan.” 27#Sam.1. 2:27-36 Bo pinopogogaidon i Salomo in ki Abyatar saḷaku imang. Aid i Salomo tatua noponiata kon onu inta ain pinoguman i Tuhan kon Silo soaḷ buí i Imang Eli in totuu kon nobaḻídon.
28Dinongogdon i Yoab in bayongan inta ain nobaḻí tatua. Inagían in ondok in sia sin sia in nomihak kon i Adonia. Táe, koḻipod sia in diábí nomihak kon i Absalom. Dá noḷagui in sia minayá in Ḷoḷaigan i Tuhan bo nokadai kon popod mita in mezbah.#2:28: popod mita in mezbah: Indoiai 1:50. 29Habar tanaa pinotaau kon i Datu Salomo. Dá nopotabá in ki datu kon i Benaya noḻimod kon i Yoab. 30Minayá in ki Benaya kon Ḷoḷaigan i Tuhan bo noguman kon i Yoab, “Ki datu nopotabá kon inimu ḷumuai nongkon nion!”
“Diá,” tubag i Yoab. “Akuoi in moibogbí matoi kon naa.”
Dá ki Benaya in nobui bo nopotaau intua kon i datu.
31Nokodongogmai kon tua, noguman in ki datu, “Bayádon bo aidaidon onu inta pinogumannea tatua. Ḻimod in sia bo ḷobong, sinbá akuoi bo bayongan buí i amáku in diádon motanggung kon pinoḻimodan i Yoab kon intau mita inta diá kotaḷá. 32Ki Tuhan in mohukum kon inia popisí in sia noḻimod diá kinotaa-taauanmai i amáku. Ki Abner porwira in Israel, bo ki Amasa porwira in Yohuda, taya dua in tumpaḷa diá kotaḷá. Mosiabí in mopia-pia nongkon i Yoab, táe iḻimodnea in mosia. 33Hukuman popisí in kinopatoian in porwira doyowa tatua in ki Yoabdon bo buínea in umuran mobaba. Táe bayongan buí i amáku inta mobaḻí datu, in umuranbí barakatan i Tuhan – mosia in mobiagbí motompia.”
34Dá minayádon in ki Benaya kon Baḷoi Tuhan bo noḻimod kon i Yoab kon tua. Bo ki Yoab in iḷobong kon baḷoinea kon ḷuai in kotá. 35Onda intua ki datu noduí kon i Benaya nobaḻí tongguḷu totok in tontara nonoḻiu kon i Yoab, bo ki Zadok in dinuí nobaḻí imang nonoḻiu kon i Abyatar.
Ki Simei minatoi
36Nopaḷut mako kon tua ki datu nogoiní kon i Simei bo noguman kon inia, “Pomiadon kon baḷoimu kon Yerusalem naa. Pogutundon kon tua bo dikadon ḷumuai nongkon kotá. 37Aka iko mokobaḻí ḷumuai bo mayá ḻimimpat kon tapá in Ongkag in Kidron, yo iko in mustibí ḻimodon; bo ikodon tontaní in motanggung kon taḷá tatua.”
38“Mopia, tuang datu Inta Momulia,” tubag i Simei. “Duduiankubí in parenta i tuang datu.” Dá nogutundon in ki Simei kon Yerusalem tongonumai notaong in koonggotnea. 39Naonda in toḷu notaong nobaḻídon in naa: Bobantung i Simei doyowa noḷagui minayá in Gat, kon i Datu Akhis adí ḷoḷaki i Maakha. Naonda in soaḷ tatua pinotaau kon i Simei, sia 40nopopaké in ḷoḻitúannea kon keledainea bo minayá kon i Datu Akhis kon Gat sin motayak kon bobantungnea doyowa tatua. Nouḻínea in mosia bo dinianea in mosia nobui. 41Naonda in kinodongogan i Salomo onu inta ain pinomia i Simei, 42pinoki oinínea in ki Simei bo noguman, “Iko in pinoki dandiankudon pinodoyon kon i Tuhan kon iko in doíbí ḷumuai kon Yerusalem. Bo akuoi in nopoingatdon kon inimu kon aka iko ḷumuai nongkon Yerusalem, yo iko in mustibí matoi. Iko ain nodandi bo noibog dumudui kon parentaku, natua degá? 43Táe nongonu sin tanaa in binayowanmubí in dandimu tatua bo iḻimpatanmudon in parentaku? 44Kinotaauanmubí totok in bayongan aidmu moraat kon i amáku. Tuamai ki Tuhan in mohukumbí kon inimu, 45táe akuoi in barakatan-Neabí bo dodatuan i amáku in umuranbí irigonan-Nea.”
46Naonda in noguman mako natua, ki datu nomarenta kon i Benaya bo minayádon in ki Benaya noḻimod kon i Simei. Tanaaya ki Salomo in nomarentadon totu-totuu kon bonu in dodatuan nea.
Currently Selected:
DATU MITA IMITÁNEA 2: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
