MARKUS 9

1“Osumbu'mo!” koonyo i Yesus. “Itotonga' nu belemiu aiya madi' ko anu mate, de ma'isa montoa Tumpu mompalentah nu kuasa-Nyo!”

I Yesus pinopodaka'

(Mat. 17:1-13, Luk. 9:28-36)

2 # 2Ptr. 1:17-18 Ilapas anon sinaa i Yesus nomboa i Petrus tiba i Yakobus ka' utusnyo i Yohanes, ola sausa' nu aha nokiita' i sa'angu' na bungkutnyo anu matangkas. I ahop nu mata nu aha, i Yesus sinangalasanmo. 3Pakean-Nyo tinimbalimo nopute' ka' binakongkilap. Madi' ko samian na anu saja' mombaso'i hude i dunia aiya anu moko ala mombaso'i sumo ko pute'nyo aijo'. 4Lapas aijo' aha totolu' na mian anu saja' mombatuki Ia aijo' nontoa i Yesus basisik tiba i Elia ka' i Musa. 5Sahingga i Petrus notatae hi Yesus, “Tuumangku Gulu', ma'ima' hondo na kita aiya. Sahanyo kami mompotinjo totolu' na tahop: sa'angu' hi Kita Tuumangku, sa'angu' hi Musa, ka' sa'angu' mule' hi Elia.” 6Sabenannyo i Petrus madi' monsumbu' apaa na tionyo nu taeakon, kalana ia tiba ua'aha na sangalunyo daagi' hau-haunyo mabuhuk hondo.

7 # Mat. 3:17, Mrk. 1:11, Luk. 3:22 Lapas aitu sehu' nongkulubimo aha, ka' lengkat i sehu' aijo' i hongo na lewo' notatae. “Aiyamo na Anak-Ku anu Kuku kalibosi. Hongoakon na Ia!” 8Lia-lia' na aha nomposilele' titikub aha panyo madi'mo nontoa maumo pe'e pa' ihe anu kiijo' hingga-hinggat aha, boli mompiakon me posi Yesus. 9Tempo'nyo aha nintau' lengkat mae i bungkutnyo aijo', i Yesus nompokinde'i aha, “Boli mompoto'i mau mule' pa' hi he na anu tinoamo nu belemiu u'uka, de ma'isa pe'e Anak nu Mian po'ule' opotumuu' lengkat i kasilakan.”

10Aha nohongo-hongo potuunon aijo', panyo de ola posi aha, aha montampu'unimo lewa' mombisalakon apaa na anu nukahanda'i Yesus nu potatae mompo'ule' “tumuu' lengkat i kasilakan”. 11#Mal. 4:5, Mat. 11:14 Sahingga aha nompokilawa hi Ia, “Kadaka' gulu-gulu' agama notatae tukoonyo i Elia tionyo toka tongkoimoona?”

12Tinaaman i Yesus, “I Elia memang toka tongkoimoona da mompobeles anu sangga'atan. Panyo mosiamo na han tiba Anak nu Mian? Apaa na sababnyo i uno nu Kitab nu Tumpu tinulis tukoonyo Ia mongoa'i manjoo' na kasansala'an ka' nupopo ise' nu mian? 13Panyo Aku motatae hi komiu: I Elia tinokamo, ka' to mia-mian mombau hi ia yayamo pongka'oho' nu aha. Aijo' kona tiba anu tinulismo i uno nu Kitab nu Tumpu.”

I Yesus nompa'alin anak anu pininsoopan nu roh ma'idek

(Mat. 17:14-21, Luk. 9:37-43a)

14Salatan i Yesus ka' ko totolu' na anu saja' mombatuki Ia po'ule' nohingga-hinggat tiba anu saja' mombatuki sangga'atan, aha nontoa da'isan na mian kiijo'. To pia-piangkuka na gulu' agama hau-haunyo mahanggaga tiba anu saja' mombatuki Yesus aijo'. 15Salatan to mia-mian aijo' nontoa i Yesus, aha binangang lantas nopadeka' molabot Ia. 16“Apaa na obisalakon nu belemiu to gulu-gulu' agama aijo'?” pinokilawa i Yesus hi anu saja' mombatuki Ia.

