Salmos 143
143
1Ruzë́ naguʼ le rulidzaʼ Liʼ, Xan.
Ruzë́ naguʼ le rinabi yúdxidaʼ Liʼ.
Tuʼ runuʼ ca rnna didzaʼ bëʼu, en nacuʼ tsahuiʼ gunníuʼ
2bitiʼ ichëʼu nedaʼ loʼ ga uchiʼa usörö́uʼ quiaʼ, huen dxin quiuʼ.
Cuntu nu zoa naca tsahuiʼ loʼ Liʼ.
3Nu bitiʼ riléʼe nedaʼ dxiʼa zoa reguʼ böʼ naca cazaʼ.
Nuzötjëʼ yöl-laʼ naʼbán quiaʼ lu yu.
Benëʼ ga zoaʼ lataj naca chul-la ca raca quégaca nupa gulati dza niʼte.
4Que lë ni naʼ rudú ládxaʼa, en röʼa böniga.
5Röjnedaʼ dza chigulaʼdödi.
Rizáʼ ládxaʼa ca nácagaca le benuʼ Liʼ.
Ribequi icjaʼ ca nácagaca le nun noʼo.
6Richisa naʼa zacaʼ ga zuʼ Liʼ.
Rizë́ ládxaʼa Liʼ ca tu luyú bidxi rizë́ ladxiʼ nisa guiö́j.
7Bubíʼitë didzaʼ, Xan, tuʼ rudú ládxaʼa.
Bitiʼ ucachiʼ loʼ lahuaʼ nedaʼ,
para cabí gacaʼ ca tu bönniʼ ruʼë lataj chul-la ga nacuáʼ nupa nátigaca.
8Ben ga yöndaʼ yuguʼ zila ca naca yöl-laʼ dxiʼi ladxiʼ quiuʼ,
tuʼ ruzxöni ládxaʼa Liʼ.
Busëdi nedaʼ ca ral-laʼ gunaʼ,
tuʼ ruchisaʼ loʼ Liʼ böʼ naca cazaʼ.
9Busölá nedaʼ, Xan, lu náʼagaca nupa bitiʼ taʼléʼe nedaʼ dxiʼa.
Nacuʼ Nu ruzóa nedaʼ tsutsu.
10Busedi nedaʼ para gunaʼ ca rë́ʼënuʼ Liʼ,
tuʼ naca cazuʼ Liʼ Dios quiaʼ.
Bëʼ lataj ichë́ʼ Böʼ Láʼayi quiuʼ nedaʼ lu nöza tsahuiʼ.
11Butipa ládxaʼa, Xan, para gaca yöl-laʼ ba que Loʼ.
Tuʼ nacuʼ tsahuiʼ busölá nedaʼ lu le raca quiaʼ.
12Lu yöl-laʼ dxiʼi ladxiʼ quiuʼ guchugu quégaca nupa bitiʼ taʼléʼe nedaʼ dxiʼa.
Busuniti yúguʼtë nupa tuʼsacaʼ ziʼ böʼ naca cazaʼ,
tuʼ nacaʼ huen dxin quiuʼ.
Currently Selected:
Salmos 143: zar
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
