AEMAWIRISAS 16

Timotius e Paulusin Silas ajamkawief

1Barewen. Paulus, kota Derbeam, kota Listraam, ajaremefen. Erasan ara, Yesus mamkawi ipic juwas Timotius aemapefen. Arosowocam, Yesus basicim Yahudi cowoc arawen. Aricipic nat, Yunani ipic arawen. 2E Listrain Ikonium Yesus mamkawi ow, e Timotius, jipic akat, inim atakam atawfesen. 3Paulus e Timotius batew akat aeefen. E nat, Timotius aricipic Yunani ipic arawen. E capinmi Yahudi ow inimas amsomen. Paulus e ow inimas amsom aporefen. Inimas ar e Timotius sunat aetiwefen. 4Bare, ar e kotain kotain ajisosfes, ar e Yerusalem atakam botaw batewosom owam, ketua owam, e aamsakamfes atakam, e ow aotawfesen. Ar e ow, e aamsakamfes atakam ji bwe aotawfesen. 5Inimas ara, e Yesus basicim barewsi ow, basicim fak aemfesen. E owam join join kayimin akakayiemfesen.

Paulus Troas aemapef, ar pok cowok desen aporef

6-7Barewen. Roh Kudus e Paulusin Silas e atakam Asia capinmi ow botaw acuw aatefen. Inimas ara, Frigia capinmi bip ajiwar ajaremfes, wunam Bitinia capinmi bafiw aemfesen. Yesus Roh nat, ar e Bitinia capinmi bafiw arapoken. 8Bare, ar Misia capinmi aofefes, wunam kota Troas ajaremfesen. 9Iram ara, Paulus pok cowok desen aporefen. E aporefas, bare, Makedonia capinmi ipic cowok aememef, wunam janim Paulus fak aanimefen. “Makedonia mamjinawey. Tolong mamemcarowey.” Inim aeefen. 10Paulus inim pok cowok desen aporef masirin, dar Makedonia bajir sarim cowok aemporfom. Daram, “Allah, dar, e Atakam Akat, e ow bacacapiom, inim aeremtewmarow.” Inim aefom.

11Bare. Dar Troas ewnajuwfom, wunam wow juwas Samotrake emtow cowok aimirfom. Ajofay masirin, dar kota Neapolis asetayfom. 12Neapolis setayfom masirin, Filipi ajisosfom. Filipi, e Makedonia capinmi wun asan, kota awut arawen. E kota, Roma pemerintah aras arawen. Daram erasan bar mamincop aemapfom. 13Ses Ban Jo ara, dar e kota fumi pagar jimasap afisfom, wunam e iwnim aneyfom. “Erasan janim Allah manim barewsiap asan ara openow.” Inim aefom. Bare, daram erasan cenes aneyapfom, wunam atakam e ajarewsiapfes cepes aotawfom. 14Erasan ara, kota Tiatira cowoc juwas Lidia, daratakam jen ajief. E cowoc, picin esakam juw buwumtaw cowoc ara. Aram Allah basicim cowoc ara. Bare, Tuhan, Paulus atakam ji bwe, bi binip e cowoc atetamef. 15Ow masirin, e cowocam, acem owam, bwi abwimfes. Ar masirin, atakam aotawforow. “Car dor Tuhan mamkawi cowoc apormenokomnew, caram dey. E docem isi pwisitey.” Inim atakam fak aotawforow.

Paulusam, Silasam, Filipi penjara cem aman aemapfes

16Bare. Jofay ara, dar janim Allah manim asan ajisosfom, wunam kerja bwemtam cowoc biamnuk aemamtewfom. E cowoc jak aman, dat arawen. E dat, e asep jofay aenawcowas, atakam e cowoc aotawa ajiawirien. E cowoc masirin, e atakam kawey ow aotawa ajiawirien. E ow masirin, uang awut, e cowoc aramat ow atetama ajiawirisen. 17E cowoc e Paulusam, daram, fa asoromomatforow. Aram atakam afakaytawa aeef. “Awamces ow, e opnakut Allah akerja bwemtam ow ara. Ar e bajortew atakam car aotawman.” Inim aea aeef. 18Ar inimas bar arke aeef. Inimas ara, Paulus jak pwicak aememef, wunam bin afirief. Aram atakam e cowoc jak aman dat aotawef. “Dor Yesus Kristus juwas ajitewmin. Inimas or e cowoc jak aman bafis, jirmec ajirimamin.” Inim aeef. Bare, e dat asarimfisef. 19Inimas ara, e cowocaramat ow, e uang awut bokakayim opok aporfes. Ar masirin, e Paulusin Silas ban akimomfes, wunam e kota ow barewsi asan ajijimocenfes. Ar ow e pemerintah ow bipu ajijimocenfes. 20Ar e ipic jamnuk, e pemerintah kepala ow bipu atewfes, wunam atakam aotawfes. “A ipic jamnuk, Yahudi ow ara. Aram e dakota acucumames. 21Aram e apok cey, atakam atawmes. Dar ara nat, Roma ow ara. E pok cey dajirmec aopowma. Inimas dar e pok cey bwemtewet asan opok.” Inim aefes. 22Bare, e ow arke, e Paulusin Silas bajurusum aememfes. E pemerintah kepala ow, e ipic jamnuk apakaian, acirkomtewfes, wunam ow, e ipic jamnuk, os omop baf, jirmec ajirimfes. 23Ar omop awut aaffes, wunam penjara cem aman afimimfes. Aram e penjara cem manmok batiw ipic, e ipic jamnuk, manmok fak batiw, jirmec ajirimfes. 24E cem manmok batiw ipic inim jirmec jen ajief masirin, ar e jipic jamnuk, e penjara cem e amannak kamar aofimimef. Aram abwey, os awut wowoc, manam ajikapomef.