17Samian anu i kiijo' hi mian da'isan aijo' nontaami, “Tuumangku Gulu', aku momboa anakku hi Kita Tuumangku. Ia momo' kalana pinisoopanmo nu roh ma'idek. 18De roh aijo' mongkonamo ia, butongnyo nupada-padahakon i tano', nganga'nyo mimbuha', bese'nyo koyokoban ka' iwi-iwi' na butongnyo timbalimo hojok. Pinoitangku da anu saja'; mombatuki Kita Tuuma molaa'akon roh ma'idek aijo', panyo madi' pinoko bau nu aha.”

19Sahingga i Yesus notatae hi aha, “Palias na komiu aiya! Komiu totu-totu'u mian anu madi' palesaya. Toka hi pian na Aku tionyo jojoong hingga-hinggat tiba komiu ka' sabaan hi komiu? Boamae na anak aijo'!” 20Aha mule' nomboa anak aijo' hi Yesus.

Salatan roh ma'idek aijo' nontoa i Yesus, binaunyo na butong nu anak aijo' i hojok sahingga anak aijo' nanabu' ka' kinumaliuntun i tano'. Nganga'nyo mimbuha'. 21Lantas i Yesus nompokilawa hi tuumanyo, “Ipianmo na ia sinumo aiya?”

“Daagi' pe'e ia ise'!” tinaaman nu tuumanyo. 22“Toho'mo roh ma'idek aijo' nompagala mompatei ia mompohampu i apu kabai i uno nu uee. Panyo de kita Tuuma timbali montulungi, ku poita de timbali, kaase' kita Tuuma mongkalibosi kami ka' montulungi kami!”

23“Apaa na kooyum? De Kita Tuuma moko ala?” tinaaman i Yesus. “Mau apaa o poko ala, asan mian palesaya!”

24Lau-laus tuumanyo aijo' noloboo', “Tuuma, aku palesaya, panyo palesayangku anu totu-totu'u ola sangkiding. Tulungimae na aku da aku lebe palesaya!”

25Tempo'nyo i Yesus nontoa saba' mian da'isan montampu' unimo toka sihuk, Ia nompalentah roh ma'idek aijo' ka' notatae, “Roh mabongon ka' momo', oko Ku palentah posabat lengkat hi anak aiya, ka' boli daagi' timbali minsoop i unonyo!”

26Roh ma'idek aijo' noloboo', lantas nombau butong nu anak aijo' i hojok, lapas aijo' nosabatmo lengkat hi anak aijo'. Anak aijo' otoa sumomo bangke' sahingga iwi-iwi' na mian notatae, “Ia sinilakamo!” 27Panyo i Yesus nontoongi limanyo ka' nontulungi ia nobula. Anak aijo' nobulamo.

28Salatan i Yesus i laigan, anu saja' mombatuki Ia, tinokamo toto samian hi Ia ka' nompokilawa, “Apaa na sababnyo kami madi' noko laa'i roh ma'idek aijo'?”

29Tinaaman i Yesus, “Roh ma'idek sumo aijo' madi' opoko laa'akon nu apa-apaa na obau, de misa' odo'akon.”

I Yesus notatae mule' mongkona kasilakan-Nyo

(Mat. 17:22-23, Luk. 9:43b-45)

30I Yesus ka' anu saja' mombatuki Ia nompala'i tampat aijo' ka' nolausakon lumambanan nu aha nontulu i Galilea. I Yesus madi' mongka'oho' nusumbu' nu mian iyame na kajojoongan-Nyo, 31kalana Ia hau-haunyo mongajan anu saja' mombatuki Ia. “Anak nu Mian obee'mo i kuasa nu mian,” sumo aijo' na koonyo i Yesus, “ka' Ia opatei, panyo sinaa ko totolu'nyo Ia po'ule'mo tumuu'!”

32Anu saja' mombatuki Ia madi' mangalati' apaa na anu ingajanakon i Yesus, panyo aha mabuhuk na mompokilawa hi Ia.

Ihe na talalo daka'?

(Mat. 18:1-5, Luk. 9:46-48)

33Aha tinokamo i Kapernaum. Tempo'nyo i laigan, i Yesus nompokilawa hi anu saja' mombatuki Ia, “Komiu mombisalakon apaa u'uka i tonga' nu jalan?”

