LUKAS 14

Yesus nen ap ekhe enggi eisok firik mene higitikhe wene

1A'nogo yagaisasikhesik he, inenggi sabit oba ekhe, Allah faget weat logolik he, Yesus ap Farisi mene inogogwi kaindek misigat ekhe aiba sumburu emberek nouwogeluk lagaikhesik were'ma, afuni nen, at Yesus ineil furogo futfikhi lagaukwa. 2A'nogo ineilenggen werek kwelek he, ap ekhe enggi eisok firik logolik ou nonghongsek welagaikhe mene Yesus elokhoma higit aremnogo wagaikhesik welagaikhe. 3Were'ma, at Yesus nen ap Allah ane lisu palek inelu mene inom, ap Farisi mene inom, omanogo yagaisikhi logolik he, mel yagaisasikhe: ”Wene Allah nen komotninafikhe mene andiba, aren ikhi logolik he, inenggi sabit oba an faget weat logolik afuni ou warek mene elok higirinabigin, isikhe a? Lega,” iluk a'nogo yagaisasikhemo re, 4it omanogo wene onggo igi'lek inane legat kamo isukwama, at Yesus nen ap a'nogo enggi fakfesikhesik ou higitikhesik he, ”Lan o,” iluk lakfesikhe. 5Lakfesikhemo, ap a'nogo lagu kwelek he, at Yesus nen it omanogo yagaisikhi logolik mel yagaisasikhe: ”Allah faget weat logolik meneat he, hit ekhe hinamlogo a? Hinanggo sapi a, i mogwe habuli'mo pile pikhe halok, weak-weagat hinenggi fagaisogo liabugun lek nogo? Liabugun aro,” iluk yagaisasikhemo re,#Mat. 12:11 6it ap omanogo nen wene onggo yagasu re, elo'lek agaikhemo inane mondok igi'lek kamo isukwa.

Seni isago nouwogeluk yi'nogo hu'lasugun iluk yagaisasikhe wene

7Ap kain mene ekhe nen afuni inom sumburu misi'mo nouwogeluk inayonggo fesikhe mene, ap kaindek mene hu'lagaikharek oba nek hu'lagaukwasik weregen he, at Yesus eilenggen yerisasikhesik he, wene oba lirogo yagaisikhi logolik, mel isikhe: 8-9”Ap ekhe agwe igeti logolik, seni isago nouwogeluk, hat ekhe hayonggo fikhe halok he, hat hebe yenggerek hangge meneat he, ap ekhe kain mene hemberegat hinayonggo fagain andi nen, ap kaindek mene hu'lagaikharek oba hu'lasi lagun o. A'nogo hu'lasi lambik were'ma, ap kain mene hemberek hinayonggo fagain mene a'nogo wagu halok he, at ap hinayonggo fagain mene a'nogo nen yagaheti logolik, Nagot yi. Ap yi hat hobali'mo hu'lasuagen he, hat hebe, iluk yagahete halok he, hat henggali asimbik ap we mene hu'lagaikharek oba hu'lasi lagen hanogo nen he, ap kaindek mene hu'lagaikharek oba andi pikhit hu'lasi lagun o.#Ams. 25:6-7 10-11Ap sa nen onggwarek endawinggen legeisogo fakhagain halok he, Allah nen sebelogo fagain o. Nen, sa nen onggwarek endawinggen sebel fakhikhe halok he, hobuk Allah nen legeisogo fagain andi nen he, hat a'nogo hayonggo fugu halok he, ap we mene hu'lagaikharek oba hu'lasi lan o. Andoma hu'lasi lambik were'ma, ap hayonggo fagain mene a'nogo wesimbik he, nagailage. Hat he, ap kaindek mene hu'lagaikharek oba yoma hu'lasi me o, iluk ugu halok he, it afuni mondogat seni isago hinom nouwogeluk andogosugun mene omanogo ineilhanemat yagahetunem, iren he, ap yi kain mene higi, iluk ineilenggen enegat yetheogoin o. Halok he, ap we mene hu'lagaikharek oba andomaat hu'lasugun o,” iluk yagaisasikhe.#Mat. 23:12; Luk. 18:14

