YOHANES 10

Domba kwalogo welagaikharek wene

1At Yesus nen wene a'nogo yagaisasikhesik he, hobuk ekhe mel yagaisasikhe, ”An nen wene ekhe eberogoat yagahisago. Ap sa nen domba enggi abisak wanigeluk ebe lalma kwigeluk he, kwe ebekwe kwigi'lek obakhe talogo kwikhe halok he, at andi yogot enggi abisak wanherek mene aro. 2Nen, ap sa nen, kwe ebekwe kwikhe halok he, at andi domba eisewerek logolik kwalogo welagarek mene aro. 3At domba eisewerek logolik kwalogo welagarek mene andi ebe wagu halok, at ekhe domba awi kweba kagalek welagarek mene nen kwe huthugunem, at eisewerek mene a'nogo nen ane fakhugunem, it domba omanogo nen at ane inesanggo holharek andi nen he, inenu lombok wolisaluk, woginarek enda'ma wulifarego. 4Woginarek wulifaresik, at ebe tak lagu kwelek he, anggo domba omanogo at ane inelure'ma andi nen he, ombo'neat lagaikharego. 5A'nogo fano lagaikharek meneat he, it ap ekhe mene nen inane ugunem it domba omanogo nen it inane inonggot andi nen he, inombo'ne lagi'lek heise lagaikharego,” iluk 6at Yesus nen, wene andi oba lirogo it yagaisasikhe meneat he, wene ki mene faget ikhe heat, futfigi'legat welagaukwa.

At Yesus nen, ”Domba eisewerek logolik, kwalogo welagirek mene, nebe anaro,” iluk yagaisasikhe wene

7A'nogo futfigi'lek werek kwelek, hobuk at Yesus nen he, mel yagaisasikhe: ”Wene eberogoat ekhe yagahisak. Wene domba andi inanggwe re, an nebe aro. 8An wagi'lek oan werek kwelek, it afuni ekhe attak wagaukwa andi re, it inebe mondogat domba yogot wanhik, hinatik, agarek mene wagaukwa andi nen he, it domba nen, it inane inesanggo holhi'lek welagaukwa. 9Kwe re, An nebe aro. Ap sa nen, An nebeba kwikhe halok, ebe tegelek fano mondok logolik, wulifik kwigik ikhi logolik he, engga fano mene nek ninggi logogin o. 10Nen, it ap yogot wanharek mene wagaikharek andi, domba yogothinatik, inoatik, inebe mondok legetfisigik, hilingisuogeluk wagaikharek meneat he An wagagi andi nek he, it afuni yi mene ti mene hokhorogo oba heilarogo welagaikharek andi hak, inebe ineluk mondok logouwageluk inelugerinafunem, ebe mene oba heilarogo logouwageluk wagagi o.

11 Domba eisewerek logolik kwalogo welagirek mene, nobabut fano re, An nebe aro. Domba eisewerek fano mene andi re, anggo domba elelerogo wa'lasigin iluk endawimo anggikherek. 12At a'nogo anggikherek meneat he, ap ekhe domba eisewerek mene lek. At anggo fugat. At we onggo wogosuageluk kwalogo were'ma mene olomene wagunem eilenggen yet haluk, domba herakfisaluk heise lagare'ma re, mene olomene a'nogo nen wam omanogo aigen halmagethigik woginabigeluk mugusogo-magaisogo pugulogo wulak fisikherek. 13At andi onggo wogosuageluk domba kwalogo welagarek andi nen he, domba omanogo endawi legengge herakfisaluk heise lagarek andi o. 14-15Domba kwalogo welagirek mene nobabut fano re, nebe Anaro. Neisena nen An elu, An nen at nelu welagorek andi hak, An nen nanggo domba nelu, nen iren an inelu welagorego. A'nogo logolik, An nanggo domba elelerogo wa'lasigiluk welagi.#Mat. 11:27; Luk. 10:22 16Nen, An nanggo domba ebe lalma yoma nek werek fuk. O ekhema-ekhema werek aro. Nanggo andoma mene nane inesanggo holuageluk woginarek wesigelugat welagi o. Fisa wesumo, it An nanggo domba yonggo palek misikwe nikhi logogun. A'nogo nugu kwelek, An nalegaren kwelaginarek logogin o. 17An wa'lagunem nambotkwe neluk asigeluk nebe wa'lasigin anggigirek andi nen he, Neisena nen An endawinggen hundik welagarego. 18An nen wa'lasigin anggigi le'maat, it afuni ekhe nen obakheba noasumo elo'lego. We, An nonggwarek nendawimo nenat, nebe wa'lasigin anggagain obaat wa'lasigin o. Wa'lasumo, hobuk nambotkwe neluk asigin andi nonggwarek nendawimo nen anggagain oba aro. A'nogo hilingisuageluk neisena nen laknobagai wagaikhe meneat hilingisigin o, iluk eberogoat yagahisigi,” iluk yagaisasikhe.

19Wene a'nogo yagaisasikhe andi nen, it ap Yahudi mene inane hokhorogo sagalhukwasik inebe minggilhukwa. 20A'nogo minggilhukwasik, it inebe hokhorogoat omanogo nen he, mel isukwa: ”At yi munggwarengge obabut weak mene endawimo kwikhesik lugulugwi palik agasik wene ugu kwelegat he, hit at ane holhi lagep andi nenahalok,” iluk isukwa. 21A'nogo isukwa meneat he, it fena nen he, mel isukwa: ”Lego. Afuni munggwarengge obabut weak mene inendawimo kuluk he wene a'nogo agarek lego. Munggwarengge obabut weak mene nen ineilenggen mum mene elok fano higirinabu hak anggegep? Mondok elo'lego,” iluk isukwa.

