SISIKON NU TO RASUL-RASUL 1

1 # Luk. 1:1-4 I Teofilus anu manonong.

I uno nu kitabku anu momona noko poto'ingkumo iwi-iwi' apaa na anu binau ka' pinogulu' i Yesus lengkat pe'e Ia nontampu'uni pakalaja'an-Nyo, 2tinoka-toka i sinaa Ia i hangkatmo nokiita' i suluga'. Ma'isa pe'e Ia noliba' nokiita' i suluga', tiba kuasa nu Roh nu Tumpu Ia nombee'imo sonto-sonto' hi aha to rasul-rasul-Nyo anu pinile'anmo. 3Ilapas Ia sinilaka kopinnyo patom pulu' na sinaa Ia toto minsan saja' manintoa nyata-nyata' hondo hi to rasul-rasul aijo' pomponyata'-Nyo saba' Ia totu-totu'u tinumuu'mo. Aha nontoamo Ia, ka' Ia notataemo hi aha mongkona mosia na Tumpu mompalentah sumo Tomundo. 4#Luk. 24:49 Ka' tempo'nyo Ia sinilimu'mo tiba aha, Ia nombee'imo palentah aiya hi aha, “Boli opala'i na Yerusalem. Tanda'i kiijo' sampe Tuumang-Ku mombee'mo apaa na anu jinanji'-Nyomo, aijo'mo anu noko poto'ing-Kumo hi komiu u'utu mae.

5 # Mat. 3:11, Mrk. 1:8, Luk. 3:16, Yoh. 1:33 Kalana i Yohanes mompalamandikan nu uee, panyo daagi' to pia-pian sinaa komiu opalamandikanmo nu Roh nu Tumpu.”

I Yesus i hangkat nokiita' i suluga'

6Salatan to rasul-rasul aijo' sinilimu'mo hingga-hinggat tiba i Yesus, aha nompokilawamo hi Ia, “Kita Tumpu, apaa uuka Kita Tumpu mongka'oho' po'ule' mompotinjo Kapalentahan nu bansa Israel?”

7Tinaaman i Yesus, “Posi Tuumang-Ku na anu montantukan sinaa ka' tempo'nyo. Aijo' madi' palalu osumbu' nu komiu, kalana aijo' hak nu Tuumang-Ku. 8#Mat. 28:19, Mrk. 16:15, Luk. 24:47-48 Panyo komiu mohumpakje kuasa, de Roh nu Tumpu tokamo hi komiu. Ka' komiu timbalimo bau sakisi-sakising-Ku i Yerusalem, i songko-songko Yudea, i Samaria ka' toka-toka i puus nu tano'.” 9#Mrk. 16:19, Luk. 24:50-51 Noko potatae na i Yesus sumo aijo', Ia i hangkatmo nokiita' i suluga' i ahop nu mata nu aha, ka' sehu' nongkulubimo Ia, madi'mo tinoa nu aha.

10Hau-haunyo aha daagi' nonsinda mokiita' i langit, tempo'nyo i Yesus tinalahangkatmo, monti-montiik ua'aha na mian nibaju' mopute' tinuminjomo i sohipi' nu aha. 11“Hee, to mia-mian nu Galilea,” koonyo nu ua'aha na mian haha aijo', “kadaka' komiu ola tuminjo atina' monsinda langit? I Yesus anu tinoa miu tinalahangkatmo nokiita' i suluga' atina' i ahop miu, po'ule'je minsusule' mae susumo atina' anu tinoamo miu u'uka aiya.”