34 # Luk. 22:24 Aha madi' nontaami, kalana i tonga' nu jalan aha pinainggaga mongkona ihe na anu talalo daka'. 35#Mat. 20:26-27, 23:11, Mrk. 10:43-44, Luk. 22:26 I Yesus sinumuhang, lantas nolaga aha sampulu' ka' ohua' na anu saja' mombatuki Ia aijo'. Ia notatae hi aha, “Mian anu mongka'oho' tongkoimoona, ia tionyo timbali tongkoimihi ka' tionyo timbali polaya' iwi-iwi' nu mian.” 36Lapas aijo' i Yesus nongala samian na anak ise', ka' sinainyo na anak aijo' tinuminjo i ahop nu aha iwi-iwi'. I Yesus nontanggogoli anak aijo' ka' notatae hi anu saja' mombatuki Ia. 37#Mat. 10:40, Luk. 10:16, Yoh. 13:20 “Mian anu montalima samian na anak sumo aiya kalana Aku, alati'nyo montalima Aku. Ka' mian anu montalima Aku, ia misa' ola montalima Aku, panyo montalima suele Ia anu nonsai Aku.”

Ihe na madi' mongewa kita ia mosambiha' hi kita

(Luk. 9:49-50)

38Lantas i Yohanes notatae hi Yesus, “Tuumangku Gulu', kami nontoa samian nolaa' setan tiba sanggo nu Kita Tuuma. Ka' kami nontewa' ia kalana ia misa' lengkat hi Kita.”

39Panyo i Yesus notatae, “Boli montewa' ia, kalana madi' ko samian pe'e moko ala mombau anu okabangangi mompake sanggong-Ku, ka' lamba-lamba montawasi Aku. 40#Mat. 12:30, Luk. 11:23 Kalana mian anu madi' mongewa kita, alati'nyo ia mosambiha' hi kita. 41#Mat. 10:42 Inau'mo! Mian anu mombee'i monginum hi komiu, kalana komiu mombatuki Tomundo anu Momposalamat, ia tantu montalimaje tamboonyo.”

Hahan anu monsaduakon mian mombau dosa'

(Mat. 18:6-9, Luk. 17:1-2)

42Ihe na monsaduakon sala'samian lengkat hi to mia-mian anu ise' aiya madi'mo palesaya hi beleng-Ku, sahanyo de batu ponggilingan oposegot i bokoko'nyo, ka' ia o alin i uno nu ambai. 43#Mat. 5:30 De limaum mombau beleyum baladosa', kolongi na lima aijo'! Sahanyo beleyum tumuu' tiba Tumpu mau ola sambiha' na lima, de mule' beleyum ua-uambiha' na lima minsoop i nalaka, aijo'mo apu anu sidu-sidutu'. [ 44I kiijo' mae apu madi' ko kapateannyo, ka' ias madi' timbali mate.] 45De tengkeum mombau beleyum baladosa', kolongi na tengkeum. Sahanyo beleyum tumuu' tiba Tumpu mau ola sambiha' na tengke, de mule' beleyum ua-uambiha' na tengke o alin i uno nu nalaka. [ 46I kiijo' mae apu madi' ko kapateannyo, ka' ias madi' timbali mate.] 47#Mat. 5:29 De mataum monsaduakon beleyum baladosa', kubetakon na mata aijo'! Sahanyo beleyum minsoop i Dunia Bu'ou tiba Tumpu mau ola sambiha' na mataum, de mule' ua-uambiha' na mataum o alin i uno nu nalaka. 48#Yes. 66:24 I kiijo' mae apu madi' ko kapateannyo, ka' ias madi' timbali mate.

49Toto samian opobelesi' nu apu, sumo palasombahan oposusi' nu timuson.

50 # Mat. 5:13, Luk. 14:34-35 Timuson aijo' ma'ima', panyo de timbalimo matawas, apaa saidi' mae timbali po'ule' opo'asing? Jadi, kukahanda'i komiu sumo timuson – tumuu'mo hingga-hinggat ka' mompaha kali-kalibosi.

Currently Selected:

MARKUS 9: LAILOE

Highlight

Copy