25Iramnak ara, Paulusin Silas, janim Allah aanimfes. Aram Allah basicim so aefes. E penjara cem aman aemapfes ow, inimas jen ajifes. 26Bare, ajow awutnakut asarimsimef. E penjara cem fasisam awawarifes. E jimasapam takas arma amuemtotoref. E ow manam ajikapomfes rantai takas arma asuruneyfes. 27Bare, e penjara cem manmok batiw ipic ajitef. Ar e cem jimasap takas arma amuemtotoref aporef, wunam aparang asumtewef. Aram arma boromsimames aememef. E penjara cem aman ow takas emcajisosfes inim arawen. 28Paulus nat, atakam awut aotawef. “Orma boromsimames arapok. Dar takas arasan awamcom ara.” 29Bare, e penjara manmok batiw ipic, sos pok bamotomom ajateef, wunam e amannak kamar asarimfiwef. Aram omar dam tetete aeef. Aram Paulusin Silas bipu jine onok aotapef. 30Ar masirin, e ipic jamnuk, cesen ametomisef, wunam atakam aotawef. “Awamcokom tuan jamnuka. Do bajorem akat ara. Do nat, ucim pok emcey?” Inim aeef. 31E ow masirin, “Or Yesus Kristus basicimey. Inimas oram, ocem owam, ajoremcomokom.” Inim aefes. 32Ar masirin, e Tuhan atakam, aramat ipicam, acem ow takasam, aotawfes. 33Iram ara masirin, aramat ipic, e ipic jamnuk atewef, wunam adoso takas bwi acicikimkurumef. E iramam ara, ow, aramat ipicam, acem owam, bwi abwimfes. 34Aramat ipicam, e ipic jamnuk, acem atowomiwef, wunam amos atetamef. Aramat ipicam, acem ow takasam, jak akatnakut aememfes. Ar Allah asicimfes aporfes ara.

35Bare. Jo apuef ara, e pemerintah kepala ow, apolisi ow atewosomfes. Aram atakam aotawfes. “E ipic jamnuk mamsurumey.” Inim aefes. 36E penjara manmok batiw ipic masirin, inim atakam Paulus aotawef. “E pemerintah kepala ow, car basurum, jirmec ajirimeres. Bare caram bafisey. Jein tosey.” Inim aeef. 37Paulus nat, atakam e ow aotawef. “Dar Roma ow ara. E ow nat, ar dar boworpor opok aemfes, wunam ar ow arke bipu, omop aafforowos. Aram penjara cem aman ajiwimforowos. Wow masirin, ar curuw da batewosom atakam atawmes. Bare, opok cowok. Aram baenawces, wunam arma dar bafimisimcarowos.” Inim aeef. 38E polisi ow masirin, inim atakam, e pemerintah kepala ow aotawfes. E owam, ‘E Paulusin Silas, Roma ow ara,’ inim atakam jen ajifes, aram omar aefes. 39Ar masirin, e ipic jamnuk bipu aenawfes. Aram atakam aotawfes. “Dormomo. E car aemfenomas, bare pwicak ara.” Inim aefes. Aram e ipic jamnuk cesen atowomisfes. “Ca bare. Baysoseyo.” Inim janim fak aanimfesen. 40Bare, ar e penjara cem afisfes, wunam Lidia cem aofiwfes. Ar e Yesus mamkawi ow biamnuk aemamtewfes. Aram e ow jak fak memem atjen aowfes, wunam ajisosfes.

Currently Selected:

AEMAWIRISAS 16: LAICNS

Highlight

Copy