SISIKON NU TO RASUL-RASUL 2

Kinatokan nu Roh nu Tumpu

1 # Im. 23:15-21, Ul. 16:9-11 Salatan tinokamo i sinaa nu Pentakosta, iwi-iwi' mian anu palesaya nosa'angu'mo i sa'angu' na tampat. 2Madi' pinin i hongo na onyi' nolengkat i langit sumo baleba' anu makansang. Laigan anu kinasuhangan nu to mia-mian aijo' iwi-iwi' sinongko nu onyi'nyo aijo'. 3Lantas aha nontoa to jila-jila' sumo moak nu apu molele iyaya mae ka' manintengke' hi aha toto samian. 4Aha iwi-iwi' kinuasanmo nu Roh nu Tumpu, ka' nontampu'unimo notatae tiba ngangahan nu basa' sangga'at. Aha motatae nombatukimo apaa na anu pinoto'i nu Roh aijo' hi aha da otaloakon.

5Tempo'nyo aitu manjoo' na mian nu Yahudi, lengkat iyaya mae na lipu' songko-songko na dunia, jojoong i Yerusalem. Aha aitumo na to mia-mian anu mohongo-hongo hi Tumpu. 6Salatan ihongo na onyi' aijo', manjoo' hondo na mian tinoka sinihuk. Aha iwi-iwi' tinolokengkeng na nohongo to mia-mian anu palesaya aijo' notataemo i basa' nu aha toto samian. 7Aha binangangmo ka' tinolokengkeng lantas notatae, “Te misa' to mia-mian anu notatae aiya iwi-iwi' mian nu Galilea? 8Mosia na tinimbali sahingga kita nohongo aha motataemo i basa' nu lipu'to toto samian? 9Kita to mia-mian lengkat i Partia, Media, Elam; lengkat i Mesopotamia, Yudea, ka' i Kapadokia; lengkat i Pontus ka' i Asia, 10lengkat i Frigia ka' i Familia, lengkat i Mesir ka' i da'erah-da'erah Libia koko Kirene; daagi' ko anu aiya hi kita anu tinoka lengkat mae i Roma, 11daagi' ko to mia-mian nu Yahudi ka' suele to mia-mian bansa sangga'at anu ninsoopmo agama Yahudi; daagi' mule' ko anu tinoka lengkat mae i Kreta ka' i Arab. Kita iwi-iwi' nohongomo aha notatae nu basa'to, toto samian mongkona hahan anu okabangangi anu binau nu Tumpu!” 12Aha binangangmo ka' tinolokengkeng lantas aha iwi-iwi' nompaha poki-pokilawa hi samian ka' samian, “Apaa na alati'nyo aiya?”

13Panyo daagi' mule' ko to mia-mian anu mongalu. Aha notatae, “Ah, to mia-mian haha aiya ola ahi' malangu!”

I Petrus nombee'i sisik

14Lantas i Petrus tinuminjo hingga-hinggat aha sampulu' ka' sa'angu' na rasul sangga'at, lapas aitu aha notatae hi mian da'isan aijo'. Ia notatae daka-daka', “To Utu-utus, to mia-mian Yahudi ka' iwi-iwi' anu jojoong i Yerusalem! Hongo ima-ima', kalana han aiya palalu ku talangkanakon hi komiu. 15To mia-mian aiya madi' malangu, sumo anu osangka miu; kalana uuka sala'je jam osio' daagi' subu. 16Panyo aiya noko poto'imo nu Tumpu hi Nabi Yoel:

17 # Yl. 2:28-32 Tumpu notatae, ‘Tempo'nyo sinaa aiya mae imihinyo

kulambe'akonje na Roh-Ku hi iwi-iwi' na mian.

Ana-anakum anu to momo'ane ka' ana-anakum to bouboune mompoto'ije hi komiu hahan anu Ku poto'i hi aha.

To mia-mian olitau miu montoaje hahan anu Ku poto'i hi aha.

To mia-mian tu'anyo miu mongipije mongkona ipion anu Ku poto'i hi aha.

