Matius 20
20
Sukamno subot yé gato ben suk mo nggwe anggur
1”Yefun Allah nai yetu sok mo An bi rus-i ne yo, bere tepsu sukamno ré. Su nyotkwo gan, yetu ge dik yo gato bi nggwe anggur mu kendo yé bok yo ma wa ben suk mo an bi nggwe ne. 2An tom su do, bere an syo sugum kom mo perak det dik, tepsu gaji wa kam no dik, orete an syogat yé bok ne mu ben suk mo nggwe ne. 3Kam kok, an mu mo pasar ete me yé bok yo o mone gato yo ben suk nde. 4Sane an ki nai do, ’Nin mu ben suk mo ji bi nggwe, ete bere ji bi sugum nai nin tepsu nin bi kamba mone.’ 5Sane yé bok ne mu. Or o, kam ti ri, ye gato bi nggwe mu ku yé bok yo o gato dakai ti not mo pasar. Sane an kendo yé bok ne ma ben suk mo an bi nggwe ne o. Or o, kam dek an ben sane o. 6Karowa kam bok dom, an mu mo pasar ete ku yé bok yo o dakai ti mone. An ndo mo do, ’Suma ben anato nin dakai ti not more kadit nyotkwo sor kom mo kre ré ne?’ 7Yé bok ne ki do, ’Ye yo ma kendo men wa ben suk yo mo nde.’ An ki do, ’Sane, nin mu ben suk mo ji bi nggwe et.’
8Kom mo noru, ye gato bi nggwe ne ki nai an bi pa gato tepsu yesu wa yé mwa gato ben suk mone do, ’Nan kendo yé gato ma ben suk ma sum, ete nan syo sugum nai án mo án bi kamba et. Nan syo bi gaji nai yé gato ma ben suk kadit kre ne nyim, orete nan syo nai ye gato ma ben suk kadit nyotkwo wari.’ 9An syo sugum perak det dik nai yetu gedik-gedik gato ben suk kadit kre ne. 10Sane yé bok gato ben suk kadit nyotkwo ne ma wa nai bi gaji sa, yé bok ne nut do, bere án ku sugum wai kadit det dik ne o re, sarewo yesu ne syo sugum perak dik nai án gedik-gedik ne sor re. 11Án ku sugum ne sa, án maskwa, án kabor ye gato bi nggwe ne. 12Án ki do, ’Yé gato ma ben suk kadit kre, ben suk kom mo jam dik sor re, wo men yé gato ben suk kadit nyotkwo, men kamba, kam gat men, wo nan bi sugum nai yé bok neya si men tepsu yu sino, sane siri re.’ 13Ye gato bi nggwe ki nai yé bok gato kabor an sare do, ’Pa, ji yo ben sukibit are nde. Nin si ji tom su yu do, nin ben suk kadit nyotkwo kom mo kre, ete ji bi sugum perak det dik is nin ne, sangge bado? 14Sangge fe! Sane nin nai nin bi sugum, ete nin mu sor. Ji dakai iwa ji syo sugum det dik nai yé gato ben suk kadit kre ne dom. 15Ji dakai bi sugum, sane ji ben suk ket ji dakai i su sugum ne anato siri bado? Ji ben sukndo, ji syo sugum mwa nai ye yi ne anato nin maskwa ji mone bado?’ ”
16Sane Yefun Yesus ki do, ”Ye gato Yefun Allah kendo ma wa ben An bi suk-i, bere ye gato ben Yefun bi suk-i nam nde, bere an ku suk nyim, ete ye gato ben Yefun bi suk-i ne nam, bere an ku suk wari.”
Yefun Yesus ki sukdu subot kam gato bere yé gu An kwop su ne kom mo wam dogri
(Mrk. 10:32-34; Luk. 18:31-34)
17Yefun Yesus mu mo kota Yerusalem saresa, An kendo An bi pakon si An mu dor kadit yé yi, ete An ki nai do, 18”Men mu mo Yerusalem it anare. Mone ye meret os wa gwat yeko ma wa but Yetu bi Pa to Ji ré, ete yé syo Ji mo yekwesú mo Yefun Allah bi nu si yeguru agama syim. Bere án syokom yé gu Ji kwop, 19ete án syo Ji mo yewis yi syim-i. Yewis yi ne bere ki Ji ket kwayo-kwayo, bere yé kwam Ji su bus, yé mban Ji mo kwesukwin, ete bere Ji kwop mone, wo kom mo kam we rek, bere Ji sun kadit sukkwop o re.”