12A'nogo yagaisasikhesik he, at Yesus nen ap awi eisewerek ayonggo fesikhe mene a'nogo yagati logolik, ”Linggene a? hu'mokwe a, haren afuni hinom sumburu misi'mo isago nouwogeluk halok he, hat hinom hundik mene inom, hagaila'lak mene inom, hogogwi hagoromi mene inom, kaindek inenggi werek hinom welagep mene andoma inom, inayonggo fugun o. A'nogo hilingiten halok he, hobuk it ekhe seni isati logolik hat hayonggo foumo, onggo wurabeten hanogo. 13-14Mene re, hat a'nogo seni isati logolik halok he, inenggi lek inelagaik mene andi inom, inouwak sagalek mene inom, ineindep holu mene inom, ineilenggen mum mene inom, it ariginik mene nek inayonggo fikhi logoino. A'nogo inayonggo fugunem, iren hat hayonggo fogoin lek andi nenat, hat hendawimo hagaiyek hokhorogo anggagain o. It andi nen onggo wokhesugun lek andi nen, afuni inobabut higithogo hilingitarek mene wa'lagaikharek oba nen Allah nen inelugerinabigin sambul andi re, hat hilingiti logogin mene onggo, at Allah nenat wokhesigin o,” iluk yagaisasikhe.

”Ap ekhe nen he iti logolik seni isago na wesuageluk inayonggo fesikhe,” iluk oba lirogo yagaisasikhe wene

(Mat. 22:1-10)

15At Yesus nen a'nogo yagaisasikhemo, afuni sumburu nouwogeluk hurek welagaukwa mene omanogo, ap ekhe nen esanggo holhikhesik he, Yesus mel yagatikhe: ”It afuni ekhe Allah nen awe a'ma fisikhere'ma andoma logolik sumburu nogoin mene andi, inendawimo inagaiyek hikhi logogun o,” iluk yagatikhemo, 16at Yesus nen he, mel yagatikhe: ”Ap ekhe seni hokho isasigin iluk wene lenggalhikhesik he, afuni mondok hokhorogoat inayonggo fesikhe. 17Inayonggo fesikhesik, ebe arat isakfuluk he, amingmingengge mene ekhe yagati logolik: Seni isago yi arat nogoin higit aga. Halok he, afuni inayonggo figi mene omanogo wesuagen he, woginabi lan o, iluk lakfesikhe. 18Lakfesikhemo, yagaisilik lagunem he, it afuni omanogo mondogat inabiren inane lagokhogo ikhi logolik, at ekhe nen he, nagailage. An yabu ekhe onggo palhirik neilenggen hali lagainmo re, seni isago nogoin sambul andiba re, an he wesigin lego, iluk yagatikhe. 19Nen, at ekhe nen he, nagailage. An wam sapi ouwali waganek mene 10 nen pirendek wuret higik onggo palhi mene neilenggen kogoli lagainmo re, seni isago nogoin sambul andiba re, an he wesigin lego, iluk yagatikhe. 20Nen, at ekhe nen he, nagailage. An nagwe ket ikhigiri'mo andi nen he, seni isago nogoin andi, an na wesu re, elo'lego, iluk yagatikhe. 21Inane a'nogo ilik lagaukwama re, at amingmingengge mene a'nogo nen oe a'nogo yagasi wagaikhe. A'nogo yagasi wagaikhemo, at oe eisewerek a'nogo a'mage hokhorogo lagasikhesik, mel yagatikhe: O kota hokho yi, ebekwe hokhokwe inom, endepkwe inom, laga logolik, afuni inelagaik mene inom, inouwak sagalek mene inom, ineilenggen mum mene inom, ineisok wut warek mene inom, woginarek we'no o, iluk yagatikhe. 22A'nogo yagatikhemo, at ap a'nogo lagaikhesik ambotkwe wagaikhesik he, oe a'nogo mel yagatikhe: Noe. Yaganeten a'nogo woginarek wagi meneat he, o fena mondok selek werego, iluk yagatikhe. 23-24A'nogo yagatikhemo, oe a'nogo nen amingmingengge a'nogo yagati logolik, mel yagatikhe: Halok he, seni isakfigi mene yi, it afuni attak inayonggo figi mene andi na wesugun mondok lego, iluk yagaheti o. Halok he, afuni o kota yiba endakwe mene, ebekhe hokhokwe, endepkwe, yugunat welagaikharek mene andoma an naiba yoma o peterogo kwi wesuagen he, hane omamerogoat yagaisilik lambik woginarek fisa we'no o, iluk yagatikhe,” iluk Yesus nen yagatikhe.