It ap kaindek Yahudi mene nen Yesus ebe wasuogeluk weim abok hobuk isukwa wene

22A'nogo isukwasik oba nen, it afuni Yahudi mene inendawimo nen he, ”O Yerusalem Allah awi wurik mene hobuk fanorogo tegelhugu a'nogo,” iluk inendawimo eberek logolik seni isatarek oba arat horogasi wagaikhe. O andem sambul he salim welagaikhe. 23A'nogo werek kwelek, at Yesus Allah awi wuri'mo solombon kwe enu Salomo asolombon kwe nugunem. 24It ap kaindek Yahudi mene era'lu andogosi wagaukwasik he, mel yagatukwa: ”Ninendawinggen firik werek kwelek herakninobagakhi lagen yi, ninendawinggen siokhogo, huli ninenggi kiba nen yaganisagain. Allah nen Kristus ayonggo fuluk lakfei wesigin isikhe a'nogo hebe harat halok he, fakhogoat yaganisan o,” iluk yagati lagaukwama, 25At Yesus nen he, mel yagaisasikhe: ”An arat yagahisikhi lagi meneat he, hiren eberogoat iluk anggikhi lagep lego. An neisena nen nayonggo fesikhemo hilingiti lagi andi, an nabok fakhogo yagahisa hagat hilingiti lagi meneat he, 26hit hinebe an nanggo domba fuk, hunogoat andi nen he, nebe futnobagakhi lagep lek andi o. 27Hit hinendawimo a'nogo anggikhi lagep meneat he, it ekhe an nanggo domba mene halok, nane inesanggo holharesik, iren an nebe inelu a'nogo nen he, nombo'ne wagaikharego. 28Nombo'ne nugu kwelek, it ineluk mondok logouwageluk inelugerinafi logogin andi nen he, it inebe wa'lasimbik nong asugun lego. It an nenggiba werek kwelek, it ap ekhe nen telogo woginabumo elo'lego. 29Ap ekhe elo'lek meneat he, An Neisena nen nanggo domba wo'netikhe mene andi nek he, ebe omame werego. It an Neisena nen wo'netikhe mene andi, at enggiba were'ma it ap ekhe nen telogo woginabumo elo'lego. 30”Neisena nemberek ninebe re, misigaro,” iluk yagaisikhi lagaikhemo,

31it ap kaindek Yahudi mene nen he, helep inenggim wanhukwasik Yesus ebe mondok wasuogeluk isukwa. 32A'nogo hilingiti lagaukwama, at Yesus nen he, mel yagaisasikhe: ”An Neisena nen fano mene hokhorogoat hilingisuageluk nayonggo fesikhe mene hilingitunem, hineilenggen niikhi lagep andoma mondogat he, ekhe ki mene weak hilingitiba nen nebe noasuogeluk ikhi lagep,” iluk yagaisikhi lagaikhemo, 33iren he, mel yagatukwa: ”Hat fano hilingiti lagen andiba helep oba hoasuogeluk ikhi lago fuk. We, hat hebe afuni meneat he, Allah enu weagerogo, mel ikhi lagen: An Allah nemberek higit, iluk ikhi lagen andi nenat hoasuogeluk ikhi lago,” iluk yagati lagaukwama,#Im. 24:16 34At Yesus nen he, mel yagaisasikhe: ”Wene Allah nen komotninafikhe wene a'nogoba ikhi logolik he, ”Hit hinebe Allah hak welagep,” iluk lisu palogo fesukwama werek a'nogo lega?#Mzm. 82:6 35Wene Allah aneba lisu palek welagarek andi mondogat he, ekhe tagan ikherek lek anggigi. Andi nen he, irat ane yagaisasikhe mene faget, Hinebe allah aro, iluk isikhemo lisu palek werek kwelegat, 36An nen he, Nebe Allah amlogo, igi andi nen, Allah enu weagete, iluk nenahalok ikhi lagep? Allah nenat nayonggo fuluk eberogoat nebe wenagaisogo kweangma yoma laknobagai wagaikhe meneat he, nenahalok ikhi lagep. 37An Neisena nen he, yi'nogo hilingiti logoin o, iluk nayonggo fuluk laknobagai wagaikhe mene, ebe hilingiti'lek logoilema re, hiren nebe futnobagaluk hinendawinggen noba himbiret fogoin elo'lego. 38Meneat he, an nen hilingitu kwelegat, hit eberogoat iluk hinendawinggen an noba himbiret fou hinabit andi o. A'nogo hilingiti lagi mene andi eberogoat iluk futfeni o,” iluk a'nogo yagaisikhi lagaikhemo, 39iren he, at Yesus ebe fakfouwogeluk isukwa meneat he, inenggi nen hap waregengge lagaikhe.

Yesus i Yordan aik eliba ambotkwe wulifikhe wene

40Yesus a'nogo lagaikhesik, hobuk ambotkwe i Yordan aik elikwe at Yohanes nen attagat afuni ima pelaginafi lagaikheba andoma wulifikhesik welagaikhe.#Yoh. 1:28 41Andoma were'ma, afuni hokhorogoat at oba wagaukwasik he, mel isukwa: ”At Yohanes nen elalin mene ekhe hilingiti lagaikhe mondok lek meneat he, aren ap yi abok ikhi lagaikhe a'nogo ane higit aga o,” iluk isukwasik he, 42it afuni andoma welagaukwa mene inebe hokhorogoat inendawinggen Yesus oba eberogoat himbiret fesukwa.

Currently Selected:

YOHANES 10: inohap

Highlight

Copy