18Hi to posa-posaihon-Ku pe'e – mau pe'e to momo'ane mau pe'e to bouboune –,

Ku dudu'akonje na Roh-Ku i sinaa haha aitu.

Aha mompoto'iakonje hahan anu pinoto'ing-Kumo hi aha.

19Aku mompodaagi'je anu okabangangi aita' mae i langit,

ka' hahan anu daka' i aluk nu dunia aiya;

daagi' saidi' mae ko baso' ka' apu, mombuun ka' tibuk.

20Batu nu sinaa timbali pikat,

bitu'on timbali momea' sumo baso'

ma'isa pe'e Sinaa nu Tumpu toka, sinaa daka' ka' anu talalo opopodaka' aijo' na toka.

21Tempo'nyo aitu, mian anu mongkakase hi Tumpu

oposalamat.’

22To Utu-utus mian nu Israel! Hongo apaa na anu ku taloakon aiya: I Yesus mian nu Nazaret aijo' binee'anmo kalaja nu Tumpu Allah bau kapentingan nu kita utus. Aijo' nyata' hondo i anu okabangangi ka' hahan anu daka', apaa na anu binau nu Tumpu i totonga' miu hi Yesus aijo'. Iwi-iwi' aijo' posi kita utus nonsumbu'mo. 23#Mat. 27:35, Mrk. 15:24, Luk. 23:33, Yoh. 19:18 Posi pongka'oho'-Nyo na Tumpu nomputusi da obee' na i Yesus hi komiu. Ka' salatan binee' na Ia, komiu nompateimo Ia ka' nompojohokmo to mia-mian ma'idek nonsalib Ia. 24#Mat. 28:5-6, Mrk. 16:6, Luk. 24:5 Panyo Tumpu po'ule' nompotumuu' Ia lengkat i totonga' nu to mia-mian mate. Ia kinona nu kapatean, panyo Tumpu na nolapasakon Ia, kalana madi' timbali Ia saja'mo nu kuasai nu kapatean. 25#Mzm. 16:8-11 Mongkona i Yesus aiya, i Daud toho'mo notatae,

‘Aku montoa Tumpu saja' i ahopku;

Ia saja' i sohipi'ku, da aku madi' nugeleguda nu mau mule' apaa.

26Aijo' na sababnyo kinyonyoangku lame' hondo,

nganga'ku montaeyakon pompuji-puji':

ka' sanang na butongku aiya montanda'i

i uno nu polamunan.

27Kalana Beleyum madi' mompojohok butongku jojoong i uno nu dunia mian mate.

Beleyum madi' mompojohok

posaihon-Um anu mohongo-hongo aijo' magalis ka' mingkot.

28Beleyum nompotiju'mo jalan anu mompatui kantumuu'an talakana' ka' sampe toka sidu-sidutu'.

Kabilahianku talalo daka' hondo,

kalana Beleyum mosangalu tiba aku.’

29To Utu-utus, poloas mae na aku motatae sahondo-hondonyo mongkona i Daud, tuuma nu mompolee'to. Ia natemo ka' i lamunmo suele; pinolamunan ia daagi' aiya i totonga'to sampe uuka. 30#Mzm. 132:11, 2Sam. 7:12-13 Tumpu noko bajanji'mo hi Daud, tiba sumpa', saba' sala' samian lengkat i lee'nyo ohangkatje nu Tumpu timbali tomundo. Kalana i Daud monsumbu' janji' aijo', ka' kalana ia suele nabi, 31ia monsumbu' suele apaa na nubau nu Tumpu. Jadi ia nompoto'imo apaa na anu timbali tukoonyo Tomundo anu Momposalamat anu jinanji'mo nu Tumpu, po'ule'je tumuu' lengkat i kapateannyo. I Daud notatae,

‘Ia madi' ola opojohok jojoong i uno nu dunia to mia-mian mate;

butong-Nyo madi' timbali magalis ka' mingkot.’