Yakobus si Yohanes, ye we ne bi im ma ndek suk yo mo Yefun Yesus
(Mrk. 10:35-45)
20Orete Zebedeus bi nggon si bi pa ge we ma ku Yefun Yesus. Án tu án umsu mo Yefun Yesus gwem, orete án ndekwa Yefun Yesus ós án su suk yo.
21Yefun Yesus ndo mo án do, ”Ji ós nin su suma ne?”
Nggon ne ki do, ”Nan tom su ji do, bere mo pe gato Nan jowa Nan bi rus-i ne yo, Nan bes ji bi pa ge we gum pasye si Nan sino, pa dik yo kem tak Nan de syim ge, pa dik yo o kem tak Nan de syim jam.”
22Yefun Yesus ki nai pa we do, ”Nin ka we jam nde suk gato nin ka we ndekwa ne. Nin ka we fro nggwa wa nin ka we ku sukye tepsu sukye gato bere Ji ku ne, bado?”
Pa we ne ki do, ”Men fro men nggwa wa re.”
23Yefun Yesus ki nai pa we ne do, ”Sangge, bere nin ka we ku sukye tepsu Ji, sarewo Ji yo bi os wa Ji syo nat yo wa nin ka we kem mone nde, wo Yefun Allah sor ete fro ye gato bere kem tak Ji de syim ge si ye gato kem tak Ji de syim jam ne.”
24Pakon ge musyu dik doyi neya jam sukdu gato pakon ge we ré ki ne sa, án maskwa ket pa we ne. 25Sane Yefun Yesus kendo pakon ge musyu dik sop we sum sino, ete An ki nai do, ”Nin jam do, yé gato gum yekwesu mo bur ré gato jam nde Yefun, bere yekwesu ne ben án bi suk-i su án bi rus-i ne krat wai o re. Sane dom yekwesu gato gum yepasye bere syaugat án bi rus-i ben suk tepsu yepasye ne bi sukdu-i ne sor. Án bi rus-i tepsu án bi pakwerut-i gato benbot suk gato án imo sor. 26Sarewo nin jom nin bi rus-i sane nde, wo sare, ye gato iwa yé bes an nggwa tepsu yepasye it yo, an ben nggwa tepsu pa wokgan gato iwa ós yé mwa neya et. 27Ye gato iwa an gum yekwesu it yo, an ben nggwa tepsu nin bi pakwerut et, 28we Yetu bi Pa to Ji ré ma mo bur ré wa yé ben suk wa Ji nde, wo Ji ma wa Ji ós nje, ete Ji bi nggwa tepsu suktot mo sukibit gato yé mwa ben ne.”
Yefun Yesus ben ye we gato gro ndu ne gro ndo satu
(Mrk. 10:46-52; Luk. 18:35-43)
29Yefun Yesus si bi pakon mu kadit kota Yerikho sa, yé mwa boribot Yefun Yesus. 30Ye we gato gro ndu kem mo os de mone. Ye we jam Yefun Yesus mu wai ket os mo an we de ne sa, an we saiye. An we saiye do, ”Yeraja Daud bi Dat o, Nan jimnotku men ka we et!”
31Yé mwa mone maskwa ket ye we ne, ete yé ndantom ye we ne do, ”Nin ka we not se!” Yé da ndantom ye we, sarewo ye we ne saiye gat nggi wai o re. An we saiye nggi o do, ”Yenggras o, yeraja Daud bi Dat o, Nan jimnotku men ka we et!”
32Yefun Yesus ti not, ete An kendo ye we ne do, ”Nin ka we iwa Ji ós nin ka we su suma ne?”
33Ye we ne ki do, ”Yenggras, Nan ós ben men ka we gro ndo et.”
34Yefun Yesus dakai jimnotku ye we ne. An ak syim mo ye we ne gro, or ye we ne gro ndo satu it anane. Orete ye we ne simo Yefun Yesus.
Currently Selected:
Matius 20: KGR
Highlight
Share
Copy
Want to have your highlights saved across all your devices? Sign up or sign in
@LAI 2004, 2014