Pombolosi i Yudas

12Lapas aijo' to rasul-rasul aijo' ninsusule'mo i Yerusalem lengkat mae i Bungkut nu Zaitun. Bungkutnyo aijo' tampatnyo kila-kila sa'angu' na kilometen na kojo'onnyo lengkat mae i Yerusalem. 13#Mat. 10:2-4, Mrk. 3:16-19, Luk. 6:14-16 I Yerusalem aha namba i laigan i tampat kinasonsoo'an nu aha, lantas noliba' nokiita' i kaman anu i bawonyo. To Rasul-rasul aijo', aitumo i Petrus ka' i Yohanes, i Yakobus ka' i Andreas, i Filipus ka' i Tomas, i Bartolomeus ka' i Matius, i Yakobus anak i Alfeus, i Simon Patriot ka' i Yudas anak i Yakobus; 14iwi-iwi' saja' mosangaja' na kinyonyoa silimu' da balado'a. Aha balado'a tiba to bouboune, singkona i Maria tina i Yesus ka' tiba to utu-utus i Yesus.

15Kinosansinaan aitu, tempo'nyo aha hau-haunyo sinilimu'mo – daagi' kila-kila sa'atu ka' uampulu' na mian anu tinoka – i Petrus tinuminjomo mongka'oho' motatae. Ia notatae, 16“To Utu-utus! Apaa na anu tinulismo i uno nu Kitab nu Tumpu Allah, aijo' tionyo timbali. Naipuan mae Roh nu Tumpu notataemo hi Daud mongkona i Yudas, polaya' nu to mia-mian anu mohakop i Yesus aijo'. 17I Yudas sala'samian lengkat hi kita, ka' ia pinile'anmo suele da mokalaja hingga-hinggat tiba kita.”

( 18#Mat. 27:3-8 I Yudas aiya nohumpakmo tano' bau polamunan anu ihumpaknyo salaku tambonyo lewa' nombau anu ma'idek mongkabisa'i mian. Ia nanabu' ka' i nate ka' kompongnyo nobiha' sampe isi nu kompongnyo nosabat iwi-iwi'. 19Iwi-iwi' na mian anu jojoong i Yerusalem monsumbu' han aijo'. Mokonyo aijo' i uno nu basa' nu aha, aha nonsanggohi tano' aijo' Akeldama, alati'nyo ‘Tano' Baso'’.)

20 # Mzm. 69:26, 109:8 “Kalana i uno nu Kitab Mazmur tinulis sumo uuka,

‘Pojohokmo na tampat kajojoongannyo timbali liing;

boli ko samian pe'e na jojoong i unonyo.’

Daagi' mule' po'ule' tinulis sumo uuka,

‘Bakasmo da pangkatnyo nu ala nu mian sangga'at.’

21-22 # Mat. 3:16, Mrk. 1:9, 16:19, Luk. 3:21, 24:51 Kalana aijo', tionyo ahi' daagi' ko toto samian anu mombatuki kita da timbali sakisi saba' i Tumpu Yesus po'ule'mo tinumuu' maumo Ia sinilakamo. Mian aijo' tionyo ahi' sala'samian lengkat hi to mia-mian anu saja' mo'imboa tiba kita tempo'nyo kita nombatuki i Tumpu Yesus noyaya, lengkat pe'e i Yohanes nontampu'uni nompalamandikan sampe tempo'nyo i Yesus i hangkat nokiita' i suluga', lengkat aiya hi kita.”

23Sahingga to mia-mian anu tinoka i kiijo' nompoto'i ua'aha na mian aitumo, i Yusuf anu osanggohi mule' i Barsabas (ia osanggohi mule' i Yustus), ka' i Matias. 24-25Lantas aha binala do'amo. Aha notatae, “Tumpu, Kita monsumbu' iwi-iwi' kinyonyoa nu mian. I Yudas binelentimo i pakalaja'annyo sumo rasul, ka' i natemo. Jadi potiju'akonmo mae hi kami, ihe na anu ua'aha na mian aiya, na nupile'i nu Tumpu da obee'i kalaja aijo' mombolosi i Yudas.” 26Lapas aijo' ohua' na sanggo aijo' ingonde, lantas ondean nanabu' hi Matias. Jadi ia i hangkat tinimbali rasul da mosangalu tiba sampulu' ka' sa'angu' na rasul sangga'atannyo.

Currently Selected:

SISIKON NU TO RASUL-RASUL 1: LAILOE

Highlight

Copy