”Yi mene ti mene herakfisaluk he, An nombo'ne wesuago,” iluk yagaisasikhe wene

(Mat. 10:37-38)

25Afuni mondok hokhorogat Yesus ombo'ne lop hundik laga lagaukwama re, at Yesus elokhe hebekhogo it afuni omanogo wogisasikhesik he, 26”Hit hineisugwi hinagaisawi inom, hinagagwi hinagainafuri inom, hinogogwi hinagoromi inom, hinonggwarek hinebe inom faget enek anggikhi logolik, an nagoromi asuogeluk nombo'ne wesumo re, elo'lego.#Mat. 10:37 27Eba menfuluk inoatarek mene a'nogo hinagayo lombok waluk he, an nombo'ne wesugun lek halok he, an nagoromi asuogeluk nawe a'ma kwi wesugun elo'lek aro.#Mat. 10:38, 16:24; Mrk. 8:34; Luk. 9:23

28Hit ekhe nen afuni kagalinarek welagaikharek oba uanhogo wusuogeluk wenggelfuluk he, o ebe ulugun warogo wusugun mene uang eloga? Elo'lega, iluk hinenggi wenati'lek, we, hesanggeat ekhe wuti lagep nogo? Lego. 29-30Onggo faget andi hinenggi wenati'lek wutu halok he, o tik talfuluk meneat he, o ebe wusu elo'lek aga halok, it afuni ekhe ineilenggen haluk he, ap andi o tik talhe meneat he, wusu elo'lek agama herakfisikhe o, iluk hinaendo ngik-ngekhogo yakhinabinogo.”

31”Andi hak ekhe, ap kain enupogot ekhe nen weim abok wulakfuluk ap kain ekhe inom yabi louwogeluk he, ebe tak yamukhogo hu'la'lugen, an nagoromi inebe 10 ribu ya re, at ap kain a'li agoromi inebe 20 ribu andi inom elok yabugun he a? Elo'lek he a, iluk endawimo ebeti'lek, we, pikhit yabi lagaikharek nogo? 32Lego. Inendawimo ebeti logolik, yabugun elo'lego, iluk anggugu halok, it selei mene omanogo oan yatma nen wagu kwelek he, weim yabugun lego, iluk, ninom lambuluogen he, onggo nena mene wokhisogoin, iluk yonggo lakfisikherek anggigi. 33Andi hak he, hit ekhe hinagarek yi mene ti mene hebisigi'lek logolik an nagoromi asuogeluk nawe a'ma kugun elo'lego,” iluk yagaisasikhe.

”Mayu aik lek aga halok herakfisagarek,” iluk yagaisasikhe wene

(Mat. 5:13; Mrk. 9:50)

34A'nogo yagaisasikhesik he, ekhe mel yagaisasikhe: ”Mayu andi fano o. Meneat he, aik lek aga halok he, nena meneba aik weregerasugun. 35Lego. Mayu aik lek mene andi re, awi yagoma figik, kweang muli asuageluk yabu esap watik, ugun mondok legen he, hugisagarego, iluk yagahisigi mene andi hinesanggo holugun halok, fanorogo holini o,” iluk yagaisasikhe.

Currently Selected:

LUKAS 14: inohap

Highlight

Copy