32I Yesusmo aiya na po'ule' pinotumuu' nu Tumpu lengkat i kapatean. Kami iwi-iwi' nosi sakisimo han aijo'. 33Ia i hangkat ka' pinosuhang i kasuhangan anu matangkas ka' binee'an kakuasa'an nu Tumpu, lantas nontalimamo Roh nu Tumpu Allah anu noko janji'mo nu Tuuma. Ka' anu ihongomo miu uuka aiya ka' tinoamo saba' Roh'mo ai-aijo' na anu ilambe'akon-Nyo hi kami. 34#Mzm. 110:1 Posi i Daud madi' noliba' nokiita' i suluga', panyo i Daud notataemo,

‘Tumpu notatae hi Tumpungku:

35Suhangmo i sasu koanan-Ku,

sampe Aku mombau to bali-bali'-Um minsuuluk hi Beleyum!’

36Aijo' na sababnyo iwi-iwi' mian nu Israel tionyo monsumbu' totu-totu'u saba' i Yesus anu sinalibmo miu aijo', i Yesus ati-atina'mo na anu pinotimbalimo nu Tumpu, timbali Tumpu ka' Tomundo anu Momposalamat!”

37Salatan to mia-mian aijo' nohongo han aijo', kinyonyoa nu aha madi'mo talalo sinanang. Lantas aha nompokilawamo hi Petrus ka' hi to rasul-rasul sangga'atannyo, “To Utu-utus, kami tionyo mombau apaa?”

38Tinaaman i Petrus, “Balatobatmo, bolimo mombau dosa-dosa' miu. Ka' tionyo komiu toto samian opalamandikan nu sanggo i Yesus Kristus, da dosa-dosa'um o ampuni. Sahingga to Utu-utus montalimaje tambo nu Roh nu Tumpu lengkat hi Tumpu. 39Kalana anu jinanji'mo nu Tumpu aijo' bau bagi miu tiba lee' miu, tiba bau bagi nu to mia-mian anu daagi' kiijo' mae i tampat-tampat anu majo'on – aijo'mo iwi-iwi' na mian anu i laga nu Tumpu Tumpunto da toka hi Ia.”

40Sumo aitumo na i Petrus nompotalangakon hi aha. Ka' manjoo' na potatae sangga'at, suele pinoto'inyo hi aha da butong nu aha boli maninggalo' i bansa anu ma'idek aiya, anu nu hukumje nu Tumpu. 41Manjoo' na mian palesaya i anu nu taloakon i Petrus, lantas aha pinalamandikan. Sahingga konjoo' nu mian palesaya i sinaa aitu nintuang mule' totolu' na madala na mian. 42Totu-totu'u na aha saja' binalajan hi to rasul-rasul, ka' saja' silimu' hingga-hinggat. Aha nongkaan hingga-hinggat ka' balado'a hingga-hinggat.

Bau-baunyo nu kantumuu'an nu to mia-mian palesaya

43Manjoo' hondo na anu okabangangi binau nu to rasul-rasul aijo' sahingga, iwi-iwi' na mian binangangmo ka' nabuhukmo. 44#Kis. 4:32-35 To mia-mian palesaya aijo' iwi-iwi' nosangaja'mo ka' apaa na anu hi aha, nupake nu aha hingga-hinggat. 45Aha nompobaluk to bala-balang ka' halata' nu aha, lantas obagi-bagimo nu aha na doinyo aijo' iwi-iwi', otoa i kapalaluan nu aha toto samian. 46Toka sansina-sinaa aha saja' silimu' i Laigan nu Tumpu ka' lame' na aha mongkaan hingga-hinggat, ka' aha madi' mombuulakon to lai-laigan nu aha. 47Aha saja' mompuji-puji' Tumpu ka' nuka'ima'i nu mian iwi-iwi'. Toka sansina-sinaa konjoo'nyo nu aha saja' mintuang kalana Tumpu mombee' hi aha to mia-mian anu oposalamat.

Currently Selected:

SISIKON NU TO RASUL-RASUL 2: LAILOE

Highlight

Copy