MATIUS 16

Snon Farisi ma Saduki ono sor aḇyair

16:1-4

(Mrk. 8:11-13)

1 # Mat. 12:38; Luk. 11:16 Ḇarpur ya snon Farisi ma Saduki ono srama simarisen sifuken sye Yesus. Sor insa Yesus fyasnai faro si aḇyair oso ro boiyaswa. 2#Luk. 12:54-56 Ḇape Yesus kyarem faro si: “Ro mandira snar rep na narik, inja mkoḇo: Ras ya nari iḇrin, 3ma ro arwo babo snar rep na narik ma nkadum, inja mkoḇo nari rasya ipyum ba. Sananai nanki mkofawi mkomambir na ḇape aḇyair awar mkofawi na ḇa. 4#Mat. 12:39; Luk. 11:29 Syos ḇeḇarḇor ma ḇeso mnisḇa sine senamu sor aḇyair oso. Ḇape faro si nari koḇuk aḇyair oso ḇa derer aḇyair Nabi Yunus.” Raimnai Yesus ibur si.

Ro mur Farisi ma Saduki

16:5-12

(Mrk. 8:14-21)

5Rofyor Yesus manfamyan ḇyesi skaḇoruk danosen, sfanander sun mamami. 6#Luk. 12:1 Yesus ikofen faro si: “Mkepen ma mkoḇesasor mko ro mur Farisi ma Saduki.”

7Ma skara ro mankunsi ma sikofenyae faro si: “Ikofen rarirya snar kun mamami ḇa.”

8Ma ro fafisu Yesus ifawi rosai ḇefnai fa sawosyae si, inja ikofen: “Snaro mkawawos ro mkun mamami ḇa? 9#Mat. 14:17-21 Ne, snonkaku ḇekyar mnis ḇa! Mkofawi ḇaimke? Mkoswarepen ḇake mamami ririm faro snonkaku syaran ririm ma mkoryur bedawer na noken ri ḇeso? 10#Mat. 15:34-38 Roḇaido mamami rifik faro snon syaran rifiak ma bedawer na mkoryur na ro inoken ri ḇeso? 11Rariso mkofawiḇa ḇo mkoḇo yawos ro mamami, mamami naiso yakofen na ḇa. Yakofen faro mko: Mkoḇesasor ma mkepen mko ro mur kawasa Farisi ma Saduki.”

12Ro fafisu ya insape sifawi Yesus dawos insa sepen si ro mur mamami ḇa, ḇoi ro farkarkor snon Farisi ma Saduki.

Petrus kankarem ḇyedi

16:13-20

(Mrk. 8:27-30; Luk. 9:18-21)

13Yesus ryama kwar ro Kaisarea Filipi, ifuken faro manfamyan ḇyesi: “Kawasa sya soḇo, manseiso Rumkun Snonkaku ya?”

14 # Mat. 14:1-2; Mrk. 6:14-15; Luk. 9:7-8 Skarem, ḇo soḇo: “Ono sikofen: Yohanes Ḇemasi, ono wer sikofen: Elia ma ono kako sikofen: Yermia roḇaido oso ro fandu nabisya.”

15Raimnai Yesus ifuken faro si: “Ḇape mko kada rosai mkakkofen, manseiso aya?”

16 # Yoh. 6:68-69 Inja Simon Petrus kyarem, ḇo doḇo: “Au kada Wairek Rumkun Allah ḇekenem!”

17Yesus ikofen faro i: “Aski faro au Simon Yunus mandaḇen ḇyedi snar snonkaku riso ḇekofen ḇadir faro au ya ḇa, ḇoi Kma yedi ro boiyaswa. 18Ma aya kako yakofen faro au: Au irya Petrus ma ro karui orḇom ine nari yaḇawes jemaat ayedi ma mun aibui ipok i ḇa. 19#Mat. 18:18; Yoh. 20:23 Faro au nari yaḇuk asyopder ḇaḇesasoser Boiyaswa. Rosai fes ro supswan ine nari neḇefes ro boiyas ma rosai per ro supswan ine nari neḇeper ro boiyaswa.”

20Raimnai Yesus myunwark manfamyan ḇyesi insa sikofen ḇayir awer faro manseirya wer mḇoi irya Wairek.

Yesus ḇyaryas randak kandera ma marmar ḇyedi

16:21-28

(Mrk. 8:31–9:1; Luk. 9:22-27)

21Rofyor ani Yesus ikofen ḇayir randak faro manfamyan ḇyesi nari ryaḇe Yerusalem ma ro diwa isma kandera nabor ro ḇeḇarara, mananir imam ma ḇefawi nananem Refo Yahudisya, isof smun i ḇape nari ḇyeḇeḇawes ro ras ḇeḇekior ya.

22Ḇape Petrus pyaw Yesus fa isoi ma isonek i, ḇo doḇo: “Manseren, Allah myam monda awer roi ḇera dine! Roi ḇeḇesya ani ipok kyur awer au.”

23Inja Yesus iknenef ma ikofen faro Petrus: “Biris wabur. Au karui ḇekarkar aya, snar kwara karkara Allah ḇyena ḇa, ḇoi karkara snonkaku.”

24 # Mat. 10:38; Luk. 14:27 Raimnai Yesus ikofen faro manfamyan ḇyesi: “Mansei ḇemarisen ḇeso aya, fyamyun mankundi, ḇoi ḇyar aprop ḇyedi ma iso aya. 25#Mat. 10:39; Luk. 17:33; Yoh. 12:25 Snar mansei ḇeḇekuker kankenem ḇyedi, ikada nari kankenem ḇyedi ryo bur i; ḇape mansei kankenem ḇyedi ryobur i snar aya, ikada nari ismai kankenem ḇyedi. 26Fandun rosai snonkaku oso isma supswan ine ḇesiper ḇape kankenem ḇyedi ryobur i? Inja rosai nari koḇuki syadweri ya?

27 # Mzm. 62:13; Mat. 25:31; Rm. 2:6 Snar Rumkun Snonkaku nari ryama kuker payamyum Kmari ma malaikat-malaikat ḇyesi siyaker i; rofyor ani nari myunsu faro snonkaku oser-oser raris rosai ifrur kwar. 28Yakofen faro mko: Kaku ḇeri ro fandu snonkaku ḇeryur sine ono nari simar ḇa isof sakmam Rumkun Snonkaku ryama raris wairek ro Ḇaḇesasoser ḇyedi.”

Currently Selected:

MATIUS 16: LAIBHW

Highlight

Copy